Ҳужжат 14.10.2013 00 санаси ҳолатига
Амалдаги версияга ўтиш

PDF-файлидаги расмий манба

Ўзбекистон Республикаси Президентининг

Фуқароларнинг ўзини ўзи бошқариш органлари ходимларининг малакасини ошириш бўйича ўқув курсларини ташкил этиш тўғрисида

«Фуқароларнинг ўзини ўзи бошқариш органлари тўғрисида»ги Ўзбекистон Республикаси Қонуни амалга оширилишини таъминлаш, шунингдек фуқаролар йиғинлари ходимларининг касбий ва бошқарув малакаларини янада ошириш, фуқароларнинг ўзини ўзи бошқариш органларига тизимли методик ёрдамни ташкил этиш мақсадида:

1. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузурида давлат таълим муассасаси шаклида фуқароларнинг ўзини ўзи бошқариш органлари ходимларининг малакасини ошириш бўйича ўқув курсларини ташкил этиш тўғрисида Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ва Ўзбекистон «Маҳалла» хайрия жамоат фондининг таклифи қабул қилинсин.

2. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузуридаги фуқароларнинг ўзини ўзи бошқариш органлари ходимларининг малакасини ошириш бўйича ўқув курслари (кейинги ўринларда Ўқув курслари деб юритилади) тузилмаси иловага мувофиқ тасдиқлансин.

3. Қуйидагилар Ўқув курсларининг асосий вазифалари этиб белгилансин:

фуқароларнинг ўзини ўзи бошқариш органлари ходимлари олдида турган вазифалар, шу жумладан ёшларни маърифатли қилиш ва маънавий-ахлоқий тарбиялаш, касбга йўналтириш, кичик ва хусусий тадбиркорликни, оилавий бизнесни ривожлантириш, аҳолини манзилли ижтимоий қўллаб-қувватлаш ва ижтимоий фаоллигини ошириш, жамоатчилик назоратини, табиатни муҳофаза қилишни ташкил этиш, ҳудудларни ободонлаштириш ва кўкаламзорлаштириш, жамиятда тинчлик ва осойишталикни таъминлаш соҳаларидаги вазифаларни амалга оширишда фуқароларнинг ўзини ўзи бошқариш ходимларининг малакасини, касбий ва бошқарув кўникмаларини, ҳуқуқий ва ижтимоий-иқтисодий билимларини оширишни ташкил қилиш;

фуқаролар йиғинларининг нодавлат нотижорат ташкилотлари, шунингдек давлат ҳокимияти ва бошқаруви органлари билан ижтимоий шериклик механизмларини шакллантириш ва ривожлантиришга қаратилган фаолиятини такомиллаштиришга кўмаклашиш.

4. Белгилаб қўйилсинки:

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Ўқув курслари фаолиятига ташкилий раҳбарликни, Ўзбекистон Республикаси Президенти ҳузуридаги Давлат бошқаруви академияси эса ўқув-методик раҳбарликни амалга оширади;

Ўқув курсларига Қорақалпоғистон Республикаси Вазирлар Кенгашининг раиси, вилоятлар ва Тошкент шаҳар ҳокимлари томонидан лавозимга тайинланадиган ва озод қилинадиган директор раҳбарлик қилади;

Ўқув курслари юридик шахс ҳисобланади ва Ўзбекистон Республикаси Давлат бюджетининг маблағлари ва қонун ҳужжатларида тақиқланмаган бошқа манбалар ҳисобидан молиялаштирилади;

Ўқув курсларида фуқаролар йиғинлари раислари, фуқаролар йиғинларининг диний маърифат ва маънавий-ахлоқий тарбия масалалари бўйича маслаҳатчилари, фуқаролар йиғинларининг масъул котиблари ва «Маҳалла посбони» жамоатчилик тузилмаларининг раҳбарлари (кейинги ўринларда тингловчилар деб юритилади) малака оширадилар.

Кейинги таҳрирга қаранг.

5. Ўзбекистон Республикаси Президенти ҳузуридаги Давлат бошқаруви академияси:

Кейинги таҳрирга қаранг.

Олий ва ўрта махсус таълим вазирлиги ҳамда Ўзбекистон «Маҳалла» хайрия жамоат фонди билан биргаликда бир ой муддатда малака ошириш бўйича ўқув режалари ва дастурларини ишлаб чиқсин ва тасдиқласин ҳамда уларнинг муттасил янгиланиб туришини таъминласин;

Кейинги таҳрирга қаранг.

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда ўқитишнинг замонавий шакл ва методларидан, илғор педагогик, ахборот-коммуникация ва инновация технологияларидан фойдаланган ҳолда ўқув жараёни ташкил этилишини таъминласин.

6. Ўзбекистон Республикаси Вазирлар Маҳкамаси бир ой муддатда фуқароларнинг ўзини ўзи бошқариш органлари ходимлари малакасини оширишнинг ташкилий тузилмаси ва тизими тўғрисидаги низомни тасдиқласин, унда малака оширишнинг ягона ҳуқуқий асослари, умумий ва махсус талаблари, асосий йўналишлари, шунингдек таълим сифатини назорат қилиш ва баҳолаш механизмлари белгилаб қўйилсин.

7. Қуйидагилар белгилансин:

Ўқув курсларининг ходимларига олий таълим муассасалари педагог кадрларини қайта тайёрлаш ва малакасини ошириш минтақавий марказларининг ходимлари учун ўрнатилган меҳнатга ҳақ тўлаш шартлари татбиқ этилади;

малака ошириш бўйича меҳнатга соатбай ҳақ тўлаш шартларида ўқитувчилик фаолиятини амалга ошириш учун қонун ҳужжатларида белгиланган тартибда етакчи таълим, тадқиқот ва илмий муассасаларнинг ходимлари, шунингдек амалиётчи мутахассислар жалб этиладилар;

малака оширишнинг тасдиқланган жадвалига киритилган ва Ўқув курсларига ўқишга йўлланган тингловчиларнинг асосий иш жойи бўйича ўртача иш ҳақи ўқиш даврида сақланиб қолинади;

малака ошириш учун Ўқув курсларига юборилган бошқа шаҳарлик тингловчиларга тўланадиган суткалик пул ва таълим олиш жойига бир марта бориб келиш бўйича сарфланган харажатлар уларни юбораётган томон ҳисобидан республика доирасида хизмат сафарлари учун ўрнатилган тартиб ва миқдорларда қопланади.

8. Ўзбекистон Республикаси Халқ таълими вазирлиги бепул асосда:

Ўқув курсларини Қорақалпоғистон Республикаси, вилоятлар ва Тошкент шаҳар халқ таълими ходимларини қайта тайёрлаш ва малакасини ошириш институтларида жойлаштирсин;

Ўқув курсларига ўқув машғулотларини ўтказиш учун зарур хоналар ва тингловчиларнинг яшаши учун жой ажратилишини таъминласин.

9. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари бир ой муддатда:

Олий ва ўрта махсус таълим вазирлиги, Халқ таълими вазирлиги, Ўзбекистон «Маҳалла» хайрия жамоат фонди билан биргаликда Ўқув курсларининг юқори малакали кадрлар билан тўлдирилишини;

Ўқув курслари учун ажратилган хоналарнинг ўқув жараёнининг ўзига хос хусусиятини инобатга олган ҳолда таъмирдан чиқарилишини;

халқ таълими ходимларини қайта тайёрлаш ва малакасини ошириш институтларининг ётоқхоналарида жойлар етишмаган (мавжуд бўлмаган) тақдирда таълим муассасаларининг ётоқхоналарида жой ажратилишини таъминласин.

10. Ўзбекистон Республикаси Молия вазирлиги 2013 йилда Ўзбекистон Республикасининг Давлат бюджети параметрларида ижтимоий соҳага йўналтириш кўзда тутилган маблағлар доирасида мазкур Қарорда назарда тутилган тадбирларни амалга оширишга, шу жумладан биноларни мукаммал таъмирлашга, идора мебели, ташкилий-техника воситалари билан жиҳозлашга, ўқув-методик ва илмий адабиётлар нашр этишга зарур маблағлар ажратсин, 2014 йилдан бошлаб эса Ўзбекистон Республикаси Давлат бюджети параметрларида уларни назарда тутсин.

Кейинги таҳрирга қаранг.

11. Мазкур Қарорнинг ижросини назорат қилиш Ўзбекистон Республикасининг Бош вазири Ш.М. Мирзиёев ва Ўзбекистон Республикаси Президентининг Давлат маслаҳатчиси И.Б. Абдуллаев зиммасига юклансин.

Ўзбекистон Республикаси Президенти И. КАРИМОВ

Тошкент ш.,

2013 йил 10 октябрь,

ПҚ-2050-сон

Ўзбекистон Республикаси Президентининг 2013 йил 10 октябрдаги ПҚ–2050-сонли қарорига
ИЛОВА

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузуридаги фуқароларнинг ўзини ўзи бошқариш органлари ходимларининг малакасини ошириш бўйича Ўқув курсларининг

ТУЗИЛМАСИ

Изоҳ: ёрдамчи ходимларнинг сони нормативлар бўйича белгиланади.

Профессор-ўқитувчилар таркиби ва мутахассис-амалиётчилар шартнома асосида жалб этилади.

(Ўзбекистон Республикаси қонун ҳужжатлари тўплами, 2013 й., 41-сон, 546-модда; 2014 й., 29-сон, 356-модда; Қонун ҳужжатлари маълумотлари миллий базаси, 04.05.2018 й., 06/18/5428/1158-сон; 23.02.2019 й., 06/19/5668/2652-сон; 30.05.2019 й., 06/19/5732/3212-сон; 17.03.2021 й., 06/21/6188/0216-сон)