|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
RESPUBLIKADA BREZENT ISHLAB CHIQARISH TASHKIL ETISH TOʻGʻRISIDA
LexUZ sharhiMazkur qaror Oʻzbekistan Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Paxta tozalash sanoatining brezentga boʻlgan ehtiyojini toʻlaroq qondirish maqsadida Vazirlar Mahkamasi qaror qiladi:
1. “Oʻzdavpaxtasanoatsotish” uyushmasi, Toshkent “Kanop” jamoa korxonasi, “Texnolen a.o.” va “Mars LTD” chex firmalarning Toshkent shahrida “Kanop” brezent ishlab chiqaradigan qoʻshma korxona tashkil etish toʻgʻrisidagi takliflari qabul qilinsin.
2. Qoʻshma korxonaning ustav fondi quyidagi tartibda — Oʻzbekiston tomoniniki 49 foiz, chex tomoniniki 51 foiz taqsimlanishiga rozilik berilsin.
3. Quyidagilar maʼlumot uchun qabul qilinsin:
chex tomoni mahsulot ishlab chiqarish boshlangan paytdan boshlab besh yil mobaynida qoʻshma korxona faoliyatidan olingan unga tegishli barcha foydani qoʻshma korxonani rivojlantirishga, kengaytirishga va texnika bilan qayta jihozlashga yoʻnaltiradi;
“Oʻzdavpaxtasanoatsotish” uyushmasi ikki yil mobaynida belgilangan tartibda “Texnolen a.o.” chex firmasidan har yili 1.5 mln kvadrat metr brezent sotib oladi.
4. Qoʻshma korxona obyektlari qurilishi boʻyicha buyurtmachi funksiyasi Toshkent “Kanop” jamoa korxonasiga bosh pudratchi funksiyasi esa “Oʻzdehqonchilikqurilish” davlat-kooperativ birlashmasiga yuklansin.
Toshkent “Kanop” jamoa korxonasiga 1995-yilda loyihalash ishlarini obyektlar qurilishi bilan bir vaqtda bajarishga va ularga ishchi hujjatlari hamda bajarilgan ishlar hajmi asosida haq toʻlashga ruxsat berilsin.
5. “Oʻzsanoatqurilishbank” va 1995-yilda Toshkent “Kanop” jamoa korxonasiga qurilishi mablagʻ bilan taʼminlash va “Kanop” qoʻshma korxonasida brezent ishlab chiqarishni tashkil etish uchun uzoq muddatli tijorat krediti ajratish tavsiya qilinsin.
6. Oʻzbekiston Respublikasi Moliya vazirligi, Tashqi iqtisodiy aloqalar vazirligi “Kanop” qoʻshma korxonasini belgilangan tartibda roʻyxatdan oʻtkazsinlar.
7. “Oʻzistiqbostat” davlat qoʻmitasi 1995-yil balansida Toshkent “Kanop” jamoa korxonasiga uskunalar haqini toʻlash uchun 1000 tonna paxta tolasiga kvota ajratishni nazarda tutsin.
8. Oʻzbekiston Respublikasi Qishloq xoʻjaligi vazirligi “Oʻzdavpaxtasanoatsotish” Uyushmasi, Toshkent viloyati hokimligi bilan birgalikda 1996-yildan boshlab kanop tolasi ishlab chiqarishni koʻpaytirish masalasini koʻrib chiqsin va hal qilsin.
9. Oʻzbekiston Respublikasi Oliy va oʻrta maxsus taʼlim vazirligi “Oʻzdavpaxtasanoatsotish” uyushmasining buyurtmanomalariga koʻra shartnoma asosida Toshkent toʻqimachilik institutida kanopni dastlabki qayta ishlash mutaxassislarini tayyorlash masalalarini hal etsin.
10. Mazkur qarorning bajarilishini nazorat qilish Vazirlar Mahkamasining Dehqonchilik sanoati majmui boʻlimiga hamda Kapital qurilish, transport va aloqa boʻlimiga yuklansin.
Oʻzbekiston Respublikasining Bosh vaziri A.MUTALOV
Toshkent sh.,
1994-yil 28-oktabr,
524-son
