«Ўзбекистон ССЖдаги корхоналар тўғрисида»ги Ўзбекистон ССЖ Қонуни (6-модда, 2-банд)ни бажариш мақсадида Вазирлар Маҳкамаси қарор қилади:

1. Ўзбекистон ССЖ ҳудудидаги корхоналарни давлат рўйхатидан ўтказиш тартиби тўғрисидаги илова қилинаётган Низом тасдиқлансин.

2. Қорақалпогистон МССЖ Вазирлар Кенгаши, вилоят ижроия қўмиталари ва Тошкент шаҳар ижроия қўмитаси Вазирлар Маҳкамасининг ушбу қарорини халқ депутатлари маҳаллий Советларининг барча ижроия қўмиталарига етказсинлар ва унинг бажарилишини доимий назоратга олсинлар.

3. Халқ депутатлари маҳаллий Советларининг ижроия қўмиталарида шу вақтгача рўйхатдан ўтказилмаган барча корхоналар, ташкилотлар, шунингдек, юридик шахс ҳуқуқлари билан таъминланган филиаллар ва таркибий бўлинмалар 1991 йилнинг II-III чораклари давомида белгиланган тартибда рўйхатдан ўтишга мажбурлиги мақсадга мувофиқ деб топилсин.

Давлат рўйхатидан ўтмаган корхоналар (ташкилотлар), филиаллар ва таркибий бўлинмаларнинг хўжалик фаолияти тўхтатиб қўйилади. Рўйхатдан ўтказилмаган корхоналар (ташкилотлар)нинг, филиаллар, таркибий бўлинмаларнинг даромадлари ноқонуний ҳисобланади ва бюджетга ўтказилади.

1. Мазкур Низом мулкий шакллари ва қайси идорага бўйсунишларидан қатъи назар, «Ўзбекистон ССЖдаги корхоналар тўғрисида»ги Ўзбекистон ССЖ Қонунига мувофиқ Ўзбекистон ССЖ ҳудудида ишлаб чиқариш (хўжалик), тижорат ва бошқа фаолиятни амалга оширувчи корхоналар, бирлашмалар, ташкилотлар, шунингдек, юридик шахс ҳуқуқлари билан таъминланган филиаллар ва таркибий бўлинмалар (бундан кейин корхоналар деб аталади)ни давлат рўйхатидан ўтказиш тартибини белгилайди.

Ушбу Низом Ўзбекистон ССЖ қонуни билан бошқа тартиб назарда тутилган корхоналарга тааллуқли эмас.

2. Корхоналарни давлат рўйхатидан ўтказиш корхона жойлашган халқ депутатлари ноҳия, шаҳар, шаҳардаги ноҳия Советининг ижроия қўмитаси (бундан кейин рўйхатга олувчи орган деб аталади)ди амалга оширилади.

3. Давлат рўйхатидан ўтказиш учун корхоналар рўйхатдан ўтказувчи органга қуйидаги ҳужжатларни тақдим этадилар:

а) мулкчиликнинг ёки вакил қилинган органнинг янги корхоналар ташкил этиш тўғрисидаги қарори, ишлаб турган корхоналар учун — уларни ташкил этиш тўғрисидаги дастлабки ҳужжатлар.

Якка тартибдаги (хусусий) ва жамоа (ширкат) мулки (кооперативлардан ташқари)га асосланган корхоналар таъсис ҳужжатларининг нотариал жиҳатдан тасдиқланган нусхаларини тақдим этадилар:

якка тартибдаги (хусусий) корхона ташкил этиш тўғрисида фуқаронинг ёхуд муассасанинг аризаси;

жамоа корхонаси ташкил этишни хоҳловчи фуқароларнинг таъсис мажлиси баённомаси;

мулкчиликнинг жамоа шаклига асосланган корхона меҳнат жамоаси умумий йиғилишининг баённомаси;

б) корхонани давлат рўйхатидан ўтказиш тўғрисида ариза;

в) корхонани таъсис этувчи (таъсис этувчилар) томонидан тасдиқланган корхонанинг Устави ва унинг товар белгиси;

г) янгидан ташкил этилаётган корхоналар учун, агар корхонанинг ишлаб чиқариш фаолияти учун ер майдони талаб қилинса, ердан фойдаланувчининг розилик хати;

д) Ўзбекистон ССЖ Давлат табиатни муҳофаза қилиш қўмитасининг маҳаллий органларида корхоналарнинг рўйхатга олинганлиги тўғрисида маълутотнома;

е) корхонани рўйхатдан ўтказиш учун белгиланган миқдордаги давлат божи тўланганлиги тўғрисида гувоҳлик берувчи банк тўлов ҳужжати.

4. Барча турдаги кооперативларни давлат рўйхатидан ўтказиш Ўзбекистон ССР Министрлар Советининг 1990 йил 17 августдаги 304-сон фармойишига мувофиқ амалга оширилади. Бунда Ўзбекистон ССЖ Давлат табиатни муҳофаза қилиш қўмитасининг маҳаллий органларида кооперативнинг рўйхатга олинганлиги тўғрисида маълумотнома тақдим этилади.

5. Корхоналарни давлат рўйхатидан ўтказиш учун 250 сўм миқдорида давлат божи олинади. Ногиронлар, уруш, меҳнат, ССЖИ Қуролли Кучлари фахрийлари ёки пенсия ёшига етган кишилар (пенсионерлар) ишлайдиганларнинг камида 50 фоизини ташкил қиладиган корхоналарнинг рўйхатга олинганлик учун давлат божи 50 фоизга қисқартирилади. Олинган маблағлар корхона рўйхатдан ўтказиладиган ниҳоя, шаҳар, шаҳардаги ниҳоя бюджетига ўтказилади.

Уставларни ўзгартирганлик ва қўшимчалар учун, шунингдек, корхоналар қайта тузилганда ва тугатилганда рўйхатдан ўтказиш учун тўланган сумманинг 50 фоизи миқдорида пул олинади.

6. Давлат рўйхатидан ўтказиш рўйхатдан ўтказиш тўғрисида зарур ҳужжатлар илова қилинган ариза олинган пайтдан бошлаб 30 кундан кечикмай амалга оширилади. Корхоналарни давлат рўйхатидан ўтказиш тўғрисидаги маълумотлар рўйхатга олиш дафтарига киритиш учун халқ депутатлари маҳаллий Советлари ижроия қўмитасининг молия-солиқ органига ўн кун муддат ичида етказилади.

Рўйхатдан ўтказиладиган ҳар бир корхона учун рўйхатга олиш дафтарида алоҳида варақ очилади, унга рўйхат графасида (1-илова) назарда тутилган маълумотлар ёзилади.

7. Рўйхатдан ўтказилган корхонага рўйхатдан ўтганлик тўғрисида ордер (2-илова) берилади.

8. Ишлаб турган корхоналар ҳар қандай қайта тузиш ёки ўзларининг фаолият турларига ўзгартириш киритган ҳолларда, шунингдек, янгидан тузилган корхоналар беш кун муддат ичида уларнинг айнан ўхшаш ва классификация белгиларини аниқлаш мақсадида корхоналар ва ташкилотларнинг умумиттифоқ классификаторини юритиш тўғрисидаги Низом билан белгиланган тартибда ЎзССЖ Давлат статистика қўмитасига мурожаат қиладилар.