Ҳужжат 17.10.2017 00 санаси ҳолатига
Амалдаги версияга ўтиш
Ўзбекистон Республикаси Вазирлар Маҳкамасининг
қарори
Ёшлар тадбиркорлик кластерларини ташкил этишга доир ташкилий чора-тадбирлар тўғрисида
Ўзбекистон Республикаси Президентининг «Ёшларга оид давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида» 2017 йил 5 июлдаги ПФ-5106-сон Фармони ижроси юзасидан, шунингдек бизнесни ташкил этиш ва ёшларни тадбиркорлик фаолиятига фаол жалб этиш учун янада қулай шароитлар яратиш мақсадида Вазирлар Маҳкамаси қарор қилади:
1. Ўзбекистон ёшлар иттифоқи, Ўзбекистон Республикаси Иқтисодиёт вазирлиги, Бандлик ва меҳнат муносабатлари вазирлиги, Хусусийлаштирилган корхоналарга кўмаклашиш ва рақобатни ривожлантириш давлат қўмитаси, Ўзбекистон Савдо-саноат палатасининг республика туман марказлари ва шаҳарларида юридик шахс ташкил этмасдан ёшлар тадбиркорлик кластерларини (кейинги ўринларда кластер деб аталади) ташкил этиш тўғрисидаги таклифига розилик берилсин ҳамда уларнинг фаолиятини бошқариш функциялари Ўзбекистон ёшлар иттифоқининг туман ва шаҳарлар кенгашларига юклансин.
2. Ёшлар тадбиркорлик кластерлари тўғрисидаги низом иловага мувофиқ тасдиқлансин.
Қуйидагилар кластерлар фаолиятининг асосий вазифалари этиб белгилансин:
ёшларга тадбиркорлик фаолиятини бошлаш ва юритиш учун кластер ҳудудида ишлаб чиқариш майдонлари тақдим этиш орқали уларни тадбиркорлик фаолиятига жалб қилиш;
ёш тадбиркорларга рухсат берувчи ҳужжатларни, кредитлар олиш, бизнес-режалар тайёрлаш, маркетинг тадқиқотлари ўтказиш, савдо бозорларини топиш ва бошқалар учун зарур ҳужжатларни тайёрлашда амалий кўмаклашиш;
ёшларга бизнесни юритиш асосларини ўргатиш, кадрлар малакасини ошириш ва уларни қайта тайёрлаш курсларини ташкил этиш, шунингдек ёш тадбиркорларга малакали ходимларни танлашда ёрдам бериш;
стартаплар ташкил этиш учун бизнес-инкубаторлар вазифаларини амалга ошириш, ёш тадбиркорларнинг рақобатбардошлигини ошириш, улар фаолиятини барқарор ривожлантириш.
3. Ўзбекистон ёшлар иттифоқи:
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда кластерларни ўрта махсус, касб-ҳунар таълими муассасаларининг бўш турган ва Ўзбекистон ёшлар иттифоқига бепул бериладиган биноларига жойлаштирсин;
кластерларни ташкил этиш ва бошқариш, кластер ишлаб чиқариш майдонларини тақдим этиш учун ёшлар тадбиркорлик субъектларини танлаш ва улар билан лойиҳаларни амалга оширишга доир шартномалар тузиш, кластер иштирокчиларининг ўз зиммасига олган вазифаларини бажариши мониторингини олиб бориш бўйича мутахассисларни бир ҳафта муддатда тайинласин.
«Ўзбекэнерго» АЖ, «Ўзтрансгаз» АЖ, «Ўзбектелеком» АК, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари раҳбарлари зиммасига кластерларда жойлаштирилган ёш тадбиркорларни уларнинг ишлаб чиқариш эҳтиёжларига мувофиқ электр энергияси, табиий газ, телекоммуникация тармоқлари билан узлуксиз таъминлаш учун шахсий жавобгарлик юклансин.
4. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Ўзбекистон Республикаси Молия вазирлиги билан биргаликда Қорақалпоғистон Республикаси бюджети, вилоятлар ва Тошкент шаҳрининг тегишли маҳаллий бюджетлари лойиҳаларини шакллантиришда кластерларни модернизация қилиш ҳамда зарур муҳандислик-коммуникация инфратузилмаси билан таъминлаш учун зарур маблағлар ажратилишини назарда тутсин.
5. Белгилаб қўйилсинки:
кластерлар ҳудудида жойлашган ишлаб чиқариш майдонлари фақат Ўзбекистон ёшлар иттифоқига аъзо бўлган ёш тадбиркорларга корхона ташкил топгунига қадар, аммо 5 йилдан кўп бўлмаган муддатга ижара ҳақининг «нол» ставкаси бўйича ижарага берилади;
Кейинги таҳрирга қаранг.
кластерларда ёшларга маслаҳат бериш, тадбиркорлик фаолиятини амалга ошириш билан боғлиқ зарур ҳужжатларни тайёрлашда амалий ёрдам кўрсатиш хизматлари бепул амалга оширилади;
кластер ҳудудида жойлаштириладиган тадбиркорлик субъекти ходимларининг штати 35 ёшгача бўлган шахслар билан тўлдирилиши ва улар ходимлар умумий сонининг камида 70 фоизини ташкил этиши керак;
фойдаланилмаётган, шу жумладан эркин иқтисодий ва кичик саноат зоналари ҳудудида жойлашган давлат мулки Ўзбекистон ёшлар иттифоқи аъзоси бўлган ёш тадбиркорларга Ўзбекистон ёшлар иттифоқининг шаҳар ҳамда туман кенгашларининг илтимосига кўра 5 йилдан кўп бўлмаган муддатга ижара ҳақининг «нол» ставкаси бўйича ижарага берилади.
Кейинги таҳрирга қаранг.
6. Шундай тартиб ўрнатилсинки, унга мувофиқ Ўзбекистон ёшлар иттифоқи кластерлар фаолиятини ташкил этиш учун қуйидагилар билан ўзаро ҳамкорлик қилади:
Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси ҳузуридаги Тадбиркорлик фаолияти асосларини ўқитиш республика маркази билан — кадрлар тайёрлаш, малакасини ошириш ва уларни қайта тайёрлаш бўйича доимий курсларни ташкил қилиш масаласида;
Ўзбекистон Савдо-саноат палатаси ҳузуридаги тадбиркорликка кўмаклашиш марказлари билан — давлат органлари ва бозор инфратузилмаси субъектларининг барча турдаги хизматларини ҳамда бизнес хизматларини бир жойнинг ўзида олиш учун зарур шарт-шароитлар яратиш ва имкониятлар тақдим этиш масаласида;
Кейинги таҳрирга қаранг.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан — кластерлардан ташқарида тадбиркорлик фаолиятини давом эттириш учун ер участкалари рўйхатини шакллантириш бўйича буюртманомаларни тақдим этиш ҳамда кўриб чиқиш масаласида;
Ўзбекистон Савдо-саноат палатаси билан — тадбиркорлик субъектларига бизнесни ташкил этиш, юритиш ва янада ривожлантириш, давлат органлари ва бозор инфратузилмаси субъектларининг барча турдаги хизматларини олиш учун шароитлар яратиш ҳамда имкониятлар тақдим этишда амалий кўмаклашиш, шунингдек маслаҳат ёрдами кўрсатиш ва ахборот таъминоти масаласида;
кичик саноат ва эркин иқтисодий зоналар дирекциялари, Ўзбекистон Республикасининг Хусусийлаштирилган корхоналарга кўмаклашиш ва рақобатни ривожлантириш давлат қўмитасининг ҳудудий бошқармалари билан — ёш тадбиркорларга ишлаб чиқариш бинолари ва майдонларини ижарага бериш масаласида;
тадбиркорлик субъектларига давлат хизматлари кўрсатиш бўйича ягона марказлар орқали «ягона дарча» тамойили асосида — рухсат берувчи ҳужжатлар ва лицензиялар олиш масаласида.
Кейинги таҳрирга қаранг.
7. Ўзбекистон Республикаси Адлия вазирлиги кластер ҳудудида жойлаштирилган ёш тадбиркорларга тадбиркорлик фаолияти билан боғлиқ рухсат берувчи ҳужжатларни тадбиркорлик субъектларига давлат хизматлари кўрсатиш бўйича ягона марказлар орқали «ягона дарча» тамойили асосида расмийлаштиришда қонун ҳужжатларида белгиланган тартибда амалий ёрдам кўрсатсин.
Кейинги таҳрирга қаранг.
8. Ўзбекистон ёшлар иттифоқи, Ўзбекистон Савдо-саноат палатаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:
ўзларининг расмий веб-сайтларида ёшлар тадбиркорлик субъектларига бизнес юритиш учун тақдим этиладиган кластернинг ишлаб чиқариш майдонлари рўйхатини жойлаштирсин ва мунтазам равишда янгилаб борсин;
кластерлар фаолиятини ташкил этиш, шунингдек кластерларда инвестиция лойиҳаларини амалга ошириш борасида бажарилаётган ишлар ҳақида Ўзбекистон Республикаси Вазирлар Маҳкамасига ҳар чоракда ахборот тақдим этсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Қўчқоров зиммасига ва Ўзбекистон ёшлар иттифоқига юклансин.
Ўзбекистон Республикасининг Бош вазири А. АРИПОВ
Тошкент ш.,
2017 йил 16 октябрь,
834-сон
Вазирлар Маҳкамасининг 2017 йил 16 октябрдаги 834-сон қарорига
ИЛОВА
Ёшлар тадбиркорлик кластерлари тўғрисида
НИЗОМ
1-боб. Умумий қоидалар
1. Ушбу Низом ёшлар тадбиркорлик кластерлари фаолиятини ташкил этиш, шунингдек ёшлар тадбиркорлик субъектларини танлаш ва кластерлар ҳудудида жойлаштириш тартибини белгилайди.
2. Ушбу Низом мақсадлари учун қуйидаги асосий тушунчалардан фойдаланилади:
ёшлар тадбиркорлик кластери (кейинги ўринларда кластер деб аталади) — муҳандислик-техник коммуникациялар билан таъминланган ва ёшлар тадбиркорлик субъектларига узоқ муддатли ижара ҳуқуқида фойдаланиш учун бериладиган ишлаб чиқариш майдонларини ўз ичига олган ҳудуд;
ёшлар тадбиркорлиги — ёш фуқаролар юридик шахс ташкил этмасдан, шунингдек таъсисчилари ёшлар ҳисобланган юридик шахслар амалга оширадиган тадбиркорлик фаолияти;
кластер иштирокчиси — кластер ишлаб чиқариш майдонларида тадбиркорлик фаолиятини амалга оширадиган ёшлар тадбиркорлик субъекти;
ишлаб чиқариш майдони — кластер иштирокчиларига 5 йилдан кўп бўлмаган муддатга ижара тўловининг «нол» ставкаси бўйича ижарага бериладиган ишлаб чиқариш ва қўшимча бинолар, иншоотлар.
2-боб. Кластерлар фаолиятини ташкил этиш ва бошқариш
3. Кластерлар тадбиркорлик фаолиятини бошлаш ва юритиш учун ёш тадбиркорларга ишлаб чиқариш майдонларини тақдим этиш орқали уларни тадбиркорлик фаолиятига жалб қилиш мақсадида ташкил этилади.
Кластерни ташкил этиш ҳақидаги қарор Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан Ўзбекистон ёшлар иттифоқи билан келишилган ҳолда қабул қилинади ҳамда унда кластерни ташкил этиш учун бериладиган бинолар ва иншоотлар белгиланади, уларнинг умумий ишлаб чиқариш майдони кўрсатилади.
Ишлаб чиқариш майдонлари кластер иштирокчиларига Ўзбекистон ёшлар иттифоқининг туман ва шаҳар кенгашлари томонидан тақдим этиладиган асосланган ҳисоб-китобларга мувофиқ, кластернинг коммунал ва бошқа фойдаланиш харажатларини қоплаш шарти билан ижара ҳақининг «нол» ставкаси бўйича берилади.
4. Ўзбекистон ёшлар иттифоқининг тегишли туман ва шаҳар кенгашлари кластерлар фаолиятини бошқариш вазифаларини амалга оширади.
Ўзбекистон ёшлар иттифоқининг туман ва шаҳар кенгашлари кластер фаолият кўрсатадиган даврда кластерларни тезкор бошқариш ҳуқуқи асосида жойлаштириш учун белгиланган тартибда тақдим этилган мулкка эгалик қилиш, ундан фойдаланиш ва ижарага бериш ҳуқуқига эга.
5. Қуйидагилар кластерлар фаолиятини ташкил этишни молиялаштириш манбалари ҳисобланади:
Ўзбекистон ёшлар иттифоқи, Қорақалпоғистон Республикаси бюджети, вилоятлар ва Тошкент шаҳрининг тегишли маҳаллий бюджетлари маблағлари;
кластер иштирокчиларига пулли хизматлар кўрсатишдан тушадиган даромадлар;
кластер иштирокчиларининг фойдаланиш тўловларидан тушадиган даромадлар.
Кластерлар фаолияти қонун ҳужжатларига зид бўлмаган бошқа манбалар ҳисобидан ҳам молиялаштирилиши мумкин.
Кейинги таҳрирга қаранг.
6. Кластерлар фаолиятини бошқаришда қуйидагилар Ўзбекистон ёшлар иттифоқи туман ва шаҳар бўлимларининг асосий вазифалари ва функциялари ҳисобланади:
кластер иштирокчилари билан лойиҳаларни амалга ошириш тўғрисида битимлар (кейинги ўринларда битим деб аталади) ва ишлаб чиқариш майдонларининг ижара шартномалари, шунингдек кластер ҳудудида хизматлар кўрсатиш ҳақида шартномалар тузиш;
кластер иштирокчиларининг битимлар ва ижара шартномаларига мувофиқ ўз зиммасига олган вазифаларни бажаришининг мониторингини олиб бориш;
кластернинг ташкилий-бошқарув фаолиятини амалга ошириш;
кластер иштирокчиларини уларнинг ишлаб чиқариш эҳтиёжларига мувофиқ муҳандислик-коммуникация тармоқлари билан таъминланиши мониторингини олиб бориш;
кластер иштирокчиларига ишлаб чиқариш фаолияти билан боғлиқ масалаларни ҳал этишда кўмаклашиш;
кластер иштирокчилари ўртасида, шунингдек бошқа ишлаб чиқариш корхоналари билан кооперация алоқаларини ривожлантиришга ёрдам бериш;
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига кластерлардан ташқарида тадбиркорлик фаолиятини давом эттириш ҳамда янада ривожлантириш учун ер участкалари рўйхатини шакллантириш бўйича буюртманомалар тақдим этиш.
7. Ўзбекистон ёшлар иттифоқининг туман ва шаҳар кенгашлари кластер иштирокчиларининг фаолиятини ташкил этиш ва ёшлар тадбиркорлик субъектининг фаолият кўрсатиши билан боғлиқ пулли хизматлар (ускуналар, мебель, техника ва бошқа жиҳозларни ижарага бериш, маркетинг ва бошқа тадқиқотлар ўтказиш, ҳужжатлар тайёрлаш, техник хизматлар кўрсатиш ва бошқалар) кўрсатиш ҳуқуқига эга.
3-боб. Кластер иштирокчиларини танлаш ва жойлаштириш тартиби
8. Ёшлар тадбиркорлик субъектларига кластернинг ишлаб чиқариш майдонларини бериш учун улар биринчи навбатда, тармоқлараро кооперацияни ривожлантириш ва ишлаб чиқарилаётган маҳсулотларнинг рақобатбардошлигини ошириш имконини берадиган саноатнинг турдош тармоқлари ва хизматлар кўрсатиш корхоналарини ташкил этиш ҳисобга олинган ҳолда, Ўзбекистон ёшлар иттифоқининг тегишли туман ва шаҳар кенгашлари томонидан танлаб олинади.
Ўзбекистон ёшлар иттифоқининг туман ва шаҳар кенгашлари, зарурат бўлганда, ёшлар тадбиркорлик субъектларига кластер ишлаб чиқариш майдонлари бериш учун уларни танлаб олишда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Савдо-саноат палатаси, шунингдек бошқа давлат органларининг тегишли мутахассисларини жалб этиши мумкин.
9. Ёшлар тадбиркорлик субъекти кластер ишлаб чиқариш майдонларида тадбиркорлик фаолиятини ташкил этиш учун Ўзбекистон ёшлар иттифоқининг туман ёки шаҳар кенгашига тадбиркорни жойлаштириш учун ушбу Низомга 1-иловага мувофиқ шаклда лойиҳа паспорти илова қилинган аризани тақдим этади.
10. Ўзбекистон ёшлар иттифоқининг туман ёки шаҳар кенгаши ёшлар тадбиркорлик субъекти тақдим этган лойиҳа паспортини унинг қуйидаги мезонларга мос келиши бўйича кўриб чиқади:
Ўзбекистон ёшлар иттифоқига аъзолик;
50 квадрат метрдан ортиқ бўлмаган ишлаб чиқариш майдонига эҳтиёж мавжудлиги;
техник ва технологик ускуналарни ишлаб чиқариш эҳтиёжлари учун монтаж ва демонтаж қилиш енгил ҳисобланади ва 2 кундан кўп вақтни олмайди;
кластерлар ишлаб чиқариш майдонларида жойлаштириладиган лойиҳаларда савдо фаолиятини амалга ошириш, экологик хавфсизликни таъминлашнинг юқори нормаларини талаб этадиган кимёвий, экологик хавфли маҳсулотлар ишлаб чиқариш назарда тутилмаган;
тахмин қилинаётган тадбиркорлик фаолияти кўп энергия талаб қиладиган ишлаб чиқариш ҳисобланмайди;
кластер ҳудудида жойлаштириладиган тадбиркорлик субъекти ходимлари умумий сонининг камида 70 фоизи 35 ёшгача бўлган ходимлардан иборат.
11. Ўзбекистон ёшлар иттифоқининг туман ёки шаҳар кенгаши аризани олган санадан бошлаб, 5 иш куни мобайнида ёшлар тадбиркорлик субъектининг таклифи ва лойиҳа паспортини кўриб чиқади ҳамда лойиҳа параметрлари ушбу Низомнинг 10-банди талабларига мос келса, субъект билан лойиҳани амалга ошириш тўғрисида битим ва ишлаб чиқариш майдонини тақдим этиш учун ижара шартномасини тузади.
12. Ёшлар тадбиркорлик субъектларининг кластернинг ишлаб чиқариш майдонларини бериш учун аризалари 2-иловага мувофиқ схема бўйича кўриб чиқилади.
13. Бир кунда битта ишлаб чиқариш майдони учун икки ёки ундан кўп ариза тушганда, яратиладиган янги иш ўринлари сони, ишлаб чиқариладиган маҳсулотнинг (ишлар, хизматларнинг) рақобатбардошлиги ва харидоргирлиги, лойиҳани амалга ошириш муддатлари ва ишлаб чиқариш фаолиятини бошлаш бўйича энг жозибадор таклифларни тақдим этган даъвогар мақбул деб топилади.
Бошқа тенг шароитларда экспертбоп маҳсулотлар ишлаб чиқаришни ташкил этадиган ва лойиҳани амалга ошириш учун реал молиявий имкониятларга эга даъвогарлар устунликка эга бўлади.
14. Лойиҳани амалга ошириш тўғрисидаги битимда:
битим предмети;
лойиҳани амалга ошириш бўйича вазифаларнинг ҳажмлари, турлари ва жадвали, шу жумладан янги иш ўринлари яратиш мажбуриятлари;
томонларнинг ҳуқуқлари ва мажбуриятлари;
битимни бекор қилиш шартлари;
низоларни ҳал этиш тартиби назарда тутилиши зарур.
Томонларнинг ихтиёрига кўра, лойиҳани амалга ошириш тўғрисидаги битимда бошқа шартлар ҳам кўрсатилиши мумкин.
15. Ишлаб чиқариш майдони бериш бўйича ижара шартномасида Вазирлар Маҳкамасининг «Давлат мулкини ижарага бериш тартибини такомиллаштириш чора-тадбирлари тўғрисида» 2009 йил 8 апрелдаги 102-сон қарорида белгиланган шартлар назарда тутилиши керак.
4-боб. Кластер иштирокчиларининг ҳуқуқлари ва мажбуриятлари
16. Кластер иштирокчилари:
тузилган ижара шартномаси доирасида ажратилган ишлаб чиқариш майдонларига мустақил эгалик қилиш ва улардан фойдаланиш;
муҳандислик-техник коммуникацияларнинг узлуксиз ишлаши таъминланишини талаб қилиш ҳуқуқига эга.
17. Кластер иштирокчилари қуйидагиларга мажбур:
кластерда битим ёки шартнома тузилгандан сўнг 3 ойдан кечиктирмасдан ишлаб чиқариш фаолиятини бошлаши шарт. Бунда лойиҳани амалга ошириш борасида объектив сабаблар мавжуд бўлса, ишлаб чиқариш фаолиятини бошлаш муддатини 3 ойдан ортиқ бўлмаган муддатга узайтиришга рухсат этилади;
ишлаб чиқариш фаолиятини амалга ошириш бошланган пайтдан икки ойдан кечиктирмасдан янги иш ўринларини ташкил этиш ва битим ёки ижара шартномасида назарда тутилган миқдорда қўшимча ходимларни ёллашни таъминлаш;
тузилган битим ва шартнома шартларини ўз вақтида бажариш.
5-боб. Лойиҳалар амалга оширилиши мониторингини олиб бориш
18. Кластер иштирокчилари лойиҳани амалга ошириш шартномаси тузилган санадан бошлаб, Ўзбекистон ёшлар иттифоқининг туман ва шаҳар кенгашларига ҳар ойнинг лойиҳани амалга оширишнинг ҳолати, яратилган иш ўринлари, маҳсулот (хизматлар) ишлаб чиқариш ҳажмлари, шунингдек тадбиркорлик фаолиятини амалга оширишга тўсқинлик қилаётган муаммоли масалалар хусусида батафсил ахборот тақдим этади.
19. Ўзбекистон ёшлар иттифоқининг туман ва шаҳар кенгашлари Кластер иштирокчилари томонидан тақдим этилган ахборот асосида ҳар ойда лойиҳанинг амалга оширилиши, шунингдек кластер иштирокчиларининг ишлаб чиқариш эҳтиёжларига мувофиқ муҳандислик-коммуникация тармоқлари билан таъминланиши мониторингини олиб боради.
Ўзбекистон ёшлар иттифоқи умумлаштирилган натижаларга мувофиқ Ўзбекистон Республикаси Вазирлар Маҳкамасига кластерлар фаолиятини ташкил этиш, шунингдек кластерларда лойиҳаларни амалга ошириш бўйича олиб борилаётган ишлар ҳақида ҳар чоракда ахборот тақдим этади.
20. Ўзбекистон Савдо-саноат палатаси назорат қилувчи органлар билан, жумладан ҳуқуқбузарликларнинг олдини олиш тадбирлари доирасида ўзаро ҳамкорлик масаласида кластерлар фаолиятини мувофиқлаштиради.
6-боб. Якунловчи қоида
21. Ўзбекистон ёшлар иттифоқи ва кластер иштирокчилари ушбу Низом талабларига риоя этилиши юзасидан қонун ҳужжатларига мувофиқ жавоб беради.
Кейинги таҳрирга қаранг.
Ёшлар тадбиркорлик кластерлари тўғрисидаги Низомга
1-ИЛОВА
Инвестиция лойиҳаси паспортининг
ШАКЛИ

I. Ариза берувчи тўғрисида ахборот

1.

Ф.И.О.(жисмоний шахслар учун)/Ташкилотнинг номи ва ариза берувчининг ташкилий-ҳуқуқий шакли (юридик шахслар учун)

2.

Паспорт маълумотлари /Корхона таъсисчилари ҳақидаги маълумотлар — таъсисчиларнинг паспорт маълумотлари, уларнинг корхона устав капиталидаги улуши

3.

Яшаш манзили /Юридик манзил

II. Лойиҳа ҳақида ахборот

1.

Лойиҳанинг номланиши

2.

Лойиҳа таърифи ва мақсади

3.

Ишлаб чиқаришда фойдаланиладиган хом ашё ва бутловчи буюмларнинг (маҳаллий ва/ёки импорт) асосий турлари

4.

Талаб этиладиган ишлаб чиқариш майдони (кв.м)

5.

Ишлаб чиқариш учун махсус ускуналарга бўлган эҳтиёж

6.

Ускуналарни монтаж ва демонтаж қилиш учун зарур давр (кун)

7.

Электр энергиясига бўлган эҳтиёж (бир соатда кВт)

8.

Табиий газга бўлган эҳтиёж (бир йилда куб метр)

9.

Техник сувга бўлган эҳтиёж (бир йилда куб метр)

10.

Ишлаб чиқариш фаолиятини бошлашнинг тахмин қилинаётган санаси

11.

Лойиҳанинг экологик хавфсизлиги

12.

Яратилаётган, шу жумладан ёшлардан иборат иш ўринлари сони

III. Ишлаб чиқарилиши мўлжалланаётган маҳсулот ҳақида ахборот

1.

Маҳсулот номи

2.

Белгиланган мақсади ва асосий хусусиятлари

3.

Тахмин қилинаётган йиллик қувват (физик ҳажмда)

IV. Молиявий-иқтисодий кўрсаткичлар

1.

Лойиҳа қиймати

2.

Молиялаштириш манбалари (ўз маблағлари, кредитлар ва бошқалар)

3.

Машиналар ва ускуналар қиймати

4.

Лойиҳанинг тахмин қилинаётган ўзини оқлаш муддати

Ёшлар тадбиркорлик кластерлари тўғрисидаги Низомга
2-ИЛОВА
Кластер ишлаб чиқариш майдонларини бериш учун ёшлар тадбиркорлик субъектларининг аризаларини кўриб чиқиш
СХЕМАСИ
(Қонун ҳужжатлари маълумотлари миллий базаси, 17.10.2017 й., 09/17/834/0122-сон; 23.01.2018 й., 09/18/40/0609-сон; Қонунчилик маълумотлари миллий базаси, 05.04.2022 й., 09/22/153/0266-сон; 30.05.2023 й., 09/23/217/0301-сон; 15.05.2024 й., 09/24/282/0347-сон)