“Oʻzbekiston Respublikasida kommunal xizmat koʻrsatishni boshqarishni takomillashtirish toʻgʻrisida” 1993-yil 15-iyuldagi Farmonga va “Davlat uy-joy fondini xususiylashtirish toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. 1994-yil 1-yanvargacha mulk egalari va uy-joylarni ijaraga oluvchilar bilan hududiy kommunal foydalanish tashkilotlari oʻrtasidagi munosabatlarni uy-joy fondiga xizmat koʻrsatish va uni saqlash uchun hisob-kitoblarning kontrakt (shartnoma) tizimiga oʻtkazish zarur deb hisoblansin.

Uy-joy fondiga xizmat koʻrsatishga va uni saqlash uchun tomonlarning oʻzaro javobgarligi toʻgʻpicida Oʻzbekiston Respublikasi Kommunal xizmat koʻrsatish vazirligi tomonidan ishlab chiqilgan namunaviy shartnoma-kontrakt maʼqullansin (ilova qilinmoqda).

2. Belgilab qoʻyilsinki;

hisob-kitoblarning uy-joy fondini saqlash va undan foydalanish boʻyicha normativ (haqiqiy) xarajatlarni mulk egalari va uy-joylarni ijaraga oluvchilar hisobiga qoplashni nazarda tutuvchi yangi tizimiga oʻtish, unga xizmat koʻrsatishga davlat dotatsiyalari miqdorlarini har yili qisqartirib borgan holda, bosqichma-bosqich amalga oshiriladi;

1993-yilda mahalliy hokimiyat organlari uy-joy fondidan foydalanish va uni saqlash boʻyicha haqiqiy xarajatlarining 70 foizi budjet hisobidan qoplanadi, keyinchalik dotatsiya miqdori yil sayin 10 foizga kamaytirib boriladi va keyingi yillarda mazkur xarajatlar toʻliq mulk egalari va uy-joylarni ijaraga oluvchilar hisobiga qoplanadi.

3. 1994-yildan boshlab aholiga kommunal xizmat koʻrsatish boʻyicha xarajatlarni mablagʻ bilan taʼminlash Qoraqalpogʻiston Respublikasi, viloyatlar va Toshkent shahar budjetlari mablagʻlari hisobiga amalga oshirilsin.

Oʻzbekiston Respublikasi Moliya vazirligi:

Oʻzbekiston Respublikasi Kommunal xizmat koʻrsatish vazirligi bilan birgalikda 20 kun muddatda, kontrakt tizimini hisobga olgan holda, uy-joy fondiga xizmat koʻrsatish va uni saqlash daromadlari va xarajatlari balansini tayyorlasin hamda Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga ushbu maqsadlar uchun ajratiladigan budjet mablagʻlari hajmlariga tegishli oʻzgartirishlar kiritsin;

1993-yilning ikkinchi yarim yili va keyingi yillar uchun respublika budjetida Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga koʻrsatib oʻtilgan maqsadlar uchun maqsadli subsidiyalar berish koʻzda tutilsin.

4. Mulk egalari va uy-joylari ijaraga oluvchilar bilan oʻzaro munosabatlarning koʻrsatib oʻtilgan tartibi oʻz balansida idoraga qarashli uy-joy fondi boʻlgan vazirliklar, idoralar, birlashmalar, korxonalar va tashkilotlarga ham joriy etilsin. Ularga har yili uy-joylardan foydalanish va ularni saqlashga tegishli mablagʻlar ajratish yuklatilsin.

5. Oʻzbekiston Respublikasi Kommunal xizmat koʻrsatish vazirligi ikki oy muddatda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda, uy-joy fondining toʻliqlik va shinamlik darajasiga, shuningdek, uyning toifasiga, qulayliklar mavjudligiga va xizmat koʻrsatish sifatiga koʻra, umumiy maydonning 1 kv. metri uchun haq toʻlash tarifini aniqlash tartibini ishlab chiqsin va tasdiqlasin.

Qopaqalpogʻiston Respublikasi Vazirlar Kengashiga, viloyatlar va Toshkent shahar hokimliklariga ushbu Tartib asosida umumiy maydonning bir kvadrat metri uchun haq toʻlash boʻyicha aniq stavkalarni belgilash huquqi berilsin.

6. Kvartira haqi toʻlash boʻyicha Fuqarolarning ayrim toifalari uchun hozirgi vaqtda amalda boʻlgan imtiyozlar saqlab qolinsin, tariflardagi tafovut budjet manbalari, shuningdek, uy-joy fondining kimga qarashli ekanligiga koʻra, korxonalar va tashkilotlarning mablagʻlari hisobiga uy-joylardan foydalanish tashkilotlariga toʻlansin.

7. Uy-joylarga xizmat koʻrsatish qiymatini toʻlash boʻyicha aholining anchagina xarajatlarini qoplash uchun Oʻzbekiston Respublika Mehnat vazirligi, Ijtimoiy taʼminot vazirligi, Kommunal xizmat koʻrsatish vazirligi Moliya vazirligi bilan birgalikda bir oy muddatda koʻp bolali, kam taʼminlangan oilalarga maqsadli pul nafaqalari toʻlash tartibi toʻgʻrisidagi takliflarini ishlab chiqsinlar va tasdiqlash uchun Vazirlar Mahkamasiga kiritsinlar.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Kommunal xizmat koʻrsatish vazirligi, tegishli hududiy kommunal foydalanish birlashmalari bilan birgalikda:

shu yilning 1-noyabrigacha mulk egalari va uy-joylarni ijaraga olganlar bilan oʻzaro hisob-kitoblarning yangi tizimiga oʻtish toʻgʻrisida shartnoma-kontraktlar tuzsinlar;

aholi oʻrtasida zarur tushuntirish ishlarini oʻtkazsinlar, bu ishlarga mahalla va uy-joy komitetlarini jalb etsinlar;

uy-joylardan foydalanish tashkilotlari tomonidan aholining yashash sharoitlarini yaxshilash va xizmatlar koʻrsatish sifatini oshirish boʻyicha olib borilayotgan ishlar uchun mahalla va uy-joy komitetlarining javobgarligini oshirsinlar.

9. Oʻzbekiston Respublikasi Moliya vazirligi, Kommunal xizmat koʻrsatish vazirligi, Energetika va elektrlashtirish vazirligi, Qoraqalpogʻiston Respublikasi Vazirlar Kengashi, viloyatlarga Toshkent shahar hokimliklari bilan birgalikda ikki oy muddatda aholining kommunal xizmatlar (ularning oʻz xarajatlarini oʻzi qoplashga bosqichma-bosqich oʻtishini nazarda tutgan holda) uchun hisob-kitoblari tartibi toʻgʻrisida Vazirlar Mahkamasiga takliflar kiritsin.

10. Oʻzbekiston Respublikasi vazirliklari, idoralari, korxonalar va tashkilotlari aholi tomonidan hamda respublika xalq xoʻjaligida foydalaniladigan suv, tabiiy gaz va boshqa energiya manbalarini tejab sarflash maqsadida Vazirlar Mahkamasining 1993-yil 26-maydagi 166-f-son farmoyishini soʻzsiz bajarishga doir qoʻshimcha chora-tadbirlar koʻrsinlar.

11. OʻzSSR MIK va XKSning “Kvartira haqi hamda shaharlarda va shahar tipidagi posyolkalarda uy-joylardan foydalanishni tartibga solishga doir chora-tadbirlar toʻgʻrisida” 1927 yil 26-maydagi 63-son, OʻzSSR XKSning 1945-yil 31-dekabrdagi 2078-son qarorlari keyingi oʻzgarishlari bilan birga oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Bosh vazir oʻrinbosari oʻrtoq K. N. Toʻlaganov zimmasiga yuklatilsin.

Mazkur shartnoma Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Oʻzbekiston Respublikasi Kommunal xizmat koʻrsatish vazirligi tomonidan tayyorlangan. Umumiy maydonining 1 kv. metri uchun toʻlov tariflari uy-joy fondining toʻliqlik va shinamlik darajasi, uyning toifasi, qulayliklarning mavjudligi va xizmat koʻrsatish sifatiga koʻra belgilanadi.

1. Mazkur shartnoma uy-joy fondidan foydalanuvchi korxona bilan ____________________________ hududiy kommunal foydalanish birlashmasi nomidan ustav asosida ishlovchi, bundan keyin “ijrochi” deb nomlanuvchi direktor _________________________ va bundan keyin “buyurtmachi” deb nomlanuvchi kvartira egasi oʻrtasida xususiylashtirilgan kvartiraga texnik xizmat koʻrsatish uchun tuzildi.

2. Buyurtmachi topshiradi, ijrochi esa dalolatnoma boʻyicha ________________ koʻchasidagi umumiy maydoni _____ kv. metr boʻlgan ____________ -uydagi ______ta xona, vannaxona, oshxona, balkon, ayvon va peshayvondan iborat ________ -kvartirani texnik xizmat koʻrsatish uchun qabul qilib oladi.

1. Ijrochi quyidagi majburiyatlarni oladi:

davlat va jamoat uy-joy fondi uylari uchun belgilangan shartlarda uy-joylardan texnik foydalanishning yagona qoidalari va normalariga albatta rioya qilgan holda texnik xizmat koʻrsatishni taʼminlash, shu jumladan, uy-joyni, jihozlarni, uy atroflarini zarur holatda saqlashni va u yerda yashovchi aholiga xizmat koʻrsatishni taʼminlovchi ishlarni olib borish;

bir oyda __________ hisobidan umumiy ravishda foydalaniladigan joylarni, muhandislik asbob-uskunalarini, tashqi obodonlashtirish jihozlarini tuzatish;

bir oyda __________ hisobidan uy-joy konstruksiyalarini bahorgi va kuzgi nazoratdan oʻtkazish;

bir oyda ___________ hisobidan muhandislik asbob-uskunalarini, kommunikatsiyalarini, uy ostidagi xonalarni, tomlarni, umumiy ravishda foydalaniladigan joylarni kuzgi-qishki davrda foydalanish uchun tayyorlab qoʻyish;

bir oyda ___________ hisobidan umumiy ravishda foydalaniladigan joylarga, uy atroflariga, axlatxonalarga sanitariya xizmati koʻrsatishni taʼminlash;

har bir koʻrsatilgan xizmat uchun ____________ hisobidan propiska qilish, propiskadan chiqarish, maʼlumotnomalar berish yuzasidan xizmat koʻrsatish;

tasdiqlangan tavsiflar va shartnomaviy narxlar boʻyicha boshqa pulli xizmatlar koʻrsatish;

1-oktabrdan kechiktirmasdan kvartirani va uy-joyni isitish mavsumiga tayyorlab qoʻyish;

paydo boʻlgan avariya holatlarini tezlik bilan, lekin talabnoma olingandan soʻng 4 soatdan kechikmay, boshqa nosozliklarni esa 24 soat ichida bartaraf etish;

normativ muddatlar yetib kelishi bilan uy-joyning umumiy ravishda foydalaniladigan joylarini, muhandislik asbob-uskunalarini, yertoʻlalarni, tomlar va boshqalarni joriy hamda asosli tuzatish,

2. Buyurtmachi quyidagi majburiyatlarni oladi:

a) uyga, kvartiraga texnik xizmat koʻrsatish yuzasidan mazkur Shartnoma boʻyicha bajarilgan ishlarni oʻz vaqtida qabul qilib olish va unga haq toʻlash;

b) kvartiradan belgilangan maqsadlarga muvofiq foydalanish, uy-joyning sanitariya-texnika asbob-uskunalariga, tashqi obodonlashtirish obyektlariga ehtiyotkorlik bilan munosabatda boʻlish.

Texnik xizmat koʻrsatganlik va tuzatganlik uchun haqni buyurtmachi umumiy maydonning 1 kv. metri uchun ishlar haqiqiy tannarxining________________foizi miqdorida toʻlaydi, sarf-xarajatlarning qolgan qismi mahalliy budjet mablagʻlari hisobidan qoplanadi.

Kommunal xizmatlar toʻlovi ijrochi orqali Vazirlar Mahkamasi tomonidan belgilangan tariflar boʻyicha amalga oshiriladi.

Ijrochi aybi bilan issiqliq sovuq va issiq suv berishdagi va boshqa kommunal xizmatlar koʻrsatishdagi uzilishlar dalolatnoma bilan ikki tomonlama rasmiylashtiriladi va ular uchun haq toʻlanmaydi.

1. Oʻz majburiyatlarini muddatida bajarmagan yoki zarur darajada bajarmagan hollarda ijrochi buyurtmachiga muddati oʻtkazib yuborilgan har bir kun uchun ishlar qiymatining 0,5 foizi miqdorida jarima toʻlaydi.

2. Buyurtmachi tomonidan toʻlovlar muddati choʻzib yuborilganda muddati oʻtkazib yuborilgan har bir kun uchun muddati oʻtkazib yuborilgan toʻlovlar summasining 0,5 foizi miqdorida penya undiriladi.

3. Avariyani bartaraf etish boʻyicha shartnoma majburiyatlari ijrochi tomonidan buzilgan hollarda buyurtmachi shartnomada nazarda tutilgan ishlarni ijrochi mablagʻlari hisobiga bajarishi mumkin yoki zararlarni toʻlashni talab qilish huquqiga egadir.

Buyurtmachi tomonidan uning shartnoma majburiyatlari oʻz vaqtida bajarilmaganligi tufayli ishlarda uzilish boʻlganligi uchun ijrochi javob bermaydi.

4. Jarima sanksiyalarini toʻlash tomonlarni shartnoma boʻyicha qabul qilingan majburiyatlarni bajarishdan ozod qilmaydi.

1. Ushbu Shartnoma _____________ dan ____________ gacha boʻlgan davr uchun 1 yilga, 2 nusxada tuzildi, ikkala nusxa ham bir xil kuchga ega, ulardan biri buyurtmachida, ikkinchisi ijrochida saqlanadi.

Agar tomonlardan biri shartnomaning amalda boʻlish muddatlari tamom boʻlishidan ikki oy oldin uni toʻxtatish toʻgʻrisida ariza bermagan boʻlsa, shartnoma keyingi davrga uzaytirilgan hisoblanadi.

2. Muddati tamom boʻlgunga qadar shartnomani bekor qilish qonun bilan belgilangan tartibda amalga oshiriladi.

Mazkur Shartnomani bajarish, bekor qilish va uning muddatini uzaytirishga doir paydo boʻlgan barcha nizolar belgilangan tartibda koʻrib chiqiladi.