Халқаро автомобилда юк ташишлар бозорини янада ривожлантириш, хорижий автомобилда юк ташувчиларнинг Ўзбекистон Республикаси ҳудудига киришлари, ундан чиқиб кетишлари ва бўлишларини назорат қилиш механизмини такомиллаштириш, Ўзбекистон Республикаси халқаро автомобиль магистралларининг сақланишини ва улардан фойдаланиш ҳолати сақлаб турилишини таъминлаш, шунингдек йирик габаритли ва оғир вазнли автотранспорт воситаларининг ўтишини тартибга солиш мақсадида Вазирлар Маҳкамаси қарор қилади:

1. Вазирлар Маҳкамасининг «Автомобилда хорижий юк ташувчиларнинг Ўзбекистон Республикаси ҳудудига киришлари, бўлишлари, юк олиб ўтишлари ва ундан чиқиб кетишлари тартиби тўғрисида» 1995 йил 11 январдаги 11-сон қарорига иловага мувофиқ ўзгартиришлар киритилсин.

2. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.И. Закиров зиммасига юклансин.

1. 5-бандда:

а) биринчи хатбошидаги «автотранспорт воситаларининг Ўзбекистон Республикаси ҳудудига кирганлиги учун олинадиган тўлов» сўзлари «хорижий давлатлар автотранспорт воситаларининг Ўзбекистон Республикаси ҳудудига кирганлиги ҳамда транзит ўтиши учун йиғим» сўзлари билан алмаштирилсин:

б) учинчи хатбоши қуйидаги таҳрирда баён қилинсин;

«Ҳужжатларни расмийлаштириш, хорижий давлатлар автотранспорт воситаларининг Ўзбекистон Республикаси ҳудудига кирганлиги ҳамда транзит ўтиши учун йиғим тўланиши устидан назорат божхона органлари томонидан амалга оширилади».

2. 6-банд қуйидаги таҳрирда баён қилинсин:

«6. Қуйидагилар:

оғир юкли ва йирик габаритли транспорт воситаларининг автомобиль йўлларини давлат томонидан бошқариш ваколатли органлари томонидан белгиланган тартибда бериладиган махсус рухсатномасиз умумий фойдаланиладиган йўллардан юриб ўтиши;

агар икки томонлама битимларда ўзгача ҳол назарда тутилмаган бўлса, автомобилда хорижий юк ташувчилар томонидан юкларнинг учинчи мамлакатларга (мамлакатлардан) ташилиши тақиқлансин».

3. Хорижий давлатлар оғир юкли ва катта ҳажмли транспорт воситаларининг Ўзбекистон Республикаси ҳудуди бўйлаб юриши учун тўловлар тўғрисида Низомда (6-илова):

а) 2-банд ўз кучини йўқотган деб ҳисоблансин;

б) 6-банд қуйидаги таҳрирда баён қилинсин:

«Транспорт воситаси умумий ҳақиқий вазнининг йўл қўйиладиган вазнга нисбатан ортиқчалиги учун тўлов миқдори 1-жадвалдаги тарифларга мувофиқ белгиланади.

Оғир юкли транспорт воситалари автомобиль йўллари бўйлаб юриб ўтганда ғилдирак ўқи ҳақиқий юкламасининг йўл қўйиладиган миқдорга нисбатан ортиқчалиги учун тўлов ҳар бир ўққа ортиқча юклама учун 2-жадвалда келтирилган тарифларга мувофиқ ундирилади.