Ҳужжат кучини йўқотган " " 22.02.2021
Ҳужжат 02.09.2002 00 санаси ҳолатига
Амалдаги версияга ўтиш
Ўзбекистон Республикаси Вазирлар Маҳкамасининг
қарори
ЎЗБЕКИСТОН РЕСПУБЛИКАСИДА МЕҲМОНХОНА БИЗНЕСИ ВА ХАЛҚАРО ТУРИЗМНИ ЯНАДА РИВОЖЛАНТИРИШ ЧОРА-ТАДБИРЛАРИ ТЎҒРИСИДА
 LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Тошкент шаҳри меҳмонхоналарини 2003 йилда Европа тикланиш ва тараққиёт банки Бошқарувчилар Кенгашининг йиллик мажлиси қатнашчиларини қабул қилишга тайёрлаш, шунингдек халқаро туризмни янада ривожлантириш, меҳмонхона соҳасига хорижий инвестицияларни кенг жалб этиш мақсадида Вазирлар Маҳкамаси қарор қилади:
1. Тошкент шаҳар ҳокимлиги, «Ўзбектуризм» компанияси ва Ўзбекистон Республикаси Давлат мулки қўмитасининг:
Тошкент шаҳридаги «Дўстлик», «Тошкент», «Россия» ва «Чорсу» меҳмонхона комплекслари, шунингдек Амир Темур кўчасидаги қурилиши тугалланмаган объект негизида меҳмонхоналарни реконструкция қилиш, қуриш ва бундан буён фойдаланиш бўйича қўшма корхоналар ташкил этиш тўғрисидаги таклифларига розилик берилсин. Хорижий шериклар ушбу қўшма корхоналарнинг устав фондларига ўз улушларини хорижий ва миллий валюталардаги пул маблағлари билан қўшадилар;
«Ўзбекистон» меҳмонхона комплексини реконструкция қилиш лойиҳасининг якунловчи босқичини амалга ошириш тўғрисидаги таклифларига розилик берилсин.
2. Тошкент шаҳар ҳокимлиги ва «Ўзбектуризм» компанияси бир ой муддатда кўрсатиб ўтилган меҳмонхоналарни реконструкция қилиш, қуриш ва улардан фойдаланиш бўйича қўшма корхоналарнинг лойиҳалари техник-иқтисодий асосланишини ишлаб чиқсинлар ва белгиланган тартибда тасдиқласинлар.
3. Белгилансинки, лойиҳалар техник-иқтисодий асослашда назарда тутилган манбаларга мувофиқ:
реконструкция қилиш ва қуриш тугаллангандан кейин кейинчалик меҳмонхоналар биноларини банкка гаровга қўйган ҳолда янгидан ташкил этилган қўшма корхоналар ва уларнинг муассисларининг ликвидли мол-мулкини гаровга қўйиш билан;
маблағ билан таъминловчи банкларнинг хорижий банклар олдидаги кафиллиги ва кафолати остида маблағ билан таъминланади:
4. Ўзбекистон Республикаси Ташқи иқтисодий фаолият миллий банки, «Ўзсаноатқурилишбанк», «Асака» банки лойиҳаларнинг техник-иқтисодий асосланиши экспертизаси натижалари бўйича хорижий банклар билан белгиланган тартибда кредит битимлари тузсинлар ва маблағ билан таъминлашни ўз маблағлари ҳисобига ёки хорижий банкларнинг маблағларини кўрсатиб ўтилган меҳмонхоналарни реконструкция қилиш ва қуришга қайта молиялаш йўли билан таъминласинлар.
5. Мазкур қарорга мувофиқ янгидан ташкил этилаётган қўшма корхоналарга меҳмонхоналарни реконструкция қилиш ва қуришни 2003 йил 1 январгача лойиҳалаштириш ва лойиҳа-смета ҳужжатлари тасдиқланиши билан бир вақтда ишчи чизмалар бўйича амалга оширишга, истисно тариқасида, рухсат берилсин.
6. Ўзбекистон Республикаси Давлат мулки қўмитаси Тошкент шаҳар ҳокимлиги ва «Ўзбектуризм» компаниясига меҳмонхона комплексларининг мол-мулкини устав фондига улуш сифатида фойдаланиш учун қўшма корхоналарга бериш ҳуқуқини берсин, шунингдек гаров шартномаларини (ипотека) расмийлаштириш учун тегишли рухсатномалар берилишини назарда тутсин.
7. Ўзбекистон Республикаси Адлия вазирлиги Тошкент шаҳар ҳокимлиги ва «Ўзбектуризм» компаниясининг гаров мол-мулки давлат пошлиналари ундирилмасдан қўшилиши тўғрисидаги шартномалар нотариал тасдиқланишини таъминласин.
8. Тошкент шаҳар ҳокимлиги ва «Ўзбектуризм» компанияси уч ой муддатда қўшма корхоналарнинг хорижий муассислари билан биргаликда менежментни амалга оширишга ва меҳмонхоналарни бошқаришга биринчи даражали хорижий компанияларни танлов асосида жалб этсинлар.
9. Янгидан ташкил этилаётган қўшма корхоналар ва «Отель Ўзбекистон» қўшма корхонаси:
реконструкция қилиш ва қуриш даврида фойдаланишга тайёр ҳолда қуриш учун тузилган контрактлар доирасида меҳмонхоналарни реконструкция қилиш ва қуриш учун олиб келинадиган материаллар ва асбоб-ускуналарга божхона тўловлари тўлашдан (божхона расмийлаштируви йиғимлари бундан мустасно);
кредитларни қайтариш даврида, бироқ кредит шартномаларида белгиланган муддатлардан ортиқ бўлмаган даврда, даромад (фойда)дан олинадиган солиқдан, қўшилган қиймат солиғидан, мулк солиғидан, ер солиғидан ва экология солиғидан озод қилинсин, солиқ имтиёзлари берилиши натижасида бўшаб қоладиган маблағлар белгиланган тартибда тўлиқ миқдорда меҳмонхоналарни реконструкция қилиш ва қуриш учун жалб қилинган кредитларни қайтаришга йўналтирилиши назарда тутилсин.
Кейинги таҳрирга қаранг.
10. Мазкур лойиҳаларни маблағ билан таъминлашда қатнашувчи хорижий банклар ва суғурта агентликлари Ўзбекистон Республикаси ҳудудида норезидентлардан ундириладиган даромаддан олинадиган солиқларни тўлашдан озод қилинсин.
11. Ўзбекистон Республикаси Ташқи ишлар вазирлиги Тошкент шаҳар ҳокимлиги ва «Ўзбектуризм» компаниясининг буюртманомалари бўйича меҳмонхоналарни реконструкция қилиш, қуриш, улардан фойдаланиш ва уларни бошқариш учун жалб этилаётган хорижий мутахассисларга меҳнат фаолияти билан шуғулланиш ҳуқуқини берувчи кўпмартали кириш визалари консуллик йиғимлари ундирилмасдан берилишини таъминласин.
12. Ўзбекистон Республикаси Ички ишлар вазирлиги Тошкент шаҳар ҳокимлиги ва «Ўзбектуризм» компаниясининг буюртманомалари бўйича меҳмонхоналарни реконструкция қилиш, қуриш, улардан фойдаланиш ва уларни бошқариш ишларини амалга оширишда қатнашиш учун тузилган муддатли меҳнат контрактлари амал қилиши даврида жалб қилинадиган хорижий мутахассислар ва республиканинг бошқа минтақаларидан жалб этиладиган маҳаллий мутахассис вақтинча рўйхатдан ўтказилишини ва рўйхатдан ўтказиш муддати узайтирилишини таъминласин.
Кейинги таҳрирга қаранг.
13. Ўзбекистон Республикаси Меҳнат ва аҳолини ижтимоий муҳофаза қилиш вазирлиги Тошкент шаҳар ҳокимлиги ва «Ўзбектуризм» компаниясининг буюртманомалари бўйича меҳмонхоналарни реконструкция қилиш, қуриш, улардан фойдаланиш ва уларни бошқариш учун жалб этилаётган хорижий ходимларнинг меҳнат фаолиятини амалга ошириш учун зарур рухсатномалар (лицензиялар) ўз вақтида берилишини таъминласин.
14. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
2002 йил 2 сентябрь,
310-сон