Ҳужжат 04.09.2017 00 санаси ҳолатига
Амалдаги версияга ўтиш
Норасмий таржима
Ўзбекистон Республикаси Президентининг
Қарори
Ахборот-коммуникация технологиялари соҳасида лойиҳа бошқаруви тизимини янада такомиллаштириш чора-тадбирлари тўғрисида
2017 — 2021 йилларда Ўзбекистон Республикасининг ривожлантиришнинг бешта устувор йўналишлари бўйича Ҳаракатлар стратегиясида белгиланган «Электрон Ҳукумат» тизимини янада ривожлантириш, иқтисодиёт тармоқларида ахборот тизимларини татбиқ этиш ва жамоат тартибини таъминлаш вазифаларини амалга ошириш мақсадида, шунингдек, Ўзбекистон Республикаси Президентининг «Ўзбекистон Республикаси Президенти ҳузуридаги Лойиҳа бошқаруви миллий агентлиги фаолиятини ташкил этиш тўғрисида» 2017 йил 27 июлдаги ПҚ-3150-сонли қарорига мувофиқ:
1. Ўзбекистон Республикаси Ахборот технологиялари ва коммуникацияларини ривожлантириш вазирлигининг Компьютер ва ахборот технологияларини ривожлантириш ва жорий этиш маркази «Узинфоком» негизида Давлат ахборот тизимларини яратиш ва қўллаб-қувватлаш бўйича ягона интегратор ташкил этилсин (кейинги ўринларда — Ягона интегратор деб юритилади).
2. Қуйидагилар Ягона интеграторнинг асосий вазифалари этиб белгилансин:
«Электрон ҳукумат» тизимида ахборот тизимлари, ресурслари ва дастурий маҳсулотларни ҳамда иқтисодиёт тармоқларида ахборот технологияларини ишлаб чиқиш, жорий этиш ва интеграциялашни, аппарат-дастурий комплексларни ўрнатишни, шунингдек, тегишли лойиҳа ва техник ҳужжатларни тайёрлашни таъминлаш;
аҳолига ва тадбиркорлик субъектларига электрон давлат хизматлари кўрсатиш сифатини такомиллаштириш бўйича комплекс чора-тадбирларни амалга ошириш;
«Электрон ҳукумат» тизими лойиҳаларини амалга оширишга ҳамда иқтисодиёт тармоқларида ахборот технологияларини жорий этишга мамлакат корхоналари ва ташкилотларини тизимли жалб этиш ҳисобига ахборот-коммуникация технологиялари ва дастурий маҳсулотларининг маҳаллий бозорини ривожлантиришга кўмаклашиш:
«Электрон ҳукумат» тизими инфратузилмасининг, давлат органлари, хўжалик бошқаруви органлари, давлат корхоналари ва ташкилотларининг (кейинги ўринларда — давлат органлари ва бошқа ташкилотлар деб юритилади) ахборот тизимлари, ресурслари ва дастурий маҳсулотларининг технологик хавфсизлигини таъминлаш чораларини амалга ошириш;
давлат органлари ва бошқа ташкилотлар ўртасида, шу жумладан, Ўзбекистон Республикаси Лойиҳа бошқарувининг ягона миллий ахборот тизими фаолияти доирасида ахборот тизимларини ҳамда идоралараро электрон ҳамкорлик ва ахборот айирбошлаш тармоқларини жорий этиш;
халқаро стандартларга мувофиқ, юқори технологияли хизматлар ва маҳсулотлар турини кенгайтириш ҳисобига ахборот-коммуникация технологиялари ва дастурий маҳсулотлар маҳаллий бозорининг экспорт салоҳиятини оширишга кўмаклашиш.
4. Ягона интеграторга:
унинг зиммасига юкланган вазифаларни амалга ошириш мақсадида, телекоммуникациялар соҳасида фаолият юритиш ҳамда қонунчиликда белгиланган талаблар ва шартларга риоя этилган ҳолда, тегишли лицензиялар ва рухсат берувчи ҳужжатларни олмасдан ўқув курсларини ташкил этишга;
Кейинги таҳрирга қаранг.
Кейинги таҳрирга қаранг.
энг яхши таклифларни танлаб олиш асосида лойиҳа ва техник ҳужжатларни тайёрлаш, ахборот тизимлари, ресурслари ва дастурий ҳужжатларни ишлаб чиқиш бўйича пудрат ва ёрдамчи пудрат ишларини бажариш юзасидан хўжалик юритувчи субъектлар билан шартномалар тузишга рухсат берилсин.
5. Давлат органлари ва бошқа ташкилотларга тендер (танлов) савдолари ўтказмасдан лойиҳа ва техник ҳужжатларни тайёрлаш, ахборот тизимлари, ресурслари ва дастурий маҳсулотларни ишлаб чиқиш бўйича Ягона интегратор билан шартномалар тузиш ҳуқуқи берилсин.
Кейинги таҳрирга қаранг.
6. Ўзбекистон Республикаси Ахборот технологиялари ва коммуникацияларини ривожлантириш вазирлигининг Ахборот хавфсизлигини таъминлаш маркази Ўзбекистон Республикаси Ахборот технологиялари ва коммуникацияларини ривожлантириш вазирлигининг Ахборот хавфсизлиги ва жамоат тартибини таъминлашга кўмаклашиш маркази (кейинги ўринларда — Марказ деб юритилади) этиб қайта ташкил қилинсин.
Кейинги таҳрирга қаранг.
7. Қуйидагилар Марказнинг асосий вазифалари этиб белгилансин:
ахборот хавфсизлигига солинаётган ҳозирги хавф-хатар тўғрисидаги маълумотларни йиғиш, таҳлил қилиш ва жамғариш, давлат органларининг ахборот тизимларига, ресурслари ва маълумотлар базасига ноқонуний суқилиб кириш ҳаракатларининг олдини олишни таъминлайдиган ташкилий ҳамда дастурий техник ечимларни самарали қабул қилиш бўйича тавсиялар ва таклифларни ишлаб чиқиш;
«Хавфсиз шаҳар» ягона аппарат-дастурий комплексини яратиш (кейинги ўринларда — «Хавфсиз шаҳар» комплекси деб юритилади), ушбу комплекс ички ишлар органлари, давлат органлари ва бошқа ташкилотларнинг ахборот тизимлари, видеокузатув тизимлари, ҳуқуқбузарликларнинг қайд этилиши, объектлар қўриқланишини, эҳтимол тутилган хавф-хатарлар тўғрисида барвақт хабардор қилиш ва уларга эътибор қаратиш интеллектуал таҳлил ускуналари, шунингдек, ҳуқуқбузарликларнинг профилактикаси бўйича бошқа ахборот тизимлари, навбатчи-диспетчерлик марказлари ҳамда маълумотларга ишлов берувчи марказларнинг интеграциялашуви назарда тутилади;
ахборот-коммуникация технологияларидан фойдаланиш соҳасида ҳуқуқбузарликларнинг олдини олиш масалалари бўйича давлат органлари ва бошқа ташкилотлар фаолиятларини мувофиқлаштириш;
ахборот маконида рухсатсиз ёки бузғунчиликдан иборат ҳатти-ҳаракатларни амалга ошириш чоғида фойдаланиладиган усуллар ва воситаларни таҳлил қилиш, бузғунчиларни аниқлашда телекоммуникациялар тармоқларининг операторлари ва провайдерлари, ҳуқуқни муҳофаза қилиш органлари билан ҳамкорлик қилиш.
Ўзбекистон Республикаси Вазирлар Маҳкамаси бир ой муддатда Марказ фаолиятини ташкил этиш тўғрисида қарор қабул қилсин.
Кейинги таҳрирга қаранг.
8. «Хавфсиз шаҳар» ягона аппарат-дастурий комплексини яратиш бўйича босқичма-босқич чора-тадбирлар дастури 1-иловага мувофиқ тасдиқлансин.
Белгилансинки, Ўзбекистон Республикаси Ахборот технологиялари ва коммуникацияларини ривожлантириш вазирлиги, Ички ишлар вазирлиги, Қорақалпоғистон Республикаси Вазирлар Кенгаши, вилоятлар, шаҳар ва туманлар ҳокимликлари, шунингдек, бошқа вазирликлар, идораларнинг раҳбарлари — Дастур ижрочилари унда назарда тутилган тадбирларнинг тўлиқ миқёсда, ўз вақтида ва сифатли амалга оширилиши учун шахсан жавобгар бўладилар.
9. «Хавфсиз шаҳар» ягона аппарат-дастурий комплексини яратиш лойиҳасини амалга оширишни мувофиқлаштириш бўйича Комиссия 2-иловага мувофиқ таркибда тузилсин, қуйидагилар унинг асосий вазифалари этиб белгилансин:
«Хавфсиз шаҳар» комплексини яратиш лойиҳасини тўлиқ миқёсда, ўз вақтида ва сифатли амалга оширилишини таъминлаш бўйича давлат органлари ва бошқа ташкилотлар фаолиятини тизимли мувофиқлаштириб бориш;
«Хавфсиз шаҳар» комплексини яратиш концепциясини ишлаб чиқиш ва янада ривожлантириш, уни «Электрон ҳукумат» тизимлари, шунингдек, давлат органлари ва бошқа ташкилотларнинг ахборот тизимлари билан интеграциялаш;
жамоат хавфсизлиги ва ҳуқуқ-тартибот масалаларида фаолият самарадорлиги ҳамда тезкорлигини ошириш учун «Хавфсиз шаҳар» комплексини яратиш ва уни ривожлантириш билан боғлиқ масалалар юзасидан давлат органлари ҳамда бошқа ташкилотларнинг ахборот соҳасидаги ҳамкорлиги самарали тизимини шакллантириш бўйича қарорлар қабу қилиш;
«Хавфсиз шаҳар» комплексини яратиш бўйича лойиҳалар ва тадбирларни амалда рўёбга чиқариш борасида давлат органлари ва бошқа ташкилотлар раҳбарлари ҳамда мансабдор шахсларининг шахсий ҳисоботларини тинглаш ва уларнинг жавобгарлиги тўғрисидаги масалаларни кўриб чиқиш;
«Хавфсиз шаҳар» комплексини яратиш лойиҳасини амалга ошириш ва уни янада ривожлантиришни самарали молиялаштириш, шунингдек, халқаро молия институтларининг маблағларини жалб этиш бўйича қарор қабул қилиш.
Кейинги таҳрирга қаранг.
10. Ўзбекистон Республикаси Ташқи ишлар вазирлиги Ахборот технологиялари ва коммуникацияларини ривожлантириш вазирлиги ҳамда Ички ишлар вазирлигининг буюртманомалари бўйича «Хавфсиз шаҳар» комплексини яратиш лойиҳасини амалга ошириш доирасида жалб этиладиган хорижий мутахассисларнинг кириш визалари, консуллик ва бошқа йиғимлар ундирилмасдан расмийлаштирилишини таъминласин.
11. Ўзбекистон Республикаси Ички ишлар вазирлиги Ахборот технологиялари ва коммуникацияларини ривожлантириш вазирлигининг буюртманомалари бўйича «Хавфсиз шаҳар» комплексини яратиш лойиҳасини амалга ошириш доирасида жалб этиладиган хорижий мутахассисларнинг кўп марталик визалари давлат божи ундирилмасдан расмийлаштирилиши, топширилиши ва муддати узайтирилишини, шунингдек, улар турган жой бўйича муваққат прописка ва ҳисобга қўйилишини таъминласин.
Кейинги таҳрирга қаранг.
12. «Хавфсиз шаҳар» комплексини яратиш лойиҳасининг ўз вақтида, тўлиқ миқёсли ва сифатли амалга оширилиши учун масъул бўлган Ўзбекистон Республикаси Ахборот технологиялари ва коммуникацияларини ривожлантириш вазирининг ўринбосари лавозими киритилсин.
Кейинги таҳрирга қаранг.
12. Ўзбекистон Республикаси Ахборот технологиялари ва коммуникацияларини ривожлантириш вазирлиги икки ой муддатда вазирлик марказий аппарати ва ҳудудий бўлинмаларининг ташкилий штат тузилмаларини такомиллаштириш бўйича Вазирлар Маҳкамасига таклифлар киритсин.
13. Қуйидагилар белгилансин:
2018 йилнинг 1 январидан бошлаб мобил алоқа операторлари абонент рақамидан фойдаланганлик учун тўлаётган маблағларининг 70 фоизи Ахборот-коммуникация технологияларини ривожлантириш жамғармасига йўналтирилади, ушбу маблағлардан «Электрон ҳукумат» ва ахборот технологиялари, шу жумладан, жамоат хавфсизлиги, ҳуқуқ-тартиботни таъминлаш ва ҳуқуқбузарликлар профилактикаси бўйича ахборот-коммуникация технологиялари тизимини жорий этиш ҳамда ривожлантириш инвестиция лойиҳалари ва дастурларини амалга оширишда, шунингдек, Ўзбекистон Республикаси Ахборот технологиялари ва коммуникацияларини ривожлантириш вазирлиги ҳамда унинг алоҳида таркибий бўлинмалари фаолиятини молиялаштиришда мақсадли фойдаланилади, қолган қисми эса Ўзбекистон Республикасининг Давлат бюджетига ўтказилади;
Кейинги таҳрирга қаранг.
Марказ фаолиятини, меҳнатга ҳақ тўлаш фондини молиялаштириш ҳамда унинг ходимларини қўшимча рағбатлантириш, шунингдек, моддий-техникавий жиҳатдан таъминлаш «Хавфсиз шаҳар» комплексидан фойдаланган ҳолда, аниқланган ҳуқуқбузарликлар учун жарималар тўлашдан тушадиган сумманинг 10 фоизи миқдоридаги маблағлар ҳисобидан, етишмай қолган қисми эса Ахборот-коммуникация технологияларини ривожлантириш жамғармаси маблағлари ҳисобидан амалга оширилади;
Кейинги таҳрирга қаранг.
тўланадиган давлат божи ва Ўзбекистон Республикаси Интерактив давлат хизматлари ягона портали орқали кўрсатиладиган давлат хизматлари учун йиғимлар суммасининг 10 фоизи миқдоридаги маблағлар интерактив давлат хизматлари ягона порталини янада ривожлантириш фаолиятини молиялаштириш ҳамда вазирлик ходимларини қўшимча рағбатлантириш манбаи сифатида Ўзбекистон Республикаси Ахборот технологиялари ва коммуникацияларини ривожлантириш вазирлигининг ваколатли банкдаги махсус ҳисоб варағига ўтказилади;
Кейинги таҳрирга қаранг.
Ягона интегратор дастурий маҳсулотларни ишлаб чиқиш, ахборот тизимлари ва ресурсларини татбиқ этиш ҳамда интеграциялаш бўйича жами ишларнинг камида 30 фоизини ахборот-коммуникация технологиялари ва дастурий маҳсулотларни ишлаб чиқиш соҳасидаги маҳаллий корхоналар ва ташкилотларга тизимли асосда топширади.
14. Ўзбекистон Республикаси Вазирлар Маҳкамаси 2017 йилнинг 15 декабрига қадар муддатда амалдаги қонунчиликни ва илғор хорижий тажрибани таҳлил қилишни, шунингдек, кенг жамоатчилик муҳокамаси натижаларини ҳисобга олган ҳолда 2018 — 2021 йилларда «Электрон ҳукумат» тизимини янада такомиллаштириш ва электрон давлат хизматлари кўрсатиш комплекс дастурини тасдиқлашни назарда тутувчи Ўзбекистон Республикаси Президентининг қарори лойиҳасини киритсин.
15. Ўзбекистон Республикаси Ахборот технологиялари ва коммуникацияларини ривожлантириш вазирлиги манфаатдор вазирликлар ва идоралар билан биргаликда икки ой муддатда қонун ҳужжатларига ушбу қарордан келиб чиқадиган ўзгартиш ва қўшимчалар тўғрисида Вазирлар Маҳкамасига таклифлар киритсин.
16. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президентининг Давлат маслаҳатчиси О.Б. Муродов ва Ўзбекистон Республикаси Президенти ҳузуридаги Лойиҳа бошқаруви миллий агентлиги директори Ш.М. Содиқов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2017 йил 29 август,
ПҚ-3245-сон
Ўзбекистон Республикаси Президентининг 2017 йил 29 августдаги ПҚ-3245-сон қарорига
1-ИЛОВА
«ХАВФСИЗ ШАҲАР» ЯГОНА АППАРАТ-ДАСТУРИЙ КОМПЛЕКСИНИ ЯРАТИШ БЎЙИЧА БОСҚИЧМА-БОСҚИЧ АМАЛГА ОШИРИЛАДИГАН ЧОРА-ТАДБИРЛАР
ДАСТУРИ

Т/р

Чора-тадбирларнинг номланиши

Амалга ошириш механизми

Ижро муддатлари

Масъул ижрочилар

I. «ХАВФСИЗ ШАҲАР» ЯГОНА АППАРАТ-ДАСТУРИЙ КОМПЛЕКСИНИ БОСҚИЧМА-БОСҚИЧ ЖОРИЙ ЭТИШ БЎЙИЧА ТАШКИЛИЙ ЧОРА-ТАДБИРЛАР

1.

Автоматлаштириш объектлари, бинолар ва иншоотларнинг мавжуд ахборот-коммуникация инфратузилмасини лойиҳаолди ўрганиш, шошилинч-оператив хизматлар, чақирувларни қайта ишлаш ягона навбатчи-диспетчерлик марказлари, фойдаланилаётган ахборот тизимлари, ресурслари ва маълумотлар базалари фаолиятини таҳлил қилиш.

Таҳлилий маълумот

2017 йил

20 октябрга қадар

Ахборот технологиялари ва коммуникацияларини ривожлантириш вазирлиги

(Ш. Шерматов), ИИВ (А. Азизов)

2.

«Хавфсиз шаҳар» комплекси концепциясини яратиш учун ҳуқуқбузарлик ва фавқулодда вазиятларнинг олдини олиш мониторинги тизимларида фойдаланиладиган замонавий технологияларни жорий этиш бўйича халқаро тажрибани ўрганиш ва таҳлил қилиш.

Таҳлилий маълумот

2017 йил

20 октябрга қадар

Ахборот технологиялари ва коммуникацияларини ривожлантириш вазирлиги

(Ш. Шерматов), ИИВ (А. Азизов)

ТИФ (А. Комилов)

3.

Ўзбекистон Республикаси Ахборот технологиялари ва коммуникацияларини ривожлантириш вазирлигининг Ахборот хавфсизлиги ва жамоат тартибини таъминлашга кўмаклашиш маркази фаолиятини ташкил этиш.

Вазирлар Маҳкамаси қарори лойиҳаси

2017 йил

20 сентябрга қадар

Ахборот технологиялари ва коммуникацияларини ривожлантириш вазирлиги

(Ш. Шерматов), ИИВ (А. Азизов),

Молия вазирлиги (Б. Ходжаев),

манфаатдор вазирлик ва идоралар

4.

«Хавфсиз шаҳар» аппарат-дастурий комплексини яратиш ва янада ривожлантириш Концепциясини тасдиқлаш, бунда қуйидагилар орқали лойиҳани босқичма-босқич амалга ошириш назарда тутилади:

биринчи босқич (2017 — 2019 йиллар) синов асосида — Тошкент шаҳри бўйича жиноятлар ва фавқулодда ҳодисалар тўғрисида хабарларни қабул қилиб олиш ва рўйхатдан ўтказиш автоматлаштирилган ахборот тизимининг видео таҳлил қилиш ва видео кузатиш тизимлари билан «Хавфсиз шаҳар» комплексини яратиш;

иккинчи босқич (2019 — 2021 йиллар) — «Хавфсиз шаҳар» комплексини вилоят марказлари ва республиканинг йирик шаҳарларида жорий этиш;

учинчи босқич (2021 — 2023 йиллар) — «Хавфсиз шаҳар» комплексини Ўзбекистон Республикасининг барча ҳудудида жорий этиш.

Комиссия қарори

2017 йил

1 октябрга қадар

Комиссия (А. Арипов)

5.

«Хавфсиз шаҳар» комплексини яратиш ва ривожлантириш бўйича техник топшириқларни қўшимча равишда ишлаб чиқиш.

Техник топшириқ

2017 йил

15 ноябрга қадар

Ахборот технологиялари ва коммуникацияларини ривожлантириш вазирлиги

(Ш. Шерматов), ИИВ (А. Азизов),

вазирликлар ва идоралар

6.

Ўзбекистон Республикаси Ахборот технологиялари ва коммуникацияларини ривожлантириш вазирлигининг Ахборот хавфсизлиги ва жамоат тартибини таъминлашга кўмаклашиш марказининг ички ишлар органлари, давлат органлари ва бошқа ташкилотлар билан ўзаро ҳамкорлиги бўйича регламентларни ишлаб чиқиш.

Комиссия қарори

2017 йил

1 декабрга қадар

Комиссия (А. Арипов), вазирликлар ва идоралар

7.

Жамоат транспортида йўловчилар оқимини кузатиш ва профилактика ишларини олиб бориш учун интеллектуал-таҳлилий видеокузатув тизимини жорий этишни назарда тутган ҳолда жамоат транспортида йўлкира ҳақини тўлашни автоматлаштириш лойиҳасини амалга ошириш доирасида «Хавфсиз шаҳар» комплексидан фойдаланган ҳолда Тошкент шаҳридаги жамоат транспортида хавфсизликни бошқариш ва аҳолига хизмат кўрсатиш сифати бўйича лойиҳани тайёрлаш ва амалга ошириш.

Комиссия қарори

2017 йил

1 декабрга қадар

Комиссия (А. Арипов), вазирликлар ва идоралар

8.

«Хавфсиз шаҳар» комплексини яратишга техник-иқтисодий ҳисоб-китобларни ишлаб чиқиш.

Ўзбекистон Республикаси Президентининг қарори лойиҳаси

2017 йил

1 декабрга қадар

Ахборот технологиялари ва коммуникацияларини ривожлантириш вазирлиги

(Ш. Шерматов), ИИВ (А. Азизов),

ФВВ (Р. Жўраев), ССВ (А. Шодмонов), ХТВ (У. Иноятов),

Олий ва ўрта махсус таълим вазирлиги (И. Мажидов),

вазирликлар ва идоралар

9.

Хорижий мамлакатларнинг тажрибасидан келиб чиққан ҳолда «Хавфсиз шаҳар» комплексининг техник воситалари ва бошқа элементларини ишлаб чиқаришни маҳаллийлаштириш имкониятларини ўрганиш, Ўзбекистон Республикаси Ахборот технологиялари ва коммуникацияларини ривожлантириш вазирлиги томонидан зарур техник воситалар ва аппарат-дастурий комплекси бошқа элементларнинг муайян рўйхатини тақдим этиш.

Таҳлилий маълумот

2017 йил

1 октябрга қадар

«Ўзэлтехсаноат» АК (Ф. Бакиев), ИИВ (А. Азизов), Ахборот технологиялари ва коммуникацияларини ривожлантириш вазирлиги (Ш. Шерматов), Иқтисодиёт вазирлиги (Г. Саидова), Давлат рақобат қўмитаси (Р. Ғуломов), Инвестициялар бўйича давлат қўмитаси (А. Ахмедходжаев), вазирликлар ва идоралар

10.

«Хавфсиз шаҳар» комплексини яратиш бўйича лойиҳани амалга ошириш учун етказиб берувчиларни белгилаш ва контрактлар тузиш.

Тендер савдолари ўтказиш

2018 йил

1 мартга қадар

Ахборот технологиялари ва коммуникацияларини ривожлантириш вазирлиги (Ш. Шерматов), ИИВ (А. Азизов), вазирликлар ва идоралар

11.

Видеокузатув камералари, шошилинч чақириш мосламалари ўрнатиш, маълумотларни қайта ишлаш марказлари ва вазиятни ўрганиш марказларини ташкил этиш учун объектлар жойлаштириладиган жойларни тайёрлаш.

Қурилиш-монтаж ишлари

жадвалга мувофиқ

Тошкент шаҳар ҳокимлиги (Р. Усмонов), ИИВ (А. Азизов),

«Маҳалла» жамғармаси (Ш. Жавлонов), Ахборот технологиялари ва коммуникацияларини ривожлантириш вазирлиги (Ш. Шерматов)

12.

Видеокузатув камералари, тезкор чақириш мосламалари ва мобил видеорегистраторларни монтаж қилиш ва ишга тушириш бўйича ишларни ташкил этиш, шунингдек, «Хавфсиз шаҳар» комплексидан фойдаланиш.

Монтаж-эксплуатация ишлари

жадвалга мувофиқ

Ахборот технологиялари ва коммуникацияларини ривожлантириш вазирлиги (Ш. Шерматов), ИИВ (А. Азизов), Тошкент шаҳар ҳокимлиги (Р. Усмонов), вазирликлар ва идоралар

13.

Зарур объектларни аниқлашнинг илғор технологияларини қўллаган ҳолда автотранспорт учун жамоат интеллектуал автомобиль тураргоҳларида аппарат-дастурий ечимларини жорий этиш ҳамда «Хавфсиз шаҳар» комплексини янада ривожлантириш доирасида онлайн тўловларни ташкил этиш.

Жадвал

2017 йил

1 ноябрга қадар тасдиқлаш

2018-2019 йилларда амалга ошириш

Ахборот технологиялари ва коммуникацияларини ривожлантириш вазирлиги (Ш. Шерматов), ИИВ (А. Азизов), Тошкент шаҳар ҳокимлиги (Р. Усмонов), Марказий банк (М. Нурмуратов)

14.

Талаб этиладиган электрон давлат хизматларини шакллантириш учун «Хавфсиз шаҳар» ахборот тизимлари комплексини «Электрон ҳукумат» тизими билан босқичма-босқич интеграция қилиш.

Техник лойиҳалар

Лойиҳага мувофиқ

Ахборот технологиялари ва коммуникацияларини ривожлантириш вазирлиги (Ш. Шерматов), ИИВ (А. Азизов), ФВВ (Р. Жўраев), ССВ (А. Шадманов), ХТВ (У. Иноятов), Олий ва ўрта махсус таълим вазирлиги (И. Мажидов), вазирликлар ва идоралар

II. КАДРЛАРНИ ТАЙЁРЛАШ ВА МАЛАКАСИНИ ОШИРИШНИ ТАШКИЛ ЭТИШ

15.

Жамоат хавфсизлиги ва ҳуқуқбузарликларнинг олдини олишни таъминлаш соҳасида замонавий ахборот технологияларини жорий этиш бўйича хорижий тажрибани ўрганишни ташкил этиш.

Таҳлилий маълумот

2017 йил

15 сентябрга қадар

Ахборот технологиялари ва коммуникацияларини ривожлантириш вазирлиги (Ш. Шерматов), ТИВ (А. Камилов), ИИВ (А. Азизов), ФВВ (Р. Жўраев), Тошкент шаҳар ҳокимлиги (Р. Усмонов), вазирликлар ва идоралар

16.

Замонавий ахборот-коммуникация технологияларидан фойдаланиш бўйича маҳаллий давлат ҳокимияти ва ички ишлар органлари ходимларининг малакасини ошириш учун ўқув курслари ва махсус таълим дастурларини ташкил этиш.

Чора-тадбирлар комплекси

тасдиқланиши — 2017 йил

1 ноябрга қадар

Ахборот технологиялари ва коммуникацияларини ривожлантириш вазирлиги (Ш. Шерматов), Олий ва ўрта махсус таълим вазирлиги (И. Мажидов), ИИВ (А. Азизов), Қорақалпоғистон Республикаси Вазирлар Кенгаши, вилоятлар, туманлар ва шаҳарлар ҳокимликлари

17.

Компьютер ва ахборот технологиялари соҳасида самарадорликни ошириш ва таълим олишни такомиллаштириш учун Ўзбекистон Республикаси Ички ишлар вазирлиги таълим муассасаларининг ўқув режалари ва дастурларини қайта кўриб чиқиш.

Комиссия қарори

2017 йил

1 декабрга қадар

Комиссия (А. Арипов), вазирликлар ва идоралар

III. АҲОЛИ ЎРТАСИДА «ХАВФСИЗ ШАҲАР» КОМПЛЕКСИ КОНЦЕПЦИЯСИНИ ИЛГАРИ СУРИШ ВА ТАРҒИБ ҚИЛИШ БЎЙИЧА ТАДБИРЛАР

18.

Аҳоли орасида «Хавфсиз шаҳар» комплекси концепциясини қуйидагилар орқали тарғиб қилишни ташкил этиш:

телерадио кўрсатувлар, ижтимоий видеороликлар;

босма нашрларда, Интернет тармоғи ва бошқа оммавий ахборот воситаларида

таҳлилий мақолалар тайёрлаш;

тегишли материалларни кўча баннерларида, оммавий ижтимоий тармоқларда жойлаштириш.

Комиссия қарори

2017 йил

1 декабрга қадар

Комиссия (А. Арипов), вазирликлар ва идоралар

19.

Жаҳон ҳамжамиятида Ўзбекистоннинг туристик ва инвестициявий жозибадорлигини ошириш мақсадида республиканинг «Worldʼs Safest Countries»да рейтингини қўллаб-қувватлаш ва ошириш учун тадбирлар ташкил қилиш.

Ташкилий чора-тадбирлар

2017-2018 йиллар

Туризмни ривожлантириш давлат қўмитаси (А. Абдуҳакимов), Инвестициялар бўйича давлат қўмитаси (А. Ахмедходжаев), ТИВ (А. Камилов), Ахборот технологиялари ва коммуникацияларини ривожлантириш вазирлиги (Ш. Шерматов), ИИВ (А. Азизов), МТРК (Б. Алиханов), ЎзА (А. Кўчимов), вазирликлар ва идоралар

Изоҳ. «Хавфсиз шаҳар» ягона аппарат-дастурий комплексини яратиш лойиҳасини амалга оширишни мувофиқлаштириш бўйича комиссияси ушбу Дастурга, зарур ҳолларда, ўзгартиришлар ва қўшимчалар киритишга ҳақли.
Кейинги таҳрирга қаранг.
Ўзбекистон Республикаси Президентининг 2017 йил 29 августдаги ПҚ-3245-сон қарорига
2-ИЛОВА
«Хавфсиз шаҳар» ягона аппарат-дастурий комплексини яратиш лойиҳасини мувофиқлаштиришни амалга ошириш бўйича комиссия
ТАРКИБИ

А.Н. Арипов

—

Ўзбекистон Республикасининг Бош вазири, Комиссия раиси

А.А. Азизов

—

Ўзбекистон Республикаси ички ишлар вазири, Комиссия раисининг ўринбосари

Ш.Х. Шерматов

—

Ахборот технологиялари ва коммуникацияларини ривожлантириш вазири в.б., Комиссия раисининг ўринбосари

Ш.М. Содиқов

—

Ўзбекистон Республикаси Президенти ҳузуридаги Лойиҳа бошқаруви миллий агентлиги директори

Б.А. Ходжаев

—

Ўзбекистон Республикаси молия вазири

У.И. Иноятов

—

Ўзбекистон Республикаси халқ таълими вазири

И.У. Мажидов

—

Ўзбекистон Республикаси олий ва ўрта махсус таълим вазири

А.К. Шодмонов

—

Ўзбекистон Республикаси соғлиқни сақлаш вазири

Р.M. Жўраев

—

Ўзбекистон Республикаси фавқулодда вазиятлар вазири

Р.К. Давлетов

—

Ўзбекистон Республикаси адлия вазири

Э.М. Ғаниев

—

Ўзбекистон Республикаси ташқи савдо вазири

М.Б. Азимов

—

Ўзбекистон Республикаси Бош прокурорининг биринчи ўринбосари

Р.Х. Гулямов

—

Ўзбекистон Республикаси Миллий хавфсизлик хизмати раисининг ўринбосари

А.И. Ахмедходжаев

—

Ўзбекистон Республикаси Инвестициялар бўйича давлат қўмитаси раиси

Б.Р. Парпиев

—

Ўзбекистон Республикаси Давлат солиқ қўмитаси раиси

М.В. Тохирий

—

Ўзбекистон Республикаси Давлат божхона қўмитаси раиси

Ф.Х. Бакиев

—

«Ўзэлтехсаноат» АК бошқаруви раиси

Р.Д. Усмонов

—

Тошкент шаҳар ҳокими

Б.Н. Қурбонов

—

Тошкент шаҳар ички ишлар Бош бошқармаси бошлиғи

Изоҳ. Ишчи гуруҳ таркиби аъзолари бошқа ишга ўтган тақдирда, унинг таркибига ушбу лавозимларга янгидан тайинланган шахслар киритилади.
Кейинги таҳрирга қаранг.