Tadbirkorlik subyektlarini tekshirishni tashkil qilish tizimini takomillashtirish va tekshirishlar sonini keskin qisqartirish, xoʻjalik yurituvchi subyektlar faoliyatini davlat tomonidan nazorat qilish toʻgʻrisidagi qonun hujjatlariga qatʼiy rioya etilishi uchun nazorat organlari mansabdor shaxslarining javobgarligini kuchaytirish maqsadida:

1. Quyidagilar belgilansin:

mikrofirmalar, kichik korxonalar va fermer xoʻjaliklarining moliya-xoʻjalik faoliyatini har toʻrt yilda koʻpi bilan bir marta, boshqa tadbirkorlik subyektlarini esa har uch yilda koʻpi bilan bir marta reja asosida tekshirish oʻtkaziladi;

yangi tashkil qilingan mikrofirmalar, kichik korxonalar va fermer xoʻjaliklarining moliya-xoʻjalik faoliyatini ular davlat roʻyxatiga olingan paytdan boshlab ikki yil mobaynida reja asosida tekshirish oʻtkazilmaydi;

hududiy soliq organlari tomonidan boshqa tumanlar (shaharlar)da roʻyxatga olingan tadbirkorlik subyektlarining ishlab chiqarish binolari, savdo shoxobchalari qayerda joylashganidan va xizmatlar koʻrsatiladigan (ishlar bajariladigan) joydan qatʼi nazar, ularning moliya-xoʻjalik faoliyatini tekshirish takrorlanishiga yoʻl qoʻyilmagan holda, tadbirkorlik subyekti roʻyxatga olingan joydagi tegishli soliq organlari bilan bir vaqtda amalga oshiriladi;

tadbirkorlik subyektlari tekshirish natijalari boʻyicha nazorat organlarining taqdimnomalarini bajargan, shuningdek yetkazilgan zararni belgilangan muddatda va toʻliq hajmda ixtiyoriy ravishda qoplagan, shu jumladan penyani toʻlagan taqdirda ularga nisbatan moliyaviy jazo choralari qoʻllanilmaydi.

2. Vazirliklar, idoralarning rahbarlari, Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari qattiq ogohlantirib qoʻyilsinki, nazorat organlarining mansabdor shaxslari tadbirkorlik subyektlari ruxsatsiz tekshirilganligi va ularning xoʻjalik faoliyatiga noqonuniy aralashilganligi uchun yetkazilgan iqtisodiy zararning oʻrni qoplangan holda javobgarlikka, hatto jinoiy javobgarlikka ham tortiladilar.

Oʻzbekiston Respublikasi Bosh prokuraturasi nazorat va huquqni muhofaza qilish organlarining tekshirishlarni tayinlash va oʻtkazish borasida belgilangan tartibga qatʼiy rioya etish, tadbirkorlik subyektlarining huquq va qonuniy manfaatlarini himoya qilish yoʻlidagi faoliyati ustidan muntazam nazoratni amalga oshirsin.

3. Oʻzbekiston Respublikasining nazorat organlari faoliyatini muvofiqlashtirish boʻyicha Respublika kengashining yangilangan tarkibi ilovaga muvofiq tasdiqlansin.

4. Nazorat organlari faoliyatini muvofiqlashtirish boʻyicha Respublika kengashi:

Oʻzbekiston Respublikasi Adliya vazirligi, Davlat soliq qoʻmitasi, boshqa manfaatdor vazirliklar va idoralar bilan birgalikda bir oy muddatda tadbirkorlik subyektlari faoliyatini tekshirish yillik va chorak muvofiqlashtiruvchi reja-jadvallarini shakllantirishning aniq asoslangan tamoyillari ishlab chiqilishini taʼminlasin;

2005-yilning 1-dekabrigacha muddatda tadbirkorlik subyektlari faoliyatini 2006-yilda tekshirish muvofiqlashtiruvchi reja-jadvalini ishlab chiqib, tasdiqlasin, unda mazkur Farmonning 1-bandiga muvofiq kompleks tekshirishlar oʻtkazishning asoslangan tamoyillari va muddatlaridan kelib chiqqan holda tekshirilishi lozim boʻlgan subyektlar roʻyxatini shakllantirishni nazarda tutsin;

nazorat organlariga “Xoʻjalik yurituvchi subyektlar faoliyatini davlat tomonidan nazorat qilish toʻgʻrisida”gi Qonun moddalariga qatʼiy muvofiq ravishda rejadan tashqari tekshirishlar oʻtkazilishini asoslab beradigan sabablar mavjud boʻlgan favqulodda holatlarda ularni oʻtkazishga ruxsat bersin.

5. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda amaldagi qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisidagi takliflarni Vazirlar Mahkamasiga kiritsin.

Vazirliklar va idoralar bir oy muddatda oʻzlarining idoraviy normativ hujjatlarini mazkur Farmon bilan muvofiqlashtirsinlar.

6. Oʻzbekiston Respublikasi Prezidentining 2000-yil 3-avgustdagi “Nazorat organlari faoliyatini muvofiqlashtirish boʻyicha Respublika kengashi tarkibiga oʻzgartishlar kiritish toʻgʻrisida” PF–2678-sonli Farmonining 1-bandi oʻz kuchini yoʻqotgan deb hisoblansin.

7. Ushbu Farmonning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev va Oʻzbekiston Respublikasi Prezidentining Davlat maslahatchisi R.S. Shamshiyev zimmalariga yuklansin.