“Standartlashtirish toʻgʻrisida”, “Metrologiya toʻgʻrisida”, “Mahsulotlar va xizmatlarni sertifikatlashtirish toʻgʻrisida” Oʻzbekiston Respublikasi qonunlari munosabati bilan Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining “Oʻzbekiston Respublikasida Standartlashtirish ishlarini tashkil etish toʻgʻrisida” 1992-yil 2-martdagi 93-son qaroriga (Oʻzbekiston Respublikasi QT, 1992-yil, 3-son, 4-modda) qisman oʻzgartirish kiritgan holda:

a) Belgilab qoʻyilsinki, Oʻzbekiston Respublikasi hududida standartlashtirish obyektlariga qoʻyiladigan talablarni belgilovchi normativ hujjatlarning quyidagi toifalari amal qiladi:

xalqaro (davlatlararo, mintaqaviy) standartlar;

Oʻzbekiston Respublikasining standartlari;

tarmoq standartlari;

texnikaviy shartlar;

korxonaning standartlari;

xorijiy mamlakatlarning milliy standartlari.

Standartlashtirishga doir normativ hujjatlar jumlasiga, shuningdek, qurilish normalari va qoidalari (QNvaQ), standartlashtirish boʻyicha qoidalar, normalar, amal qilinuvchi hujjatlar, texnik-iqtisodiy axborot klassifikatorlari ham kiradi. “Oʻzdavstandart” markazi “Davarxitektqurilish” qoʻmitasi, Davlat tabiatni muhofaza qilish qoʻmitasi va Sogʻliqni saqlash vazirligi bilan birgalikda uch oy muddatda yuqorida koʻrsatilgan hujjatlarni ishlab chiqish va qoʻllash tartibini belgilasin;

6) Oʻzbekiston Respublikasi Moliya vazirligi “Oʻzdavstandart” markazi, “Davarxitektqurilish” qoʻmitasi, Davlat tabiatni muhofaza qilish qoʻmitasi va Sogʻliqni saqlash vazirligiga davlat tomonidan mablagʻ bilan taʼminlanishi kerak boʻlgan standartlashtirish, metrologiya va sertifikatlashtirish ishlarini mablagʻ bilan taʼminlash uchun har yili respublika budjetidan mablagʻ ajratishni nazarda tutsin.

“Oʻzdavstandart” markazi “Davarxitektqurilish” qoʻmitasi, Davlat tabiatni muhofaza qilish qoʻmitasi va Sogʻliqni saqlash vazirligi bilan birgalikda bir oy muddatda qonunlar buzilganligi uchun jarimalar undirish va koʻrsatiladigan xizmatlarga sarflanadigan mablagʻlarni hisobga olgan holda ularni davlat nazorati organlari oʻrtasida taqsimlash prinsiplari toʻgʻrisidagi Nizomni ishlab chiqsin.

Belgilab qoʻyilsinki, nashr etilgan (qayta nashr etilgan) standartlarni, texnik-iqtisodiy axborot klassifikatorlarini, mahsulotlar va xizmatlar Davlat reyestriga kiritilgan mahsulotlar va xizmatlarning nashr etilgan (qayta nashr etilgan) kataloglarini, standartlarga muvofiq tamgʻalangan belgilarni sotishdan belgilangan tartibda olingan mablagʻlar, shuningdek, “Standartlashtirish toʻgʻrisida”, “Metrologiya toʻgʻrisida”, “Mahsulotlar va xizmatlarni sertifikatlashtirish toʻgʻrisida”gi qonunlarning qoidalari buzilganligi uchun undiriladigan hamda davlat nazorati organlariga yuboriladigan jarimalarning bir qismi hamda, “Oʻzdavstandart” markazi tomonidan shartnomalar va litsenziya bitimlari asosida beriladigan metrologiya va sertifikatlash sohasida ayrim huquqlar va koʻrsatiladigan xizmatlar uchun toʻlovlar ham standartlashtirish, standartlar, metrologik qoidalar va sertifikatlangan mahsulotlarga qoʻyiladigan majburiy talablarga rioya qilish ustidan davlat nazorati ishlarini mablagʻ bilan taʼminlash manbalari boʻlishi mumkin;

v) Belgilab qoʻyilsinki, standartlarni, qurilish normalari va qoidalarini nashr qilish va qayta nashr qilishni ularni tasdiqlagan organlar amalga oshiradilar;

g) Oʻzbekiston Respublikasi Fan va texnika davlat qoʻmitasi, Oliy va oʻrta maxsus taʼlim vazirligi, Oʻzbekiston Respublikasi Fanlar akademiyasi, shuningdek, davlat boshqaruvi organlari toʻliq yoki qisman respublika budjeti mablagʻlari hisobiga mablagʻ bilan taʼminlanadigan davlat dasturlarini ishlab chiqishda “Oʻzdavstandart” markazi bilan kelishilgan holda, qurilish, loyihalash, tabiiy resurslarni tartibga solish va atrof muhitni muhofaza qilish sohasida esa tegishlicha “Davarxitektqurilish” qoʻmitasi, Davlat tabiatni muhofaza qilish qoʻmitasi va Sogʻliqni saqlash vazirligi bilan kelishilgan holda mahsulot sifatini normativ taʼminlash boʻlimlarini nazarda tutsin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari standartlashtirish, metrologiya hamda sertifikatlashtirish mintaqaviy organlari tomonidan yuridik va jismoniy shaxslarning standartlarning majburiy talablari va texnikaviy shartlarga, sertifikatlashtirish, davlat metrologik tekshirishi va nazorati qoidalariga rioya etishlari ustidan davlat tekshirishi va nazorati amalga oshirilishida ularga zarur yordam koʻrsatsinlar.

Davlat boshqaruvi organlariga, xoʻjalik faoliyati subyektlariga bir oy muddatda “Standartlashtirish toʻgʻrisida”, “Metrologiya toʻgʻrisida”, “Mahsulotlar va xizmatlarni sertifikatlashtirish toʻgʻrisida”gi qonunlardan kelib chiqqan holda oʻz nizomlariga kiritiladigan qoʻshimchalar va oʻzgartirishlarni belgilangan tartibda koʻrib chiqish uchun kiritish topshirilsin.

2. Oʻzbekiston Respublikasi Vazirlar Mahkamasining 1992-yil 2-martdagi 93-son qarori bilan tasdiqlangan Oʻzbekiston Respublikasi Davlat standartlashtirish tizimining Asosiy prinsiplarida:

a) 1-band quyidagi tahrirda bayon etilsin:

“Standartlashtirishning asosiy maqsadlari quyidagilar hisoblanadi:

mahsulotlar, ishlar va xizmatlarning (keyingi oʻrinlarda mahsulotlar deb yuritiladi) aholining hayoti, salomatligi va mol-mulki, atrof muhit uchun xavfsizligi, resurslarni tejash masalalarida isteʼmolchilarning va davlatning manfaatlarini himoya qilish;

mahsulotlarning oʻzaro bir-birining oʻrnini bosishini va bir-biriga monandligini taʼminlash;

fan va texnika taraqqiyoti darajasiga, shuningdek, aholi va xalq xoʻjaligining ehtiyojlariga muvofiq mahsulotlarning sifati hamda raqobatbardoshligini oshirish;

resurslarning barcha turlarini tejashga, ishlab chiqarishning texnik-iqtisodiy koʻrsatkichlarini yaxshilashga koʻmaklashish;

ijtimoiy-iqtisodiy, ilmiy-texnikaviy dasturlar va loyihalarni amalga oshirish;

tabiiy va texnogen falokatlar va boshqa favqulodda vaziyatlar yuzaga kelishi xavf-xatarini hisobga olgan holda xalq xoʻjaligi obyektlarining xavfsizligini taʼminlash;

isteʼmolchilarni ishlab chiqarilayotgan mahsulotlar nomenklaturasi va sifati toʻgʻrisidagi toʻliq va ishonarli axborot bilan taʼminlash;

mudofaa qobiliyatini va safarbarlik tayyorgarligini taʼminlash;

oʻlchovlarning yagonaligini taʼminlash;

ishlab chiqaruvchi (sotuvchi, ijro etuvchi) maʼlum qilgan mahsulot sifati toʻgʻrisidagi koʻrsatkichlarni tasdiqlash”;

b) 2-bandning ikkinchi va uchinchi xatboshlari quyidagi tahrirda bayon qilinsin:

“Umuman Oʻzbekiston Respublikasi boʻyicha — Oʻzbekiston Respublikasi Vazirlar Mahkamasi huzuridagi standartlashtirish, metrologiya va sertifikatlashtirish markazi;

qurilish va qurilish industriyasi sohasida — loyihalash va konstruksiyalash ham shunga kiradi — Oʻzbekiston Respublikasi Davlat arxitektura va qurilish qoʻmitasi”;

v) 3-band “Standartlar boʻyicha bazaviy tashkilotlar” soʻzlaridan oldin “Standartlashtirish boʻyicha texnikaviy qoʻmita toʻgʻrisidagi Namunaviy nizomga muvofiq tashkil etiladigan standartlashtirish boʻyicha texnikaviy qoʻmitalar” degan soʻzlar bilan toʻldirilsin va soʻngra matn boʻyicha;

g) 4-bandning ikkinchi xatboshi quyidagi tahrirda bayon qilinsin:

“Mahsulotlar, atrof muhit, aholi salomatligi va mol-mulkining xavfsizligini taʼminlash, mahsulotlarning texnikaviy va axborot jihatdan bir-biriga monandligi, resurslarni tejashi, oʻzaro almashuvchanligini, ularni nazorat qilish, tamgʻalash usullarining birligini taʼminlash uchun belgilanadigan talablar va Oʻzbekiston Respublikasi qonun hujjatlari bilan belgilangan boshqa talablar idoraviy boʻysunishi va mulkchilik shakllaridan qatʼi nazar, davlat korxonalari, tashkilotlari, shuningdek, tadbirkorlik faoliyati bilan shugʻullanuvchi fuqarolar tomonidan rioya qilinishi majburiy hisoblanadi.

Import qilinadigan mahsulot, agar uning majburiy talablar borasida Oʻzbekiston Respublikasida amalda boʻlgan standartlarga muvofiqligi tasdiqlanmagan boʻlsa, yetkazib berilishi va foydalanilishi mumkin emas”;

d) 4-bandning toʻrtinchi xatboshi chiqarib tashlansin.

3. Oʻzbekiston Respublikasi Vazirlar Mahkamasining 1992-yil 2-martdagi 93-son qarori bilan tasdiqlangan Oʻzbekiston davlat standartlash, metrologiya va sertifikatlashtirish markazi toʻgʻrisidagi Nizomda:

a) 4-band quyidagi tahrirda bayon etilsin:

“4. “Oʻzdavstandart” markazi tarkibiga kiruvchi tashkilotlar oʻz faoliyatini “Oʻzbekiston Respublikasida korxonalar toʻgʻrisida”, “Standartlashtirish toʻgʻrisida”, “Metrologiya toʻgʻrisida”, “Mahsulotlar va xizmatlarni sertifikatlashtirish toʻgʻrisida” Oʻzbekiston Respublikasi qonunlariga, mazkur Nizomga va “Oʻzdavstandart” markazi tomonidan tasdiqlangan korxonalar va tashkilotlarning ustavlariga muvofiq amalga oshiradilar”.

b) 7-bandda:

birinchi va ikkinchi xatboshilar quyidagi tahrirda bayon qilinsin:

“7. Quyidagi vazifalarni amalga oshirish yoʻli bilan mahsulotlarning raqobatbardoshligini oshirishda respublika xalq xoʻjaligiga koʻmaklashish, standartlashtirish, metrologiya va sertifikatlashtirishni rivojlantirish maqsadida Oʻzbekiston Respublikasi Davlat standartlash tizimi, Oʻlchovlarning yagonaligini taʼminlash davlat tizimi, Sertifikatlashtirish milliy tizimining faoliyatini taʼminlash va takomillashtirish “Oʻzdavstandart” markazining bosh vazifasi hisoblanadi”;

uchinchi xatboshi “resurslarni tejash” soʻzlari bilan toʻldirilsin;

toʻrtinchi xatboshida “mahsulotning mosligi, oʻzaro bir-birining oʻrnini toʻldirishi” soʻzlaridan keyin “resurslarni tejashi” soʻzlari kiritilsin, “eksportga chiqariladigan” soʻzlaridan keyin “va import boʻyicha keltiriladigan” soʻzlari qoʻshilsin;

yettinchi xatboshi quyidagi tahrirda bayon qilinsin:

“respublika xalq xoʻjaligini normativ hujjatlar bilan taʼminlashni tashkil etish”;

oʻn ikkinchi xatboshi “Oʻzdavstandart” markazi sinov boʻlinmalari (markazlari) ni attestatsiya va akkreditatsiya qilish” soʻzlari bilan boshlansin va soʻngra matn boʻyicha;

band quyidagi mazmundagi xatboshilar bilan toʻldirilsin:

“sertifikatlashtirishni amalga oshirish boʻyicha umumiy qoidalarni belgilash;

sertifikatlangan mahsulotda standartlarga rioya qilinishi, bir turdagi mahsulotlarni sertifikatlashtirish boʻyicha akkreditatsiya qilingan organlar va sinov laboratoriyalari (markazlari) tomonidan sertifikatlashtirish qoidalariga rioya qilinishi ustidan davlat tekshiruvi va nazoratini amalga oshirish;

sertifikatlanishi shart boʻlgan mahsulotlar roʻyxatini aniqlash;

v) 8-band quyidagi tahrirda bayon etilsin:

“8. “Oʻzdavstandart” markazi oʻzining ishlab chiqarish-xoʻjalik, moliyaviy faoliyatini ishlab chiqiladigan yillik va uzoq muddatli dasturlar va prognozlar asosida tashkil qiladi va rivojlanish istiqbollarini belgilaydi”;

g) 9-bandning birinchi xatboshi quyidagi tahrirda bayon qilinsin:

“9. “Oʻzdavstandart” markazi oʻz faoliyatida Oʻzbekiston Respublikasi vazirliklari, idoralari, uyushmalari, konsernlari, davlat boshqaruvining boshqa organlari bilan bevosita hamkorlik qiladi”;

d) 12-bandda:

ikkinchi xatboshi quyidagi tahrirda bayon qilinsin:

mahsulotni standartlashtirish, metrologiya, sinash va sertifikatlashtirish masalalarini hal qilishda davlat boshqaruvi organlari, tegishli vazirliklar, idoralar, uyushmalar, konsernlar, korxonalar, tashkilotlar, jamoat birlashmalari jalb qilinsin”.

4. Oʻzbekiston Respublikasida standartlar va oʻlchov vositalari ustidan davlat nazorati toʻgʻrisida ilova qilinayotgan Nizom tasdiqlansin.

5. Vazirlar Mahkamasining “Oʻzbekiston Respublikasida standartlashtirish ishlarini tashkil etish toʻgʻrisida” 1992-yil 2-martdagi 93-son qarorining (Oʻzbekiston Respublikasi QT, 1992-yil, 3-son, 4-modda) 1, 9, 10-bandlari va Vazirlar Mahkamasining “Oʻzbekiston Respublikasida standartlar va oʻlchov vositalari ustidan davlat nazorati toʻgʻrisidagi Nizomni tasdiqlash haqida” 1992-yil 29-apreldagi 211-son qarori (Oʻzbekiston Respublikasi QT, 1992-yil, 4-son, 16-modda) oʻz kuchini yoʻqotgan deb hisoblansin.

1. Xoʻjalik faoliyati subyektlari tomonidan standartlarning majburiy talablariga, standartlashtirish boʻyicha qonunchilikning boshqa hujjatlariga rioya etilishi ustidan davlat tekshiruvi va nazoratini “Oʻzdavstandart” markazi, “Davarxitektqurilish” qoʻmitasi, Davlat tabiatni muhofaza qilish qoʻmitasi, sogʻliqni saqlash vazirligi va ularning hududiy organlari, shuningdek, boshqa maxsus vakil qilingan davlat organlari oʻz vakolatlari doirasida amalga oshiradilar.

Tayyorlovchilar (tadbirkorlar, sotuvchilar, ijrochilar), sinov laboratoriyalari (markazlari), sertifikatlashtirish organlarining majburiy sertifikatlashtirish qoidalariga rioya qilishlari hamda sertifikatlashtirilgan mahsulot ustidan davlat nazoratini “Oʻzdavstandart” markazining davlat inspektorlari Oʻzbekiston Respublikasi qonunlarida belgilangan tartibda va shartlarda amalga oshiradilar.

Davlat metrologiya tekshiruvi va nazorati metrologiya xizmati organlari tomonidan metrologiya normalari va qoidalarini tekshirish maqsadida amalga oshiriladi.

2. Vazirliklar, idoralar, uyushmalar, konsernlar, davlat korxonalari, kooperativlar, qoʻshma, aksionerlik, ijaradagi, kichik va boshqa korxonalar, muassasalar va tashkilotlar (bundan keyin matnda korxonalar deyiladi) ularning qaysi idoraga qarashliliklari va mulkchilik shakllaridan qatʼi nazar, shuningdek, respublika hududida tadbirkorlik faoliyati bilan shugʻullanuvchi fuqarolar tomonidan standartlar* va metrologik qoidalarning, oʻlchov birligining oʻz vaqtida joriy etilishini va ularga qatʼiy rioya qilinishini taʼminlash, shuningdek, standartlar va oʻlchov vositalarining ilmiy-texnik darajalarini tahlil qilishdan va ularni ishlab chiqishda ishlab chiqarish samaradorligini oshirish, ilmiy-texnika taraqqiyotini jadallashtirish, mehnat unumdorligini oʻstirish, mahsulotning texnik darajasini va sifatini oshirish maqsadida fan va texnika yutuqlaridan yanada samaraliroq foydalanishga koʻmaklashish Oʻzbekiston Respublikasida standartlar va oʻlchov vositalari ustidan davlat nazoratining bosh vazifasi hisoblanadi.

Mahsulotlar, atrof muhit, aholi sogʻligʻi va mol-mulkining xavfsizligini taʼminlash maqsadida belgilanadigan talablar ustidan olib boriladigan davlat nazoratining obyekti mahsulot, shu jumladan, qaysi idoraga boʻysunishlari va mulkchilik shakllaridan qatʼi nazar, xoʻjalik faoliyati subyektlari, tadbirkorlik bilan shugʻullanuvchi jismoniy shaxslarning ham ishlab chiqish, tayyorlash, saqlash, tashish, ishlatish, tuzatish va foydalanish bosqichlarida sertifikatlashtirilgan mahsulotidir.

Mahsulotlar (dasturiy va boshqa ilmiy-texnikaviy mahsulot ham), xizmatlar va, shuningdek, sifat tizimlari sertifikatlashtirish obyektlari hisoblanadi.

Etalonlar, oʻlchov vositalari, modda va materiallarning tarkibi va xossalarining standart namunalari, axborot-oʻlchov tizimlari, oʻlchovlarni bajarish uslubi va metrologiya normalari va qoidalarida koʻzda tutilgan boshqa obyektlar davlat metrologiya tekshirishi va nazorati obyektlari hisoblanadi.

Xoʻjalik faoliyati subyektlari davlat nazoratini amalga oshirish uchun zarur boʻladigan barcha sharoitlarni yaratib berishlari shart.

Standartlarning majburiy talablariga rioya qilinishi ustidan davlat nazorati:

Oʻzbekiston Respublikasi va Qoraqalpogʻiston Respublikasining standartlar ustidan nazorat qilish boʻyicha bosh davlat inspektorlari;

standartlar ustidan nazorat qilish boʻyicha viloyatlar, shaharlardagi bosh davlat inspektorlari;

standartlar ustidan nazorat qilish boʻyicha davlat inspektorlari tomonidan amalga oshiriladi.

“Oʻzdavstandart” markazi, “Davarxitektqurilish” qoʻmitasi, Davlat tabiatni muhofaza qilish qoʻmitasi, Sogʻliqni saqlash vazirligi rahbariyati lavozimlariga koʻra ayni vaqtda Oʻzbekiston Respublikasining standartlar va oʻlchov vositalari ustidan nazorat olib boruvchi bosh davlat inspektorlari, ularning oʻrinbosarlari esa Oʻzbekiston Respublikasining standartlar va oʻlchov vositalari ustidan nazorat olib boruvchi bosh davlat inspektorlarining oʻrinbosarlari hisoblanadilar.

“Oʻzdavstandart” markazining standartlashtirish, metrologiya va sertifikatlashtirish mintaqaviy markazlari (SMSMM) ning rahbarlari, “Davarxitektqurilish” qoʻmitasi, Davlat tabiatni muhofaza qilish qoʻmitasi, Sogʻliqni saqlash vazirligining Qoraqalpogʻiston Respublikasidagi va shaharlardagi hududiy organlarining rahbarlari lavozimlariga koʻra Qoraqalpogʻiston Respublikasi, viloyatlar va shaharlarning standartlar va oʻlchov vositalari boʻyicha nazorat olib boruvchi bosh davlat inspektorlari, ularning oʻrinbosarlari esa Qoraqalpogʻiston Respublikasi, viloyatlar, shaharlarning standartlar va oʻlchov vositalari boʻyicha nazorat olib boruvchi bosh davlat inspektorlarining oʻrinbosarlari hisoblanadilar.

Standartlar va oʻlchov vositalari ustidan davlat nazoratini amalga oshirish vazifasi topshirilgan boʻlim boshliqlari, ularning oʻrinbosarlari, bosh mutaxassislar, mansabdor shaxslar lavozimlari boʻyicha bir vaqtning oʻzida standartlar va oʻlchov vositalari ustidan nazoratni amalga oshiruvchi davlat inspektorlari hisoblanadilar.

Standartlar va oʻlchov vositalari ustidan davlat nazoratini amalga oshiruvchi mansabdor shaxslar hokimiyat organlarining vakillari hisoblanadilar va davlat himoyasi ostida boʻladilar.

Standartlar va oʻlchov vositalari ustidan davlat nazoratini amalga oshiruvchi mansabdor shaxslar davlat nazoratchisi yoki davlat tekshiruvchisi sifatida “Oʻzdavstandart” markazi tomonidan belgilanadigan tartibda attestatsiyadan oʻtgan boʻlishlari kerak.

Oʻzbekiston Respublikasida davlat nazoratini:

butun Oʻzbekiston Respublikasi boʻyicha — “Oʻzdavstandart” markazi;

qurilish, qurilish industriyasi, shu jumladan, loyihalash va konstruksiyalash sohasidagi standartlar boʻyicha — “Davarxitektqurilish” qoʻmitasi;

tabiiy resurslardan foydalanishni tartibga solish, atrof muhitni ifloslanishdan va boshqa zararli moddalar taʼsiridan muhofaza qilish sohasida Davlat tabiatni muhofaza qilish qoʻmitasi;

tibbiy maqsadlardagi mahsulotlar, tibbiy texnika buyumlari, dorivor vositalar sohasida, shuningdek, respublika sanoati ishlab chiqarayotgan, shu jumladan, import boʻyicha keltirilayotgan mahsulot tarkibida inson uchun zararli moddalarning borligini aniqlash masalalari boʻyicha — Sogʻliqni saqlash vazirligi amalga oshiradi.

3. Standartlar va oʻlchov vositalari ustidan davlat nazorati organlari oʻzlariga yuklangan vazifalarga muvofiq:

a) standartlar va metrologiya qoidalarining, shuningdek, mahsulotlar (jarayonlar, ishlar va xizmatlar) ning aholi hayoti va salomatligi, mulki xavfsizligiga, atrof muhitni muhofaza qilish, resurslarni tejash, bir-birini almashtira olishga majburiy talablarni belgilaydigan standartlar va metrologiya qoidalarining oʻz vaqtida joriy qilinishi hamda ularga rioya qilinishini, shuningdek, ularni nazorat qilish uslublari birligi va tamgʻalash birligini, qonunchilikda nazarda tutilgan, mahsulotni ishlab chiqish, ishlab chiqarish va yetkazib berish shartnomalariga kiritilgan boshqa talablarni tekshiradilar;

b) fizik oʻlchovlarning belgilangan birliklarining toʻgʻri qoʻllanilishini, oʻlchov vositalarining ahvolini, ularni tayyorlash, saqlash, uzatish, tekshirish va qoʻllanish sharoitlarini, eskirgan oʻlchov vositalarining ishlab chiqarishdan oʻz vaqtida olib tashlanishini va ularni yangisiga almashtirilishini tekshiradilar;

v) standartlashtirish va metrologiya xizmatlarining idoraviy xizmatlari ishini nazorat qiladilar;

g) standartlar ustidan nazoratni amalga oshiruvchi korxonalar va tashkilotlar faoliyatiga uslubiy rahbarlikni amalga oshiradilar va ularning faoliyatlarini muvofiqlashtiradilar;

d) sertifikatlashtirish sinovlarining toʻgʻri oʻtkazilishi ustidan nazoratni amalga oshiradilar;

e) ishlab chiqarishlar, sertifikatlashtirilgan mahsulotlar, sifat tizimlarida attestatsiya shartlariga qanday rioya qilinayotganligi ustidan inspeksiya nazoratini oʻtkazadilar;

j) mahsulotlarning ayrim turlarini oʻz bazalarida tashkil qilingan laboratoriyalarda sinab koʻradilar;

z) standartlar va oʻlchov vositalari ustidan davlat nazorati natijalarini umumlashtiradilar, ularni ishlab chiqishda fan va texnika yutuqlaridan samarali foydalanishda koʻmaklashadilar, ularning oʻz vaqtida joriy qilinmaganligi, standartlar va metrologik qoidalarning buzilishi sabablarini tahlil qiladilar, standartlar va oʻlchov vositalari ustidan davlat nazorat organlari ishining taʼsirini oshirish yuzasidan tadbirlar ishlab chiqadilar va ularni oʻtkazadilar;

i) vazirliklar, idoralar, uyushmalar, konsernlarning sinash boʻlimlarini attestatsiyadan oʻtkazadilar va akkreditatsiya qiladilar, berilgan mahsulotlar nomenklaturasi yoki sinovlar turlari boʻyicha sinovlarni oʻtkazish huquqiga attestatsiyadan oʻtganlik va akkreditatsiya qilinganlik toʻgʻrisidagi guvohnomalarni beradilar va ularni roʻyxatga oladilar. Bu ishlarni litsenziya (ruxsatnoma) olgan boshqa xizmatlar ham amalga oshirishlari mumkin.

k) sinov laboratoriyalari (markazlari) faoliyati ustidan davlat nazorati va tekshiruvini amalga oshiradilar;

l) oʻlchovlarni bajarish uslublarining toʻgʻri qoʻllanilayotganligi ustidan nazoratni amalga oshiradilar;

m) agar standartlar, metrologiya qoidalari va texnik shartlar mahsulotlarning texnik darajasini va sifatini oshirishni taʼminlamasa yoki amaldagi qonun hujjatlariga zid boʻlsa, ularni bekor qiladilar yoki bekor qilish, amalda boʻlish muddatlarini cheklash toʻgʻrisida belgilangan tartibda takliflar kiritadilar;

n) standartlar va texnik shartlarni tasdiqlashda va davlat roʻyxatidan oʻtkazishda ularni ekspertiza qiladilar;

o) korxonalar, muassasalar, tashkilotlarning oʻlchov vositalarini ishlab chiqarish, tuzatish va tekshirish boʻyicha ishlarni bajarish uchun tayyorgarliklarini tekshiradilar, agarda ular tayyor boʻlsalar, ularga koʻrsatilgan ishlarni bajarish huquqini beruvchi roʻyxatga olinganlik guvohnomalarini topshiradilar;

p) vazirliklar, idoralar, uyushmalar, konsernlarning bosh tashkilotlarini va madaniy-maishiy maqsadlardagi mahsulotlarning muhim turlarini davlat sinovlarini oʻtkazish boʻyicha attestatsiya qilishni amalga oshiradilar va ushbu sinovlarni ularga biriktirib qoʻyilgan mahsulotlar boʻyicha oʻtkazish huquqini beruvchi roʻyxatga olinganlik guvohnomalarini beradilar;

r) sertifikatlashtirish qoidalari, standartlar va oʻlchov vositalarini joriy etish va ularga rioya qilishni nazorat etish jarayonida aniqlangan buzilishlarni bartaraf qilish chora-tadbirlarini koʻradilar.

4. Davlat inspektori quyidagi huquqlarga egadir:

mahsulotlarni loyihalash, ishlab chiqarishga tayyorlash, uni ishlab chiqarish, sotish (yetkazib berish) va ishlatish, saqlash, foydalanish jarayonida standartlarning majburiy talablari buzilganligi aniqlansa, ularni bartaraf etish haqida yozma koʻrsatma berish;

xoʻjalik faoliyati subyekti tekshiruvdan bosh tortgan taqdirda, mahsulotni sotishni man qilish;

Oʻzbekiston Respublikasi va Qoraqalpogʻiston Respublikasining standartlarni nazorat qilish boʻyicha bosh davlat inspektorlari, viloyatlar va shaharlarning standartlarni nazorat qilish boʻyicha bosh davlat inspektorlari, bulardan tashqari, quyidagi mutlaq huquqlarga egadirlar:

xoʻjalik faoliyati subyektlariga nisbatan standartning majburiy talablarini buzganliklari uchun sotilgan mahsulot qiymatining 100% miqdorida jarima solish haqida qaror qabul qilish;

standartlar, sertifikatlashtirish va metrologiya qoidalarining buzilishida aybdor boʻlgan xoʻjalik faoliyati subyektlarining mansabdor shaxslarini belgilangan tartibda maʼmuriy javobgarlikka tortish;

tekshirilgan mahsulot standartlarning majburiy talablariga muvofiq kelmagan va sertifikatlashtirishdan oʻtmagan mahsulotni sotishni (yetkazib berishni, sotishni), ishlatishni (foydalanishni) taqiqlash yoki toʻxtatish toʻgʻrisida yozma koʻrsatma berish;

normativ hujjatlari boʻlmagan mahsulotni ishlab chiqarishni taqiqlash;

standartning majburiy talablariga muvofiq kelmaydigan, davlat roʻyxatidan oʻtmagan va muvofiqlik sertifikatlariga ega boʻlmagan import qilingan mahsulotlarni sotishni taqiqlash;

davlat sinovidan, metrologik attestatsiyadan oʻtmagan, tekshirilmagan yoki tuzatilmagan oʻlchov vositalarini muomalaga chiqarishni va qoʻllashni toʻxtatish, korxonalar, muassasalar va tashkilotlarga bunday vositalarni muomaladan chiqarish zarur boʻlganda ularni muomaladan olish toʻgʻrisida bajarilishi shart boʻlgan koʻrsatmalar berish;

davlat standarti organlarida oʻlchov vositalarini ishlab chiqarish, tuzatish va tekshirish ishlarini bajarish huquqini beruvchi roʻyxatdan oʻtganlik guvohnomasini olmagan korxonalar, muassasalar va tashkilotlarda ishlarni toʻxtatish;

ayrim ishlar turlarini, agarda bu ishlarni bajargan korxonalar, muassasalar va tashkilotlar standartlar va metrologiya qoidalarining buzilishiga yoʻl qoʻygan boʻlsalar oʻlchov vositalarini tayyorlash va tekshirish huquqini beradigan roʻyxatga olish guvohnomalarini bekor qilish, roʻyxatga olish guvohnomalaridan chiqarish, shuningdek, sertifikatlashtirish boʻyicha qonunchilik normalarini buzganlik uchun muvofiqlik sertifikatlari va muvofiqlik belgilarini bekor qilish hamda amal qilishini toʻxtatish, sertifikatlashtirish boʻyicha organlarni akkreditatsiya qilish toʻgʻrisidagi guvohnomalarni bekor qilish, sinash laboratoriyalari markazlari faoliyatlarini toʻxtatish;

tekshirish qoidalarining buzilishiga yoʻl qoʻygan korxonalarda, muassasalarda va tashkilotlarda ishlatilayotgan oʻlchov vositalarini yalpisiga bir vaqtda tekshirishni tayinlash va tekshirishlar oʻrtasida qisqartirilgan oraliqlarni tayinlash, nuqsoni talab darajasidagi aniqlik bilan baholanmagan oʻlchash natijalaridan foydalanishni taqiqlash.

Davlat inspektorlarining mahsulot sotish (yetkazib berish, sotish) ni man qilgan koʻrsatmasini buzganligi uchun xoʻjalik faoliyatining subyektlari sotilgan mahsulotlarning 50% miqdorida jarima toʻlaydilar.

Xoʻjalik faoliyatining subyektlari tomonidan berilgan koʻrsatmalar yoki qarorlar bajarilmagan taqdirda davlat inspektorlari zarur materiallarni prokuratura yoki sud organlariga yuboradilar.

5. Standartlar va oʻlchov vositalari ustidan davlat nazorati organlari amaldagi qonunchilikka rioya qilinishini nazorat qilishga va ularga berilgan huquqlardan foydalanishda va yuklatilgan funksiyalarni amalga oshirishda umumdavlat manfaatlariga rioya qilishga, standartlarga va metrologiya qoidalariga rioya qilish va oʻlchovlarning yagonaligini taʼminlash bilan bogʻliq masalalarda idoraviy va tor mahalliychilikning har qanday koʻrinishlarining oldini olishga daʼvat etilgandir.

Davlat inspektorlari ularga yuklatilgan vazifalar bajarilmaganligi yoki zarur darajada bajarilmaganligi, davlat va tijorat sirini oshkor qilganliklari uchun qonunchilikda belgilangan tartibda javob beradilar.

6. Davlat inspektorlarining xatti-harakatlari ustidan yuqori turgan mansabdor shaxsga, agar qonunchilikda shikoyat qilishning oʻzgacha tartibi belgilanmagan boʻlsa, 10 kun muddatda shikoyat qilinishi mumkin.

Shikoyat qilish shikoyat qilingan qarorning bajarilishini toʻxtatmaydi.

Davlat inspektorlari ustidan berilgan shikoyatlarni koʻrib chiqish kechiktirilmasdan, biroq shikoyat tushgan kundan boshlab 15 kun muddatdan kechikmay, qoʻshimcha ravishda oʻrganishni va tekshirishni talab etuvchi shikoyatlarni koʻrib chiqish esa bir oygacha muddatda amalga oshiriladi.

7. Korxonalar, muassasalar va tashkilotlarning rahbarlari davlat inspektorlariga ularga yuklatilgan vazifalar bajarilishi uchun zarur shart-sharoitlar (belgilangan tartibda xizmat xonalari, aloqa vositalari, transport va boshqalar bilan taʼminlash) yaratib berishga majburdirlar.

Standartlar va oʻlchov vositalari ustidan davlat nazorati organlari faoliyatiga chet tashkilotlarning aralashuvi, standartlar va oʻlchov vositalari ustidan davlat nazoratini amalga oshiruvchi mansabdor shaxslarga ularning qonuniy faoliyatiga toʻsqinlik qilish maqsadida qanday shaklda boʻlmasin taʼsir koʻrsatish man etiladi va Oʻzbekiston Respublikasi qonun hujjatlariga muvofiq javobgarlikni keltirib chiqaradi.

8. Standart va oʻlchov vositalari ustidan nazorat organlari oʻz ishini boshqa davlat organlari va jamoat tashkilotlari (kasaba uyushmalari) matlubotchilar jamiyati va boshqalar bilan mustahkam hamkorlikda olib boradilar.

9. Standartlarning majburiy talablari buzilganligi uchun jarima summasining va davlat inspektorlarining mahsulotni sotishni (yetkazib berishni, sotishni) taqiqlash yoki toʻxtatish koʻrsatmalari buzilganligi uchun jarima summasining 50 foizi — respublika davlat budjetiga, 30 foizi — mahalliy budjetga, 20 foizi — standartlar va oʻlchov vositalari ustidan davlat nazorati hududiy organlariga yuboriladi.