|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
ЦЕЛЛЮЛОЗА ВА ЮҚОРИ СИФАТЛИ ҚОҒОЗ ИШЛАБ ЧИҚАРИШ ҚУВВАТЛАРИНИ БАРПО ЭТИШ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Республика халқ хўжалигининг целлюлоза ва юқори сифатли қоғозга бўлган талабини қондириш, уларнинг импорт қилинишини қисқартириш ва маҳаллий хом ашё манбаларидан оқилона фойдаланиш мақсадида Вазирлар Маҳкамаси қарор қилади:
1. «Ўзбекмебель» давлат-акционерлик бирлашмасининг Ангрендаги «Промкартонторг» очиқ турдаги акционерлик жамиятида похолдан 10 минг тонна целлюлоза ишлаб чиқарувчи қувватлар ишга туширилганлиги ва ушбу корхонада шунга ўхшаш қўшимча қувватлар жорий йилнинг учинчи чорагида ишга туширилиши маълумот учун қабул қилинсин.
2. Тошкент вилояти ҳокимлиги ва «Ўзбекмебель» ДАБнинг 1996-1997 йилларда қувватларни «Янгийўлмебель» ишлаб чиқариш-тижорат ширкатининг мавжуд майдонларига жойлаштирган ҳолда Янгийўл туманида пахта линтидан йилига 25 минг тонна целлюлоза ва 12 минг тонна қоғоз ишлаб чиқариш қувватига эга бўлган целлюлоза-қоғоз фабрикасини барпо этиш тўғрисидаги таклифларига розилик берилсин.
3. «Ўзбекмебель» ДАБ, «Ўзоғирсаноат» институти «Буммаш Холдинг» (Россия) акционерлик бирлашмаси билан биргаликда уч ой муддатда целлюлоза ва қоғоз ишлаб чиқариш қувватларини барпо этиш учун техник-иқтисодий асослашни, 1996 йилнинг 31 декабригача эса лойиҳа-смета ҳужжатларини ишлаб чиқсинлар.
«Ўзсаноатхўжаликқурилиш» давлат корпорацияси Янгийўл целлюлоза-қоғоз фабрикаси қурилиши бўйича бош пудратчи этиб белгилансин.
Ишчи чизмалари бўйича объектларни бир йўла лойиҳалашга, қуришга ва маблағ билан таъминлашга (лойиҳа-смета ҳужжатлари тасдиқлангунга қадар), истисно тариқасида, рухсат этилсин.
4. Пул-кредит сиёсати бўйича республика комиссияси (Ҳамидов) мазкур ишлаб чиқаришнинг халқ хўжалигидаги муҳим аҳамиятини ҳисобга олиб «Ўзбекмебель» ДАБ «Целлюлозақурилиш» дирекциясига қурилиш ва асбоб-ускуналар билан бутлаш учун 590 млн сўм, кейинчалик конвертация қилиш шарти билан қоғоз тайёрлаш машинаси олиш, лойиҳалаштириш ва мазкур маблағлар ҳисобига бутлаш учун 128 млн сўм миқдорида кредит ажратиш ҳақидаги масалани кўриб чиқсин.
5. Янгийўл целлюлоза-қоғоз фабрикасига, истисно тариқасида, банкларнинг кредитлари учун ҳисоб-китоб тугагунига қадар қўшимча қиймат солиғини тўла ҳажмда ушбу кредитларни узиш учун йўналтиришга рухсат берилсин.
6. «Ўзбекмебель» ДАБ (Мақсудов)нинг целлюлоза ва қоғоз ишлаб чиқариш фабрикаси қуввати кредит ажратилган кундан эътиборан бир йил-у уч ой мобайнида ишга туширилиши ҳақидаги ахбороти маълумот учун қабул қилинсин.
7. «Ўзистиқболстат» давлат қўмитаси (Ғафуров) 1997 йилдан бошлаб пахта линти ишлаб чиқариш ва ундан фойдаланиш умумий балансидан «Ўзбекмебель» ДАБга фабриканинг ишга туширилиш муддати ва барпо этилаётган қувватларнинг ўзлаштирилишига қараб целлюлоза ишлаб чиқариш учун зарур бўлган ҳажмда линт ажратишни назарда тутсин.
8. Ўзбекистон Республикаси Давлат табиатни муҳофаза қилиш қўмитаси лойиҳани белгиланган тартибда давлат экология экспертизасидан ўтказсин.
9. Мазкур қарорнинг бажарилишини назорат қилиш Бош вазир ўринбосарлари М. 3. Усмонов ва Р. Р. Юнусовлар зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
1996 йил 11 апрель,
144-сон
