|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
«TRANSYOʼLQURILISН» ДАВЛАТ КОМПАНИЯСИНИНГ САМАРАЛИ ФАОЛИЯТ КЎРСАТИШИНИ ТАЪМИНЛАШ ЧОРА-ТАДБИРЛАРИ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ўзбекистон Республикаси Президентининг «Осиё тараққиёт банки иштирокида «Минтақавий автомобиль йўлларини ривожлантириш» лойиҳасини амалга ошириш чора-тадбирлари тўғрисида» 2008 йил 28 февралдаги ПҚ-804-сон қарорини бажариш юзасидан Вазирлар Маҳкамаси қарор қилади:
1. Қуйидагилар:
Вазирлар Маҳкамаси «TRANSYOʼLQURILISН» давлат компаниясининг муассиси ҳисобланиши;
«TRANSYOʼLQURILISН» давлат компаниясининг устави 2008 йил 19 сентябрда «Минтақавий автомобиль йўлларини ривожлантириш» лойиҳасини амалга ошириш бўйича Мувофиқлаштирувчи кенгаш раиси – Коммунал соҳа, транспорт, капитал қурилиш ва қурилиш индустрияси комплекси раҳбари томонидан тасдиқланганлиги;
«TRANSYOʼLQURILISН» давлат компанияси 2008 йил 24 сентябрда Тошкент шаҳар Мирзо Улуғбек тумани ҳокимлиги томонидан юридик шахс сифатида рўйхатдан ўтказилганлиги;
«Ўзавтойўл» давлат-акциядорлик компанияси кенгаши томонидан «Ўзйўлмашсервис» йўл-таъмирлаш корхонаси балансида турган ва «TRANSYOʼLQURILISН» давлат компаниясига унинг устав фондини шакллантириш ҳисобига белгиланган тартибда бериладиган давлат мол-мулки рўйхати белгиланганлиги маълумот учун қабул қилинсин.
2. Ўзбекистон Республикаси Давлат мулки қўмитаси «Ўзавтойўл» давлат-акциядорлик компанияси кенгаши томонидан белгиланган рўйхатга киритилган давлат мол-мулкини икки ҳафта муддатда баҳоласин ҳамда уни белгиланган тартибда «TRANSYOʼLQURILISН» давлат компаниясининг устав фондига берсин.
3. Белгилаб қўйилсинки, «Минтақавий автомобиль йўлларини ривожлантириш» лойиҳасини амалга ошириш бўйича Мувофиқлаштирувчи кенгаш лойиҳа даврида Вазирлар Маҳкамаси номидан «TRANSYOʼLQURILISН» давлат компаниясининг муассиси функциясини амалга оширади.
4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Н.М.Ханов зиммасига юклансин.
Ўзбекистон Республикасининг Бош вазири Ш. МИРЗИЁЕВ
Тошкент ш.,
2009 йил 19 май,
140-сон
