Ҳужжат кучини йўқотган " " 20.08.2020

Ҳужжат 22.10.2019 00 санаси ҳолатига
Амалдаги версияга ўтиш

Ўзбекистон Республикаси Вазирлар Маҳкамасининг

Қурилиш объектларининг мураккаблик (хавфлилик) даражасига кўра, қурилиш-монтаж ишларини амалга ошириш жараёнида текширишларни тайинлаш ва ўтказиш тартиби тўғрисидаги Низомни тасдиқлаш ҳақида

LexUZ шарҳи

Мазкур қарор Ўзбекистон Республикаси Вазирлар Маҳкамасининг 2020 йил 20 августдаги 496-сонли «Объектларда давлат қурилиш назоратини амалга ошириш бўйича маъмурий регламент ҳамда объектларнинг хавф-хатарлар тоифалари таснифини тасдиқлаш тўғрисида»ги қарорига асосан ўз кучини йўқотган.

Ўзбекистон Республикаси Президентининг «Тадбиркорлик фаолиятининг жадал ривожланишини таъминлашга, хусусий мулкни ҳар томонлама ҳимоя қилишга ва ишбилармонлик муҳитини сифат жиҳатидан яхшилашга доир қўшимча чора-тадбирлар тўғрисида» 2016 йил 5 октябрдаги ПФ-4848-сон Фармони ижроси юзасидан Вазирлар Маҳкамаси қарор қилади:

1. Қурилиш объектларининг мураккаблик (хавфлилик) даражасига кўра, қурилиш-монтаж ишларини амалга ошириш жараёнида текширишларни тайинлаш ва ўтказиш тартиби тўғрисидаги низом иловага мувофиқ тасдиқлансин.

2. Ўзбекистон Республикаси Давлат архитектура ва қурилиш қўмитаси манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

3. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов ва Ўзбекистон Республикаси Давлат архитектура ва қурилиш қўмитаси раиси Б.И. Закиров зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2017 йил 12 октябрь,

Вазирлар Маҳкамасининг 2017 йил 12 октябрдаги 820-сон қарорига
ИЛОВА

Қурилиш объектларининг мураккаблик (хавфлилик) даражасига кўра, қурилиш-монтаж ишларини амалга ошириш жараёнида текширишларни тайинлаш ва ўтказиш тартиби тўғрисида

1-боб. Умумий қоидалар

1. Ушбу Низом объектларни қуриш ва реконструкция қилиш хусусиятларини таснифлашни белгилайди, шунингдек объектларни қуриш ҳамда реконструкция қилишни давлат томонидан архитектура-қурилиш назорат қилиш тартиби ва тартиб-таомилларини тартибга солади.

2. Ушбу Низом якка тартибдаги уй-жой қуриш объектлари (Қишлоқ жойларда намунавий лойиҳалар бўйича якка тартибда уй-жой қуриш дастурига киритилган объектлардан ташқари), турар-жой тоифасидан нотурар-жой тоифасига ўтказиладиган бинолар, мавсумий ишлар ва яйловдаги чорвачилик учун вақтинчалик уйлар ҳамда маиший бинолар, мобиль алоқа станцияларни монтаж қилиш, кичик ҳажмдаги (300 куб метрдан катта бўлмаган) алоҳида қуриладиган ва фойдаланилаётган муҳандислик тармоқларини ўзгартиришни талаб қилмайдиган объектлар, тоғ кавлаш ишлари, технологик ресурслари ишлатиб бўлинган ва объектни реконструкция қилиш талаб этилмайдиган технологик ҳамда муҳандислик ускуналарини таъмирлаш ва алмаштиришга жорий этилмайди.

3. Республика ҳудудида қурилиш-монтаж ишларини амалга ошириш учун рухсат олишни талаб этадиган қурилиш ва реконструкция объектлари давлат томонидан мажбурий тартибда архитектура-қурилиш назоратига олинади.

Кейинги таҳрирга қаранг.

4. Давлат архитектура-қурилиш назорати қурилиш объектларининг хавфсизлиги, сифати, зилзилабардошлиги ва фойдаланишда ишончлилигини таъминлаш мақсадида амалга оширилади.

5. Давлат архитектура-қурилиш назорати ўрта ва юқори хавфлилик омилларига эга объектларни назорат қилиш бўйича ваколатли давлат органлари томонидан амалга оширилади.

6. Ушбу Низомда қуйидаги тушунчалардан фойдаланилади:

шаҳарсозлик фаолияти — давлат органлари, фуқароларнинг ўзини ўзи бошқариш органлари, юридик ва жисмоний шахсларнинг қонун ҳужжатларига мувофиқ кўчмас объектларни лойиҳалаштириш, қуриш ҳамда реконструкция қилиш соҳасидаги фаолияти;

шаҳарсозлик фаолияти субъекти — давлат органлари, фуқароларнинг ўзини ўзи бошқариш органлари, юридик ва жисмоний шахслар бўлиб, улар шаҳарсозлик фаолияти соҳасида буюртмачилар, шаҳарсозлик ҳужжатларини ишлаб чиқувчилар, объектларни қуриш бўйича пудратчилар ва шаҳарсозлик фаолияти объектларидан фойдаланувчилар бўлиши мумкин;

шаҳарсозлик фаолияти субъектининг ваколатли шахслари — шаҳарсозлик фаолияти субъекти томонидан техник ва муаллифлик назоратини амалга ошириш ваколати берилган масъул шахслар, шунингдек объект қурилиши ишларини амалга оширувчилар;

қурилиш босқичи — қурилиш объектининг сифати, мустаҳкамлиги, зилзилабардошлиги ва фойдаланишда ишончлилигини таъминлаш борасида ниҳоясига етказилган қурилиш-монтаж ишларининг хавфга учраши мумкинлиги юқори бўлган босқичи;

хавф — шаҳарсозлик фаолиятини амалга оширишда салбий оқибатларнинг пайдо бўлиш эҳтимолини ҳисобга оладиган хавфлилик чоралари;

Олдинги таҳрирга қаранг.

қоидабузарликларни бартараф этиш бўйича кўрсатмалар — Ўзбекистон Республикаси Қурилиш вазирлиги ҳузуридаги Қурилиш соҳасида назорат инспекцияси ва унинг қурилиш соҳасида ҳудудий назорат инспекцияси (кейинги ўринларда назорат бўйича ваколатли давлат органи деб аталади) мансабдор шахслари — инспекторларининг белгиланган муддатлар бажарилиши шарт бўлган ёзма талаблари. Кўрсатмалар шаҳарсозлик фаолияти субъектларига нисбатан санкциялар қўллашни назарда тутмайди. Кўрсатма текширувни амалга оширган орган мансабдор шахси томонидан берилади ва имзоланади.

(6-банднинг еттинчи хатбошиси Ўзбекистон Республикаси Вазирлар Маҳкамасининг 2019 йил 14 июндаги 498-сонли қарори таҳририда — Қонун ҳужжатлари маълумотлари миллий базаси, 20.06.2019 й., 09/19/498/3310-сон)

Назорат бўйича ваколатли давлат органи инспекторлари қонун ҳужжатларида белгиланган тартибда аттестациядан ўтказилади.

Олдинги таҳрирга қаранг.

(II-боб Ўзбекистон Республикаси Вазирлар Маҳкамасининг 2019 йил 14 июндаги 498-сонли қарорига асосан ўз кучини йўқотган — Қонун ҳужжатлари маълумотлари миллий базаси, 20.06.2019 й., 09/19/498/3310-сон)

3-боб. Давлат архитектура-қурилиш назоратига олинадиган қурилиш объектларининг (объектлар тоифалари) мураккаблик тоифалари таснифи

8. Ҳаёт ва фаолият учун мақбул хавфлар аҳамияти инобатга олинган ҳолда, барча қурилиш объектлари уч тоифага — хавфлиликнинг паст, ўрта ва юқори омилларига ажратилади.

9. Қурилиш объектларининг мураккаблик тоифаларининг таснифи:

а) I-тоифа — хавфлилик омили паст объектлар;

б) II-тоифа — хавфлилик омили ўртача объектлар;

в) III-тоифа — хавфлилик омили юқори объектлар.

10. Объектлар тоифалари қурилиш объектларининг мураккаблик тоифаси бўйича Вазирлар Маҳкамасининг 2016 йил 22 январдаги 15-сон қарори билан тасдиқланган Объектларнинг лойиҳа-қидирув ва қурилиш-монтаж ишлари бўйича мураккаблик тоифалари классификаторига мувофиқ таснифланади.

11. Қурилиш объектлари бир қанча тоифалар хусусиятларига эга бўлса, улар III — хавфлилик омиллари юқори объектлар тоифаси бўйича таснифланади.

12. Объектларнинг мураккаблик тоифалари таснифланишига қараб, давлат архитектура-қурилиш назоратини амалга ошириш даврийлигининг қуйидаги муддатлари белгиланади:

I-тоифа — назорат бўйича ваколатли давлат органининг назорат функциялари кўзда тутилмаган;

II-тоифа — бир ойда тўрт мартадан кўп эмас;

III-тоифа — бир ойда беш мартадан кўп эмас.

4-боб. Текширишлар турлари ва принциплари, уларни ўтказишни асослаш

13. Давлат архитектура-қурилиш назорати қуйидаги турдаги текширувлар шаклида амалга оширилади: режали, қисқа муддатли (субъектнинг молиявий-хўжалик фаолиятига аралашмасдан) инспекторлик ва назорат тартибидаги текширувлар.

14. Режали, қисқа муддатли инспекторлик ва назорат тартибидаги текширувлар назорат бўйича ваколатли давлат органи томонидан қонун ҳужжатларида белгиланган тартибда амалга оширилади.

Режали текширувларни ўтказишнинг умумий муддати бир йилда ўн календарь кунидан ошмаслиги даркор.

15. Режали, қисқа муддатли инспекторлик ва назорат тартибидаги текширувларни ўтказишда қуйидагилар давлат архитектура-қурилиш назоратининг предметлари ҳисобланади:

ҳудудларни ривожлантириш ва қуришни лойиҳалаштириш тўғрисида шаҳарсозлик ҳужжатлари амалга оширилишига риоя этиш;

қурилиш жараёнида лойиҳа ҳужжатларига киритилаётган ўзгартиришларнинг техник тартибга солиш соҳасидаги норматив ҳужжатларга мувофиқлиги;

лойиҳа ва пудрат ташкилоти — ишлар ва хизматлар ижрочиларида қонун ҳужжатларида назарда тутилган лойиҳалаштириш ва қурилиш фаолиятининг лицензиялаштириладиган турларини амалга ошириш ҳуқуқини берадиган лицензияларнинг мавжудлиги;

бажариладиган қурилиш-монтаж ишларининг сифати ҳамда шаҳарсозлик нормалари ҳамда қоидаларига, техник тартибга солиш соҳасидаги норматив ҳужжатлар ва лойиҳа ҳужжатларига мослиги, шунингдек пудрат ташкилотининг қурилиш соҳасига оид ижро ҳужжатини юритиш;

қурилиш объектида техник тартибга солиш соҳасига оид норматив ҳужжатлар ва лойиҳа ҳужжатларида назарда тутилган синовлар, суратга олиш ва ўлчаш ишлари ўтказилиши юзасидан танлаш асосида назоратни амалга ошириш.

16. Назорат тартибидаги текширув аввалги режали текширувлар ёки қисқа муддатли инспекторлик текшируви давомида аниқланган ҳамда қоидабузарликни бартараф этиш тўғрисидаги кўрсатмаларда қайд этилган қоидабузарликларга барҳам бериш мақсадида назорат бўйича ваколатли давлат органи томонидан ўтказилади ва ушбу вазифа доирасидан четга чиқиши мумкин эмас.

Назорат тартибидаги текширувлар фақат шаҳарсозлик фаолияти субъектига аниқланган қоидабузарликларни бартараф этиш кўрсатмасида берилган муддат тугагандан сўнг ўтказилиши мумкин.

Олдинги таҳрирга қаранг.

17. Қисқа муддатли инспекторлик текширувлари тадбиркорлик субъектлари фаолиятида ўтказиладиган текширувларни мувофиқлаштириш бўйича ваколатли органни хабардор қилган ҳолда (субъектнинг молиявий-хўжалик фаолиятига аралашмасдан) қуйидаги ҳолатларда ўтказилади:

(17-банднинг биринчи хатбошиси Ўзбекистон Республикаси Вазирлар Маҳкамасининг 2019 йил 21 октябрдаги 886-сонли қарори таҳририда — Қонун ҳужжатлари маълумотлари миллий базаси, 22.10.2019 й., 09/19/886/3941-сон)

тасдиқланган лойиҳа ҳужжати, ижобий экспертиза хулосаси ва назорат бўйича ваколатли давлат органи томонидан қурилиш-монтаж ишларини амалга ошириш учун бериладиган рухсатнома мавжуд бўлмаган ҳолда объектни қуриш ёки реконструкция қилишда;

Кейинги таҳрирга қаранг.

шаҳарсозлик фаолияти субъекти технологик жараённи бузганда, иншоотлар, ускуналар ишдан чиққанда, одамлар ҳаёти ва саломатлиги, мол-мулки, атроф-муҳитга зарар етказиши мумкин бўлган авария ҳолатлари юзага келганда;

жисмоний ёки юридик шахснинг шаҳарсозлик фаолияти субъект томонидан мурожаат қилувчининг ҳуқуқлари ҳамда манфаатлари бузилганини тасдиқловчи ҳужжатлар, материаллар ҳамда бошқа маълумотлар илова қилинган ёзма равишдаги аризаси мавжуд бўлганда.

Қисқа муддатли инспекторлик текширувини ўтказиш муддати бир иш кунидан ошмаслиги керак.

18. Объект қурилиши бўйича давлат архитектура-қурилиш назорати назорат функцияларини амалга ошириш шартномаси асосида ўтказилади.

Кейинги таҳрирга қаранг.

Хўжалик субъектлари фаолиятини режали, қисқа муддатли инспекторлик ва назорат тартибида текшириш ушбу Низомга иловага мувофиқ Республикада қурилиш объектларининг мураккаблик (хавфлилик) даражасига кўра, қурилиш-монтаж ишларини амалга ошириш жараёнида текширишларни тайинлаш ва ўтказиш схемаси асосида ўтказилади.

19. Қуйидагилар режали, қисқа муддатли инспекторлик ва назорат тартибида текширувларни ўтказишнинг асосий принциплари ҳисобланади:

назорат органлари фаолиятининг қонунийлиги, холислиги ва ошкоралиги;

юридик ва жисмоний шахсларнинг ҳуқуқлари ҳамда қонуний манфаатларини ҳимоя қилиш;

хўжалик субъектлари, жумладан, молиявий-хўжалик фаолиятига аралашмаслик.

5-боб. Давлат архитектура-қурилиш назоратига олинадиган қурилиш босқичлари

20. Давлат архитектура-қурилиш назорати объект қурилишининг барча босқичларида амалга оширилади.

21. Объектни молиялаштириш манбаидан қатъи назар:

қонун ҳужжатларида белгиланган ҳолатлардан ташқари, объектларни батафсил режалаштиришнинг белгиланган тартибда тасдиқланган бош режаси ва лойиҳалари мавжуд бўлмаганда шаҳар ва туман марказларида жойлаштириш ҳамда қуриш;

Ўзбекистон Президенти ёки Ўзбекистон Республикаси Ҳукуматининг қарорларида назарда тутилган ҳолатлардан ташқари, лойиҳа ҳужжатлари, ижобий экспертиза хулосаси ва назорат бўйича ваколатли давлат органининг қурилиш-монтаж ишларини амалга ошириш учун рухсати бўлмаганда, объектларни қуриш ҳамда реконструкция қилиш қатъиян ман этилади.

Кейинги таҳрирга қаранг.

22. Қуйидагилар давлат архитектура-қурилиш назоратига олинадиган объектларни янгидан қуришнинг асосий босқичлари ҳисобланади:

бино ва иншоот пойдеворини қуриш (хандак ва чуқурликлар);

пойдевор қуриш (ерости, ерусти қисми);

асосий кўтариб турувчи конструкцияларни қуриш (бино ва иншоотлар синчи);

деворлар ва тўсиб турувчи конструкцияларни қуриш;

махсус ишларни бажариш (сантехника, иситиш, шамоллатиш, электрлаштириш ва газлаштириш тизимлари);

бинолар ва фасадни пардозлаш;

том ёпиш ишларини амалга ошириш.

23. Қуйидагилар давлат архитектура-қурилиш назоратига олинадиган объектларни реконструкция қилишнинг асосий босқичлари ҳисобланади:

бино ва иншоотлар замин-пойдеворини мустаҳкамлаш;

пойдевор, кўтариб турувчи ва ўраб турувчи конструкцияларни (деворларни) мустаҳкамлаш;

янги конструкциялар қуриш (шу жумладан, тақаб ва устига қуриладиган бинолар ва бошқа);

бинолар фасадини ўзгартириш ёки хоналарнинг пардозини яхшилаш;

махсус ишларни бажариш (сантехника, иситиш, шамоллатиш, электрлаштириш ва газлаштириш тизимлари);

том ёпиш ишларини амалга ошириш.

Биноларнинг кўтариб турувчи ва ўраб турувчи конструкцияларни (деворларни) мустаҳкамлаш объектларнинг ҳажми ва режалаштириш ҳамда конструктив ечимларини ўзгартирган ҳолда реконструкция қилиш деб ҳисобланади.

24. Бинолар, иншоотларни қуриш ҳамда реконструкция қилишда назорат бўйича ваколатли давлат органи барча босқичларда бажариладиган қурилиш-монтаж ишларининг лойиҳа ечимлари, техник регламентлар, шаҳарсозлик нормалари ва қоидаларига ҳамда техник тартибга солиш соҳасидаги бошқа норматив ҳужжатларга, шунингдек, объектнинг мустаҳкамлиги, хавфсизлиги, сифати, зилзилабардошлиги ва фойдаланишда ишончлилигини таъминлаш бўйича мажбурий талаблар белгиланган норматив-ҳуқуқий ҳужжатларга мувофиқлиги юзасидан танлаш асосида давлат архитектура-қурилиш назоратини амалга ошириш ҳуқуқига эга.

6-боб. Давлат архитектура-қурилиш назоратини амалга ошириш тартиби

25. Шаҳарсозлик фаолияти субъектлари қурилиш-монтаж ишларининг босқичлари якунланишидан икки кун аввал назорат бўйича ваколатли давлат органига ёзма хабарнома юбориши лозим.

26. Назорат бўйича ваколатли давлат органи инспектори назорат бўйича ваколатли давлат органи ва қурилиш буюртмачилари, шунингдек буюртмачилар ҳамда пудрат қурилиш ташкилотлари ўртасида шартнома мавжуд бўлса, қурилиш объектида шаҳарсозлик субъекти томонидан амалга ошириладиган қурилиш ишлари сифатининг қурилиш нормалари ва қоидалари, республика стандартлари, ДАСТ ҳамда техник шартларга мувофиқлиги юзасидан давлат архитектура-қурилиш назоратини амалга оширади.

Кейинги таҳрирга қаранг.

27. Назорат бўйича ваколатли давлат органи инспектори томонидан ўтказиладиган текширувлар, шу жумладан ниҳоясига етказилган қурилиш босқичини қабул қилиш ишлари шаҳарсозлик фаолияти субъекти ваколат берган, техник ҳамда муаллифлик назоратини ўтказадиган, шунингдек объект қурилиши бўйича ишларни бажарувчининг жавобгар шахслари иштирокида амалга оширилади.

Бажарилган ишлар лойиҳа ечимлари, техник регламентлар, шаҳарсозлик нормалари ва қоидалари, техник тартибга солиш соҳасидаги бошқа норматив ҳужжатлар, норматив-ҳуқуқий ҳужжатларга мос келган ҳолларда, шунингдек қурилиш материаллари, буюмлари ва конструкцияларини лабораторияда синовдан ўтказишнинг ижобий натижалари асосида шаҳарсозлик фаолияти субъекти ваколат берган жавобгар шахслар иштирокида мувофиқлик ҳужжати тузилади.

28. Бажарилган ишлар лойиҳа ечимлари, техник регламентлар, шаҳарсозлик нормалари ва қоидалари, техник тартибга солиш соҳасидаги бошқа норматив ҳужжатлар, норматив-ҳуқуқий ҳужжатларга мос келмаслиги аниқланган ҳолларда, шунингдек қурилиш материаллари, буюмлари ва конструкцияларини лабораторияда синовдан ўтказишнинг салбий натижаларига ҳамда талаблари бузилган ҳужжатга асосланган ҳолда қурилиши ниҳоясига етказилган босқичда бажарилган ишларнинг номувофиқлиги тўғрисида ёзма кўрсатма берилади.

Ёзма кўрсатма назорат бўйича ваколатли давлат органи инспектори томонидан шаҳарсозлик фаолияти субъектининг ваколатли шахсига берилади.

Олдинги таҳрирга қаранг.

29. Шаҳарсозлик фаолияти субъектининг ваколатли шахси ёзма кўрсатмада қайд этилган қоидабузарликларни рад этса, назорат бўйича ваколатли давлат органи инспекторининг хатти-ҳаракатлари юзасидан юқори орган — Ўзбекистон Республикаси Қурилиш вазирлигига ёки судга белгиланган тартибда шикоят қилишга ҳақли.

(29-банд Ўзбекистон Республикаси Вазирлар Маҳкамасининг 2019 йил 14 июндаги 498-сонли қарори таҳририда — Қонун ҳужжатлари маълумотлари миллий базаси, 20.06.2019 й., 09/19/498/3310-сон)

30. Аниқланган қоидабузарликларни бартараф этиш бўйича кўрсатма қоидабузарликни тузатиш мумкин бўлган ҳолатларда берилади.

Қурилиш объектининг конструктив ва бошқа хусусиятлари инобатга олиниб, камчиликларни бартараф этишнинг қуйидаги муддатлари ва назорат тартибида текшириш санаси белгиланади:

аниқланган қоидабузарликни бартараф этиш учун — беш иш куни давомида;

қурилишни тўхтатиш (тақиқлаш) — икки иш куни давомида;

қурилиш-монтаж ишларини амалга ошириш учун рухсатнома ва қонун ҳужжатларида назарда тутилган рухсат бериш хусусиятига бошқа ҳужжатларни бериш учун — уч иш куни давомида.

Кейинги таҳрирга қаранг.

31. Назорат натижаларига кўра, аввал аниқланган қоидабузарликларни бартараф этилганида назорат бўйича ваколатли давлат органи инспектори қурилиши якунланган босқичнинг мувофиқлиги тўғрисидаги далолатномада «Қоидабузарликни бартараф этиш тўғрисида кўрсатмалар» устунида тегишли ёзуви қайд этилади.

32. Назорат бўйича ваколатли давлат органи қонун ҳужжатларига мувофиқ қуйидаги ҳолларда қурилиш объектларидаги ишларни тўхтатади:

бинолар, иншоотлар, уларнинг айрим қисмлари ва муҳандислик коммуникацияларининг ўзгариши ёки қулаб тушиши хавфини юзага келтирадиган камчиликлар (ёхуд) қоидабузарликлар аниқланганда;

қурилиш лойиҳаси ўзгартирилганда ёки қурилиш ишлари тасдиқланган лойиҳа ҳужжатларига риоя этмасдан амалга оширилганда.

33. Аниқланган қоидабузарликларни бартараф этиш имконияти бўлмаган ҳолатларда назорат бўйича ваколатли давлат органи инспектори шаҳарсозлик нормалари ва қоидалари бузилган ҳолда бажарилган конструктив элементларни бузиш (ёки демонтаж қилиш) тўғрисида буйруқ чиқаради.

34. Шаҳарсозлик фаолияти субъекти давлат архитектура-қурилиш назоратини амалга ошириш чоғида аниқланган қонун ҳужжатлари талаблари, шаҳарсозлик нормалари ва қоидаларининг бузилиш ҳолатларини бартараф этишга доир кўрсатмаларни бажармаса, унга нисбатан қонун ҳужжатларида белгиланган тартибда маъмурий жавобгарлик чоралари қўлланилади.

Олдинги таҳрирга қаранг.

35. Назорат бўйича ваколатли давлат органи Ўзбекистон Республикаси Қурилиш вазирлигига лойиҳа ечимлари, техник регламентлар, шаҳарсозлик нормалари ва қоидалари, техник тартибга солиш соҳасидаги бошқа норматив ҳужжатлар талаблари бузилишига йўл қўйган ташкилотнинг архитектура-шаҳарсозлик ҳужжатларини ишлаб чиқиш ҳамда қурилиш соҳасида айрим фаолият турларини амалга ошириш ҳуқуқини берадиган лицензияларининг амал қилишини тўхтатиш ёки бекор қилиш тўғрисида таклифлар киритади.

(35-банд Ўзбекистон Республикаси Вазирлар Маҳкамасининг 2019 йил 14 июндаги 498-сонли қарори таҳририда — Қонун ҳужжатлари маълумотлари миллий базаси, 20.06.2019 й., 09/19/498/3310-сон)

7-боб. Текширишларни ўтказишда синовлар

36. Назорат бўйича ваколатли давлат органи инспектори давлат архитектура-қурилиш назоратини амалга оширишда қурилиш материаллари, буюмлари ва конструкцияларини лойиҳа ечимлари, техник регламентлар, шаҳарсозлик нормалари ва қоидалари, техник тартибга солиш соҳасидаги бошқа норматив ҳужжатларнинг бажарилиши мажбурий бўлган талабларига мувофиқлиги юзасидан синовдан ўтказишни тайинлаш ҳуқуқига эга.

37. Синовлар шаҳарсозлик фаолияти субъекти томонидан объект жойлашган жойда ёки танланган намуналарни лабораторияларда (синов қурилиш лабораториялари) лаборатория таҳлили ҳамда синовидан ўтказиш орқали амалга оширилади.

38. Мавжуд бинолар ва иншоотларнинг техник ҳолати уларни қайта тиклаш ёки реконструкция қилиш мақсадга мувофиқлиги бўйича шартномага мувофиқ текширувдан ўтказилади ва бу ҳақида тегишли хулоса берилади.

39. Назорат бўйича ваколатли давлат органи инспектори зарур ҳолларда, шаҳарсозлик фаолияти субъектларининг лойиҳа ечимлари, техник регламентлар, шаҳарсозлик нормалари ва қоидалари, техник тартибга солиш соҳасидаги бошқа норматив ҳужжатлар талабларига риоя этганини аниқлаш мақсадида лаборатория тадқиқотларини ўтказиш учун фойдаланилган қурилиш материаллари, буюмлари ва конструкцияларидан намуналар олиш ҳуқуқига эга.

40. Фойдаланиладиган қурилиш материаллари, буюмлари ва конструкциялари намуналарини танлаш услуби ва миқдори лойиҳа ечимлари, техник регламентлар, шаҳарсозлик нормалари ва қоидалари, техник тартибга солиш соҳасидаги бошқа норматив ҳужжатлар талабларига мос келиши зарур.

41. Қурилишда фойдаланиладиган қурилиш материаллари, буюмлари ва конструкцияларининг лойиҳа ечимлари, техник регламентлар, шаҳарсозлик нормалари ва қоидалари, техник тартибга солиш соҳасидаги бошқа норматив ҳужжатлар талабларига мувофиқлиги бўйича танлаш, етказиб бериш ҳамда синовдан ўтказиш билан боғлиқ сарф-харажатлар шаҳарсозлик фаолияти субъекти ҳисобидан молиялаштирилади.

42. Синовлар назорат бўйича ваколатли давлат органи лабораторияларида назорат бўйича ваколатли давлат органи инспектори ҳамда шаҳарсозлик фаолияти субъекти иштирокида техник тартибга солиш соҳасидаги норматив ҳужжатларга мувофиқ, маҳсулотни назорат ва синовдан ўтказиш услуби ёрдамида ўтказилади.

43. Синовларни ўтказиш муддати ўттиз иш кунидан ошмаслиги зарур.

44. Қурилиш маҳсулотининг лаборатория синовлари натижалари хулоса билан расмийлаштирилади.

45. Объект қурилишида фойдаланиладиган қурилиш материаллари, буюмлари ва конструкцияларининг сифати лойиҳа ечимлари, техник регламентлар, шаҳарсозлик нормалари ва қоидалари, техник жиҳатдан тартибга солиш соҳасидаги меъёрий ҳужжатлар талабларига мос келмаслиги аниқланган ҳолатларда демонтаж қилиниши лозим. Синовларни ўтказиш ва сифатсиз қурилиш материаллари, буюмлари ва конструкцияларини демонтаж қилиш билан боғлиқ сарф-харажатлар шаҳарсозлик фаолияти субъекти ҳисобидан қонун ҳужжатларида белгиланган тартибда қопланади.

46. Шаҳарсозлик фаолияти субъекти синов натижаларидан рози бўлмаган ҳолатларда ўз ихтиёри билан ва ўз ҳисобидан қонун ҳужжатларида белгиланган тартибда аккредитациядан ўтган мустақил лабораторияга ёки экспертга қўйилган масалалар юзасидан лаборатория хулосасини олиш учун мурожаат қилиш ҳуқуқига эга. Бунда олинган лаборатория хулосаси шаҳарсозлик фаолияти субъектининг шикоят материаллари ва текшириш ҳужжатларига илова қилинади.

8-боб. Қоидабузарлик учун жавобгарлик ва назорат бўйича ваколатли давлат органининг ҳаракатлари ҳамда қарорлари юзасидан шикоят қилиш тартиби

47. Назорат бўйича ваколати давлат органи ва унинг мансабдор шахслари давлат архитектура-қурилиш назоратини амалга оширишда ўз функциялари ҳамда хизмат мажбуриятларини тегишли равишда бажармаган ҳолатларда қонун ҳужжатларига мувофиқ жавоб беради.

48. Шаҳарсозлик фаолияти субъектлари шаҳарсозлик фаолиятини амалга оширишда техник тартибга солиш соҳасидаги норматив ҳужжатлар талаблари, шунингдек ушбу Низом талабларини бузса, қонун ҳужжатларига мувофиқ жавоб беради.

Қурилиш объектларининг мураккаблик (хавфлилик) даражасига кўра, қурилиш-монтаж ишларини амалга ошириш жараёнида текширишларни тайинлаш ва ўтказиш тартиби тўғрисидаги низомга
ИЛОВА

Қурилиш объектларининг мураккаблик (хавфлилик) даражасига кўра, қурилиш-монтаж ишларини амалга ошириш жараёнида текширишларни тайинлаш ва ўтказиш

СХЕМАСИ

Кейинги таҳрирга қаранг.

(Қонун ҳужжатлари маълумотлари миллий базаси, 13.10.2017 й., 09/17/820/0105-сон; Қонун ҳужжатлари маълумотлари миллий базаси, 20.06.2019 й., 09/19/498/3310-сон; 22.10.2019 й., 09/19/886/3941-сон; 29.11.2019 й., 09/19/961/4092-сон)