|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
OʻZBEKISTON RESPUBLIKASI OLIY MAJLISINING SENATI (YuQORI PALATASI) MAʼMURIY BINOSINI QURISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Oʻzbekiston Respublikasi Oliy Majlisining Senati (yuqori palatasi) faoliyati uchun shart-sharoitlar yaratish maqsadida Vazirlar Mahkamasi qaror qiladi:
1. Toshkent shahar, Mustaqillik maydoni, 6-uyda joylashgan binoning texnik holatini oʻrganish boʻyicha maxsus komissiyaning:
mazkur binoni kelgusida unga Oʻzbekiston Respublikasi Oliy Majlisining Senati (yuqori palatasi)ni joylashtirish uchun rekonstruksiya qilish mumkin emasligi toʻgʻrisidagi;
binoni, “Bahor” konsert zalini va oshxona zalini, keyinchalik ularni rekonstruksiya qilib saqlab qolgan holda, buzish zarurligi toʻgʻrisidagi xulosasiga rozilik berilsin.
2. Toshkent shahar hokimligi Mustaqillik maydoni, 6-uydagi buzilgan bino oʻrnida Oʻzbekiston Respublikasi Oliy Majlisining Senati (yuqori palatasi) maʼmuriy binosi qurilishini taʼminlasin.
Quyidagilar:
Toshkent shahar hokimligining Kapital qurilish bosh boshqarmasi – buyurtmachi etib;
“Toshshaharloyiha” ochiq aksiyadorlik jamiyati loyihalash instituti – bosh loyihalovchi etib;
“12-trest” ochiq aksiyadorlik jamiyati – bosh pudratchi tashkilot etib belgilansin.
3. Oʻzbekiston Respublikasi Iqtisodiyot vazirligi va Moliya vazirligi Oʻzbekiston Respublikasi Oliy Majlisining Senati maʼmuriy binosi qurilishi uchun 2003-2004-yillarda zarur mablagʻlar ajratilishini nazarda tutsinlar.
4. Oʻzbekiston Respublikasi Bosh vazirining birinchi oʻrinbosari K.N. Toʻlaganov Oʻzbekiston Respublikasi Oliy Majlisining Senati maʼmuriy binosini loyihalash, qurishni jadallashtirish va uni oʻz vaqtida foydalanishga topshirish ustidan tezkor nazoratni amalga oshirsin.
5. Toshkent shahar hokimligi:
bosh loyihalovchi va bosh pudratchi bilan birgalikda loyihalash va qurish uchun subpudratchi tashkilotlarni, asbob-uskunalar va qurilish materiallari yetkazib beruvchilarni, shu jumladan xorijiy sheriklarni tanlash boʻyicha tanlov savdolari (tendyerlar) sifatli oʻtkazilishini, savdolar natijalari “Davarxitektqurilish” qoʻmitasi tomonidan tasdiqlanishini taʼminlasin;
Mustaqillik maydoni, 6-uydagi binoni boʻshatishni va undagi barcha tashkilotlarni boshqa binolarga qayta joylashtirishni taʼminlasin;
Mustaqillik maydonidagi Oʻzbekiston Respublikasi Oliy Majlisining Senati maʼmuriy binosi qurilishini 2004-yilning III choragida tugallasin.
6. Oʻzbekiston Respublikasi Davlat arxitektura va qurilish qoʻmitasi loyihalash ishlarining ekspertizadan oʻtkazish bilan birgalikda olib borilishini va mazkur obyektda qurilish sifati ustidan nazoratni taʼminlasin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2003-yil 19-mart,
148-son
