Ўзбекистон Республикаси Президентининг «Автомобиль транспорти соҳасида монополиядан чиқариш ва бошқарувни такомиллаштириш тўғрисида» 2001 йил 4 июндаги ПФ-2871-сон Фармонига мувофиқ, шунингдек республика ва ҳудудий даражаларда автомобиль транспортини бошқаришнинг самарали ташкилий тузилмасини барпо этиш мақсадида Вазирлар Маҳкамаси қарор қилади:

1. Ўзбекистон автомобиль транспорти («Ўзавтотранс») давлат-акционерлик корпорациясини тугатиш бўйича 1-иловага* мувофиқ таркибда комиссия ташкил этилсин.

Тугатиш комиссияси белгиланган тартибда икки ой муддатда «Ўзавтотранс» корпорациясини тугатиш чора-тадбирларини амалга оширсин, корпорация, шунингдек унинг таркибига кирувчи бўлинмалар балансидаги давлат мулкини хатловдан ўтказсин ва ундан бундан буён самарали фойдаланиш юзасидан Ўзбекистон Республикаси Давлат мулки қўмитасига таклифлар киритсин.

2. Тугатилаётган «Ўзавтотранс» корпорациясига кирган бирлашмалар ва компаниялар муассисларининг, Ўзбекистон Республикаси Давлат мулки қўмитасининг:

«Ўзтрансхизмати» давлат-акциядорлик бирлашмаси, «Ўзтранстараққиёт» давлат-акциядорлик компанияси, «Ўзавтоходим» давлат-акциядорлик бирлашмасини тугатиш, улар таркибига кирган корхоналар ва ташкилотларни автомобилда юк ва йўловчилар ташиш ҳудудий уюшмаларига бериш;

«Тошвилоятйўловчитранс» давлат-акциядорлик компанияси ва «Тошвилоятюктранс» давлат-акциядорлик компаниясини «Тошвилтранс» автомобилда юк ва йўловчилар ташиш ҳудудий уюшмасига айлантириш;

«Ўзвилоятларароавтотранс» республика давлат-акциядорлик бирлашмаси, «Ўзтранссаноат» республика уюшмаси, «Йўловчи» суғурта компанияси, «BK INTRANS» очиқ акциядорлик жамиятининг Ўзбекистон автомобиль ва дарё транспорти агентлиги билан ўзаро ҳамкорлик қилувчи мустақил хўжалик юритувчи субъектлар сифатида фаолият кўрсатиши тўғрисидаги таклифлари қабул қилинсин.

3. «Хоразмдарёфлот» бошқармаси тугатилсин, унга қарашли ташкилотлар Хоразм вилояти автомобилда юк ва йўловчилар ташиш ҳудудий уюшмаси таркибига берилсин.

Ўзбекистон Республикаси Давлат мулки қўмитаси «Хоразмдарёфлот» бошқармасини тугатиш чора-тадбирларини белгиланган тартибда икки ой муддатда амалга оширсин.

Ўзбекистон Республикаси Молия вазирлиги дарё йўлларининг Хўжайли ва Чалиш техник участкаларини маблағ билан таъминлашни республика бюджетидан Қорақалпоғистон Республикаси ва Хоразм вилояти маҳаллий бюджетларидан маблағ билан таъминлашга ўтказсин.

4. Қуйидагилар:

автомобиль ва дарё транспортини бошқаришнинг ташкилий тузилмаси 2-иловага мувофиқ;

республика бирлашмалари ва уюшмалари, автомобилда юк ва йўловчилар ташиш ҳудудий уюшмалари таркибига берилаётган корхоналар ва ташкилотлар рўйхати 3-иловага* мувофиқ;

автомобилда юк ва йўловчилар ташиш ҳудудий уюшмаси бошқаруви ижро этувчи аппаратининг намунавий тузилмаси 4-иловага мувофиқ маъқуллансин.

5. Тугатиш комиссияси белгиланган тартибда:

«Автотранспорт Узбекистана» журнали, «Ўзбекистон автомобилчиси» газетаси таҳририятларини ва автомобиль транспортида хизматларни сертификатлаш республика марказини Ўзбекистон автомобиль ва дарё транспорти агентлиги ихтиёрига;

тугатилаётган «Ўзавтотранс» корпорациясининг 5-иловага мувофиқ ўқув муассасаларини Ўзбекистон Республикаси Олий ва ўрта махсус таълим вазирлиги ихтиёрига берсин.

6. Ўзбекистон автомобиль ва дарё транспорти агентлиги таркиби, унинг марказий аппарати тузилмаси ва Агентлик ҳудудий бўлимларининг намунавий тузилмаси 6, 7 ва 8-иловаларга мувофиқ тасдиқлансин.

Ўзбекистон автомобиль ва дарё транспорти агентлиги марказий аппарати ходимларининг чекланган сони 21 нафар этиб ва унинг ҳудудий бўлимлари ходимларининг чекланган сони 144 нафар этиб белгилансин (хизмат кўрсатувчи ходимлардан ташқари).

Ўзбекистон автомобиль ва дарё транспорти агентлигига бошлиқнинг икки нафар ўринбосарига ва 5 кишидан иборат ҳайъатга эга бўлишга рухсат берилсин.

7. Ўзбекистон Республикаси Давлат мулки қўмитаси 2001 йил 1 августгача бўлган муддатда илгари «Ўзавтотранс» корпорацияси тизимига кирган автомобиль транспорти акциядорлик жамиятларидаги акциялар пакетларининг давлат улушини бошқариш бўйича ишончли бошқарувчиларни танлов асосида тайинласин.

9. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Ўзбекистон Республикаси Давлат мулки қўмитаси 2001 йил 1 августгача бўлган муддатда ҳудудий давлат-акциядорлик концернлари ва бирлашмаларини автомобилда юк ва йўловчилар ташиш ҳудудий уюшмаларига айлантириш чора-тадбирларини белгиланган тартибда амалга оширсинлар.

10. «Ўзавтотранс» давлат-акционерлик корпорациясини тугатиш бўйича махсус комиссия бозор нормалари ва мақсадга мувофиқликдан келиб чиқиб, лицензияланадиган фаолият турлари рўйхати ва лицензиялаш тартибини, автомобилда юк ва йўловчилар ташишга қўйиладиган лицензия шартлари ва талабларини, уларни янада эркинлаштиришни назарда тутган ҳолда, қайта кўриб чиқишга доир таклифларни бир ой муддатда кўриб чиқсин ва Вазирлар Маҳкамасига киритсин.

11. Ўзбекистон автомобиль ва дарё транспорти агентлиги Ўзбекистон Республикаси Давлат солиқ қўмитаси, Ички ишлар вазирлиги, Адлия вазирлиги билан биргаликда:

мулкчилик шаклларидан қатъи назар, барча автомобилда юк ва йўловчилар ташувчилар томонидан белгиланган лицензия шартлари ва талабларига риоя этилиши устидан назорат қилиш механизмини назарда тутувчи Автомобилда юк ва йўловчилар ташишни назорат қилиш тартибини икки ой муддатда Вазирлар Маҳкамасига киритсин;

Давлат божхона қўмитаси билан биргаликда божхона постларида назорат қилишнинг самарали тизимини ташкил этиш ва республикага кириб келаётган автотранспорт воситаларининг техник ҳолатини, йўл қўйиладиган оғирлик ва габарит параметрлари, халқаро юк ва йўловчилар ташишни амалга оширишда Европа битими (ЕСТР) талабларига мувофиқ уларда назорат приборлари (тахографлар) мавжудлигини инспекциядан ўтказиш тартиби тўғрисидаги таклифларни икки ой муддатда Вазирлар Маҳкамасига киритсин.

12. Илгари «Ўзавтотранс» корпорациясига кирган ҳамда «Ўзавтотранс» корпорацияси кафиллиги остида «Асака» банкидан олинган кредитлар бўйича қарздор бўлган автотранспорт корхоналари ва ташкилотлари кафиллик шартномаларини кредитларни таъминлашнинг бошқа турларига — гаров, кафолат ва учинчи шахсларнинг кафиллигига бир ой муддатда белгиланган тартибда қайта расмийлаштирсинлар.

13. Ўзбекистон Республикаси Вазирлар Маҳкамасининг Ташқи иқтисодий алоқалар ва хорижий инвестициялар департаменти Ўзбекистон автомобиль ва дарё транспорти агентлиги билан биргаликда Халқаро тиклаш ва тараққиёт банкининг № UZ 4547 қарз битими бўйича «Ўзтранссаноат» республика уюшмасини тугатилаётган «Ўзавтотранс» корпорацияси ўрнига субқарз олувчи этиб белгилаш масаласини Халқаро тиклаш ва тараққиёт банки билан ишлаб чиқсин.

14. Тугатиш комиссияси Тошкент шаҳар, академик Я.Ғуломов кўчасидаги 39а уйдаги бинони ва бошқа мол-мулкни белгиланган тартибда «Ўзавтотранс» балансидан Ўзбекистон автомобиль ва дарё транспорти агентлиги балансига берсин.

15. Ўзбекистон Республикаси Вазирлар Маҳкамасининг «Ўзбекистон автомобиль транспорти («Ўзавтотранс») давлат-акционерлик корпорациясини ташкил этиш ва унинг фаолияти масалалари» тўғрисидаги 1993 йил 12 январдаги 21-сон қарори ўз кучини йўқотган деб ҳисоблансин.

16. Ўзбекистон Республикаси Вазирлар Маҳкамасининг 9-иловага мувофиқ айрим қарорларига ўзгартириш ва қўшимчалар киритилсин.

17. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов зиммасига юклансин.

I. Вазирлар Маҳкамасининг «Автомобилда хорижий юк ташувчиларнинг Ўзбекистон Республикаси ҳудудига киришлари, бўлишлари, юк олиб ўтишлари ва ундан чиқиб кетишлари тартиби тўғрисида» 1995 йил 11 январдаги 11-сон қарорининг 7-банди қуйидаги таҳрирда баён қилинсин:

«7. Қуйидагилар:

Ўзбекистон Республикаси Давлат чегараларини ҳимоя қилувчи қўмитага ҳамда Давлат божхона қўмитасига назорат-ўтказиш пунктларида хорижий автомобилда юк ва йўловчилар ташувчиларни;

Ўзбекистон Республикаси Ички ишлар вазирлигига — хорижий автотранспортнинг республика ҳудуди бўйлаб ҳаракат қилишини;

Ўзбекистон Республикаси Давлат божхона қўмитасига республикага кириб келаётган автотранспорт воситаларининг техник ҳолатини, йўл қўйиладиган оғирлик ва габарит параметрларини, халқаро юк ва йўловчилар ташишни амалга оширишда Европа битими (ЕСТР) талабларига мувофиқ уларда назорат приборлари (тахографлар) мавжудлигини ҳисобга олиш ва назорат қилиш юклансин».

II. Ўзбекистон Республикаси Вазирлар Маҳкамасининг «Ўзбекистон автомобиль ва дарё транспорти агентлигини ташкил этиш тўғрисида» 1998 йил 11 июлдаги 296-сон қарорининг:

1) 7-банди тўртинчи хатбоши қуйидаги таҳрирда баён этилсин:

«сузиб юрувчи қурилмаларни ҳисобга олганлик ва текширув кўригидан ўтказганлик учун Ўзбекистон Республикаси Молия вазирлиги билан келишилган тарифлар бўйича тушадиган маблағлар ва қонун ҳужжатларида белгиланган бошқа маблағлар»;

2) 1-илованинг:

6-бандида:

учинчи хатбоши чиқариб ташлансин;

еттинчи хатбоши қуйидаги таҳрирда баён қилинсин:

«фойдаланишда бўлган кемалар ва сузиб юрувчи қурилмаларни ҳисобга олиш, таснифлаш, рўйхатдан ўтказиш ва сертификатлаш, шунингдек Регистр қоидалари ҳамда кемалар ва сузиб юрувчи қурилмаларни таъмирлашга доир бошқа норматив ҳужжатлар талаблари бажарилиши устидан назорат қилиш, Дарё кемачилиги регистри билан кемалар ва сузиб юрувчи воситаларга кема гувоҳномаси, малака гувоҳномаси, сузишга яроқлилик тўғрисидаги гувоҳномани, нефть, оқова сувлар ва ахлат билан ифлос қилишнинг олдини олиш тўғрисидаги гувоҳномани ҳамда Регистр қоидаларида назарда тутилган бошқа ҳужжатларни бериш».

қуйидаги мазмундаги хатбошилар билан тўлдирилсин:

«Ўзбекистон Республикаси Молия вазирлиги билан биргаликда автотранспорт хизматларига доир тариф сиёсатини шакллантириш;

юк ва йўловчилар ташувчилар фаолиятини белгиланган тартибда лицензиялаш ҳамда автомобиль ва дарё транспорти соҳасида лицензия талаблари ва шартларига риоя этилиши устидан назорат қилиш;

жойлардаги давлат ҳокимияти органлари билан биргаликда йўловчилар ва юкларни ташиш борасида республиканинг давлат ва аҳоли эҳтиёжлари прогнозларини ишлаб чиқиш ҳамда жамоат автомобиль транспорти ва дарё транспорти фаолиятини мувофиқлаштириш;

тармоқни хусусийлаштириш жараёнларини чуқурлаштириш, юк ва йўловчилар ташиш йўналишларини тендер асосида жойлаштириш механизмларини жорий этиш ва такомиллаштириш, мулкчиликнинг барча шаклларидаги юк ва йўловчилар ташувчилар фаолияти учун тенг шарт-шароитлар яратиш, автотранспорт хизматлари кўрсатиш соҳасида ягона техника сиёсатини амалга ошириш асосида автотранспорт хизматлари бозорини шакллантиришга ва ривожлантиришга кўмаклашиш;

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг таклифлари асосида Ўзбекистон Республикаси Ички ишлар вазирлиги билан биргаликда халқаро ва вилоятлараро автомобилда йўловчилар ташиш йўналишларини тасдиқлаш;

автомобиль транспорти соҳасида хизматларни сертификатлашни ташкил этиш ва амалга ошириш;

фавқулодда ҳолатларда ва сафарбарлик вазиятида жойлардаги давлат ҳокимияти ва бошқаруви органларига, Ўзбекистон Республикаси Мудофаа вазирлигига ва Фавқулодда вазиятлар вазирлигига автомобиль транспортининг махсус бўлинмалари фаолиятини мувофиқлаштиришда кўмаклашиш;

автомобиль ва дарё транспорти соҳасида кадрлар тайёрлаш ва уларни қайта тайёрлаш масалаларида ягона сиёсатни амалга ошириш».

7-бандида:

иккинчи ва учинчи хатбошилар қуйидаги таҳрирда баён этилсин:

«автомобиль ва дарё транспорти соҳасида хўжалик юритувчи субъектлар фаолиятини қонун ҳужжатларида белгиланган тартибда лицензиялаш;

автомобиль ва дарё транспорти соҳасида лицензиатлар томонидан лицензия талаблари ва шартларига риоя этилишини назорат қилиш;

қуйидаги мазмундаги хатбоши билан тўлдирилсин:

«Ўзбекистон Республикаси Молия вазирлиги билан биргаликда автотранспорт хизматларига доир тариф сиёсатини шакллантириш»;

8-бандида:

учинчи хатбоши қуйидаги таҳрирда баён қилинсин:

«лицензиатлар томонидан лицензия талаблари ва шартларига риоя қилинишини қонун ҳужжатларида белгиланган тартибда режали ва режадан ташқари текшириш, текширишлар натижалари бўйича аниқ қоида бузилишларини кўрсатган ҳолда далолатномалар (маълумотномалар) тузиш, хўжалик юритувчи субъектларга аниқланган қоида бузилишларини бартараф этиш мажбуриятини юкловчи қарорлар қабул қилиш, бундай қоида бузилишларини бартараф этиш муддатларини белгилаш»;

қуйидаги мазмундаги хатбошилар билан тўлдирилсин:

«кемалар ва сузиб юрувчи воситалардан тўғри фойдаланилишини, уларнинг табель бўйича таъминот ва ашёлар билан таъминланганлигини, улар томонидан сузиш ва фойдаланиш хавфсизлигини таъминлаш қоидалари ва талаблари бажарилишини, кемалар қатнайдиган йўллар ва кемалар қатнови шароитларини назорат қилиш, экипаж аъзоларининг билимларини текшириш;

кема ҳужжатларининг амал қилиш муддати тугаган, малакали экипаж билан таъминланмаган, кема бортида ҳалокат-қутқарув ва ёнғинга қарши ашёлар бўлмаган ҳолларда, сузиб юрувчи қурилмада одамлар хавфсизлигига таҳдид солувчи нуқсонлар пайдо бўлганда, кемалардан фойдаланиш, ёнғинга қарши ва санитария хавфсизлиги қоидалари талаблари, экология нормалари бузилганда кемалар ва сузиб юрувчи воситалардан фойдаланишни тақиқлаш;

техник ҳолати сузиш ва фойдаланиш хавфсизлигини ёки сузиб юрувчи воситаларнинг хавфсиз туришини таъминламаган ҳолларда сузиб юрувчи воситалардан фойдаланишни тақиқлаш;

сузиб юрувчи воситаларга нисбатан хавфсиз сузиш шароитларини, инсон ҳаётининг муҳофаза қилинишини, юкларнинг ички сув йўллари орқали ишончли ташилишини, кемалар қатнови орқали ифлос қилишнинг олди олинишини таъминловчи техник талабларни белгилаш, ушбу талабларга риоя этилиши устидан техник назорат ўрнатиш, сузиб юрувчи воситалар Регистр томонидан чиқариладиган қоидалар асосида таъмирланаётган вақтда уларни таснифлаш, техник кўрикдан ўтказиш ва назорат қилиш;

хорижий ҳамда миллий юк ва йўловчилар ташувчилар томонидан автомобиль ва дарё транспорти соҳасида Ўзбекистон Республикаси қатнашчиси бўлган халқаро битимлар ва конвенцияларнинг асосий шартлари ва қоидаларига риоя этилишини назорат қилиш»;

10 ва 11-бандлари қуйидаги таҳрирда баён қилинсин:

«10. Агентлик бошлиғи Ўзбекистон Республикаси Вазирлар Маҳкамаси томонидан тайинланадиган икки нафар ўринбосарга эга бўлади.

11. Агентликда таркибига Агентлик бошлиғи (ҳайъат раиси), лавозимлари бўйича бошлиқ ўринбосарлари, шунингдек Агентлик тизимининг бошқа раҳбар ходимлари кирувчи 5 кишидан иборат ҳайъат тузилади. Ҳайъатнинг шахсий таркиби Вазирлар Маҳкамаси томонидан тасдиқланади»;

15-банди «ажратмалар» сўзидан кейин «шунингдек сузиб юрувчи воситаларни ҳисобга олганлик ва текширув кўригидан ўтказганлик учун маблағлар ва қонун ҳужжатларида белгиланган бошқа маблағлар» сўзлари билан тўлдирилсин.

III. Вазирлар Маҳкамасининг «Ўзбекистон автомобиль ва дарё транспорти агентлигини ташкил этиш тўғрисида» 1998 йил 11 июлдаги 296-сон қарорига ўзгартиришлар киритиш ҳақида» 1998 йил 2 октябрдаги 422-сон қарори ўз кучини йўқотган деб ҳисоблансин

IV. Вазирлар Маҳкамасининг «Шаҳар атрофи, шаҳарлараро ва халқаро йўловчилар ташиш автомобиль транспортида очиқ тендерлар ташкил этиш ва ўтказиш тўғрисида» 1999 йил 29 июлдаги 368-сон қарори (Ўзбекистон Республикаси ҚТ, 1999 й., 7-сон, 44-модда)да:

қарорнинг 1 ва 6-бандларидан, қарорга 3-илованинг 4-бандидан «ҳамда «Ўзавтотранс» корпорацияси», «ҳамда «Ўзавтотранс» давлат корпорацияси», «Ўзавтотранс» корпорацияси» сўзлари чиқариб ташлансин;

қарорнинг 4-бандида «Ўзавтотранс» корпорацияси» сўзлари «Ўзбекистон автомобиль ва дарё транспорти агентлиги» сўзлари билан алмаштирилсин;

қарорга 2-илованинг 20-банди учинчи хатбошидаги «Ўзавтотранс» корпорацияси» сўзлари «Ўзбекистон автомобиль ва дарё транспорти агентлиги» сўзлари билан алмаштирилсин.