|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
ҚИЗИЛҚУМ ФОСФОРИТ КОМБИНАТИ ҚУРИЛИШИ ЮЗАСИДАН ҚЎШИМЧА ЧОРА-ТАДБИРЛАР ТЎҒРИСИДА
[Кўчирма]
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Қизилқум фосфорит комбинати қурилишини жадаллаштириш ва фосфорли ўғитлар ишлаб чиқарувчи корхоналарга маҳаллий фосфорит хом ашёси етказиб бериш муддатларини яқинлаштириш мақсадида Вазирлар Маҳкамаси қарор қилади:
1. Белгилансинки:
а) Қизилқум фосфорит комбинатининг бойитиш фабрикаси Тошқўра конида жойлаштирилади;
б) Қизилқум фосфорит комбинати қурилиши икки босқичда амалга оширилади:
конни очиш, 300 минг тонна руда қазиб олиш, бойитилмаган фосфор унини тайёрлаш ва суперфосфат ишлаб чиқариш учун Қўқон суперфосфат заводига махсус вагонларда жўнатиш ишларини ўз ичига олувчи 1997 йилнинг биринчи ярим йиллигида ишга тушириладиган биринчи комплекс;
йилига 5150 минг тонна руда қазиб олиш ва уни 2774 минг тонна фосфорит концентратигача бойитиш ишларини ўз ичига олувчи 2000 йилда ишга тушириладиган иккинчи комплекс;
в) ишга тушириладиган биринчи комплекс қурилишини маблағ билан таъминлаш марказлаштирилган кредит ресурслари ҳисобидан амалга оширилади.
2. Қуйидагилар:
ишга тушириладиган биринчи комплекснинг буюртмачиси этиб Навоий кон-металлургия комбинати, «Қизилқумнодирметаллолтин» концернининг Зарафшон қурилиш бошқармаси эса пудратчи этиб;
«Ўзкимёсаноат» уюшмаси ишга тушириладиган иккинчи комплекснинг буюртмачиси этиб белгилансин.
4. Куйидагилар:
а) қурилиши 1997 йилнинг биринчи чорагида тамомланадиган ташқи инфраструктура объектлари қурилиши бўйича:
«Ўзавтойўл» давлат уюшмаси ташқи автомобиль йўллари қурилиши бўйича буюртмачи ҳамда пудратчи этиб;
«Ўзбекистон темир йўллари» давлат-акционерлик компанияси ташқи темир йўл линияси қурилиши бўйича буюртмачи, «Ўзбектрансқурилиш» давлат уюшмаси эса пудратчи этиб;
Алоқа вазирлиги ташқи алоқа тармоқлари ва иншоотлари қурилиши бўйича буюртмачи ҳамда пудратчи этиб;
«Ўзтрансгаз» бирлашмаси ташқи газ таъминоти тармоқлари ва иншоотлари қурилиши бўйича буюртмачи ҳамда «Ўзбекнефтгаз» корпорациясининг «Ўзнефтгазқурилиш» бирлашмаси эса пудратчи этиб белгилансин;
б) маблағ билан таъминлашнинг манбалари этиб:
ташқи автомобиль йўллари қурилиши бўйича — Республика йўл жамғармаси маблағлари;
ташқи темир йўл линияси қурилиши бўйича — бюджетдан ажратиладиган маблағлар;
ташқи алоқа тармоқлари ва иншоотлари, ташқи газ таъминоти тармоқлари ва иншоотлари қурилиши бўйича — тегишли равишда Алоқа вазирлиги, «Ўзбекнефтгаз» корпорациясининг ўз маблағлари белгилансин.
5. Қизилқум фосфорит комбинатининг тўлиқ технологик схемаси бўйича Ўзбекистон Республикаси Энергетика ва электрлаштириш вазирлиги, ушбу ишларни ўз маблағлари ҳисобига таъминлаган ҳолда, ташқи электр таъминоти тармоқлари ва иншоотлари бўйича буюртмачи ҳамда пудратчи этиб белгилансин.
6. «Ўзкимёсаноат» уюшмаси, «Ўзсаноатхўжаликқурилиш» корпорацияси ва «Қизилқумнодирметаллолтин» концерни ишга тушириладиган биринчи комплекс бўйича лойиҳа-смета ҳужжатлари, асосий фондлар, тугалланмаган қурилиш ва барча активлар ва пассивларни қабул қилиш-топшириш ишларини икки ҳафта муддатда амалга оширсинлар.
7. «Ўзистиқболстат» давлат қўмитаси кўрсатиб ўтилган қурилишни республиканинг инвестиция дастурига киритсин.
8. «Ўзкимёсаноат» уюшмаси:
1997 йилнинг биринчи чораги давомида хорижий фирмаларни жалб этган ҳолда тендер асосида фосфор рудасини бойитишнинг замонавий технологиясини танласин;
1997 йилнинг биринчи ярим йиллиги мобайнида танланган технология бўйича Тошқўра конида бойитиш фабрикаси қурилишининг техник-иқтисодий асосланишини қайта ишлаб чиқсин ва уни экспертизадан ўтказсин;
1997 йилнинг учинчи чорагида тўлиқ технологик схема бўйича бойитиш фабрикаси қурилишининг ишлар лойиҳасини ишлаб чиқсин ва Ўзбекистон Республикаси Вазирлар Маҳкамасига таклиф киритсин.
9. Навоий кон-металлургия комбинати йилига 300 минг тонна ҳажмда фосфорит рудаси қайта ишланиши таъминланишини назарда тутган ҳолда Тошкент вилоятининг Чиғириқ шаҳарчасидаги 2-руда бошқармасининг бойитиш фабрикасини реконструкция қилиш ҳақида ўн кун муддатда таклиф тайёрласин ва Вазирлар Маҳкамасига киритсин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И.Ҳ. Жўрабеков зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
1997 йил 20 февраль,
92-сон
