Ўзбекистон Республикаси Президентининг «Иқтисодий ривожланиш соҳасида давлат сиёсатини амалга ошириш тизимини тубдан такомиллаштириш чора-тадбирлари тўғрисида» 2019 йил 10 январдаги ПФ-5621-сон ва «Урбанизация жараёнларини тубдан такомиллаштириш чора-тадбирлари тўғрисида» 2019 йил 10 январдаги ПФ-5623-сон Фармонларининг ижросини таъминлаш мақсадида:

2. Ўзбекистон Республикаси иқтисодий тараққиёт ва камбағалликни қисқартириш вазирига:

Ўзбекистон Республикаси Иқтисодий тараққиёт ва камбағалликни қисқартириш вазирлиги марказий аппарати, Қорақалпоғистон Республикаси иқтисодий тараққиёт ва камбағалликни қисқартириш, вилоятлар иқтисодий тараққиёт ва камбағалликни қисқартириш бош бошқармалари, шунингдек идоравий бўйсунувидаги ташкилотлар тузилмасига белгиланган штатлар сони доирасида ўзгартиришлар киритиш;

Ўзбекистон Республикаси Иқтисодий тараққиёт ва камбағалликни қисқартириш вазирлиги марказий аппарати департаментлари тузилмасида 4 та ва ундан ортиқ штат бирлигидан иборат бошқарма (шу жумладан, йиғма) ташкил этиш;

давлат органлари ва бошқа ташкилотлар, етакчи лойиҳа институтлари, илмий ва таълим муассасалари, халқаро ташкилотлар ва хорижий компанияларнинг юқори малакали мутахассисларини, шунингдек экспертларни консультант сифатида жалб қилиш;

малакали хорижий мутахассисларни ишга қабул қилиш ва уларга иш ҳақини миллий валютада ёки хориждаги ҳисобварақларига ўтказган ҳолда чет эл валютасида тўлаш ҳуқуқи берилсин.

4. Шундай тартиб ўрнатилсинки, унга мувофиқ:

устав фондида (капиталида) давлат улуши 50 фоиз ва ундан ортиқ бўлган юридик шахслар, шунингдек устав фондининг (капиталининг) 50 фоизи ва ундан ортиғи 50 фоиз ва ундан ортиқ миқдорда давлат улушига эга юридик шахсга тегишли бўлган юридик шахслар ҳар йили 1 декабрга қадар келгуси йилда жорий хўжалик фаолиятини таъминлаш учун моддий-техник ресурслар рўйхатини (кейинги ўринларда — Рўйхат) шакллантиради ва уларни кузатув кенгашлари розилиги билан давлат харидлари сайтида мажбурий тартибда эълон қилади;

2020 йил 1 январдан бошлаб давлат харидлари тўғрисидаги қонун ҳужжатлари талабларига риоя қилиш ва тегишли товарларнинг нархлари мувофиқлиги учун жавобгарликни бошқарув органларига юклаган ҳолда Рўйхат бўйича (капитал қўйилмалар бундан мустасно) товарлар (ишлар, хизматлар) давлат харидлари бўйича техник топшириқлар, контрактлар ва импорт контрактлари Ўзбекистон Республикаси Иқтисодий тараққиёт ва камбағалликни қисқартириш вазирлиги ҳузуридаги «Лойиҳалар ва импорт контрактларини комплекс экспертиза қилиш маркази» ДУКда (кейинги ўринларда — Марказ) экспертизадан ўтказилмайди;

2019 йил 1 февралдан бошлаб товарлар (ишлар, хизматлар) давлат харидлари бўйича техник топшириқлар нарх кўрсаткичларининг ўртача бозор даражасини ўрганиш натижалари бўйича дастлабки ҳисоб-китоблар асосида шакллантириладиган уларнинг чекланган қийматини белгилаган ҳолда экспертизадан ўтказиш учун Марказга тақдим этилади;

тузилган контрактлар ва импорт контрактларининг техник топшириқларга мувофиқлиги, шунингдек уларнинг бажарилиши учун давлат буюртмачиси жавобгар бўлади;

давлат буюртмачиси контрактларни, импорт контрактларини ихтиёрий равишда шартнома асосида экспертизадан ўтказиш учун Марказга тақдим этиши мумкин;

товарлар (иш ва хизматлар) давлат харидига техник топшириқларни комплекс экспертизадан ўтказганлик учун қўшилган қиймат солиғи ҳисобга олинмаган ҳолда давлат буюртмачиси томонидан белгиланган чекланган қийматнинг 0,1 фоизи, лекин базавий ҳисоблаш миқдорининг 100 баробаридан ортиқ бўлмаган миқдорда тўлов ундирилади.

5. Ўзбекистон Республикаси Иқтисодиёт ва саноат вазирлиги 2019 йил 1 мартга қадар:

Марказ томонидан лойиҳа олди, лойиҳа, тендер ҳужжатлари ва контрактларни экспертизадан ўтказишнинг янгиланган тартибини;

«Давлат харидлари тўғрисида»ги Қонунга, шу жумладан Рўйхатнинг давлат харидлари ихтисослаштирилган сайтларида эълон қилиниши бўйича мажбурий талаблар ва белгиланган талабларга риоя қилинишини назорат қилишни назарда тутадиган ўзгартиришлар тўғрисидаги таклифларни;

Ўзбекистон Республикаси Президенти ҳузуридаги Лойиҳа бошқаруви миллий агентлигига «Электрон ҳукумат» тизимига тақдим этилиши ва киритилиши лозим бўлган маълумотлар таркиби бўйича таклифларни киритсин ҳамда Лойиҳа бошқарувининг ягона миллий ахборот тизимининг белгиланган протокол бўйича платформа форматида мажбурий қўлланилишини таъминласин.

6. Белгилансинки:

Ўзбекистон Республикаси Иқтисодий тараққиёт ва камбағалликни қисқартириш вазирлиги ҳузуридаги Урбанизация агентлиги директорининг ўринбосарлари, шу жумладан биринчи ўринбосари ҳамда Марказ директори ва директор ўринбосарлари Ўзбекистон Республикаси иқтисодий тараққиёт ва камбағалликни қисқартириш вазири томонидан;

Қорақалпоғистон Республикаси иқтисодий тараққиёт ва камбағалликни қисқартириш вазири, унинг ўринбосари — Қорақалпоғистон Республикаси Жўқорғи Кенгеси томонидан Ўзбекистон Республикаси иқтисодий тараққиёт ва камбағалликни қисқартириш вазири билан келишилган ҳолда;

вилоятлар иқтисодий тараққиёт ва камбағалликни қисқартириш бош бошқармалари бошлиқлари, уларнинг ўринбосарлари — вилоятлар ҳокимлари томонидан Ўзбекистон Республикаси иқтисодий тараққиёт ва камбағалликни қисқартириш вазири билан келишилган ҳолда;

туманлар ва шаҳарлар иқтисодий тараққиёт ва камбағалликни қисқартириш бўлимлари бошлиқлари — тегишли туманлар (шаҳарлар) ҳокимлари томонидан Қорақалпоғистон Республикаси иқтисодий тараққиёт ва камбағалликни қисқартириш вазири, вилоятлар иқтисодий тараққиёт ва камбағалликни қисқартириш бош бошқармалари бошлиқлари тақдимномасига кўра ҳамда Ўзбекистон Республикаси иқтисодий тараққиёт ва камбағалликни қисқартириш вазири билан келишилган ҳолда лавозимга тайинланади ва лавозимдан озод этилади.

7. Ўзбекистон Республикаси Иқтисодий тараққиёт ва камбағалликни қисқартириш вазирлиги ҳузуридаги Прогнозлаштириш ва макроиқтисодий тадқиқотлар институти ва Маҳаллабай ишлаш ва тадбиркорликни ривожлантириш агентлиги ходимларига Вазирлик марказий аппарати ходимлари учун белгиланган меҳнатга ҳақ тўлаш, моддий рағбатлантириш, ижтимоий ҳимоя, транспорт ва тиббий хизмат шартлари татбиқ этилсин.

8. Ўзбекистон Республикаси Иқтисодиёт ва саноат вазирлиги (кейинги ўринларда — Вазирлик) бир ой муддатда белгиланган тартибда Вазирлик марказий аппарати ходимлари ва хизмат кўрсатувчи ходимларининг штат жадвалини тасдиқласин.

9. Вазирлик Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда кичик саноат зоналарининг фаолиятини қуйидагиларни ҳисобга олган ҳолда таъминласин:

табиий ва иқтисодий ресурслардан самарали фойдаланган ҳолда ҳудудларни ижтимоий-иқтисодий ривожлантиришнинг устувор йўналишлари;

ички истеъмол бозорини юқори сифатли ва харидоргир маҳаллий ишлаб чиқариш товарлари билан тўлдириш, бўш турган объектларни ва мавжуд маҳаллий меҳнат ресурсларини, айниқса ёшларнинг меҳнат кучидан самарали фойдаланиш мақсадида лойиҳаларни мақбул жойлаштириш;

йирик ва кичик корхоналар ўртасида кооперация алоқаларини мустаҳкамлаш, шу жумладан маҳаллийлаштириш ва импорт ўрнини босиш бўйича лойиҳаларни ташкил этиш орқали минтақаларнинг саноат салоҳиятини ошириш ва кичик саноат зоналарида ишлаб чиқариладиган маҳсулотлар бозорини кенгайтириш;

кичик саноат зоналарида лойиҳаларни амалга ошириш ва саноат маҳсулотларини ишлаб чиқаришнинг автоматлаштирилган мониторинги натижалари.

10. Қорақалпоғистон Республикаси Вазирлар Кенгаши ва вилоятлар ҳокимликлари бир ой муддатда:

Ўзбекистон Республикаси Молия вазирлигининг ҳудудий бўлинмалари билан биргаликда Қорақалпоғистон Республикаси Иқтисодиёт ва саноат вазирлиги, вилоятлар иқтисодиёт ва саноат бош бошқармалари ходимларининг штатлар жадвалини ва кўп йиллик хизматлари учун тўловлар миқдорини тасдиқласинлар;

Вазирликнинг ҳудудий бўлинмалари зиммасига юкланган вазифаларни юқори касбий даражада амалга оширишга қодир, зарур билим ва кўникмаларга эга бўлган малакали мутахассислар билан тўлдирилишини таъминласинлар;

Вазирлик билан келишган ҳолда Қорақалпоғистон Республикаси Иқтисодиёт ва саноат вазирлиги тўғрисидаги низомни, вилоятлар иқтисодиёт ва саноат бош бошқармалари, шунингдек туманлар (шаҳарлар) иқтисодиёт ва саноат бўлимлари тўғрисидаги намунавий низомларни белгиланган тартибда тасдиқласинлар.

11. Белгилансинки:

Қорақалпоғистон Республикаси Иқтисодий тараққиёт ва камбағалликни қисқартириш вазирлиги, вилоятлар иқтисодий тараққиёт ва камбағалликни қисқартириш бош бошқармалари, туманлар (шаҳарлар) иқтисодий тараққиёт ва камбағалликни қисқартириш бўлимларининг жорий таъминоти ва улар фаолиятини, шунингдек ходимларига кўп йиллик хизматлари учун тўловларни молиялаштириш Қорақалпоғистон Республикасининг республика бюджети ва вилоятларнинг вилоят бюджетлари ҳисобидан амалга оширилади;

Ўзбекистон Республикаси Иқтисодий тараққиёт ва камбағалликни қисқартириш вазирлиги ҳузуридаги Прогнозлаштириш ва макроиқтисодий тадқиқотлар институти (кейинги ўринларда — Институт) директори мақоми ва меҳнатга ҳақ тўлаш шартлари, тиббий ва транспорт таъминоти шароитлари бўйича вазирнинг ўринбосарига тенглаштирилади.

12. Ўзбекистон Республикаси Инвестициялар ва ташқи савдо вазирлиги Институт томонидан ижтимоий-иқтисодий соҳада тадқиқотларни амалга ошириш учун халқаро молия институтлари ва хорижий давлат молия ташкилотларининг грантлари ҳар йили жалб этилишини таъминласин.

13. Институт:

қонунлар, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари ва фармойишлари, Вазирлар Маҳкамасининг қарорлари ва фармойишлари, бошқа норматив-ҳуқуқий ҳужжатлар мажбурий тарқатиладиган ташкилотлар рўйхатига;

Ўзбекистон Республикаси Иқтисодиёт ва молия вазирлиги, Олий таълим, фан ва инновациялар вазирлиги, Инвестициялар, саноат ва савдо вазирлиги, Камбағалликни қисқартириш ва бандлик вазирлиги, Миллий статистика қўмитаси, Солиқ қўмитаси, Божхона қўмитаси, Давлат активларини бошқариш агентилиги, бошқа вазирлик ва идоралар статистик ахборот бюллетенларини мажбурий тарқатиш рўйхатига киритилсин.

14. Ўзбекистон Республикаси Инвестициялар ва ташқи савдо вазирлиги, Молия вазирлиги, Вазирлик, Вазирлар Маҳкамаси ҳузуридаги Ўзбекистон Республикасининг ривожланиш давлат дастурларини молиялаштириш жамғармаси Ўзбекистон Республикасининг 2020 йилги Инвестиция дастури доирасида марказлаштирилган капитал қўйилмалар ҳисобидан, буюртмачи этиб «Тошкентқурилишинвест» инжиниринг компаниясини ва бош лойиҳачи этиб «Тошгипрошаҳар» АЖни белгилаган ҳолда институтнинг муҳандислик-коммуникация тизимларини модернизациялашни ва институт биносининг техник иншоотларини қайта таъмирлашни амалга оширилишини таъминласин.

15. Вазирлик ва унинг ҳузуридаги Урбанизация агентлиги Тошкент шаҳри, Ислом Каримов кўчаси, 45а-уй манзилида жойлаштирилсин.

16. Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси Тошкент шаҳар ҳокими аппарати билан биргаликда Ўзбекистон Республикаси Вазирлар Маҳкамасига Марказни жойлаштириш учун бино ажратиш бўйича таклиф киритсин ҳамда янги жой аниқлангунига қадар у эгаллаб турган Тошкент шаҳри, Ислом Каримов кўчаси, 1-уй манзилидаги жой ўзида қолдирилсин.

17. Ўзбекистон Республикаси Президентининг «Ўзбекистон Республикаси Иқтисодиёт вазирлиги фаолиятини тубдан такомиллаштириш чора-тадбирлари тўғрисида» 2017 йил 28 апрелдаги ПҚ-2934-сон қарори ўз кучини йўқотган деб топилсин.

18. Вазирлик бошқа манфаатдор идоралар билан биргаликда бир ой муддатда:

Вазирликнинг янги ташкил этилган бўлинмаларини зиммасига юкланган вазифаларни бажариш учун зарур бўлган назарий билим ва амалий кўникмаларга эга малакали мутахассислар билан тўлдирилишини таъминласин;

Ўзбекистон Республикаси Иқтисодиёт ва саноат вазирлиги ҳузуридаги Урбанизация агентлиги тўғрисидаги низомни Вазирлар Маҳкамасига тасдиқлаш учун киритсин;

қонун ҳужжатларига мазкур қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклиф киритсин;

ўзлари қабул қилган норматив-ҳуқуқий ва бошқа ҳужжатларни мазкур қарорга мувофиқлаштирсин.

19. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти Администрацияси раҳбари З.Ш. Низомиддинов ва Ўзбекистон Республикаси Бош вазири ўринбосари — молия вазири Ж.А. Қўчқоров зиммасига юклансин.