|
Ҳужжат кучини йўқотган " " 22.02.2021
|
Ўзбекистон Республикаси Президенти ҳузуридаги Вазирлар Маҳкамасининг
қарори
ЎЗБЕКИСТОН РЕСПУБЛИКАСИ ЎҚУВ ЮРТЛАРИДА ТАЪЛИМ ОЛАЁТГАН АФFОНИСТОН ИСЛОМ ДАВЛАТИ ФУҚАРОЛАРИ ТЎFРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ўзбекистон Республикаси билан Афғонистон Ислом Давлати раҳбарлари ўртасида бўлиб ўтган расмий учрашув якунларига амал қилган ҳолда, шунингдек, таълим соҳасида дўстона давлатлараро муносабатларни қарор топтириш, хусусан, Афғонистон Ислом Давлатига миллий кадрлар тайёрлашда ёрдам кўрсатиш мақсадида Вазирлар Маҳкамаси қарор қилади:
1. Афғонистон Ислом Давлатининг Ўзбекистон ўқув юртларида шартномасиз таълим олаётган ўқувчиларини 1992/93-ўқув йили охирига қадар, етим болалардан иборат бўлган ўқувчиларни эса муайян касбни эгаллагунга қадар бепул ўқитишга рухсат берилсин.
2. Ўзбекистон Республикаси Олий ва ўрта махсус таълим, Халқ таълими вазирликлари тегишли ўқув юртларида Афғонистон Ислом Давлатидан келган ўқувчиларнинг пухта билим олишлари учун зарур шарт-шароитлар яратиб бериш чораларини кўрсинлар.
Ҳунар-техника билим юртида ва мактаб-интернатда таълим олаётган афғонистонлик етим болаларнинг ўқиши ва яшаши учун сарфланадиган харажатлар Ўзбекистон Республикаси фуқаролари бўлган етим болалар учун белгиланган миқдорга тенглаштирилсин.
3. Ўзбекистон Республикаси Молия вазирлиги ушбу қарорни рўёбга чиқариш учун зарур маблағ ажратсин.
4. Ушбу қарорнинг бажарилишини назорат қилиш Вазирлар Маҳкамасининг ижтимоий масалалар, фан ва таълим мажмуига юклатилсин.
Вазирлар Маҳкамасининг Раиси И. КАРИМОВ
Тошкент ш.,
1992 йил 30 ноябрь,
560-сон
