Ҳужжат 22.02.2021 00 санаси ҳолатига
Амалдаги версияга ўтиш
Ўзбекистон Республикаси Вазирлар Маҳкамасининг
қарори
Марказлаштирилган капитал қуйилмалар ҳисобига рўёбга чиқарилаётган инвестиция лойиҳаларини амалга оширишда шартномавий жорий нархларга ўтиш тўғрисида
Ўзбекистон Республикаси Президентининг «Капитал қурилишда иқтисодий ислоҳотларни янада чуқурлаштиришнинг асосий йўналишлари тўғрисида» 2003 йил 6 майдаги ПФ-3240-сон Фармонини бажариш юзасидан ҳамда бозор муносабатларини ривожлантириш, қурилишда нархларни шакллантириш механизмини такомиллаштириш, инвестиция жараёни барча қатнашчиларининг пировард натижалар, инвестиция лойиҳаларини амалга ошириш самарадорлиги учун жавобгарлигини ошириш мақсадида Вазирлар Маҳкамаси қарор қилади:
1. Қуйидагилар:
Объектларни қуриш қийматини шартномавий жорий нархларда белгилаш тартиби тўғрисидаги Вақтинчалик низом 1-иловага мувофиқ;
Объектлар қурилишининг иккинчи ва кейинги йилларида шартномавий жорий нархларда қурилиш шартномавий қийматини аниқлаштириш тартиби тўғрисидаги Вақтинчалик низом 2-иловага мувофиқ тасдиқлансин.
Ўзбекистон Республикаси Молия вазирлиги, Иқтисодиёт вазирлиги, «Давархитектқурилиш» қўмитаси 2003 йил якунлари бўйича мазкур низомларга зарур ўзгартириш ва қўшимчалар тўғрисида Вазирлар Маҳкамасига таклифлар киритсинлар.
Олдинги таҳрирга қаранг.
2. Ўзбекистон Республикаси Молия вазирлиги, Иқтисодиёт вазирлиги, «Давархитектқурилиш» қўмитаси марказлаштирилган капитал қўйилмалар ҳисобига молиялаштириладиган объектлар қурилишида нархларнинг сунъий равишда ошиб кетишига йўл қўймаган ҳолда уларнинг шакллантирилиши устидан доимий назорат ўрнатсинлар.
(2-банд Ўзбекистон Республикаси Вазирлар Маҳкамасининг 2017 йил 16 августдаги 638-сонли қарори таҳририда — ЎР ҚҲТ, 2017 й., 33-сон, 863-модда)
3. Белгилаб қўйилсинки, қурилишнинг титул рўйхати:
биринчи молиявий йилда капитал қўйилмалар ҳажмлари ва уларни сарфлаш йўналишлари кўрсатилган, қурилишнинг иккинчи ва кейинги йиллари учун улар аниқлаштирилган ҳолда қурилишнинг барча даврига тузилади ҳамда инвестиция лойиҳасининг асосий техник-иқтисодий кўрсаткичларини акс эттиради;
қурилишларнинг Ўзбекистон Республикаси Иқтисодиёт вазирлиги ва Молия вазирлиги билан келишилган аниқ рўйхати, ўтказилган танлов савдолари (тендерлар) ва тузилган шартномалар шартлари асосида қурилишнинг ҳар бир якка тартибдаги объекти бўйича инвестор (буюртмачи) томонидан тузилади ва тасдиқланади;
объект қурилишининг унда тасдиқланган қиймати доирасида кредитлаш учун асос ҳисобланади.
4. Объектлар қурилиши учун жорий нархларни асосланган ҳолда белгилаш учун Ўзбекистон Республикаси Давлат статистика қўмитаси ҳамда Меҳнат ва аҳолини ижтимоий муҳофаза қилиш вазирлиги 2003 йилнинг III чорагидан бошлаб «Давархитектқурилиш» қўмитасининг Нархларни шакллантириш минтақавий марказларига уларнинг сўровларига кўра минтақалар бўйича «қурилиш» тармоғида ўртача иш ҳақининг вужудга келган миқдорлари тўғрисида маълумотлар тақдим этсинлар.
Кейинги таҳрирга қаранг.
5. Ўзбекистон Республикаси Давлат архитектура ва қурилиш қўмитаси капитал қурилишда нархларни шакллантиришнинг смета-норматив базасини такомиллаштириш ва янгилашга доир чора-тадбирлар дастурини уч ой муддатда ишлаб чиқсин ва Вазирлар Маҳкамасига тақдим этсин.
6. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин ҳамда айримларига ўзгартириш ва қўшимчалар киритилсин.
7. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда Вазирлар Маҳкамасига Ўзбекистон Республикасининг қонун ҳужжатларига мазкур қарордан келиб чиқувчи ўзгартириш ва қўшимчалар тўғрисида таклифлар киритсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари К.Н. Тўлаганов ва Ўзбекистон Республикаси Бош вазирининг ўринбосари Р.С. Азимов зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
2003 йил 11 июнь,
261-сон
Вазирлар Маҳкамасининг
2003 йил 11 июндаги
261-сон қарорига
1-ИЛОВА
Объектларни қуриш қийматини шартномавий жорий нархларда белгилаш тартиби тўғрисида
ВАҚТИНЧАЛИК НИЗОМ
1. Мазкур Низом марказлаштирилган манбалар (давлат капитал қўйилмалари) ҳисобига қурилаётган қурилиш объектларининг шартномавий жорий нархлардаги қийматини аниқлаш тартибини белгилаб беради.
2. Объект қурилиши бўйича ишлар ва хизматларнинг жорий нархлардаги шартномавий қиймати танлов савдолари (тендер) натижалари бўйича шакллантирилади.
3. Танлов савдолари (тендер)ни ташкил этиш ва ўтказиш мақсадида объект қурилиши қиймати ресурсларга харажатларни прогнозлаштирилаётган жорий нархлар ва тарифларда калькуляция қилишга асосланган ресурс усули бўйича ҳисоблаб чиқилади.
Бунда янгидан қурилаётган, марказлаштирилган манбалар (давлат капитал маблағлари) ҳисобига молиялаштирилаётган объектлар бўйича базавий нархлардаги смета ҳужжатлари тузилмайди, ресурслар сметалари чиқариш тартиби сақланиб қолади.
4. Объект қурилишининг мазкур Низомга мувофиқ буюртмачи томонидан аниқланган бошланғич қиймати танлов савдолари (тендерлар) ўтказишда йўналиш ҳисобланади ва пудрат шартномаси (контракт) тузиш учун асос бўлиб хизмат қилмайди.
5. Танлов савдолари бошланғич қийматни ошкор қилмасдан ўтказилган тақдирда у танлов савдолари (тендер)нинг иккинчи босқичигача махфий ахборот ҳисобланади.
6. Танлов савдолари (тендер)да иштирок этаётган пудратчи ташкилотлар танлов таклифи нархини мазкур Низомнинг 10-бандида назарда тутилган тартибда ва пудрат ишлари бозори конъюнктурасидан, шу жумладан иш ҳақига харажатларни аниқлаш имкониятидан, корхонада шаклланган меҳнатга ҳақ тўлаш шартлари ва шаклидан келиб чиққан ҳолда мустақил равишда аниқлайдилар.
7. Талабгорнинг танлов таклифи (оферта)да кўрсатилган нархи махфий ахборот ҳисобланади ва танлов савдолари (тендер)нинг иккинчи босқичигача ошкор қилинмайди.
8. Объект қурилиши бошланғич қийматини ва талабгор нархини белгиланган давргача ошкор этишда айбдор бўлган шахслар Ўзбекистон Республикаси қонун ҳужжатларига мувофиқ жавоб берадилар.
Кейинги таҳрирга қаранг.
9. Объект қурилишининг шартномавий жорий нархи талабгорларнинг танловдаги нарх бўйича таклифларидан мақбул нархни танлаш асосида, буюртмачининг бошланғич нархини ва танлов ҳужжатлари шартларини ҳисобга олган ҳолда белгиланади.
10. «Ресурс усули»ни қўллашда физик кўрсаткичлардаги:
асбоб-ускуналар номлари ва миқдори;
норматив меҳнат сарфи;
машина ва механизмлардан фойдаланиш харажатлари;
қурилиш материаллари, буюмлар ва конструкциялар номлари ва миқдори;
бошқа харажатлар ва сарфлар аниқланади.
11. «Ресурс усули» бўйича объектнинг жорий нархлардаги қиймати қуйидаги формула бўйича аниқланади:
С=(Со+См+Сзп+Сэм+Пп+Пз+Ср) х КР, бунда:
Со — асбоб-ускуналарга, мебель ва инвентарга харажатлар;
См — қурилиш материаллари, буюмлар ва конструкцияларга харажатлар;
Сзп — ижтимоий суғуртага ажратмалар ҳисобга олинган ҳолда асосий иш ҳақига харажатлар;
Сэм — машина ва механизмлардан фойдаланиш харажатлари;
Пп — бошқа харажатлар ва пудратчининг харажатлари;
Пз — бошқа харажатлар ва буюртмачининг харажатлари;
Ср — объектлар қурилишини суғурта қилиш харажатлари;
Кр — навбатдаги йилда қурилишда нарх ўсишининг прогнозлаштирилаётган индексидан келиб чиқиб аниқланадиган таваккалчилик коэффициенти.
12. Асбоб-ускуналар, мебель ва инвентарга харажатлар транспорт харажатларини ҳисобга олган ҳолда ишлаб чиқарувчи корхоналар (етказиб берувчилар)нинг нархлари қўлланилган ҳолда спецификациялар асосида ёки нархлар мониторинги асосида шакллантириладиган маълумотлар банки бўйича аниқланади.
13. Қурилиш материаллари, буюмлар ва конструкцияларга харажатлар мазкур минтақада шаклланган бирликка ўртача нархлар қўлланилган ҳолда тендер ҳужжатлари таркибида ишлаб чиқиладиган Йиғма ресурс ҳисоб-китобига мувофиқ амалдаги кўрсаткичлар асосида қуйидаги формула бўйича аниқланади:
См=См1+См2+См3+...+ Смn, бунда:
См1, См2, См3, Смn — қурилиш материаллари ва конструкцияларнинг айрим турлари қиймати:
Cмп = N х Цср, бунда:
N — объект қурилиши учун талаб қилинадиган қурилиш материали (буюм, конструкция)нинг алоҳида тури миқдори;
Цср – қурилиш материали (буюм, конструкция) бирлигига ўртача нарх.
Ҳар хил қурилиш материаллари (буюмлар, конструкциялар)нинг ўртача қиймати тайёрловчи заводларнинг улгуржи сотиш нархлари, қурилиш материаллари биржалари ва ярмаркаларидаги нархлар, «Давархитектқурилиш» қўмитаси томонидан чиқариладиган каталоглар, «Давархитектқурилиш» қўмитасининг нарх белгилаш бўйича минтақавий марказлари маълумотлари асосида аниқланади.
Қонун ҳужжатлари нормаларига мувофиқ белгиланган қурилиш материаллари (буюмлар, конструкциялар) нархлари тайёрловчи заводларнинг улгуржи нархларини, идишларга харажатларни, транспорт харажатларини, таъминот-сотиш ташкилотларининг устама нархларини ўз ичига олади.
Кейинги таҳрирга қаранг.
Транспорт харажатларини «Давархитектқурилиш» қўмитаси томонидан ишлаб чиқилган Юкларни қурилиш учун ташишга ҳисоб-китоб жорий нархларини аниқлаш бўйича методик тавсиялар асосида ҳисоблаб чиқиш тавсия қилинади.
14. Иш ҳақи харажатлари объектнинг норматив меҳнат сарфини бир киши-соатнинг жорий қийматига (сўмларда) ва ижтимоий суғуртага ажратмалар миқдорини ҳисобга олувчи коэффициентга кўпайтириш йўли билан қуйидаги формула бўйича аниқланади:
Сзп=Т х Сч Ксс, бунда:
Т – тендер ҳужжатлари таркибида ёки ишга туширилган объектларга ўхшаш киши-соатларда аниқланадиган объект қурилишининг норматив меҳнат сарфи;
Сч — ишчиларнинг ўртача соатлик иш ҳақи, объект қурилиши қийматини ҳисоблаб чиқишда минтақа бўйича қурувчиларнинг ўртача статистик ойлик иш ҳақи даражасидан келиб чиқиб ҳисоблаб чиқилади;
Ксс — ижтимоий суғуртага ажратмалар миқдорини ҳисобга олувчи коэффициент.
Ўртача соатлик иш ҳақи қуйидаги формула бўйича ҳисоблаб чиқилади:
Сч = Змс: Ф, бунда:
Змс — олдинги 12 ой учун статистика маълумотлари асосида бир ой учун ҳисоблаб чиқилган минтақа бўйича қурувчиларнинг ўртача йиллик иш ҳақи, ойига сўм;
Ф — Ўзбекистон Республикаси Меҳнат ва аҳолини ижтимоий муҳофаза қилиш вазирлиги маълумотлари бўйича соатларда иш вақтининг ўртача ойлик фонди.
15. Объект қурилиши қийматини аниқлашда машина ва механизмлардан фойдаланиш харажатлари қиймати жорий нархларда қуйидаги формула бўйича қабул қилинади:
Сэм = ЭМ х Цпр, бунда:
ЭМ — машина ва механизмлардан фойдаланишнинг соатлардаги ҳажми;
Цпр — машина ва механизмлардан фойдаланишнинг соат/сўмлардаги жорий нархлари.
Машина ва механизмлардан фойдаланишнинг жорий нархларини «Давархитектқурилиш» қўмитасининг методик тавсиялари асосида аниқлаш тавсия қилинади.
16. Пудратчининг бошқа харажатлари (Пп) зарур фойдадан, шу жумладан пудрат ишлари (хизматлар) бозори конъюнктурасидан келиб чиқиб шакллантириладиган мажбурий тўловлар ва ажратмалардан иборат бўлади.
Олдинги таҳрирга қаранг.
(16-бандининг иккинчи хатбошиси Ўзбекистон Республикаси Вазирлар Маҳкамасининг 2004 йил 12 майдаги 226-сонли қарорига мувофиқ ўз кучини йўқотган — Ўзбекистон Республикаси Қонун ҳужжатлари тўплами, 2004 й., 19-сон, 222-модда; )
17. Буюртмачининг бошқа харажатлари ва сарфлари (Пз) лойиҳа-қидирув ишлари, экспертиза, танлов савдолари (тендер) ўтказиш, техник назорат харажатларидан, объект қурилиши билан боғлиқ бошқа харажатлардан иборат бўлади.
Олдинги таҳрирга қаранг.
18. Буюртмачи объект қурилиши қиймати таркибида объект қурилишини ташкил этиш, унга хизмат кўрсатиш, кузатиб бориш, қурилиши тугалланган объектни фойдаланишга қабул қилиб олиш билан боғлиқ бошқа харажатларни ҳам ҳисобга олиши керак.
(18-банди Ўзбекистон Республикаси Вазирлар Маҳкамасининг 2004 йил 12 майдаги 226-сонли қарори таҳририда — Ўзбекистон Республикаси Қонун ҳужжатлари тўплами, 2004 й., 19-сон, 222-модда; )
19. Буюртмачининг бошқа харажатлари объект қурилиши қийматини шакллантиришда белгиланган миқдорларда объектнинг шартномавий қийматига киритилади.
Олдинги таҳрирга қаранг.
20. Ўзбекистон Республикаси Молия вазирлиги, Иқтисодиёт вазирлиги, «Давархитектқурилиш» қўмитаси марказлаштирилган манбалар (давлат капитал қўйилмалари) ҳисобига молиялаштириладиган объектлар қурилишининг бошланғич нархлари шакллантирилиши бўйича доимий мониторингни амалга оширадилар.
(20-банд Ўзбекистон Республикаси Вазирлар Маҳкамасининг 2017 йил 16 августдаги 638-сонли қарори таҳририда — ЎР ҚҲТ, 2017 й., 33-сон, 863-модда)
21. Объект қурилиши муддати бир календарь йилдан ортиқ бўлганда иккинчи йилга ва кейинги йилларга шартномавий нарх Объектлар қурилишининг иккинчи ва кейинги йилларида шартномавий жорий нархларда қурилиш шартномавий қийматини аниқлаштириш тартиби тўғрисидаги Вақтинчалик низомга мувофиқ аниқланади.
Вазирлар Маҳкамасининг
2003 йил 11 июндаги
261-сон қарорига
2-ИЛОВА
Объектлар қурилишининг иккинчи ва кейинги йилларида шартномавий жорий нархларда қурилиш шартномавий қийматини аниқлаштириш тартиби тўғрисида
ВАҚТИНЧАЛИК НИЗОМ
1. Мазкур Низом танлов савдолари (тендер) натижасида жорий нархларда тузилган пудрат шартномалари (контракт) бўйича марказлаштирилган манбалар (давлат капитал қўйилмалари) ҳисобига қурилаётган қурилиш объектларининг иккинчи ва кейинги йиллар учун шартномавий жорий нархларини аниқлаштириш тартибини назарда тутади.
2. Танлов савдолари (тендер) натижалари бўйича тузилган объектнинг қурилишини амалга ошириш пудрат шартномасига (контрактга), иш ҳажмлари босқичлар ва бажариш муддатлари бўйича бўлинган ҳолда, ишларни амалга ошириш жадвали илова қилинади.
Ҳар йили ҳисобот йили тугаши билан буюртмачи томонидан пудратчи ташкилот билан биргаликда прогноз қилинаётган йил ва кейинги йиллар учун бажарилаётган ишларнинг (хизматларнинг) контракт бўйича қолдиқ қиймати аниқланади.
Қурилишнинг титул рўйхатини шакллантириш ва капитал қўйилмаларнинг объектлар бўйича лимитларини аниқлаш мазкур Низомга мувофиқ шартномаларда белгиланган объект қурилишининг давом этиш муддатлари ва қийматига қатъий мувофиқ бўлиши зарур.
Иккинчи ва кейинги йиллар учун қурилишнинг титул рўйхатларига ўзгартиришлар пудрат шартномаси (контракт) асосида киритилади.
3. Нарх омиллари бўйича индексация қилиниши лозим бўлган иккинчи йил учун пудрат ишлари (хизматлар) қиймати буюртмачилар ва пудратчи ташкилотлар томонидан қуйидаги формула бўйича аниқланади:
О2 = (C — O1 — Пп — H1) x K1 бунда:
О2 – иккинчи йил учун пудрат ишлари қиймати;
C – танлов савдолари (тендер) натижасида аниқланган объектнинг жорий нархлардаги қиймати;
O1 – ишларни бажариш жадвалига мувофиқ қурилишнинг биринчи йилидаги пудрат ишлари ҳажмининг жорий нархлардаги қиймати;
Пп – ишларни бажариш жадвалига мувофиқ кейинги йиллар учун ишлар қиймати;
Н1 – буюртмачининг олдиндан берилган аванси;
К1 – пудрат шартномаси (контракт) тузилган вақтда белгиланган объект қийматига нисбатан ҳисоблаб чиқиладиган объект қурилишининг иккинчи йили учун шартномавий нарх ўзгаришини ҳисобга олувчи коэффициент.
Нарх омиллари бўйича индексация қилиниши лозим бўлган учинчи йил учун пудрат ишлари (хизматлар) қиймати буюртмачилар ва пудратчи ташкилотлар томонидан қуйидаги формула бўйича аниқланади:
О3 = (С — О1 — О2 — Пп — Н2) х К2 бунда:
О3 – учинчи йил учун пудрат ишлари қиймати;
C – объектнинг танлов савдолари (тендер) натижалари бўйича аниқланган жорий нархлардаги қиймати;
O1 ва О2 – ишларни бажариш жадвалига мувофиқ қурилишнинг биринчи ва иккинчи йиллари учун пудрат ишлари ҳажмининг жорий нархлардаги қиймати;
Пп – ишларни бажариш жадвалига мувофиқ кейинги йиллар учун ишлар қиймати;
Н2 – қурилишнинг иккинчи йилида буюртмачининг олдиндан берилган аванси;
К2 – пудрат шартномаси (контракт) тузилган вақтда белгиланган объектнинг қийматига нисбатан ҳисоблаб чиқиладиган объект қурилишининг учинчи йили учун шартномавий нарх ўзгаришини ҳисобга олувчи коэффициент.
Қурилишнинг кейинги йиллари учун объект қурилиш қиймати ҳам шу тартибда аниқланади.
4. К коэффициентни — қурилишнинг иккинчи йили (ва кейинги йиллари) учун шартномавий нарх ўзгаришини аниқлаш буюртмачи ва пудратчи билан биргаликда қуйидаги асосий нарх шакллантирувчи компонентлар асосида аниқланади:
Олдинги таҳрирга қаранг.
а) меҳнат харажатлари (меҳнатга ҳақ тўлашнинг энг кам миқдорининг ўзгариши);
(4-банднинг «а» кичик банди Ўзбекистон Республикаси Вазирлар Маҳкамасининг 2019 йил 28 декабрдаги 1046-сонли қарори таҳририда — Қонун ҳужжатлари маълумотлари миллий базаси, 29.12.2019 й., 09/19/1046/4242-сон)
б) электр энергияси («Ўзбекэнерго» компанияси);
в) ёнилғи-мойлаш материаллари («Ўзбекнефтгаз» компанияси);
г) металл («Ўзметкомбинат» бирлашмаси);
д) цемент (цемент заводлари);
е) қум (завод-карьерлар);
ж) йиғма темир-бетон буюмлари (тайёрловчи заводлар);
з) ёғоч-тахта материаллар (биржа нархлари);
и) ғишт (тайёрловчи заводлар) ва бошқа компонентлар.
Бунда компонентлар ва асосий қурилиш материалларининг турлари ҳар бир муайян объект бўйича, пудрат шартномаси (контракт) тузилган пайтдаги объектни қуриш қийматининг камида 70 фоизини ташкил этадиган асосий нарх шакллантирувчи компонентларни ҳисобга олган ҳолда танланади.
5. Мазкур Низомга мувофиқ аниқланган пудрат ишлари (хизматлар) қиймати ушбу қурилиш объекти бўйича танлов савдолари (тендер) ўтказган танлов комиссияси томонидан кўриб чиқилади ва тасдиқланади.
Олдинги таҳрирга қаранг.
6. Ўзбекистон Республикаси Молия вазирлиги, Иқтисодиёт вазирлиги, «Давархитектқурилиш» қўмитаси объектлар марказлаштирилган манбалар (давлат капитал қўйилмалари) ҳисобига қурилганда иккинчи йилга (ва кейинги йилларга) қурилишнинг шартномавий жорий нархи аниқлаштирилиши устидан доимий мониторингни амалга оширадилар.
(6-банд Ўзбекистон Республикаси Вазирлар Маҳкамасининг 2017 йил 16 августдаги 638-сонли қарори таҳририда — ЎР ҚҲТ, 2017 й., 33-сон, 863-модда)
7. Мазкур Низомга риоя этилиши ва объект қурилишининг кейинги йиллари учун шартномавий нархлар тўғри аниқланиши учун жавобгарлик қонун ҳужжатларига мувофиқ пудрат шартномаси (контракт) тузган буюртмачи билан пудратчи ташкилотлар зиммасига юкланади.
Ўзаро ҳисоб-китоб қилишда нархни шакллантирувчи асосий омиллар ва бошқа ҳисоблаб чиқиладиган кўрсаткичлар асоссиз қўлланилиши натижасида иккинчи йилга ва кейинги йилларга объектлар қурилиши қиймати ошириб юборилиши ҳоллари аниқланган тақдирда ошириб юборилган сумма қонун ҳужжатларида белгиланган тартибда республика бюджетида тикланади.
Кейинги таҳрирга қаранг.
Вазирлар Маҳкамасининг
2003 йил 11 июндаги
261-сон қарорига
3-ИЛОВА
I. Ўзбекистон Республикаси Ҳукуматининг ўз кучини йўқотган қарорлари рўйхати
Олдинги таҳрирга қаранг.
(1-банд Ўзбекистон Республикаси Вазирлар Маҳкамасининг 2021 йил 22 февралдаги 87-сонли қарорига асосан ўз кучини йўқотган — Қонун ҳужжатлари маълумотлари миллий базаси, 22.02.2021 й., 09/21/87/0134-сон)
2. Вазирлар Маҳкамасининг «Капитал қурилишда иқтисодий ислоҳотларни чуқурлаштириш чора-тадбирлари тўғрисида» 1998 йил 3 сентябрдаги 375-сон қарорига 8-илова.
II. Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг 1999 йил 5 февралдаги 54-сон қарори билан тасдиқланган Маҳсулот (ишлар, хизматлар)ни ишлаб чиқариш ва сотиш харажатлари таркиби ҳамда молиявий натижаларни шакллантириш тартиби тўғрисидаги Низомнинг (Ўзбекистон Республикаси ҚТ, 1999 й., 2-сон, 9-модда) «Ишлаб чиқариш тусидаги бошқа харажатлар» 1.5-кичик бўлимига қуйидаги мазмундаги 1.5.10-банд қўшилсин:
«1.5.10. Объектларни давлат капитал қўйилмалари ҳисобига қуришда қурилиш таваккалчиликларини суғурта қилиш билан боғлиқ харажатлар».
2. Вазирлар Маҳкамасининг 1999 йил 20 декабрдаги 532-сон қарори билан тасдиқланган Объектларни давлат маблағлари ва Ҳукумат кафолати остидаги кредитлар ҳисобига барпо этишда қурилиш таваккалчиликларини мажбурий суғурта қилиш тўғрисидаги Низомнинг (Ўзбекистон Республикаси ҚТ, 1999 й., 12-сон, 70-модда) I бўлимига қуйидаги мазмундаги 6-1-банд қўшилсин:
«6-1. Объектларни давлат капитал қўйилмалари ҳисобига барпо этишда қурилиш таваккалчиликларини суғурта қилиш қурилиш таваккалчиликларини мажбурий суғурта қилиш харажатларини объект қурилишининг умумий қийматига киритган ҳолда амалга оширилади».
3. Вазирлар Маҳкамасининг «Капитал қурилишда иқтисодий ислоҳотларни чуқурлаштиришга доир қўшимча чора-тадбирлар тўғрисида» 2000 йил 5 августдаги 305-сон қарорида (Ўзбекистон Республикаси ҚТ, 2000 й., 8-сон, 48-модда):
5-бандга қуйидаги мазмундаги иккинчи хатбоши қўшилсин:
«Мазкур банд биринчи хатбошининг амал қилиши улар бўйича шартномалар (контрактлар) танлов савдолари (тендерлар) натижаларига кўра тузилган қурилиш объектларига татбиқ этилмайди»;
қарорга 4-илова (Объектлар қурилишини лойиҳалаш ҳужжатларини ишлаб чиқиш билан айни бир вақтда амалга ошириш тартиби тўғрисидаги Низом)нинг 15-банди ўз кучини йўқотган деб ҳисоблансин.

(Ўзбекистон Республикаси қонун ҳужжатлари тўплами, 2003 й., 11-сон, 88-модда; 2010 й., 17-сон, 130-модда; 2013 й., 37-сон, 485-модда; 2017 й., 33-сон, 863-модда; Қонун ҳужжатлари маълумотлари миллий базаси, 29.12.2019 й., 09/19/1046/4242-сон; 22.02.2021 й., 09/21/87/0134-сон; Қонунчилик маълумотлари миллий базаси, 05.04.2022 й., 09/22/153/0266-сон; 07.10.2025 й., 09/25/627/0901-сон)