|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
АКАДЕМИК ЛИЦЕЙЛАР ВА КАСБ-ҲУНАР КОЛЛЕЖЛАРИНИНГ БИНОЛАРИ ВА МУҲАНДИСЛИК ИНШООТЛАРИДАН ФОЙДАЛАНИШ БЎЙИЧА ХЎЖАЛИК ҲИСОБИДАГИ ХИЗМАТЛАРНИ ТАШКИЛ ЭТИШ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Академик лицейлар ва касб-ҳунар коллежларининг бинолари ва иншоотларининг, уларда ўрнатилган ўқув-лаборатория ва махсус асбоб-ускуналарнинг сақланишини таъминлаш, улардан оқилона фойдаланиш, шунингдек, бюджет харажатларидан фойдаланиш самарадорлигини ошириш мақсадида Вазирлар Маҳкамаси қарор қилади:
1. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузурида академик лицейлар ва касб-ҳунар коллежлари бинолари ва муҳандислик иншоотларидан фойдаланиш бўйича хўжалик ҳисобидаги хизматлар ташкил этилсин. Улар 2001 йил 1 январдан бошлаб амалга киритилсин.
2. Қуйидагилар академик лицейлар ва касб-ҳунар коллежлари бинолари ва муҳандислик иншоотларидан фойдаланиш бўйича хўжалик ҳисобидаги хизматларнинг асосий вазифалари этиб белгилансин:
бинолар, иншоотлар ва муҳандислик коммуникацияларидан, шунингдек техника, механизмлар, станок парки, ўқув-лаборатория ва махсус асбоб-ускуналардан, таълимнинг техник воситаларидан оқилона фойдаланиш ва уларни юқори техник даражада сақлаш;
ушбу мақсадлар учун ажратиладиган бюджет маблағлари самарали сарфланишини таъминлаш.
3. Ўзбекистон Республикаси Олий ва ўрта махсус таълим вазирлиги Молия вазирлиги, Макроиқтисодиёт ва статистика вазирлиги, Адлия вазирлиги билан биргаликда академик лицейлар ва касб-ҳунар коллежлари бинолари ва муҳандислик иншоотларидан фойдаланиш бўйича хўжалик ҳисобидаги хизматларнинг намунавий низоми ва тузилмасини икки ҳафта муддатда ишлаб чиқсин ва Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига ишда фойдаланиш учун юборсин.
4. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:
2000 йил 15 октябргача академик лицейлар ва касб-ҳунар коллежлари бинолари ва муҳандислик иншоотларидан фойдаланиш бўйича хўжалик ҳисобидаги хизматлар низомини, тузилмасини ва ходимлари сонини лицейлар ва коллежларнинг сонини, таълим йўналишларини ва уларнинг ихтисослашувини, шунингдек, ҳудудий жойлашишини ҳисобга олган ҳолда белгиланган тартибда тасдиқласинлар;
2000 йил 1 декабргача академик лицейлар ва касб-ҳунар коллежлари бинолари ва муҳандислик иншоотларидан фойдаланиш бўйича хўжалик ҳисобидаги хизматлар жойлаштирилиши ва ходимлар билан тўлдирилишини, улар ўз фаолиятини бажариши учун зарур бўлган техника ва механизмлар билан жиҳозланишини таъминласинлар;
Ўзбекистон Республикаси Олий ва ўрта махсус таълим вазирлиги билан биргаликда академик лицейлар ва касб-ҳунар коллежлари бинолари ва муҳандислик иншоотларидан фойдаланиш бўйича хўжалик ҳисобидаги хизматларнинг мутахассислари техника ва ўқув-лаборатория асбоб-ускуналаридан фойдаланиш ва уларга хизмат кўрсатиш қоидаларига мунтазам ўқитилишини ташкил этсинлар ва таъминласинлар.
Белгилансинки, Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари ушбу хўжалик ҳисобидаги хизматлар самарали фаолият кўрсатиши учун шахсан жавоб берадилар.
5. Белгилаб қўйилсинки, ташкил этилаётган академик лицейлар ва касб-ҳунар коллежлари бинолари ва муҳандислик иншоотларидан фойдаланиш бўйича хўжалик ҳисобидаги хизматлар 2006 йилгача даромад (фойда)дан солиқ тўлашдан озод қилинадилар, солиқ солишдан бўшаб қоладиган маблағлар моддий-техник базани мустаҳкамлашга мақсадли йўналтирилади.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Н. Исаев зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
2000 йил 2. октябрь,
381-сон
(Ўзбекистон Республикаси қонун ҳужжатлари тўплами, 2000 й., 7-сон, 111-модда)
