60-сон 09.03.2009. Адвокатлик фаолиятини лицензиялаш ва адвокатлик тузилмаларини ташкил этиш тартибини такомиллаштириш тўғрисида

Ҳужжат кучини йўқотган " " 01.01.2023

Ҳужжат 01.11.2012 00 санаси ҳолатига
Амалдаги версияга ўтиш

Ўзбекистон Республикаси Вазирлар Маҳкамасининг

қарори

Адвокатлик фаолиятини лицензиялаш ва адвокатлик тузилмаларини ташкил этиш тартибини такомиллаштириш тўғрисида

LexUZ шарҳи

Мазкур қарор Ўзбекистан Республикаси Вазирлар Маҳкамасининг 2022 йил 5 августдаги 432-сонли «Адвокатлик фаолиятини махсус электрон тизим орқали лицензиялаш тартиби тўғрисидаги низомни тасдиқлаш ҳақида»ги қарорига асосан 2023 йил 1 январдан ўз кучини йўқотади.

Ўзбекистон Республикасининг «Адвокатура институти такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида» 2008 йил 31 декабрдаги ЎРҚ-198-сон Қонунига ҳамда Ўзбекистон Республикаси Президентининг «Ўзбекистон Республикасида адвокатура институтини янада ислоҳ қилиш чора-тадбирлари тўғрисида» 2008 йил 1 майдаги ПФ-3993-сон Фармонига мувофиқ Вазирлар Маҳкамаси қарор қилади:

1. Қуйидагилар:

Адвокатлик фаолиятини лицензиялаш тўғрисидаги низом 1-иловага мувофиқ;

Адвокатлик тузилмаларини давлат рўйхатидан ўтказиш (ҳисобга олиш) тўғрисидаги низом 2-иловага мувофиқ тасдиқлансин.

2. Давлат божининг қуйидаги ставкалари белгилансин:

адвокатлик бюролари, адвокатлик фирмалари ва адвокатлар ҳайъатларини давлат рўйхатидан ўтказганлик учун — энг кам ойлик иш ҳақининг 4 баравари миқдорида;

Кейинги таҳрирга қаранг.

юридик маслаҳатхоналарни ҳисобга олганлик учун — энг кам ойлик иш ҳақининг 2 баравари миқдорида;

Кейинги таҳрирга қаранг.

адвокатлик бюролари, адвокатлик фирмалари ва адвокатлар ҳайъатларининг таъсис ҳужжатларига киритилган ўзгартиш ва қўшимчаларни, шунингдек юридик маслаҳатхоналар тўғрисидаги низомларни давлат рўйхатидан ўтказганлик учун — мазкур банднинг тегишли равишда иккинчи ва учинчи хатбошида кўрсатилган ставкаларнинг 20 фоизи миқдорида;

адвокатлик фаолияти билан шуғулланиш ҳуқуқи учун лицензия берилганлиги учун — энг кам ойлик иш ҳақининг 2 баравари миқдорида.

Кейинги таҳрирга қаранг.

Давлат божи суммалари Судлар ва адлия органларини ривожлантириш жамғармасига ўтказилади.

Кейинги таҳрирга қаранг.

Олдинги таҳрирга қаранг.

3. Белгилансинки, адвокат мақомига эга бўлишга талабгор шахслар уларнинг лицензия бериш тўғрисидаги аризалари кўриб чиқилганлиги учун тегишли адлия органларига энг кам ойлик иш ҳақининг 50 фоизи миқдорида йиғим тўлайдилар.

(3-банд Ўзбекистон Республикаси Вазирлар Маҳкамасининг 2012 йил 1 ноябрдаги 313-сонли қарори таҳририда — ЎР ҚҲТ, 2012 й., 44-сон, 507-модда)

Кейинги таҳрирга қаранг.

4. Ўзбекистон Республикасининг «Адвокатура институти такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида» 2008 йил 31 декабрдаги ЎРҚ-198-сон Қонунининг 7-моддасига мувофиқ, 2009 йилнинг 1 январигача фаолият кўрсатаётган адвокатлик тузилмалари, шунингдек уларда ишлаётган адвокатлар 2009 йилнинг 1 июлигача адвокатлик тузилмаларининг ташкилий-ҳуқуқий шаклларини, лицензияларини ҳамда адвокат мақомларини кўрсатиб ўтилган Қонунга мувофиқлаштириши мажбурийлиги маълумот учун қабул қилинсин.

Адлия вазирлиги Ўзбекистон Республикаси Адвокатлар палатаси билан биргаликда:

икки ҳафта муддатда Ўзбекистон Республикаси Адвокатлар палатаси ҳузурида Олий малака комиссияси ва Палатанинг ҳудудий бошқармалари ҳузурида малака комиссиялари тузишни;

2009 йилнинг 1 июлигача бўлган муддатда амалдаги адвокатлик тузилмаларини қайта рўйхатдан ўтказишни, уларда ишлаётган адвокатлар томонидан малака имтиҳонлари қайта топширилишини, уларга адвокатлик фаолияти билан шуғулланиш ҳуқуқини берувчи янги намунадаги лицензиялар ва адвокат гувоҳномалари берилишини;

Ўзбекистон Республикаси Адвокатлар палатаси ҳузуридаги Олий малака комиссияси ва Палатанинг ҳудудий бошқармалари ҳузуридаги малака комиссиялари таркибига киритилган адвокатларга малака имтиҳонлари топширмасдан адвокатлик фаолияти билан шуғулланиш ҳуқуқи учун лицензиялар берилишини таъминласин.

5. Фаолият кўрсатаётган адвокатлик тузилмалари ва уларда ишлаётган адвокатлар мазкур қарорга мувофиқ тегишли равишда адвокатлик тузилмаларини қайта рўйхатдан ўтказишда ва адвокатлик фаолияти билан шуғулланиш ҳуқуқини берувчи лицензиялар беришда давлат божлари ва йиғимлари тўлашдан озод қилинсин.

6. Қуйидагилар:

Вазирлар Маҳкамасининг «Адвокатлик бюролари, ҳайъатлари, фирмаларини давлат рўйхатидан ўтказиш ҳамда Ўзбекистон Республикаси фуқароларига адвокатлик фаолияти билан шуғулланиш ҳуқуқини берувчи лицензияларни бериш тартиби тўғрисида» 1997 йил 13 мартдаги 139-сон қарори (Ўзбекистон Республикаси ҚТ, 1997 й., 3-сон, 12-модда);

«Ўзбекистон Республикаси Ҳукуматининг айрим қарорларига ўзгартиришлар киритиш тўғрисида» 2003 йил 30 апрелдаги 197-сон қарорига илованинг 8-банди (Ўзбекистон Республикаси ҚТ, 2003 й., 4-сон, 34-модда);

Вазирлар Маҳкамасининг «Адвокатлик бюролари, ҳайъатлари, фирмаларини давлат рўйхатидан ўтказиш ҳамда Ўзбекистон Республикаси фуқароларига адвокатлик фаолияти билан шуғулланиш ҳуқуқини берувчи лицензияларни бериш тартиби тўғрисидаги низомга ўзгартиришлар ва қўшимчалар киритиш ҳақида» 2003 йил 5 ноябрдаги 485-сон қарори (Ўзбекистон Республикаси ҚТ, 2003 й., 11-сон, 109-модда) ўз кучини йўқотган деб ҳисоблансин.

7. Мазкур қарорнинг бажарилишини назорат қилиш Ўзбекистон Республикасининг Адлия вазири Р.А. Муҳитдинов зиммасига юклансин.

Ўзбекистон Республикасининг Бош вазири Ш. МИРЗИЁЕВ

Тошкент ш.,

2009 йил 9 март,

60-сон

Вазирлар Маҳкамасининг 2009 йил 9 мартдаги 60-сон қарорига
1-ИЛОВА

Адвокатлик фаолиятини лицензиялаш тўғрисида

НИЗОМ

I. Умумий қоидалар

1. Ушбу Низом адвокатлик фаолиятини лицензиялаш тартибини белгилайди.

2. «Адвокатура тўғрисида»ги Ўзбекистон Республикаси Қонунига мувофиқ адвокатлик фаолияти билан шуғулланиш ҳуқуқини берувчи лицензия (кейинги ўринларда лицензия деб аталади) Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари (кейинги ўринларда адлия органлари деб аталади) томонидан Ўзбекистон Республикаси Адвокатлар палатасининг тегишли ҳудудий бошқармалари ҳузуридаги малака комиссияларининг (кейинги ўринларда малака комиссиялари деб аталади) қарорлари асосида берилади.

Кейинги таҳрирга қаранг.

3. Лицензия олиш учун адвокат мақомини олишга талабгор шахс (кейинги ўринларда талабгор деб аталади) юридик мутахассислик бўйича камида икки йил иш стажига эга бўлиши, шу жумладан адвокатлик тузилмасида (адвокатлик бюросида, адвокатлик фирмасида, адвокатлар ҳайъатида, юридик маслаҳатхонада) камида олти ой стажировка ўтаган бўлиши керак ҳамда малака имтиҳонини топшириши шарт.

Ўзбекистон Республикаси Адлия вазирлиги томонидан белгиланадиган тартибда бериладиган адвокатлик гувоҳномаси адвокатнинг мақомини тасдиқловчи ҳужжат ҳисобланади.

4. Малака имтиҳонини муваффақиятли топширган талабгор лицензия олиш учун тегишли адлия органига уч ой ичида мурожаат қилиши керак. Бу муддатни ўтказиб юборган талабгор лицензия олиш учун адлия органига малака имтиҳонини топширганидан кейингина мурожаат қилиши мумкин.

Кейинги таҳрирга қаранг.

5. Лицензияларни бериш талабгорнинг доимий яшаш жойидаги адлия органлари томонидан белгиланган тартибда амалга оширилади.

Кейинги таҳрирга қаранг.

6. Лицензия Ўзбекистон Республикасининг бутун ҳудудида амал қилади ва унинг амал қилиш муддати чекланмайди.

II. Лицензия талаблари ва шартлари

7. Адвокатлик фаолиятини амалга оширишда қуйидагилар лицензия талаблари ва шартлари ҳисобланади:

қонун ҳужжатлари талабларига, Адвокатларнинг касб этикаси қоидаларига, адвокатлик сири ва адвокат қасамёдига риоя этиш;

адвокатга юридик ёрдам сўраб мурожаат этган жисмоний ва юридик шахсларнинг ҳуқуқлари ва қонуний манфаатларини ҳимоя қилиш учун қонунда тақиқланмаган воситалар ва усуллардан фойдаланиш;

қонунда назарда тутилган ҳолларда тайинлов асосида жиноий ишларни кўриб чиқишда қатнашиш;

ҳар уч йилда камида бир марта ўзининг касбий малакасини ошириш.

III. Лицензия олиш учун зарур бўладиган ҳужжатлар

8. Лицензия олиш учун малака имтиҳонини муваффақиятли топширган талабгор адлия органига қуйидаги ҳужжатларни тақдим этиши керак:

лицензия бериш тўғрисидаги ариза, унда фамилияси, исми, отасининг исми ва Ўзбекистон Республикаси фуқароси паспортининг маълумотлари кўрсатилади;

Ўзбекистон Республикаси фуқароси паспортининг нусхаси;

олий юридик маълумот тўғрисидаги дипломнинг нотариал тасдиқланган нусхаси;

Кейинги таҳрирга қаранг.

меҳнат дафтарчасининг нотариал тасдиқланган нусхаси;

Кейинги таҳрирга қаранг.

талабгор тўғрисидаги маълумотлардан иборат бўлган шахсий варақа;

малака имтиҳонини топширганлиги тўғрисидаги малака комиссиясининг қарори;

талабгор томонидан унинг аризасини адлия органи кўриб чиқиши учун йиғим тўланганлигини тасдиқловчи ҳужжат.

Кейинги таҳрирга қаранг.

9. Талабгордан ушбу Низомда назарда тутилмаган бошқа ҳужжатларни тақдим этишни талаб қилишга йўл қўйилмайди.

10. Ҳужжатлар адлия органига бевосита ёхуд почта алоқаси воситалари орқали, улар олингани ҳақидаги билдиришнома олинган ҳолда, етказиб берилади.

Кейинги таҳрирга қаранг.

11. Лицензия олиш учун адлия органига тақдим этилган ҳужжатлар масъул шахс томонидан рўйхат бўйича қабул қилинади, рўйхатнинг нусхаси ҳужжатлар қабул қилинган сана тўғрисида белги қўйилган ҳолда талабгорга юборилади (топширилади) ва адлия органи томонидан рўйхатдан ўтказилади.

Кейинги таҳрирга қаранг.

IV. Аризани кўриб чиқиш ва лицензия бериш тўғрисида ёки лицензия беришни рад этиш тўғрисида қарор қабул қилиш

Олдинги таҳрирга қаранг.

12. Лицензия бериш тўғрисидаги аризани кўриб чиқиш учун талабгордан қонун ҳужжатларида белгиланган энг кам ойлик иш ҳақининг 50 фоизи миқдорида йиғим ундирилади.

(12-банднинг биринчи хатбошиси Ўзбекистон Республикаси Вазирлар Маҳкамасининг 2012 йил 1 ноябрдаги 313-сонли қарори таҳририда — ЎР ҚҲТ, 2012 й., 44-сон, 507-модда)

Кейинги таҳрирга қаранг.

Аризани кўриб чиқиш учун ундирилган йиғим суммаси адлия органи ҳисоб рақамига ўтказилади. Талабгор берган аризасидан воз кечган тақдирда тўланган йиғим суммаси қайтариб берилмайди.

Кейинги таҳрирга қаранг.

13. Талабгорнинг аризаси адлия органи томонидан йигирма кун муддатда кўриб чиқилади.

Кейинги таҳрирга қаранг.

Адвокатлик фаолиятини лицензиялаш схемаси ушбу Низомга 1-иловада келтирилган.

Алоҳида ҳолларда, келиб тушган ҳужжатлар қўшимча, шу жумладан, мустақил экспертизадан ўтказилганда адлия органи раҳбари ёки унинг ўринбосари ушбу муддатни узайтириши, бироқ 10 кундан ортиқ бўлмаган муддатга узайтириши мумкин.

14. Талабгорнинг аризасини барча зарур ҳужжатлар билан бирга кўриб чиқиш натижаларига кўра адлия органи лицензия бериш ёки лицензия беришни рад этиш тўғрисида қарор қабул қилади ва талабгорни қабул қилинган қарор тўғрисида уч кун муддатда хабардор қилади. Лицензия бериш тўғрисидаги қарор адлия органи раҳбарининг буйруғи билан расмийлаштирилади.

15. Лицензия бериш тўғрисида қарор қабул қилингани ҳақидаги билдиришнома талабгорга ёзма шаклда банк ҳисоб рақами реквизитлари ва давлат божини тўлаш муддати кўрсатилган ҳолда юборилади (топширилади).

Кейинги таҳрирга қаранг.

Лицензия талабгор давлат божи тўланганлигини тасдиқловчи ҳужжатни тақдим этгандан кейин икки кун муддатда берилади.

Агар талабгор лицензия бериш тўғрисида қарор қабул қилинганлиги ҳақидаги билдиришнома юборилган (топширилган) вақтдан бошлаб уч ой ичида лицензия берганлик учун давлат божи тўланганлигини тасдиқловчи ҳужжатни адлия органига тақдим этмаса адлия органи лицензиянинг амал қилишини тугатиш тўғрисида қарор қабул қилади.

16. Лицензия ушбу Низомга 2-иловага мувофиқ шаклдаги махсус бланкаларда расмийлаштирилади ҳамда адлия органи раҳбари томонидан имзоланади ва муҳр билан тасдиқланади.

Лицензиялар бланкалари қатъий ҳисобда турадиган ҳужжат ҳисобланади, ҳисобга олиш серияси, тартиб рақами ва ҳимояланганлик даражасига эга бўлади. Лицензиялар бланкалари Ўзбекистон Республикаси Адлия вазирлиги буюртмасига биноан босмахона усулида «Давлат белгиси» давлат ишлаб чиқариш бирлашмасида тайёрланади.

Лицензия бланкаларини сақлаш ва ҳисобга олиш тартиби Ўзбекистон Республикаси Адлия вазирлиги томонидан белгиланади.

Лицензияни берган адлия органлари томонидан ушбу Низомга 3-иловага мувофиқ шакл бўйича лицензиялар реестрлари юритилади.

Реестр дафтари ип билан тикилади, рақамланади ва унинг орқа тарафида бетлар сони, дафтарни юритиш санаси (йил, кун, ой) кўрсатилади ва адлия органи раҳбарининг муҳри ва имзоси қўйилади.

17. Адлия органи қуйидаги ҳолларда лицензия беришни рад этиши мумкин:

талабгор малака имтиҳонини топширган кундан бошлаб уч ой муддат ўтгандан кейин малака имтиҳонини қайта топширмасдан мурожаат қилса;

ҳужжатларнинг тўлиқ рўйхатини топширмаса ёки уларни номувофиқ равишда расмийлаштирса;

юридик мутахассислик бўйича камида икки йиллик иш стажи бўлмаса, шунингдек адвокатлик тузилмасида камида олти ойлик стажировкадан ўтмаган бўлса;

талабгор томонидан тақдим этилган ҳужжатларда ҳақиқат бўлмаган ёки нотўғри маълумотлар мавжуд бўлса;

талабгор белгиланган тартибда муомалага лаёқатсиз ёки муомала лаёқати чекланган деб топилса, шунингдек судланганлик ҳолати тугалланмаган ёки судланганлиги олиб ташланмаган бўлса;

лицензиясининг амал қилиш муддати тугаган шахс қонунга мувофиқ талабгор бўлиши мумкин бўлмаган уч йиллик муддат ўтмаган бўлса.

Лицензия беришни бошқа сабабларга кўра, жумладан мақсадга мувофиқ эмас деб ҳисоблаш сабабли рад этишга йўл қўйилмайди.

Лицензия бериш рад этилган тақдирда тўланган йиғим суммаси қайтарилмайди.

Олдинги таҳрирга қаранг.

18. Лицензияни беришни рад этиш тўғрисидаги қарор талабгорга ёзма равишда ва рад этиш сабаблари кўрсатилган ҳолда ҳамда уларни бартараф этиб, ҳужжатларни қайта кўриб чиқиш учун тақдим этиши мумкин бўлган муддат кўрсатилган ҳолда юборилади (топширилади), агар сабаблар бартараф этиб бўлмайдиган хусусиятга эга бўлмаса. Лицензия беришни рад этиш ҳақидаги хабарномада кўрсатилган муддат камчиликларни бартараф этиш учун зарур бўлган вақтга мутаносиб бўлиши керак.

Агар талабгор лицензия беришни рад этишга асос бўлган сабабларни бартараф этса, ҳужжатлар адлия органи томонидан талабгорнинг аризаси барча зарур ҳужжатлар билан бирга олинган кундан бошлаб ўн кун муддатда кўриб чиқилади.

Талабгорнинг аризасини қайта кўриб чиқишда илгари лицензия беришни рад этиш тўғрисидаги билдиришномада кўрсатилмаган янги асослар бўйича лицензия беришни рад этишга йўл қўйилмайди.

Лицензия беришни рад этиш тўғрисидаги қарорда кўрсатилган муддат ўтгандан кейин берилган ариза янгидан берилган ариза ҳисобланади.

(18-банд Ўзбекистон Республикаси Вазирлар Маҳкамасининг 2012 йил 1 ноябрдаги 313-сонли қарори таҳририда — ЎР ҚҲТ, 2012 й., 44-сон, 507-модда)

19. Талабгор адлия органининг лицензия беришни рад этиш тўғрисидаги қарори юзасидан Ўзбекистон Республикаси Адлия вазирлигига ёки судга шикоят қилиш ҳуқуқига эга.

V. Лицензияни қайта расмийлаштириш ва лицензия дубликатларини бериш

Олдинги таҳрирга қаранг.

20. Талабгорнинг (адвокатнинг) фамилияси, исми ва отасининг исми ўзгарганда у бир ой муддатда лицензия берган адлия органига кўрсатилган маълумотларни ва лицензияни қайта расмийлаштириш учун йиғим тўланганлигини тасдиқловчи тегишли ҳужжатларни илова қилган холда, лицензияни қайта расмийлаштириш тўғрисида ариза бериши шарт.

(20-банднинг биринчи хатбошиси Ўзбекистон Республикаси Вазирлар Маҳкамасининг 2012 йил 1 февралдаги 26-сонли қарори таҳририда — ЎР ҚҲТ, 2012 й., 6-сон, 57-модда)

Кейинги таҳрирга қаранг.

Лицензия қайта расмийлаштирилгунгача адвокатлик фаолиятини илгари берилган лицензия асосида амалга оширади.

21. Йўқолган ёки яроқсиз ҳолга келган лицензия ўрнига талабгор (адвокат)нинг аризасига кўра унинг дубликати берилиши мумкин.

Лицензия дубликатини олиш учун талабгор (адвокат) лицензия берган адлия органига фамилияси, исми ва отасининг исмини ҳамда лицензия дубликатини бериш учун йиғим тўланганлигини тасдиқловчи ҳужжатни кўрсатган ҳолда лицензия дубликатини бериш тўғрисида ариза тақдим этади.

Кейинги таҳрирга қаранг.

22. Лицензия дубликатини беришда ва лицензияни қайта расмийлаштиришда лицензия бериш тўғрисидаги аризани кўриб чиқиш учун тўланадиган сумманинг 50 фоизи миқдорида йиғим ундирилади. Йиғим суммаси адлия органининг ҳисоб рақамига ўтказилади.

Кейинги таҳрирга қаранг.

Лицензияни қайта расмийлаштириш ва лицензия дубликатини бериш талабгор (адвокат) аризаси олинган кундан бошлаб уч кун муддатда амалга оширилади.

Кейинги таҳрирга қаранг.

VI. Лицензия талаблари ва шартларига риоя этилишини назорат қилиш

23. Адвокатга гувоҳнома берган адлия органлари адвокат томонидан лицензия талаблари ва шартларига риоя этилишини назорат қиладилар.

Адлия органи адвокат томонидан лицензия талаблари ва шартлари бузилганлигини аниқлаган тақдирда, адлия органи адвокатга нисбатан интизомий иш қўзғайди.

24. Адвокатга нисбатан интизомий ишни кўриб чиқиш натижаларига кўра, малака комиссиясининг қарорига асосан, қонун ҳужжатларида назарда тутилган интизомий чоралар қўлланилиши мумкин.

25. Назорат қилувчи ва ҳуқуқни муҳофаза қилувчи органлар ўз ваколатлари доирасида, адвокат лицензия талаблари ва шартларини бузганлиги аниқланганда, ушбу адвокатга гувоҳнома берган адлия органига аниқланган ҳуқуқбузарликлар тўғрисида хабар берадилар.

VII. Лицензиянинг амал қилишини тўхтатиб туриш ва тугатиш

26. Лицензиянинг амал қилишини тўхтатиб туриш адвокатга гувоҳнома берган адлия органи қарори билан қуйидаги ҳолларда амалга оширилади:

адвокат жиноий жавобгарликка тортилганда, у айбланувчи тариқасида жалб этилган пайтдан бошлаб ва суд ҳукми қонуний кучга киргунига қадар ёхуд реабилитация қилувчи асосларга биноан уни жиноий жавобгарликдан озод этиш тўғрисида қарор қабул қилингунига қадар;

адвокат томонидан адвокатура тўғрисидаги қонун ҳужжатлари талаблари, Адвокатларнинг касб этикаси қоидалари, адвокатлик сири ва адвокат қасамёди бузилганлиги аниқланганда (малака комиссиясининг қарорига асосан);

Адвокатлар палатаси ҳудудий бошқармасининг ёки адлия органининг ўз ваколатлари доирасида қабул қилинган, шу жумладан адвокатнинг зиммасига аниқланган қоидабузарликларни бартараф этиш мажбуриятини юклайдиган қарорлари адвокат томонидан бажарилмаганда ёки лозим даражада бажарилмаганда (малака комиссиясининг қарорига асосан).

Лицензиянинг амал қилишини тўхтатиб туриш муддати олти ойдан ошиши мумкин эмас, адвокат жиноят ишида иштирок этишга айбланувчи тариқасида жалб қилинган ҳол бундан мустасно. Лицензиясининг амал қилиши тўхтатиб турилган шахс лицензиянинг амал қилишини тўхтатиб туришга олиб келган ҳолатларни, агар улар бартараф этиб бўлмайдиган хусусиятга эга бўлмаса, кўрсатилган муддатда бартараф этиши шарт.

Адлия органининг лицензиянинг амал қилишини тўхтатиб туриш тўғрисидаги қарори устидан судга шикоят қилиниши мумкин.

Лицензиянинг амал қилишини тўхтатиб туриш адвокат мақомининг тўхтатиб турилишига сабаб бўлади.

27. Лицензиянинг амал қилишини тугатиш адвокатга гувоҳнома берган адлия органининг қарори билан қуйидаги ҳолларда амалга оширилади:

адвокат лицензиянинг амал қилишини тугатиш тўғрисидаги ариза билан мурожаат этганда, агар ишонч билдирувчи шахс (ҳимоя остидаги шахс) буни талаб қилса, илгари қабул қилинган топшириқни бажариб бўлганидан сўнг;

агар талабгор лицензия бериш тўғрисида қарор қабул қилинганлиги тўғрисида билдиришнома юборилган (топширилган) пайтдан эътиборан уч ой ичида лицензия берганлик учун давлат божи тўланганлигини тасдиқловчи ҳужжатни адлия органига тақдим этмаган бўлса;

«Адвокатура тўғрисидаги» Ўзбекистон Республикаси Қонунининг 3¹-моддаси олтинчи қисмида ва 13¹-моддаси бешинчи қисмида назарда тутилган талаблар бажарилмаганда;

лицензия сохта ҳужжатлардан фойдаланилган ҳолда олинганлиги факти аниқланганда;

лицензия бериш тўғрисидаги қарорнинг ғайриқонуний эканлиги аниқланганда;

адвокатнинг муомала лаёқати чекланганда ёки у белгиланган тартибда муомалага лаёқатсиз деб топилганда;

суднинг адвокатни жиноят содир этишда айбдор деб топиш ҳақидаги айблов ҳукми қонуний кучга кирганда;

касбига доир вазифаларини уч ой ичида узрсиз сабабларга кўра бажармаганда (малака комиссиясининг қарорига асосан);

адвокат томонидан адвокатура тўғрисидаги қонун ҳужжатлари талаблари, Адвокатларнинг касб этикаси қоидалари, адвокатлик сири ва адвокат қасамёди мунтазам равишда ёки бир марта қўпол равишда бузилганда, адвокатнинг шаъни ва қадр-қимматига доғ туширадиган ҳамда адвокатуранинг обрўсини туширадиган қилмиш содир этилганда (малака комиссиясининг қарорига асосан);

лицензиясининг амал қилиши тўхтатиб турилган шахс лицензиянинг амал қилиши тўхтатиб турилишига олиб келган ҳолатларни лицензиянинг амал қилиши тўхтатиб турилган муддатларда бартараф этмаганда (малака комиссиясининг қарорига асосан);

адвокат Ўзбекистон Республикасининг фуқаролигини йўқотганда;

адвокат вафот этганда ёки суднинг уни вафот этган деб эълон қилиш ҳақидаги қарори қонуний кучга кирганда.

Лицензиянинг амал қилиши суд қарорига биноан ҳам тугатилиши мумкин.

Лицензиянинг амал қилишини тугатиш лицензиянинг амал қилишини тугатиш тўғрисида қарор қабул қилинган санадан эътиборан амалга оширилади.

28. Адлия органининг лицензиянинг амал қилишини тугатиш тўғрисидаги қарори устидан судга шикоят қилиниши мумкин.

Лицензиянинг амал қилишини тугатиш адвокат мақомининг тугатилишига сабаб бўлади.

29. Лицензиянинг амал қилишини тўхтатиб туриш ёки тугатиш тўғрисидаги қарор, тегишли равишда адвокат мақомини тўхтатиб туриш ва тугатиш тўғрисидаги қарор адлия органи раҳбарининг буйруғи билан расмийлаштирилади.

30. Адлия органлари лицензиянинг амал қилишини тўхтатиб туриш ёки тугатиш тўғрисидаги буйруқ чиққан кундан бошлаб уч кун муддатда бу тўғрисида адвокат мақоми тўхтатиб турилган ёки тўхтатилган шахсни ёзма равишда хабардор қилади.

Кейинги таҳрирга қаранг.

31. Лицензиянинг амал қилишини ва адвокат мақомини тўхтатиб туриш ёки тугатиш тўғрисидаги ахборот, адвокатга гувоҳнома берган адлия органи томонидан лицензиялар реестрига маълумотлар киритиш учун лицензия берган адлия органига юборилади.

Адвокатга гувоҳнома берган адлия органи адвокат мақоми тўхтатиб турилганлиги, тикланганлиги ва тугатилганлиги тўғрисида суд-тергов органларига маълумот учун хабар беради.

VIII. Якуний қоида

32. Мазкур Низомнинг бузилишида айбдор бўлган шахслар қонун ҳужжатларига мувофиқ жавобгар бўладилар.

Адвокатлик фаолиятини лицензиялаш тўғрисидаги низомга
1-ИЛОВА

Адвокатлик фаолиятини лицензиялаш

СХЕМАСИ

Кейинги таҳрирга қаранг.

Адвокатлик фаолиятини лицензиялаш тўғрисидаги низомга
2-ИЛОВА

‎	‎	‎

ЎЗБЕКИСТОН РЕСПУБЛИКАСИ АДЛИЯ ВАЗИРЛИГИ
‎‎‎ЛИЦЕНЗИЯ
‎ ‎____________________________________________________ га берилди.
^{‎‎(фамилияси, исми, отасининг исми)}
‎‎«Адвокатура тўғрисида»ги Ўзбекистон Республикасининг Қонунига мувофиқ ушбу лицензия Ўзбекистон Республикаси фуқаросига адвокат мақомини олиш ҳуқуқини беради.
‎Ушбу лицензия Ўзбекистон Республикасининг барча ҳудудларида амал қилади ва унинг амал қилиш муддати чекланмаган.
‎‎ ‎Лицензияни берган адлия органи _____________________________________
‎Лицензия берилган сана 20__ йил «____» _______________
‎‎Лицензиялар реестри бўйича тартиб рақами ____________________________
‎М.Ў. ________________	‎‎‎____________________________________________
^(имзо)	^{‎‎(Лицензияни берган адлия органи раҳбари Ф.И.О.)}
‎АА № 000000

Кейинги таҳрирга қаранг.

Адвокатлик фаолиятини лицензиялаш тўғрисидаги низомга
3-ИЛОВА

‎_________________________ ҳудудида адвокатлик фаолияти билан
шуғулланиш учун берилган лицензияларнинг
‎ДАВЛАТ РЕЕСТРИ ‎
Тартиб рақами‎	Лицензия олган фуқаронинг фамилияси, исми, отасининг исми‎	Лицензия олган фуқаронинг яшаш жойи (лицензия олиш пайтида)	Лицензиянинг берилган санаси ва тартиб рақами‎	Қўшимча маълумотлар‎	Лицензиянинг амал қилиш муддатини тугатиш тўғрисидаги маълумотлар‎
1‎	2‎	3‎	4‎	5‎	6‎

Вазирлар Маҳкамасининг 2009 йил 9 мартдаги 60-сон қарорига
2-ИЛОВА

Адвокатлик тузилмаларини давлат рўйхатидан ўтказиш (ҳисобга олиш) тўғрисида

НИЗОМ

I. Умумий қоидалар

1. Ушбу Низом адвокатлик бюролари, адвокатлик фирмалари ва адвокатлар ҳайъатларини давлат рўйхатидан ўтказиш (кейинги ўринларда рўйхатдан ўтказиш деб аталади) ҳамда юридик маслаҳатхоналарни ҳисобга олиш (кейинги ўринларда ҳисобга олиш деб аталади) тартибини белгилайди.

2. «Адвокатура тўғрисида»ги Ўзбекистон Республикасининг Қонунига мувофиқ рўйхатдан ўтказиш (ҳисобга олиш) Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари (кейинги ўринларда адлия органлари деб аталади) томонидан амалга оширилади.

3. Рўйхатдан ўтказиш (ҳисобга олиш) адвокатлик тузилмаси жойлашган жойдаги адлия органи томонидан амалга оширилади.

4. Адвокатлик бюролари, адвокатлик фирмалари ва адвокатлар ҳайъатларининг муассислари адвокатлик фаолияти билан шуғулланиш учун лицензияга (кейинги ўринларда лицензия деб аталади) эга бўлган, адвокат сифатида қасамёд қабул қилган шахслар ва адвокатлар бўлиши мумкин, юридик маслаҳатхоналар муассислари эса — Ўзбекистон Республикаси Адвокатлар палатасининг ҳудудий бошқармалари (кейинги ўринларда ҳудудий бошқармалар деб аталади) бўлиши мумкин.

II. Рўйхатдан ўтказиш (ҳисобга олиш) учун тақдим этиладиган ҳужжатлар

5. Рўйхатдан ўтказиш учун адлия органига қуйидаги ҳужжатлар тақдим этилади:

муассис томонидан (бошқа муассислар томонидан бунинг учун ваколат берилган муассислардан бири томонидан) имзоланган рўйхатдан ўтказиш тўғрисидаги ариза;

адвокатлик фирмаси ёки адвокатлар ҳайъатини ташкил этиш тўғрисидаги, уларнинг муассислари тўғрисидаги, уларнинг уставларини тасдиқлаш тўғрисидаги, раҳбарлик органларини шакллантириш тўғрисидаги (адвокатлик фирмалари ёки адвокатлар ҳайъатлари учун) маълумотларни ўз ичига олган таъсис йиғилишининг протоколи;

таъсис ҳужжатларининг давлат тилидаги, нотариал тасдиқланган иккита асл нусхаси;

Кейинги таҳрирга қаранг.

муассислар лицензияларининг нусхалари;

Кейинги таҳрирга қаранг.

малака комиссияларининг адвокатнинг қасамёдини муассислар қабул қилганлигини тасдиқлаш тўғрисидаги қарори, агар улар адвокат мақомига эга бўлмасалар;

Кейинги таҳрирга қаранг.

давлат рўйхатидан ўтказиш учун белгиланган миқдордаги давлат божи тўланганлиги тўғрисида банкнинг тўлов ҳужжати;

икки нусхада муҳр ва штамп намуналари эскизи, агар мавжуд бўлса — эмблема ва бошқа рамзларнинг ҳам;

давлат статистика органи томонидан берилган адаштириб юбориш даражасида бир хил ёки ўхшаш номларнинг йўқлиги тўғрисидаги маълумотнома.

Кейинги таҳрирга қаранг.

6. Устав адвокатлик бюроси ва адвокатлик фирмасининг, устав ва таъсис шартномаси эса — адвокатлар ҳайъатининг таъсис ҳужжатлари ҳисобланади.

Адвокатлик бюроси, адвокатлик фирмаси ва адвокатлар ҳайъатининг устави уларнинг муассислари томонидан тасдиқланади, адвокатлар ҳайъатининг таъсис шартномаси эса унинг муассислари билан тузилади.

«Адвокатура тўғрисида»ги Ўзбекистон Республикаси Қонунининг 4³-моддасига мувофиқ адвокатлар ҳайъатларидаги аъзолар сони ўн нафардан кам бўлиши мумкин эмас.

7. Ҳисобга олиш учун адлия органига қуйидаги ҳужжатлар тақдим этилади:

тегишли ҳудудий бошқарманинг раҳбари томонидан имзоланган, юридик маслаҳатхона ташкил этиш зарурати асослари акс эттирган ҳисобга олиш тўғрисидаги ариза;

ҳудудий бошқарма раҳбарининг юридик маслаҳатхона ташкил этиш тўғрисидаги буйруғи;

юридик маслаҳатхона тўғрисидаги низомнинг нотариал тасдиқланган иккита асл нусхаси;

Кейинги таҳрирга қаранг.

ҳисобга олиш учун белгиланган миқдорда давлат божи тўланганлиги тўғрисида банкнинг тўлов ҳужжати;

икки нусхада муҳр ва штамп намуналари эскизи.

8. Юридик маслаҳатхона тўғрисидаги низом тегишли ҳудудий бошқарма раҳбари томонидан тасдиқланади.

Кейинги таҳрирга қаранг.

III. Рўйхатдан ўтказиш (ҳисобга олиш)

9. Рўйхатдан ўтказиш тўғрисидаги ариза адлия органи томонидан йигирма кун муддатда кўриб чиқилади.

Кейинги таҳрирга қаранг.

Ҳисобга олиш тўғрисидаги ариза адлия органи томонидан ўн кун муддатда кўриб чиқилади.

Кейинги таҳрирга қаранг.

Адвокатлик тузилмаларини рўйхатдан ўтказиш (ҳисобга олиш) схемаси ушбу Низомга 1-иловада келтирилган.

10. Аризани барча зарур ҳужжатлар билан бирга кўриб чиқиш якунларига кўра адлия органи рўйхатдан ўтказиш (ҳисобга олиш) тўғрисида ёки рўйхатдан ўтказишни (ҳисобга олишни) рад этиш тўғрисида қарор қабул қилади ва ариза берувчини қабул қилинган қарор тўғрисида уч кун муддатда хабардор қилади. Рўйхатдан ўтказиш (ҳисобга олиш) тўғрисидаги қарор адлия органи раҳбарининг буйруғи билан расмийлаштирилади.

11. Ариза берувчининг билдиришнома олгандан кейин мурожаати бўйича адвокатлик бюроси, адвокатлик фирмаси ва адвокатлар ҳайъати рўйхатдан ўтказилган тақдирда қуйидагилар берилади:

ушбу Низомга 2-иловага мувофиқ шакл бўйича рўйхатдан ўтказиш тўғрисидаги гувоҳнома;

адлия органининг муҳри билан тасдиқланган, «рўйхатдан ўтказилган» белгиси қўйилган таъсис ҳужжатлари;

икки нусхада муҳр ва штамп намуналари эскизи, агар мавжуд бўлса — эмблемаси ва бошқа рамзлари ҳам, «тасдиқланган» белгиси билан.

12. Ариза берувчининг билдиришнома олгандан кейин мурожаати бўйича ҳисобга қўйилганда ҳудудий бошқармага қуйидагилар берилади:

ушбу Низомга 3-иловага мувофиқ шакл бўйича ҳисобга олиш тўғрисидаги гувоҳнома;

юридик маслаҳатхона тўғрисидаги низом, «ҳисобга қўйилди» белгиси билан;

муҳр ва штамп намуналарининг эскизлари, «тасдиқланган» белгиси билан.

13. Рўйхатдан ўтказиш (ҳисобга олиш) тўғрисидаги гувоҳномаларнинг бланкалари қатъий ҳисобда турадиган ҳужжат ҳисобланади, ҳисобга олиш сериясига, тартиб рақамига ва ҳимояланганлик даражасига эга бўлади. Гувоҳномаларнинг бланкалари Ўзбекистон Республикаси Адлия вазирлигининг буюртманомаси бўйича босмахона усулида «Давлат белгиси» давлат ишлаб чиқариш бирлашмасида тайёрланади.

Гувоҳномалар бланкаларини сақлаш ва ҳисобга олиш тартиби Ўзбекистон Республикаси Адлия вазирлиги томонидан белгиланади.

14. Адлия органлари томонидан рўйхатдан ўтказиш (ҳисобга олиш) тўғрисидаги маълумотлар ушбу Низомнинг 11 ва 12-бандларида кўрсатилган ҳужжатларни бериш билан бир вақтда ушбу Низомга 4-иловага мувофиқ шакл бўйича адвокатлик тузилмаларининг тегишли реестрларига киритилади.

Реестр дафтари ип билан тикилади, рақамланади ва унинг орқа томонида бетлар сони, дафтар юритилиб бошланган санаси (йил, кун, ой) кўрсатилади, муҳр, адлия органи раҳбарининг имзоси қўйилади.

Кейинги таҳрирга қаранг.

15. Адлия органи қуйидаги ҳолларда рўйхатдан ўтказишни (ҳисобга олишни) рад этиш ҳуқуқига эга:

юридик маслаҳатхонани ташкил этиш зарурати бўлмаса;

Кейинги таҳрирга қаранг.

рўйхатдаги ҳужжатлар тўлиқ тақдим этилмаса ёки улар лозим тартибда расмийлаштирилмаса;

рўйхатдан ўтказиш тўғрисидаги ариза муассислар лицензия олган кундан бошлаб уч ой муддат ўтгандан кейин топширилса, агар улар адвокат мақомига эга бўлмасалар;

таъсис ҳужжатлари қонунчиликка тўғри келмаса;

агар рўйхатдан ўтказиш (ҳисобга олиш) учун тақдим этилган таъсис ҳужжатларида (низомларда) ҳақиқий бўлмаган ёки нотўғри маълумотлар аниқланган бўлса.

Адвокатлик бюролари, адвокатлик фирмалари ва адвокатлар ҳайъатларини ташкил этишнинг мақсадга мувофиқ эмаслиги сабабли рўйхатдан ўтказишни рад этишга йўл қўйилмайди.

16. Ушбу Низомнинг 15-банди тўртинчи хатбошида кўрсатилган ҳолатда рўйхатдан ўтишни рад этиш билан бир вақтда адлия органи томонидан Адвокатлик фаолиятини лицензиялаш тўғрисидаги низомга мувофиқ лицензиянинг амал қилишини тугатиш ҳақида қарор қабул қилинади.

Кейинги таҳрирга қаранг.

17. Рўйхатдан ўтказишни (ҳисобга олишни) рад этиш тўғрисидаги қарор ариза берувчига ёзма равишда ва рад этиш сабаблари кўрсатилган ҳолда ҳамда уларни бартараф этиб, ҳужжатларни қайта кўриб чиқиш учун тақдим этиши мумкин бўлган муддат кўрсатилган ҳолда юборилади (топширилади), агар сабаблар бартараф этиб бўлмайдиган хусусиятга эга бўлмаса.

Агар ариза берувчи рўйхатдан ўтказишни (ҳисобга олишни) рад этишга асос бўлган сабабларни бартараф этса, рўйхатдан ўтказиш бўйича ҳужжатлар адлия органи томонидан барча зарур ҳужжатлар билан бирга ариза топширилган кундан бошлаб ўн кун муддатда, ҳисобга олиш бўйича ҳужжатлар эса — беш кун муддатда кўриб чиқилади.

Кейинги таҳрирга қаранг.

Рўйхатдан ўтказишни (ҳисобга олишни) рад этиш тўғрисидаги қарорда кўрсатилган муддат тугагандан кейин топширилган ариза янгидан топширилган ҳисобланади.

18. Ариза берувчи адлия органининг рўйхатдан ўтказишни (ҳисобга олишни) рад этиш тўғрисидаги қарори юзасидан Ўзбекистон Республикаси Адлия вазирлигига ёки судга шикоят қилиши мумкин.

19. Адвокатлик бюроси, адвокатлик фирмаси, адвокатлар ҳайъати банкда ҳисоб рақами очганидан кейин бир ҳафта муддатда ўзи жойлашган ҳудуддаги давлат статистика органларида ва давлат солиқ хизмати органларида белгиланган тартибда рўйхатдан ўтиши керак.

Кейинги таҳрирга қаранг.

IV. Адвокатлик тузилмаларининг таъсис ҳужжатларига киритилган ўзгартириш ва қўшимчаларни рўйхатдан ўтказиш

20. Адвокатлик тузилмаларининг таъсис ҳужжатларига (низомларига) ўзгартириш ва қўшимчалар киритилганда, шунингдек адвокатлик бюролари, адвокатлик фирмалари ва адвокатлар ҳайъатлари қайта ташкил этилганда рўйхатдан ўтказган (ҳисобга олган) адлия органига етти кун муддатда қуйидаги ҳужжатлар тақдим этилади:

рўйхатдан ўтказиш тўғрисидаги ариза;

адвокатлик фирмаси ва адвокатлар ҳайъати ваколатли органларининг таъсис ҳужжатларига (адвокатлик фирмалари ва адвокатлар ҳайъатлари учун) ўзгартириш ва қўшимчалар киритиш тўғрисидаги қарори;

ҳудудий бошқарма раҳбарининг юридик маслаҳатхона тўғрисидаги низомга ўзгартириш ва қўшимчалар киритиш тўғрисидаги буйруғи (юридик маслаҳатхоналар учун);

уставга ва (ёки) таъсис шартномасига киритилган ўзгартириш ва қўшимчаларнинг адвокатлик бюроси, адвокатлик фирмаси ва адвокатлар ҳайъатининг муҳри қўйилган икки нусхадаги матни (адвокатлик бюроси, адвокатлик фирмаси ва адвокатлар ҳайъати учун);

юридик маслаҳатхона тўғрисидаги низомга ўзгартириш ва қўшимчаларнинг уни ташкил этган ҳудудий бошқарма муҳри қўйилган икки нусхадаги матни (юридик маслаҳатхоналар учун);

ном ўзгартирилганда — рўйхатдан ўтказиш (ҳисобга олиш) тўғрисидаги гувоҳноманинг асл нусхаси ҳамда адаштириб юбориш даражасида бир хил ёки ўхшаш номлар йўқ эканлиги тўғрисидаги маълумотнома, алмаштириладиган муҳр ва штамп, шунингдек икки нусхада янги штамп ва муҳр намуналарининг эскизлари;

белгиланган миқдорда давлат божи тўланганлиги тўғрисида банкнинг тўлов ҳужжати;

адвокатлик тузилмасини ажратиб чиқариш ёки қўшиб юбориш шаклида қайта ташкил қилинганда — қайта ташкил қилинаётган адвокатлик тузилмасининг барча кредиторлар ва қарздорлар олдидаги барча мажбуриятлар бўйича, жумладан тарафлар ўртасидаги даъволашаётган мажбуриятлар юзасидан ҳуқуқий ворислик тўғрисидаги низомни ўз ичига олган бўлиш баланси ёки топшириш далолатномаси, шунингдек қўшилаётган адвокатлик тузилмасининг рўйхатдан ўтказиш тўғрисидаги гувоҳномасининг асл нусхаси, муҳри ва штампи.

21. Адвокатлик тузилмаларининг таъсис ҳужжатларига (низомларига) киритилган ўзгартириш ва қўшимчалар мазкур адвокатлик тузилмалари рўйхатдан ўтказилган (ҳисобга олинган) тартибда ва муддатларда рўйхатдан ўтказилиши керак.

22. Таъсис ҳужжатларига ўзгартириш ва қўшимчалар киритиш тўғрисидаги маълумотлар тегишли адлия органлари томонидан адвокатлик тузилмалари реестрига («Қўшимча маълумотлар» устунига) киритилади.

23. Почта манзили ўзгарганда адвокатлик бюролари, адвокатлик фирмалари, адвокатлар ҳайъатлари ва юридик маслаҳатхоналарни ташкил этган ҳудудий бошқармалар ўн кун муддатда рўйхатдан ўтказган (ҳисобга олган) адлия органини бу ҳақда хабардор қилиши шарт. Бунда давлат божи ундирилмайди. Адлия органлари билдиришномани олган вақтдан бошлаб икки кун муддатда бу ўзгаришлар тўғрисида давлат статистика органларига ва давлат солиқ хизмати органларига хабар берадилар.

Кейинги таҳрирга қаранг.

V. Адвокатлик тузилмаларининг фаолиятини назорат қилиш

24. Адлия органлари рўйхатдан ўтказувчи органлар сифатида адвокатлик тузилмалари томонидан таъсис ҳужжатларига, уставдаги фаолиятга, қайта ташкил қилиш ва тугатиш тартибига риоя этилишини назорат қиладилар.

Қонун ҳужжатлари бузилиши аниқланган тақдирда, адлия органлари адвокатлик бюролари, адвокатлик фирмалари ва адвокатлар ҳайъатларига аниқланган қонунбузарликларни бартараф этиш тўғрисида тақдимномалар киритишга ҳақлидир. Юридик маслаҳатхоналар фаолиятида қонунбузарликлар аниқланганда тақдимномалар адлия органлари томонидан ушбу юридик маслаҳатхоналарни ташкил этган ҳудудий бошқармаларга киритилади.

25. Рўйхатдан ўтказиш (ҳисобга олиш) тартиби бузилганда, шунингдек таъсис ҳужжатларининг талабларига риоя этилмаганда адлия органи адвокатлик бюроси, адвокатлик фирмаси, адвокатлар ҳайъати ва тегишли ҳудудий бошқармадан хўжалик суди орқали энг кам ойлик иш ҳақининг 200 баробаригача миқдорда жарима ундириш ҳуқуқига эга.

Жарима Судлар ва адлия органларини ривожлантириш жамғармасига ўтказилади. Бундай даъво аризаси билан хўжалик судига мурожаат қилишда адлия органлари давлат божи тўлашдан озод қилинадилар.

Кейинги таҳрирга қаранг.

Агар адвокатлик бюроси, адвокатлик фирмаси ва адвокатлар ҳайъати жарима ундирилгандан кейин қонунчиликни ва таъсис ҳужжатлари талабларини бузишда давом этсалар адлия органи хўжалик судига уларни тугатиш тўғрисида даъво аризаси билан мурожаат қилишга ҳақлидир.

Кейинги таҳрирга қаранг.

26. Адвокатлик тузилмалари ўз фаолияти натижаларини ҳисобга олиб борадилар ва тегишли ҳудудий бошқармаларга Ўзбекистон Республикаси Адвокатлар палатаси томонидан Ўзбекистон Республикаси Адлия вазирлиги билан биргаликда белгиланган шакл бўйича ва муддатда статистик маълумотлар тақдим этадилар.

VI. Адвокатлик тузилмаларини қайта ташкил этиш ва уларнинг фаолиятини тўхтатиш

27. Адвокатлик бюролари, адвокатлик фирмалари ва адвокатлар ҳайъатларини қайта ташкил қилиш уларнинг муассислари (шериклари, аъзолари) қарорига биноан амалга оширилади.

28. Адвокатлик бюролари, адвокатлик фирмалари ва адвокатлар ҳайъатларини тугатиш уларнинг муассислари (шериклари, аъзолари) ёки хўжалик суди қарорига биноан амалга оширилади.

Кейинги таҳрирга қаранг.

Адвокатлик бюросининг муассиси бўлган адвокатнинг лицензияси амал қилишининг тугатилиши адлия органининг даъво аризасига кўра ушбу адвокатлик бюросининг тугатилишига олиб келади.

29. Юридик маслаҳатхоналар фаолиятини тўхтатиш уларни ташкил этган ҳудудий бошқармаларнинг қарорига биноан амалга оширилади.

30. Адвокатлик бюролари, адвокатлик фирмалари ва адвокатлар ҳайъатларини қайта ташкил қилиш ва тугатиш қонун ҳужжатларига мувофиқ амалга оширилади.

31. Адвокатлик бюролари, адвокатлик фирмалари ва адвокатлар ҳайъатларини қайта ташкил қилиш ва тугатиш ҳамда юридик маслаҳатхоналар фаолиятини тўхтатиш тўғрисидаги ёзувлар тегишли адлия органлари томонидан адвокатлик тузилмалари реестрига киритилади.

VII. Якуний қоида

32. Ушбу Низомнинг бузилишида айбдор бўлган шахслар қонун ҳужжатларига мувофиқ жавобгар бўладилар.

Адвокатлик тузилмаларини давлат рўйхатидан ўтказиш (ҳисобга олиш) тўғрисидаги низомга
1-ИЛОВА

Адвокатлик тузилмаларини давлат рўйхатидан ўтказиш (ҳисобга олиш)

СХЕМАСИ

Кейинги таҳрирга қаранг.

Адвокатлик тузилмаларини давлат рўйхатидан ўтказиш (ҳисобга олиш) тўғрисидаги низомга
2-ИЛОВА

‎	‎	‎
ЎЗБЕКИСТОН РЕСПУБЛИКАСИ АДЛИЯ ВАЗИРЛИГИ
‎‎Адвокатлик бюроси, адвокатлик фирмаси ва адвокатлар ҳайъатининг давлат рўйхатидан ўтказилганлиги тўғрисида
ГУВОҲНОМА
‎ ‎Мазкур гувоҳнома _________________________________________________да
^{‎(адлия органининг номи)}
‎рўйхатдан ўтказилган _____________________________________ га берилди.
^{‎(адвокатлик тузилмасининг номи)}
‎ ‎Давлат рўйхатидан ўтказилган санаси 20___ йил «____» ____________
‎ ‎Реестр бўйича тартиб рақами ________________________________
‎М.Ў. ________________	‎‎‎____________________________________________
^{(имзо)‎}	^{(Адлия органи раҳбари Ф.И.О.)}
‎‎АА № 000000

Адвокатлик тузилмаларини давлат рўйхатидан ўтказиш (ҳисобга олиш) тўғрисидаги низомга
3-ИЛОВА

‎	‎	‎
‎ЎЗБЕКИСТОН РЕСПУБЛИКАСИ АДЛИЯ ВАЗИРЛИГИ
‎‎‎Юридик маслаҳатхонанинг ҳисобга олинганлиги тўғрисида
‎‎ГУВОҲНОМА
‎ ‎Ушбу гувоҳнома Ўзбекистон Республикаси Адвокатлар палатасининг
‎_______________________________________________ ҳудудий бошқармасига
^{‎(минтақанинг номи)}
‎______________________________________________________________ нинг
^{‎(юридик маслаҳатхонанинг номи)}
‎___________________________ да юридик маслаҳатхона ҳисобга олинганлиги
^{(адлия органининг номи)}	‎	‎
муносабати билан берилди.‎‎
‎‎‎Ҳисобга қўйилган санаси 20__ й. «____» ________________
‎‎Реестр бўйича тартиб рақами _________________
‎М.Ў. ________________‎	‎‎ ‎____________________________________________
^{(имзо)‎}	^{‎(Адлия органи раҳбари Ф.И.О.)}
‎АА № 000000

Адвокатлик тузилмаларини давлат рўйхатидан ўтказиш (ҳисобга олиш) тўғрисидаги низомга
4-ИЛОВА

_______________________________ ҳудудида жойлашган адвокатлик тузилмалари
‎РЕЕСТРИ ‎
Давлат рўйхатидан ўтказиш ёки ҳисобга олиш тартиб рақами ва санаси‎	Адвокатлик тузилмасининг номи‎	Жойлашган жойи (почта манзили)‎	Қўшимча маълумотлар‎	Қайта ташкил этиш ва тугатиш (фаолиятини тўхтатиш) тўғрисидаги маълумотлар‎
1‎	2‎	3‎	4‎	5‎

(Ўзбекистон Республикаси қонун ҳужжатлари тўплами, 2009 й., 10-11-сон, 113-модда; 2012 й., 6-сон, 57-модда, 44-сон, 507-модда; Қонун ҳужжатлари маълумотлари миллий базаси, 26.10.2017 й., 09/17/873/0180, 23.12.2017 й., 10/17/1001/0447-сон; 23.01.2018 й., 09/18/34/0605-сон, 18.08.2018 й., 09/18/675/1885-сон; 29.12.2019 й., 09/19/1046/4242-сон; 04.09.2020 й., 09/20/539/1257-сон; 29.09.2020 й., 09/20/593/1340-сон; Қонунчилик маълумотлари миллий базаси, 30.06.2021 й., 09/21/402/0618-сон, 29.10.2021 й., 09/21/661/0999-сон, 27.12.2021 й., 09/21/774/1198-сон)