Корхоналар ва ташкилотларнинг молиявий аҳволини мустаҳкамлаш, етказиб берилган маҳсулот, бажарилган ишлар ва кўрсатилган хизматлар учун истеъмолчилар ҳисоб-китобларини ўз вақтида қилишларини таъминлаш, шунингдек халқ хўжалигида тўлов интизомининг аҳволини яхшилаш мақсадида Вазирлар Маҳкамаси қарор қилади:

1. Ўзбекистон Республикаси Ташқи иқтисодий алоқалар вазирлиги илгари тузилган контрактлар, шу жумладан, фьючерс асосида тузилган контрактлар бўйича пахта толаси учун маблағларнинг «Ўздавпахтасаноатсотиш» уюшмасига ўз вақтида тушишини таъминласин.

«Ўздавпахтасаноатсотиш» уюшмаси 1997 йил ҳосилидан топширилган пахта хом ашёси учун унинг қийматининг 90 фоизи ҳисобидан келиб чиқиб пахта етиштирувчи хўжаликлар билан жорий йил охиригача ҳисоб-китоб қилинишини таъминласин.

3. Вазирликлар, идоралар, уюшмалар, концернлар, корпорациялар, компаниялар, корхоналар ва ташкилотлар:

дебиторлик ва кредиторлик қарзларини тармоқ ичида ва идоралараро узиш йўли билан икки томонлама ўзаро қарздорликни қисқартиришга оид асосланган таклифларни бир ой муддатда тайёрласин ва уларни Халқ хўжалигида ҳисоб-китобларни такомиллаштириш бўйича республика комиссиясининг кўриб чиқиши учун киритсин;

тижорат банклари билан биргаликда 1997 йил ноябрь-декабрь ойларида муддати ўтказиб юборилган дебиторлик ва кредиторлик қарзларини, уларни солиштириш далолатномаларини расмийлаштирган ҳолда, ялпи хатловдан ўтказсин.

Қорақалпоғистон Республикаси Вазирлар Кенгаши, вилоятлар, шаҳарлар ва туманлар ҳокимликлари барча хўжалик юритувчи субъектлар тўлиқ қамраб олинишини таъминлашда ҳамда муддати ўтказиб юборилган дебиторлик ва кредиторлик қарзлари хатлови сифатли ўтказилишида ҳар томонлама кўмаклашсинлар.

4. Мулкчилик шаклларидан қатъи назар, хўжалик юритувчи субъектлар хатлов натижалари бўйича Ўзбекистон Республикасида бухгалтерия ҳисоби ва ҳисоботи тўғрисидаги низомга мувофиқ даъво муддати тамом бўлган дебиторлик қарзларини 1998 йил 1 январгача ҳисобдан чиқарсинлар.

Ўзбекистон Республикаси Макроиқтисодиёт ва статистика вазирлиги Молия вазирлиги, Марказий банки, тижорат банклари иштирокида хўжалик юритувчи субъектларнинг дебиторлик ва кредиторлик қарзлари 1998 йил 1 январдаги баланс бўйича ҳисоботда тўлиқ ва аниқ акс эттирилишини таъминласин. Мулкчилик шаклларидан қатъи назар, хўжалик юритувчи субъектлардан ҳисоботларни қабул қилишда муддати ўтказиб юборилган дебиторлик ва кредиторлик қарзларининг барча суммасига солиштириш далолатномаларини талаб қилсин.

5. Тижорат банкларига:

пудратчи ташкилотларнинг дебиторлик қарзлари пайдо бўлишининг олдини олиш мақсадида тасдиқланган лойиҳа-смета ҳужжатларига мувофиқ буюртмачилар томонидан капитал қўйилмалар йиллик лимитларининг камида 30 фоизи миқдоридаги маблағлар махсус счётларда банд қилиб қўйилган тақдирда корхоналарнинг ўз маблағлари ҳисобига маблағ билан таъминлашни расмийлаштириш;

пудратчи ташкилотларнинг муддати ўтказиб юборилган дебиторлик қарздорлигига йўл қўймаслик учун муддати ўтказиб юборилган кредиторлик қарзларини қайтаришга маблағларини ҳисобга олмасдан туриб қурилишлар рўйхатларининг маблағ билан таъминлашга қабул қилинишини тақиқлаш;

лойиҳа-смета ҳужжатларига ва маблағ билан таъминлашнинг реал манбаларига эга бўлмаган объектларни қуриш ҳоллари аниқланган тақдирда уларнинг қийматини пудратчи ташкилотлар томонидан бажарилган ишларнинг умумий ҳажмидан ва ҳисобланган иш ҳақидан чиқариб ташлаш тавсия этилсин. Аниқланган ҳолларга оид материалларни айбдор шахсларга нисбатан иқтисодий таъсир чоралари қўллаш учун Ўзбекистон Республикаси Давлат солиқ қўмитасига ошириш, шу жумладан, ундирилган маблағларни белгиланган тартибда бюджетга ўтказган ҳолда буюртмачи ва пудратчидан тенг улушларда жарималар ундириш;

бюджет ва бошқа кредиторлар олдида муддати ўтказиб юборилган қарзлари бўлган корхоналар ва ташкилотлар билан биргаликда корхоналар ва ташкилотларнинг ўз валюта маблағларининг, сўмлардаги тушумни бюджетга муддатида тўланманган тўловларни ва республика маҳсулот етказиб берувчиларига кредиторлик қарзларини тўлашга йўналтирган ҳолда, мажбурий сотилишини таъминлаш;

кредит маблағлари ажратишда корхоналар ва ташкилотларнинг молиявий аҳволини ҳар томонлама ва чуқур ўрганиш тавсия қилинсин. Кредитлар фақат ишлаб чиқарилган маҳсулотни сотиш учун контрактлар ва аниқ харидорлар мавжуд бўлган тақдирдагина ажратилсин. Омборларда тайёр маҳсулотнинг нормативдан ортиқ қолдиғига эга бўлган корхоналарга кредит маблағлари ажратиш тақиқлансин;

дебиторлик ва кредиторлик қарзларини қисқартириш мақсадида факторинг хизматлари кўрсатишни кенгайтириш ва ҳисоб-китобларнинг аккредитив шаклини қўллаш тавсия этилсин.

6. Мулкчилик шаклларидан қатъи назар, корхоналар ва ташкилотларнинг раҳбарлари тўлов муддатлари бузилган тақдирда (товар олингандан кейин 60 кун ичида) кўрсатиб ўтилган истеъмолчи корхоналарга маҳсулотни бундан кейин фақат ҳисоб-китобларнинг аккредитив шакли бўйича жўнатсинлар.

Ўзбекистон Республикаси Давлат солиқ қўмитаси, вазирликлар ва идоралар, тижорат банклари раҳбарлари ҳисоб-китобларнинг мазкур бандда белгиланган тартибига риоя қилиниши устидан қатъий назорат ўрнатсинлар. Ушбу тартиб бажарилмаган тақдирда корхоналар ва ташкилотларнинг раҳбарларига нисбатан моддий ва маъмурий жавобгарлик чораларини қўлласинлар.

7. Ўзбекистон Республикаси Молия вазирлиги Давлат солиқ қўмитаси билан биргаликда дебиторлик ва кредиторлик қарзларини бухгалтерия ҳисоби ва ҳисоботида ягона нархларда акс эттириш тартибини ишлаб чиқсин ва тасдиқласин ҳамда уни 1998 йил 1 январдан бошлаб жорий этсин.

8. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов зиммасига юклансин.