|
Hujjat kuchini yo‘qotgan " " 01.01.2008
|
Oʻzbekiston Respublikasining qonuni
PATTA TOʻLOVI TOʻGʻRISIDA
LexUZ sharhiMazkur Qonun Oʻzbekiston Respublikasining 2007-yil 28-dekabrdagi OʻRQ-138-sonli “Oʻzbekiston Respublikasining Soliq kodeksi qabul qilinishi munosabati bilan Oʻzbekiston Respublikasining ayrim Qonun hujjatlariga oʻzgartish va qoʻshimchalar kiritish, shuningdek ayrim qonun hujjatlarini oʻz kuchini yoʻqotgan deb topish toʻgʻrisida”gi Qonuni bilan oʻz kuchini yoʻqotgan.
1-modda. Patta haqi toʻlovchilari
Bozorlar, yarmarkalar va oldi-sotdi qilish uchun maxsus belgilangan boshqa joylarda mollar, buyumlar va qishloq xoʻjalik mahsulotlarini sotayotgan jismoniy shaxslar patta haqi toʻlaydilar.
2-modda. Patta toʻlovi olish obyektlari
Patta toʻlovi oldi-sotdi qilishga ajratilgan har bir joy uchun, savdo qilingan har bir kun yoki har bir mol, buyum, har bosh chorva mol uchun olinadi. Agar oldi-sotdi qilish uchun ajratilgan joy uchun ijara shartnomasiga koʻra ijara haqi toʻlansa, u holda patta toʻlovi ijara qiymatiga kiritiladi.
3-modda. Patta toʻlovi olish tartibi
Patta toʻlovi har bir toʻlovchidan naqd pul olib, unga patta qogʻozi berish yoʻli bilan undiriladi. Patta qogʻozini boshqa toʻlovchilarga berish man etiladi. Patta toʻlovi bozorlar, yarmarkalar va oldi-sotdi uchun maxsus ajratilgan boshqa joylar xodimlari tomonidan yigʻiladi.
4-modda. Patta toʻlovi miqdorlari
Patta toʻlovi miqdorlari Oʻzbekiston Respublikasi Vazirlar Mahkamasi tomonidan belgilanadi.
LexUZ sharhiPatta toʻlovlari miqdorlari Vazirlar Mahkamasining 1993-yil 23-martdagi 152-son “Patta toʻlovlari miqdorlarini belgilash haqida”gi qarori bilan tasdiqlangan.
5-modda. Patta haqini toʻlovchi hamda oluvchi idoralarning vazifalari va javobgarligi
Mollar, buyumlar va qishloq xoʻjaligi mahsulotini bozorlar, yarmarkalar yoki oldi-sotdi qilish uchun ajratilgan boshqa maxsus joylarda patta haqi toʻlamasdan sotish taqiqlanadi.
Bozorlar, yarmarkalar hamda mollar, qishloq xoʻjaligi mahsulotlari sotish uchun maxsus ajratilgan boshqa joylarning maʼmuriyati patta haqi toʻgʻri va oʻz vaqtida undirilishiga rioya qilishi shart. Patta toʻlovidan tushgan mablagʻ budjetga har oyda bir marta, lekin hisobot oyidan keyingi oyning 15-kunidan kechiktirilmay oʻtkaziladi. Patta toʻlovidan tushgan mablagʻni oʻz vaqtida budjetga oʻtkazmaganlik uchun har bir kechiktirilgan kun hisobidan 0,5 foiz miqdorda jarima undiriladi.
6-modda. Patta toʻlovidan tushgan mablagʻdan foydalanish tartibi
Oldingi tahrirga qarang.
Patta toʻlovi mablagʻlaridan foydalanishning tartibi har yili xalq deputatlari Kengashlari tomonidan belgilanadi, lekin shu mablagʻning kamida yarmi bozor, yarmarka yoki mollar, buyumlar va qishloq xoʻjaligi mahsulotlarini sotish uchun maxsus ajratilgan joylardan foydalanish huquqiga ega boshqa tashkilot tasarrufida qolishi sharti bilan.
(6-moddaning birinchi qismi Oʻzbekiston Respublikasining 2004-yil 3-dekabrdagi 714-II-son Qonuni tahririda — Oʻzbekiston Respublikasi Qonun hujjatlari toʻplami, 2004-y., 51-son, 514-modda)
Patta toʻlovining qolgan qismi mahalliy budjetga oʻtkaziladi.
7-modda. Patta toʻlovi toʻgʻri undirilishi ustidan nazorat qilish
Patta toʻlovi toʻgʻri undirilishini davlat soliq idoralari nazorat qiladilar.
8-modda. Ushbu Qonunni qoʻllanishga doir yoʻriqnoma
Oldingi tahrirga qarang.
Ushbu Qonunni qoʻllanishga doir yoʻriqnoma Oʻzbekiston Respublikasi Moliya vazirligi bilan kelishilgan holda Oʻzbekiston Respublikasi Davlat soliq qoʻmitasi tomonidan chiqariladi.
(8-modda Oʻzbekiston Respublikasining 2004-yil 3-dekabrdagi 714-II-son Qonuni tahririda — Oʻzbekiston Respublikasi Qonun hujjatlari toʻplami, 2004-y., 51-son, 514-modda)
Oʻzbekiston Respublikasining Prezidenti I. KARIMOV
Toshkent sh.,
1992-yil 9-dekabr,
742-XII-son
(Oʻzbekiston Respublikasi Oliy Kengashining Axborotnomasi, 1993-y., 1-son, 25-modda; Oʻzbekiston Respublikasi Qonun hujjatlari toʻplami, 2004-y., 51-son, 514-modda)
