“Isteʼmolchilarning huquqlarini himoya qilish toʻgʻrisida”gi Oʻzbekiston Respublikasi Qonuni 27-moddasining isteʼmolchilarning huquqlarini himoya qilish toʻgʻrisidagi qonun hujjatlari buzilganligi uchun jarimalar solishga oid qismini amalga oshirish maqsadida Vazirlar Mahkamasi qaror qiladi:

1. Isteʼmolchilarning huquqlarini himoya qilish toʻgʻrisidagi qonun hujjatlari buzilganligi uchun monopoliyaga qarshi faoliyatni amalga oshiruvchi davlat organi tomonidan solinadigan jarimalarni xoʻjalik yurituvchi subyektlarga qoʻllash tartibi ilovaga muvofiq tasdiqlansin.

2. Mazkur qarorning bajarilishini nazorat qilish Bosh vazirning oʻrinbosari B. S. Hamidov zimmasiga yuklansin.

1. Mazkur Tartib “Isteʼmolchilarning huquqlarini himoya qilish toʻgʻrisidagi Oʻzbekiston Respublikasi Qonunining 27-moddasini bajarish yuzasidan ishlab chiqilgan.

2. Mazkur Tartibning amal qilishi Oʻzbekiston Respublikasi hududida oʻz faoliyatini amalga oshiruvchi xoʻjalik yurituvchi subyektlar (ishlab chiqaruvchi, ijrochi, sotuvchiga, ularning idoraviy boʻysunishi va mulkchilik shakllaridan qatʼi nazar, joriy etiladi.

Mazkur Tartibning amal qilishi jismoniy shaxslarga nisbatan joriy etilmaydi.

“Isteʼmolchilarning huquqlarini himoya qilish toʻgʻrisida”gi Oʻzbekiston Respublikasi Qonunini buzganligi uchun yuridik shaxs boʻlmagan holda tadbirkorlik faoliyati bilan shugʻullanuvchi jismoniy shaxslardan jarima undirish maʼmuriy qonunchilikka muvofiq amalga oshiriladi.

3. Monopoliyaga qarshi faoliyatni amalga oshiruvchi davlat organi (Oʻzbekiston Respublikasi Moliya vazirligi huzuridagi Monopoliyadan chiqarish va raqobatni rivojlantirish qoʻmitasi) isteʼmolchi huquqlarining quyidagi buzilishlarini bartaraf etish toʻgʻrisidagi koʻrsatmalarni bajarishdan boʻyin tovlangan yoki ular oʻz vaqtida bajarilmagan hollarda ishlab chiqaruvchiga, ijrochiga va sotuvchiga:

a) tovarlar yaroqlilik muddati koʻrsatilmagan holda yoki yaroqlilik muddati oʻtgan holda sotishga qabul qilinganligi va sotilganligi uchun eng kam oylik ish haqining besh yuz baravari miqdorida;

b) tovar (ish, xizmat)lar nohalol reklama qilinganligi uchun eng kam oylik ish haqining uch yuz baravari miqdorida;

v) tovarning sotib olinganligini yoki ishning haqi toʻlanganligini tasdiqlovchi, tovar (ish, xizmat)ning bahosi haqidagi maʼlumot koʻrsatilgan kassa va tovar cheklari hamda boshqa hujjatlar isteʼmolchiga berilmasdan tovarlar sotilganligi yoki xizmatlar koʻrsatilganligi uchun eng kam oylik ish haqining yuz baravari miqdorida;

g) ishlab chiqaruvchi (ijrochi, sotuvchi) toʻgʻrisidagi zarur axborot, tovar (ish, xizmat) toʻgʻrisidagi axborot mavjud emasligi, shuningdek tovarni almashtirish tartibi va shartlari bajarilmaganligi uchun eng kam oylik ish haqining yetmish baravari miqdorida;

d) tovar (ish, xizmat) toʻgʻrisida ishonchli boʻlmagan yoki yetarlicha toʻliq boʻlmagan axborot berilganligi, kafolat muddati belgilanadigan tovarlar kafolat majburiyatlarisiz sotilganligi va belgilangan tartibda tasdiqlanadigan Tovarlarning ayrim turlarini sotish (xizmatlar koʻrsatish) tartibi talablari buzilishining boshqa hollari uchun eng kam oylik ish haqining ellik baravari miqdorida jarima solishga haqlidir.

4. Mazkur Tartibning 3-bandi “v”, “g” va “d” kichik bandlarida nazarda tutilgan hollarda jarimalar monopoliyadan chiqarish va raqobatni rivojlantirish hududiy organlari boshliqlari va ularning oʻrinbosarlari tomonidan mustaqil ravishda solinadi, mazkur Tartibning 3-bandi “a” va “b” kichik bandlarida nazarda tutilgan hollarda esa Monopoliyadan chiqarish va raqobatni rivojlantirish qoʻmitasi raisi va uning oʻrinbosarlari bilan kelishilgan holda solinadi.

5. Gerbli muhr bilan tasdiqlangan va monopoliyaga qarshi faoliyatni amalga oshiruvchi organ rahbarining vizasi qoʻyilgan hamda isteʼmolchilarning huquqlarini himoya qilish toʻgʻrisidagi qonun hujjatlari buzilganligi toʻgʻrisidagi maʼlumotlar mavjud boʻlgan, ishlab chiqaruvchi, ijrochi, sotuvchini tekshirish uchun berilgan bir martalik guvohnoma asosida amalga oshirilgan tekshirishning raqamli dalolatnomasi jarima solish toʻgʻrisida qaror chiqarish uchun asos boʻladi.

Monopoliyaga qarshi faoliyatni amalga oshiruvchi davlat organining mansabdor shaxsi isteʼmolchilarning huquqlarini himoya qilish toʻgʻrisidagi qonun hujjatlari buzilganligi haqidagi ishni koʻrib chiqadi va qaror chiqaradi, unda quyidagilar koʻrsatiladi:

qaror chiqarilgan sana;

qarorni chiqargan mansabdor shaxsning familiyasi, ismi, otasining ismi;

xoʻjalik yurituvchi subyekt nomi;

xoʻjalik yurituvchi subyektni tekshirish dalolatnomasining tartib raqami va sanasi;

qonun buzilganligi uchun javobgarlikni nazarda tutuvchi meʼyoriy hujjatga havola;

jarimaning aniq miqdori, shikoyat qilish tartibi, toʻlov muddati.

Qaror yozma shaklda chiqariladi va ushbu qarorni qabul qilgan mansabdor shaxs tomonidan imzolanadi.

6. Isteʼmolchilarning huquqlarini himoya qilish toʻgʻrisidagi qonun hujjatlari buzilganligi uchun ishlab chiqaruvchiga (ijrochiga, sotuvchiga) solingan jarimalar soʻzsiz tartibda undirib olinadi,

Mazkur Tartibning 3-bandida nazarda tutilgan isteʼmolchilarning huquqlarini himoya qilish toʻgʻrisidagi qonun hujjatlari buzilganligi uchun ishlab chiqaruvchiga (ijrochiga, sotuvchiga) solinadigan jarimalar miqdori Oʻzbekiston Respublikasi Moliya vazirligining maxsus budjetdan tashqari schyotida Narxlarni boshqarish jamgʻarmasida jamlanadi va ulardan foydalanish Oʻzbekiston Respublikasi Vazirlar Mahkamasining “Oʻzbekiston Respublikasi Moliya vazirligi huzuridagi Monopoliyadan chiqarish va raqobatni rivojlantirish qoʻmitasi faoliyatini tashkil etish masalalari toʻgʻrisida” 1996-yil 23-maydagi 188-son qarorining 4-bandiga va Oʻzbekiston Respublikasi Vazirlar Mahkamasining “Narxlarni boshqarish jamgʻarmasi toʻgʻrisidagi nizomni tasdiqlash haqida” 1997-yil 22-iyuldagi 368-son qaroriga muvofiq amalga oshiriladi.

Monopoliyaga qarshi faoliyatni amalga oshiruvchi davlat organi xoʻjalik yurituvchi subyektga jarimani boʻlib-boʻlib toʻlash imkoniyatini berish huquqiga egadir, basharti jarima solish toʻgʻrisidagi qarorni darhol bajarish uning bankrot boʻlishiga olib kelishi mumkin boʻlsa.

7. Monopoliyaga qarshi faoliyatni amalga oshiruvchi davlat organi tomonidan xoʻjalik yurituvchi subyektlarga jarima solinishi ularning mansabdor shaxslarini Oʻzbekiston Respublikasining amaldagi qonun hujjatlariga muvofiq javobgarlikdan ozod qilmaydi.

8. Jarima toʻlash xoʻjalik yurituvchi subyektlarni ular tomonidan yetkazilgan zararning oʻrni toʻliq toʻldirilishidan ozod qilmaydi.

9. Tovar (ish, xizmat)larni ishlab chiqaruvchilar (ijrochilar, sotuvchilar) monopoliyaga qarshi faoliyatni amalga oshiruvchi davlat organi qarorlarini toʻliq yoki qisman haqiqiy emas deb topish toʻgʻrisidagi ariza bilan sudga murojaat qilishga haqlidirlar.

Ariza berilishi isteʼmolchilarning huquqlarini himoya qilish toʻgʻrisidagi qonun hujjatlari buzilganligi uchun jarima solish haqidagi qarorlar ijro etilishini toʻxtatib qoʻymaydi, basharti koʻrsatib oʻtilgan qarorning bajarilishi toʻxtatib turilishi toʻgʻrisida sud tomonidan ajrim chiqarilmagan boʻlsa.