Кейинги ўринда Томонлар деб аталувчи ушбу Битим иштирокчи-давлатлар ҳукуматлари,

Мустақил Давлатлар Ҳамдўстлиги иштирокчи-давлатлари иқтисодиётлари глобал рақобатбардошлигини оширишнинг муҳимлигини ҳисобга олиб,

ушбу Битим иштирокчи-давлатларида инновацион фаолият самарадорлигини ошириш учун қулай шарт-шароитлар яратиш мақсадида,

интеллектуал мулк объектларидан фойдаланиш самарадорлигини ошириш бўйича масалаларни, шу жумладан уларни тижоратлаштириш йўли билан, муваффақиятли ечиш учун шароитларни таъминлашни истаб,

МДҲ иштирокчи-давлатлар интеллектуал мулк бозори инфратузилмасини шакллантириш ва ривожлантириш бўйича ушбу Битим иштирокчи-давлатлари ҳаракатларини мувофиқлаштириш заруратини англаб,

ушбу Битим иштирокчи-давлатларининг халқаро мажбуриятлари ва қонунчилигига амал қилиб,

интеллектуал мулкни ҳуқуқий муҳофазалаш ва ҳимоя қилиш соҳасидаги ҳамкорлик тўғрисидаги Битим қоидаларига ва 2010 йил 19 ноябрдаги интеллектуал мулкни ҳуқуқий муҳофазалаш ва ҳимоя қилиш масалалари бўйича Давлатлараро Кенгаш ҳамда 2016 йил 28 октябрдаги МДҲ иштирокчи-давлатлари интеллектуал мулк бозорини шакллантириш ва ривожлантириш Концепциясига асосланиб,

қуйидагилар тўғрисида келишиб олдилар:

Ушбу Битимнинг мақсади МДҲ иштирокчи-давлатлар интеллектуал мулк бозорини шакллантириш ва ривожлантиришга қаратилган шарт-шароитларни яратишдан иборатдир.

Ушбу Битимни амалга ошириш мақсадида Томонлар миллий қонунчиликни ҳисобга олиб, ҳамкорликни қуйидаги йўналишларда ривожлантирадилар:

ушбу Битим иштирокчи-давлатларининг интеллектуал мулк соҳасидаги қонунчилигини, хусусан, унинг интеллектуал мулк объектларига ҳуқуқларни муҳофазалаш, ҳимоя қилиш, тижоратлаштириш, интеллектуал мулк объектларидан фойдаланиш даражасини оширишга тегишли қисмини такомиллаштириш;

жаҳон тажрибасидан фойдаланиб, зарурат бўлганда, интеллектуал мулк объектларига ҳуқуқлар қийматини баҳолаш тизимини ривожлантириш;

интеллектуал мулк объектларига ҳуқуқларни бошқариш тизимини такомиллаштириш;

интеллектуал мулк объектларига ҳуқуқларни тижоратлаштириш, интеллектуал мулк объектларидан фойдаланишнинг ҳуқуқий, молиявий, ташкилий механизмлари давлатлараро тизимини қуриш ва бу соҳадаги энг яхши амалиётларни тарқатиш;

кадр таъминоти тизимини, шу жумладан, интеллектуал мулк объектларига ҳуқуқларни муҳофазалаш ва ҳимоя қилиш, инновацион менежмент, технологияларни тижоратлаштириш, интеллектуал мулкни баҳолаш йўналишларида шакллантириш.

Ушбу битимни амалга ошириш мақсадларида интеллектуал мулк бозори ривожланишининг, шунингдек алоҳида тадбирларнинг молиявий масалалари бўйича Томонлар алоҳида битимлар тузишлари мумкин.

Томонлар миллий устиворликларни ҳисобга олиб, МДҲ иштирокчи-давлатлар интеллектуал мулк бозорини шакллантириш бўйича чораларни ишлаб чиқиш ва амалга оширишни таъминлайдилар, шу жумладан:

ушбу Битим иштирокчи-давлатлари иқтисодиётларининг турли секторларида интеллектуал фаолият натижаларидан фойдаланиш имкониятини таъминлашни

интеллектуал мулк бозорини ривожлантириш бўйича фаолиятни кучайтиришни;

интеллектуал мулк соҳасида, шу жумладан, ахборот коммуникация технологияларидан фойдаланиб, махсус таълим дастурларини тайёрлаш ва амалга оширишни;

интеллектуал мулк соҳасида халқаро илмий-амалий конференциялар, семинарлар, форумлар ва бошқаларни, шу жумладан, интеллектуал мулк соҳасида ҳамкорликдаги тадбирларни ташкил этиш ва ўтказишни.

Томонлар ушбу Битимни амалга оширишда ушбу Битим иштирокчи-давлатлари қонунчилигига мувофиқ илмий, таълим, илмий-техника ва инновацион фаолият иштирокчиларининг ўзаро тенг ҳуқуқли алоқаларини таъминлайдилар.

Томонлар ушбу Битим иштирокчи-давлатлари қонунчилигига мувофиқ ваколатли органлар (вазирликлар, идоралар, ташкилотлар) воситасида ушбу битим қоидаларини амалга ошириш бўйича ҳамкорликни амалга оширадилар.

Томонлар ушбу Битим иштирокчи-давлатлари қонунчилигига мувофиқ интеллектуал мулк бозори иштирокчилари ўртасида очиқ ҳуқуқий, илмий-техникавий, патент ва бошқа ахборот билан айирбошлашни таъминлайдилар.

Халқаро интеллектуал мулкни ҳуқуқий муҳофазалаш ва ҳимоя қилиш бўйича кенгаш ушбу Битим қоидаларини амалга ошириш бўйича Томонлар ўзаро фаолиятининг координатори бўлиб ҳисобланади.

Ушбу Битимни амалга ошириш бўйича Томонлар ўтказадиган тадбирларни молиялаштириш ушбу Битим иштирокчи-давлатлари бюджетларида манфаатдор вазирликлар ва идораларга улар функцияларини бажариш учун ҳар йили кўзда тутиладиган маблағлар доирасида, шунингдек, бюджетдан ташқари, шу жумладан, халқаро ташкилотлар маблағлари ҳисобига ушбу Битим иштирокчи-давлатлари қонунчилиги билан ўрнатилган тартибда амалга оширилади.

Ушбу Битим ҳар бир Томоннинг унинг давлати иштирокчи бўлган бошқа халқаро шартномалардан унинг учун келиб чиқадиган ҳуқуқлар ва мажбуриятларга дахл қилмайди.

Томонлар розилиги билан ушбу Битимга унинг ажралмас қисми бўлган, тегишли баённома билан расмийлаштириладиган ўзгартиришлар киритилиши мумкин.

Ушбу Битимни қўллашда ёки шарҳлашда Томонлар ўртасида вужудга келадиган баҳсли масалалар манфаатдор Томонларнинг консультациялари ва музокаралари йўли билан ёки Томонлар билан келишилган бошқа процедура воситасида ҳал қилинади.

Ушбу Битим уни имзолаган Томонларнинг Битим кучга кириши учун зарур бўлган ички давлат процедураларини бажарганлиги ҳақидаги учинчи билдиришномани депозитарий олган санадан 30 кундан кейин кучга киради.

Ички давлат процедураларини кечроқ бажарган Томонлар учун ушбу Битим депозитарий тегишли ҳужжатларни олган санадан 30 кундан кейин кучга киради.

Ушбу Битим ҳар қандай МДҲ иштирокчи-давлатининг у кучга киргандан кейин қўшилиш тўғрисидаги ҳужжатни депозитарийга топшириш йўли билан қўшилиши учун очиқдир.

Қўшилаётган давлат учун ушбу Битим депозитарий қўшилиш тўғрисидаги ҳужжатни олиш санасидан 30 кун ўтгандан кейин кучга киради.

Ушбу Битим номуайян муддатгача тузилади. Томонларнинг ҳар бири депозитарийга чиқишдан 6 ой аввал ўзининг бундай нияти тўғрисидаги ёзма билдиришномани юбориб ва ушбу Битим амал қилиш вақтида вужудга келган ҳолатларни тартибга солиб, ушбу Битимдан чиқиш ҳуқуқига эга.

Душанба шаҳрида 2018 йили 1 июнда бир ҳақиқий нусхада рус тилида тузилди. Ҳақиқий нусха Мустақил Давлатлар Ҳамдўстлиги Ижроия қўмитасида сақланади, у ушбу Битимни имзолаган ҳар бир давлатга унинг тасдиқланган нусхасини юборади.