2017 йил ҳосилини қисқа муддатларда ўз вақтида ва сифатли йиғиб-териб олиш ҳамда фермер хўжаликлари томонидан давлат ресурсларига ғалла сотиш бўйича тузилган шартномаларнинг сўзсиз бажарилишини таъминлаш мақсадида:

1. Қайд этилсинки, 2016 йилда Жиззах, Наманган, Сирдарё ва Фарғона вилоятларининг 16 та туманида якка тартибдаги фермер хўжаликлари томонидан давлат ресурсларига ғалла сотиш бўйича контрактация шартномаларини бажаришда жиддий қоидабузарликларга йўл қўйилган. Юқорида қайд этилган камчиликлар учун 15 нафар мансабдор шахсга нисбатан маъмурий жазо қўлланилган, 700 дан ортиқ фермер хўжалиги шартнома мажбуриятларини бажармаганлиги учун суд тартибида жавобгарликка тортилганлиги маълумот учун қабул қилинсин.

2017 йил ҳосилини ўз вақтида ва сифатли йиғиб-териб олиш ишларини ташкил этиш ва ўтказиш, ғалла ўрим-йиғим машиналаридан самарали фойдаланиш, шунингдек, тузилган контрактация шартномаларини сўзсиз бажариш учун Қорақалпоғистон Республикаси Вазирлар Кенгаши, вилоятлар ҳокимлари, Ўзбекистон Республикаси қишлоқ ва сув хўжалиги вазирлиги «Ўздонмаҳсулот» акциядорлик компанияси ва дон маҳсулотлари корхоналари, «Ўзагросервис» акциядорлик жамияти ва унинг ҳудудий филиаллари раҳбарлари зиммасига юклатилсин.

2. Қуйидагилар Қорақалпоғистон Республикаси Вазирлар Кенгаши, вилоятлар ҳокимлари, Ўзбекистон Республикаси Қишлоқ ва сув хўжалиги вазирлиги, Ўзбекистон фермер хўжаликлари кенгаши, «Ўзагросервис» акциядорлик жамияти ва унинг ҳудудий бўлинмалари, Ўзбекистон автомобил ва дарё транспорти агентлиги, «Ўздонмаҳсулот» акциядорлик жамияти ва дон маҳсулотлари корхоналарининг энг муҳим вазифалари деб ҳисоблансин:

фермер хўжаликлари томонидан давлат ресурсларига ғалла сотиш бўйича тузилган контрактация шартномаларнинг сўзсиз бажарилишини таъминлаш;

ғалла ўрим-йиғим машиналарини, ғалла ташишда фойдаланиладиган барча турдаги автотранспорт воситаларини, шунингдек, ғалла хирмонлари ва платформаларини, ғалла тозалаш машиналарини ва донни бирламчи қайта ишлаш учун бошқа моддий-техник базаларни тайёрлашни жорий йилнинг 22 майига қадар якунлаш бўйича ташкилий-иқтисодий чора-тадбирлар комплексини амалга ошириш;

тайёрлов корхоналари ва фермер хўжаликларидан донни фақат мажбурий дастлабки тозалашдан сўнг, ифлосланиши ва намлиги норматив-ҳуқуқий ҳужжатларда ва стандартлаштириш бўйича норматив ҳужжатларда белгиланган талаблардан ошмайдиган оғишлар билан қабул қилишни ташкил этиш;

Ўзбекистон Республикаси Вазирлар Маҳкамаси ҳузуридаги давлат эҳтиёжлари учун харид қилинадиган қишлоқ хўжалиги маҳсулотлари учун ҳисоб-китоблар жамғармаси билан биргаликда давлат эҳтиёжлари учун харид қилинадиган дон учун фермер хўжаликлари, қишлоқ хўжалиги ишлаб чиқарувчиларидан дон маҳсулотлари корхоналарига дон ташиш бўйича кўрсатилган хизматлар учун транспорт ташкилотлари, машина-трактор парклари ва операторлари, ғалла териш комбайнлари кўрсатилган механизациялашган хизматлар учун меҳнатига ҳақ тўлаш бўйича ўз вақтида ҳисоб-китоблар ўтказиш.

Белгилансинки, донни дон қабул қилиш корхоналарига етказиб бериш учун транспорт харажатлари транспорт ташкилотлари, қишлоқ хўжалиги ишлаб чиқарувчилари ва дон маҳсулотлари ишлаб чиқарувчи корхоналар ўртасида тузилган шартномаларга мувофиқ «Ўздонмаҳсулот» акциядорлик жамияти томонидан тўланади.

3. Шундай тартиб ўрнатилсинки, унга кўра ғалла етиштирувчи фермер хўжаликлари биринчи навбатда давлат эҳтиёжлари учун ғалла сотиш контрактация шартномалари бўйича ўз мажбуриятларини бажаришлари шарт.

Фермер хўжаликлари тузилган контрактация шартномалари бўйича ўз мажбуриятларини бажармаган тақдирда, уларга қонунчилик ҳужжатларида назарда тутилган жавобгарлик чоралари, шу жумладан фермер хўжаликларининг ер участкаларини қайта ташкил этиш ва уларнинг ўлчамларини оптималлаштириш чоралари қўлланилади.

Ўзбекистон Республикаси Бош прокуратураси ва унинг ҳудудий бўлинмалари фермер хўжаликлари томонидан давлат эҳтиёжлари учун ғалла етиштириш ва сотиш контрактация шартномалари бўйича ўз мажбуриятларини сўзсиз бажариши устидан қатъий назорат ўрнатсин.

4. Ўзбекистон Республикаси Қишлоқ ва сув хўжалиги вазирлиги, Қорақалпоғистон Республикаси Вазирлар Кенгаши, вилоятлар ва туманлар ҳокимликлари, «Ўздонмаҳсулот» акциядорлик компанияси ва унинг жойлардаги бўлинмалари раҳбарлари, «Ўзстандарт» агентлиги ва «Ўздавлатнонинспекция» 2018 йил ҳосили учун бошоқли дон экинлари уруғ фондини ўз вақтида ва сифатли ташкил этишни таъминласин.

Давлат ресурсларига буғдой донини сотишнинг умумий ҳажмида уруғлик дон топшириш, шунингдек, буғдой донидан уруғлик мақсадларида фойдаланиш тақиқлансин.

5. «Ўздонмаҳсулот» АК Ўздавлатнонинспекция ва Ўздавзахирақўмитаси билан биргаликда «Ўздонмаҳсулот» АК тизимидаги элеваторлар ва дон қабул қилувчи корхоналарда «нол» тозалаш ишларини амалга оширилишини таъминласин ва жорий йилнинг 15 июнига қадар озиқ-овқат буғдойини инвентаризациядан ўтказиш натижаларини Вазирлар Маҳкамасига тақдим этсин.

6. Ўзбекистон Республикаси Давлат статистика қўмитаси Қишлоқ ва сув хўжалиги вазирлиги, Иқтисодиёт вазирлиги, «Ўздонмаҳсулот» АЖ билан биргаликда ғалла етиштириш ва давлат ресурсларига сотиш ҳажмлари бўйича статистик ҳисоботларнинг тўғрилиги устидан қатъий назорат ўрнатсин. Ҳисобот маълумотларини бузиб кўрсатиш фактлари аниқланса, айбдор шахсларга нисбатан қонунчилик ҳужжатларига мувофиқ жавобгарлик чораларини кўрсин.

7. Ўзбекистон Республикаси Президентининг 1997 йил 10 октябрдаги «Товарлар (ишлар, хизматлар) экспортини рағбатлантиришга доир қўшимча чора-тадбирлар тўғрисида»ги ПФ-1871-сон Фармонига мувофиқ, бошоқли дон, ун ва нон маҳсулотларини республикадан олиб чиқиш тақиқланганлиги раҳбарлик учун қабул қилинсин.

Давлат божхона қўмитаси Ўзбекистон Республикаси Миллий хавфсизлик хизмати Давлат чегарасини ҳимоя қилиш қўмитаси ва Ички ишлар вазирлиги билан биргаликда дон, ун ва нон маҳсулотларини республика чегараси орқали ноқонуний олиб ўтиш ҳолатларининг олдини олиш ва уларга чек қўйиш бўйича қатъий чоралар кўрсин.

8. Ўзбекистон Республикаси Ички ишлар вазирлиги жорий йилнинг 1 июнидан бошлаб Ўзбекистон Республикаси Ички ишлар вазирлиги таълим муассасаларининг 2017 йил ҳосилининг бошоқли дон экинларини йиғиб-териб олишга жалб этилган тингловчилари ва курсантлари контингентини ўз ҳудудий бўлинмалари бўйича тақсимотга мувофиқ ҳудудий ички ишлар бошқармасига юборсин.

«Ўзбекистон темир йўллари» АЖ ва «Тошшаҳартрансхизмат» АЖ Ўзбекистон Республикаси Ички ишлар вазирлигининг талабига биноан тингловчилар ва курсантларни вақтинчалик жойлаштириш жойларига ва йиғим ишлари тугаллангандан сўнг орқага қайтариш учун зарур миқдорда автотранспорт воситалари ажратилишини таъминласин.

Жиззах, Қашқадарё, Сирдарё ва Тошкент вилоятлари ҳокимликлари:

фермер хўжаликлари томонидан «Ўзбекистон темир йўллари» АЖ ва «Тошшаҳартрансхизмат» АЖ билан Ўзбекистон Республикаси Ички ишлар вазирлигининг тингловчилари ва курсантларини ўрим-йиғим-терим ишлари якунланганидан сўнг уларни вақтинча жойлаштириш жойларига ва қайтариб олиб кетиш хизматларини кўрсатиш бўйича тегишли шартномалар тузиш;

тингловчилар ва курсантларни вақтинча турар жой, шунингдек, озиқ-овқат, транспорт ва уларни ташиш учун ёнилғи-мойлаш материалларини фермер хўжаликлари ҳисобидан таъминласин.

9. Қорақалпоғистон Республикаси Вазирлар Кенгаши ва вилоятлар ҳокимликлари Ўзбекистон Республикаси Ички ишлар вазирлиги билан биргаликда дон ва ғалла ўрим-йиғим техникасини ташишда йўл ҳаракати хавфсизлигини таъминлаш, ёнғинлар содир бўлишининг олдини олиш, 2017 йил ҳосилида ғалланинг ўғирланиши ва йўқолишининг олдини олиш бўйича зарур чора-тадбирларни кўрсин.

10. «Ўзбекнефтгаз» миллий холдинг компанияси ва «Ўзнефтмаҳсулот» акциядорлик жамияти қишлоқ хўжалиги ишлаб чиқарувчилари ва транспорт ташкилотларини, машина-трактор паркларини ҳамда ғалла йиғим-терими, ташиш ва тайёрлаш билан шуғулланувчи бошқа ташкилотларни зарур захираларни яратиб, белгиланган тартибда ёқилғи-мойлаш материаллари билан узлуксиз таъминлашни ташкил этсин.

11. Мазкур қарорнинг бажарилишини назорат қилиш Ўзбекистон Республикасининг Бош вазири А.Н. Арипов зиммасига юклатилсин.