Ҳужжат 15.07.1998 00 санаси ҳолатига
Амалдаги версияга ўтиш

Ўзбекистон Республикаси Вазирлар Маҳкамасининг

Олдинги таҳрирга қаранг.

ЎЗБЕКИСТОН РЕСПУБЛИКАСИ ЮК ОҚИМИ ГРУЗИЯ ПОРТЛАРИ ОРҚАЛИ ЎТИШНИ МУВОФИҚЛАШТИРИШ ҲУКУМАТ КОМИССИЯСИНИ ТАШКИЛ ЭТИШ ТЎҒРИСИДА

(қарор номи Ўзбекистон Республикаси Вазирлар Маҳкамасининг 1998 йил 15 июлдаги 302-сонли қарори таҳририда)

Озарбайжон Республикаси, Грузия Республикаси, Туркманистон ва Ўзбекистон Республикаси ўртасида Ашхобод шаҳрида 1996 йил 13 майда имзоланган Темир йўл транспорти фаолиятини мувофиқлаштириш тўғрисидаги шартномага ва Транзит ташишларни тартибга солиш соҳасида ҳамкорлик қилиш тўғрисидаги битимга мувофиқ, шунингдек Фарап — Туркманбоши — Боку — Поти темир йўл станциялари ўртасида юкларнинг узлуксиз ва тўсиқсиз ташилишини таъминлаш мақсадида Вазирлар Маҳкамаси қарор қилади:

1. Ўзбекистон Республикасининг Грузия портлари орқали юк оқимларини мувофиқлаштириш масалалари Ўзбекистон Республикаси Ташқи иқтисодий алоқалар агентлиги зиммасига юклатилсин. Ушбу мақсадлар учун ТИАИС, «Ўзбекистон темир йўллари» давлат-акциядорлик компанияси, «Ўзавтойўл» давлат-акциядорлик компанияси, Ўзбекистон автомобил ва дарё транспорти агентлиги, Олий хўжалик суди, Адлия вазирлиги, «Ўзпахтасаноат» уюшмаси, Давлат божхона қўмитаси ва Ўзбекистон халқаро экспедиторлар уюшмаси вакилларидан иборат ишчи гуруҳ тузилсин.

ТИАИС (Ғаниев) ҳар йили декабр ойида Вазирлар Маҳкамасига Европа — Кавказ — Осиё йўлаги бўйича юкларни ташиш ҳажмларини кўпайтириш чора-тадбирлари режаларини келишиш учун киритсин.

Белгилаб қўйилсинки, Ташқи иқтисодий алоқалар агентлиги ҳузуридаги Грузия портлари орқали Ўзбекистон Республикасининг юк оқимларини мувофиқлаштириш бўйича ишчи гуруҳнинг ўз ваколатлари доирасида қабул қилган қарорлари вазирликлар, идоралар, корпорациялар, уюшмалар, концернлар, мулкчилик шаклларидан қатъи назар, корхоналар ва ташкилотлар учун мажбурийдир.

3. Ташқи иқтисодий алоқалар вазирлиги (Ғаниев), «Ўзбекистон темир йўллари» давлат-акциядорлик компанияси (Эрметов), Адлия вазирлиги (Мирсафоев), Давлат солиқ қўмитаси (Гатаулин) манфаатдор вазирликлар ва идоралар билан биргаликда бир ой муддатда кўрсатиб ўтилган ташишларни амалдаги битимларга татбиқан бажариш тартибини ишлаб чиқсинлар ва тасдиқлаш учун киритсинлар.

4. Ташқи иқтисодий алоқалар вазирлиги (Ғаниев) ҳамда тегишли вазирликлар ва идоралар бир ой муддатда Поти портида Ўзбекистон Республикасининг экспорт-импорт юкларини ўз вақтида расмийлаштириш ва ташишни назорат қилиш бўйича Ўзбекистон Республикасининг махсус ваколатхонасини ташкил этиш бўйича ҳужжатларни тасдиқлаш учун киритсинлар.

5. «Ўздавпахтасаноатсотиш» уюшмаси Ташқи иқтисодий алоқалар вазирлиги билан биргаликда мавжуд ва истиқболли контрактлардан келиб чиққан ҳолда бир ой муддатда Бухоро вилоятида кўрсатиб ўтилган йўналишда пахта толасини юклаб жўнатиш бўйича марказлаштирилган база ташкил этиш тўғрисида таклифлар киритсин.

6. Бухоро вилояти ҳокимлиги вилоят ҳудудида Ташқи иқтисодий алоқалар вазирлигининг «Ўзмарказимпекс» республика савдо-саноат палатаси ва «Ўзавтотранс» корпорациясига пахта толасини бир йўла сақлаш учун 40000 тоннагача ҳажмда божхона омборхоналари қуриш учун ер участкаси ажратсин.

Давлат солиқ қўмитасининг Божхона бош бошқармаси ва «Ўздавстандарт» агентлиги юкларни ўз вақтида божхона ва метрологик расмийлаштириш учун тегишли инфратузилмани яратсинлар.

7. Ташқи иқтисодий алоқалар вазирлиги (Ғаниев), Молия вазирлиги (Гускова), «Ўзбекистон темир йўллари» давлат-акциядорлик компанияси (Эрметов), «Ўзавтотранс» корпорацияси (Ахметов), Адлия вазирлиги (Мирсафоев), Давлат мулки қўмитаси (Хўжаев) «Ўзинвестлойиҳа» инжиниринг компанияси билан биргаликда Туркманистон ва Грузия денгиз кемачилиги билан келишган ҳолда бир ой муддатда Туркманбоши ва Поти портларида реконструкция ишларини амалга оширишда Ўзбекистон Республикасининг улушли иштироки бўйича таклифлар киритсинлар.

8. «Ўзбекистон темир йўллари» давлат-акциядорлик компанияси «Ўздавпахтасаноатсотиш» уюшмаси ва вилоятлар ҳокимликлари билан биргаликда пахта толасини оғир юкли контейнерларга юклашнинг аниқ пунктларини ишлаб чиқсин ва белгиласин, бундай контейнерларда экспортга жорий йилда камида 10 минг тонна, 1997 йилда камида 30 минг тонна пахта толаси юкланишини ҳисобга олиб, оғир юкли контейнерларда пахта толаси ташиш ҳажмларини 2000 йилга бориб 100 минг тоннага етказсин.

9. «Ўзбекистон темир йўллари» давлат-акциядорлик компанияси мазкур транспорт йўналиши бўйича ташиладиган юкларнинг сақланиши ва хавфсизлигини таъминлаш мақсадида ушбу юкларни мажбурий суғурта мавжуд бўлган тақдирда қабул қилсин.

10. Мазкур қарорнинг бажарилишини назорат қилиш Бош вазирнинг биринчи ўринбосари И.Ҳ. Жўрабеков зиммасига юклансин..

Вазирлар Маҳкамасининг Раиси И. КАРИМОВ

Тошкент ш.,

1996 йил 24 май,

194-сон