Замонавий тиббиёт асбоб-ускуналари ва тиббиёт мақсадидаги буюмлар ишлаб чиқаришни ташкил этишни такомиллаштириш ва улар билан даволаш-профилактика муассасаларини, ихтисослаштирилган тиббий марказларни таъминлаш мақсадида Вазирлар Маҳкамаси қарор қилади:

1. Ўзбекистон Республикаси Соғлиқни сақлаш вазирлиги, «Ўзфармсаноат» давлат-акциядорлик концернининг ва «Ўзтибтехника» акциядорлик компанияси муассисларининг «Ўзтибтехника» акциядорлик компаниясини «Ўзфармсаноат» давлат концерни таркибидан Ўзбекистон Республикаси Соғлиқни сақлаш вазирлиги тизимига бериш тўғрисидаги таклифи қабул қилинсин.

2. Қуйидагилар «Ўзтибтехника» акциядорлик компаниясининг асосий вазифалари ҳисоблансин:

тиббиёт муассасалари ва аҳолининг замонавий тиббиёт асбоб-ускуналари ва технологияларига бўлган эҳтиёжини чуқур ўрганиб чиқиш ва ушбу эҳтиёжларни қондириш юзасидан таклифлар тайёрлаш;

замонавий тиббиёт асбоб-ускуналари ва тиббиёт мақсадидаги буюмлар ишлаб чиқаришни ташкил этишни такомиллаштириш ва улар билан даволаш-профилактика муассасаларини, ихтисослаштирилган тиббий марказларни таъминлаш;

монтаж ва ишга тушириш-созлаш ишларини, тиббиёт асбоб-ускуналарининг техник сервисини амалга ошириш;

соғлиқни сақлаш муассасаларини техник жиҳозлаш бўйича лойиҳаларини ва техник-иқтисодий асослашларни ишлаб чиқиш;

тиббиёт асбоб-ускуналарига техник хизмат кўрсатиш муҳандис-техник ходимлар тайёрлашни ва уларнинг малакасини оширишни ташкил этиш.

3. «Ўзтибтехника» акциядорлик компаниясининг ташкилий тузилмаси ва унинг ижро этувчи аппарати тузилмаси 1 ва 2-иловаларга* мувофиқ маъқуллансин.

4. Ўзбекистон Республикаси Соғлиқни сақлаш вазирлиги Иқтисодиёт вазирлиги ва Молия вазирлиги билан биргаликда бир ой муддатда 2004—2006 йилларда республика тиббиёт муассасаларини замонавий тиббиёт асбоб-ускуналари билан жиҳозлаш ва унга техник сервис хизмати кўрсатишни ташкил этиш дастурини ишлаб чиқсин ва тасдиқласин.

5. Ўзбекистон Республикаси Давлат мулки қўмитаси:

икки ой муддатда амалдаги қонун ҳужжатларига мувофиқ «Ўзтибтехника» акциядорлик компаниясининг устав фонди ва эмиссия проспектини хатловдан ва қайта рўйхатдан ўтказсин;

давлатга тегишли активларни бошқариш бўйича давлатнинг ишончли вакили тайинланишини таъминласин;

«Ўзтибтехника» акциядорлик компаниясининг давлат активларини ишончли бошқариш тўғрисидаги шартнома қоидалари ижроси устидан қаттиқ назорат ўрнатсин.

6. Тиббиёт техникаси бўйича мувофиқлаштирувчи кенгаш 3-иловага мувофиқ таркибда ташкил этилсин.

Тиббиёт техникаси бўйича мувофиқлаштирувчи кенгаш тўғрисидаги низом 4-иловага мувофиқ тасдиқлансин.

7. Вазирлар Маҳкамасининг «Ўзбекистон Республикасида тиббиёт ва фармацевтика саноатини ривожлантиришни давлат томонидан қўллаб-қувватлаш чора-тадбирлари тўғрисида» 1996 йил 14 августдаги 283-сон қарорининг 5-банди ўз кучини йўқотган деб ҳисоблансин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А. Азизхўжаев зиммасига юклансин.

1.1. Мазкур Низом Тиббиёт техникаси бўйича мувофиқлаштирувчи кенгаш фаолиятини тартибга солади.

1.2. Мувофиқлаштирувчи кенгаш тиббиёт техникаси ва тиббиёт буюмлари ишлаб чиқариш, улар билан соғлиқни сақлаш муассасаларини, аҳолини таъминлаш ва техник сервис бўйича юқори мувофиқлаштирувчи орган ҳисобланади.

1.3. Тиббиёт техникаси бўйича мувофиқлаштирувчи кенгаш ўз фаолиятида Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Олий Мажлисининг қарорлари ва бошқа қарорларига, Ўзбекистон Республикаси Президентининг фармонлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига ҳамда бошқа қонун ҳужжатларига, шунингдек мазкур Низомга амал қилади.

2.1. Қуйидагилар Мувофиқлаштирувчи кенгашнинг асосий вазифалари ҳисобланади:

соғлиқни сақлаш муассасалари ва аҳолининг замонавий тиббиёт асбоб-ускуналари ва тиббиёт буюмларига бўлган эҳтиёжини аниқлаш;

даволаш муассасаларини замонавий тиббиёт асбоб-ускуналари ва технологиялари ҳамда тиббиёт буюмлари билан техник жиҳозлаш дастурини ишлаб чиқиш ва тасдиқлаш;

илғор тиббиёт асбоб-ускуналари ва техникаси, тиббиёт буюмлари ишлаб чиқариш ва улар билан соғлиқни сақлаш муассасалари ва аҳолини таъминлашни мувофиқлаштириш;

даволаш-профилактика муассасаларининг тиббиёт аппаратураси ва касалхона асбоб-ускуналарини монтаж қилиш, ишга тушириш-созлаш, техник сервис кўрсатиш ишлари ташкил этилишини таъминлаш;

илғор тиббиёт асбоб-ускуналари билан техник жиҳозлаш учун мамлакатимиз инвестицияларини ва хорижий инвестицияларни, ҳомийлик маблағлари ва грантларни жалб этиш ишларини ташкил этиш;

тиббиёт техникаси, тиббиёт буюмларини ишлаб чиқариш, улар билан даволаш-профилактика муассасалари, ихтисослаштирилган тиббий марказларни таъминлашни яхшилаш, шунингдек тиббиёт техникасига техник ва сервис хизмати кўрсатиш даражасини ошириш юзасидан Ҳукуматга таклифлар киритиш.

3.1. Ўзига юкланган вазифаларга мувофиқ Мувофиқлаштирувчи кенгаш:

мавжуд тиббиёт асбоб-ускуналарининг жорий таъминоти, уларни таъмирлаш, профилактика ишлари, улардан самарали фойдаланишнинг, даволаш муассасаларининг замонавий тиббиёт асбоб-ускуналари билан жиҳозлаш бўйича техник-иқтисодий асослаш ишланмаларининг йиллик дастурини тасдиқлайди;

Мувофиқлаштирувчи кенгашнинг кўриб чиқиши учун киритиладиган масалаларни ўрганиб чиқиш ва тайёрлаш, Мувофиқлаштирувчи кенгашнинг ваколатига кирувчи бошқа масалаларни ҳал этиш учун Соғлиқни сақлаш вазирлигининг етакчи мутахассисларидан, Вазирлик таркибига кирувчи ташкилотларнинг масъул ходимларидан бўлган экспертлар таркибини тасдиқлайди;

Мувофиқлаштирувчи кенгашнинг иш тартиби ва регламентини белгилайди.

3.2. Мувофиқлаштирувчи кенгаш қуйидаги ҳуқуқларга эгадир:

масалалар сифатли ва мустақил тайёрланишини таъминлаш талабларидан келиб чиқиб экспертлар таркибига хорижий мутахассисларни жалб этиш;

соғлиқни сақлаш хизматини ривожлантиришнинг тасдиқланган дастурига мувофиқ даволаш муассасаларини жиҳозлаш учун импорт бўйича тиббиёт асбоб-ускуналари харид қилишнинг техник-иқтисодий асосланишини тасдиқлашга доир таклифларни ишлаб чиқиш ва Ўзбекистон Республикаси Вазирлар Маҳкамасига киритиш;

ўз ваколатлари доирасида барча соғлиқни сақлаш органлари ва муассасалари, шунингдек давлат ва хўжалик бошқаруви органлари томонидан бажарилиши мажбурий бўлган қарорлар қабул қилиш.

4.1. Мувофиқлаштирувчи кенгашнинг шахсий таркиби Ўзбекистон Республикаси Вазирлар Маҳкамаси томонидан тасдиқланади.

4.2. Мувофиқлаштирувчи кенгашга Ўзбекистон Республикаси Соғлиқни сақлаш вазири бошчилик қилади ва унинг раиси ҳисобланади.

4.3. Мувофиқлаштирувчи кенгашнинг раиси Мувофиқлаштирувчи кенгашнинг фаолиятига раҳбарлик қилади ва унга юкланган вазифалар бажарилиши учун жавоб беради.

4.4. Мувофиқлаштирувчи кенгаш раиси бўлмаганда унинг функцияларини ўринбосар бажаради.

4.5. Мувофиқлаштирувчи кенгаш фаолияти қарорлар қабул қилишда тенг ҳуқуқлилик ва коллегиаллик принципларига асосланади.

Мувофиқлаштирувчи кенгаш аъзолари умумий сонининг камида учдан икки қисми қатнашган тақдирда Мувофиқлаштирувчи кенгаш мажлиси ҳуқуқий ваколатли ҳисобланади.

Мувофиқлаштирувчи кенгаш мажлислари ўз ваколатига кирувчи масалалар тайёрланиши давомида, бироқ йил чорагида камида бир марта ўтказилади.

4.6. Мувофиқлаштирувчи кенгашнинг қарорлари мажлисда иштирок этган Кенгаш аъзоларининг оддий кўпчилик овози билан қабул қилинади.