|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
TOShKENT ShAHRIDA “DEU-TOShKENT” BIZNES- MARKAZI QURILIShI LOYIHASINI KENGAYTIRISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Oʻzbekiston Respublikasi Vazirlar Mahkamasining “Toshkent shahrida Biznes markaz qurish va undan foydalanish boʻyicha “DEU-Toshkent” Oʻzbekiston-Koreya qoʻshma korxonasini tashkil etish toʻgʻrisida” 1997-yil 27-iyundagi 329-son qarorini bajarish yuzasidan loyihaning kengaytirilishi munosabati bilan Vazirlar Mahkamasi qaror qiladi:
1. “DEU-Toshkent” qoʻshma korxonasi muassislarining ustav jamgʻarmasini 58,065 mln. AQSh dollarigacha koʻpaytirish toʻgʻrisidagi bitimi maʼqullansin, qatnashchilar ulushlari quyidagicha taqsimlanadi:
Toshkent shahar hokimligining Investitsiyalar bosh boshqarmasi ulushi 40 foiz — 23,226 mln. AQSh dollari qiymati 12,834 mln. AQSh dollari boʻlgan yer maydonidan foydalanish huquqi, qiymati 8,536 mln. AQSh dollari boʻlgan umumiy foydalanishdagi hisoblash markazining qurilishi tugallanmagan binosi va qiymati 1,856 mln. AQSh dollari boʻlgan Sh. Rashidov koʻchasidagi 6-uyda joylashgan uch qavatli bino;
“DEU” korporatsiyasi ulushi 60 foiz — 34,839 mln AQSh dollari (pul badali);
2. Toshkent moliya-qurilish korporatsiyasi tomonidan umumiy foydalanishdagi hisoblash markazining qurilishi tugallanmagan binosi Toshkent shahar hokimligi balansiga oʻtkazilishiga rozilik berilsin.
3. Quyidagilar:
ustav jamgʻarmasini shakllantirish uchun “DEU” korporatsiyasi tomonidan toʻgʻridan toʻgʻri 4,936 mln AQSh dollari toʻlanganligi, Oʻzbekiston tomonidan mulkiy badal sifatida 23,226 mln AQSh dollari miqdorida ulush qoʻshilganligi;
loyiha qiymati 286,339 mln AQSh dollarini tashkil etishi;
Biznes-markaz qurilishini mablagʻ bilan taʼminlash qoʻshma korxona muassislari mablagʻlari va “DEU” korporatsiyasi kafolati ostida “DEU-Toshkent” qoʻshma korxonasi tomonidan jalb qilinadigan 152,279 mln AQSh dollari miqdoridagi xorijiy banklarning toʻgʻridan toʻgʻri kreditlari, shuningdek ijara shartlarida Biznes-markaz maydonlaridan kelajakda foydalanuvchilar bilan fyuchers bitishuvlar hisobiga amalga oshirilishi;
Biznes-markaz qurilishi 2001-yilning birinchi yarim yilligida toʻliq tugallangan holda bosqichma-bosqich foydalanishga topshirilishi maʼlumot uchun qabul qilinsin.
4. Oʻzbekiston Respublikasi Moliya vaziri “DEU” korporatsisiga 60,912 mln. AQSh dollariga, uni qoʻshma korxonalar tomonidan jalb qilinadigan kredit resurslari summasidan Oʻzbekistonlik muassis ulushining 40 foiziga teng summaga Oʻzbekiston Respublikasi Hukumati kafolatini berishga vakil qilinsin.
5. Oʻzbekiston Respublikasi Makroiqtisodiyot va statistika vazirligi Moliya vazirligi bilan birgalikda 1999-yil va keyingi yillar investitsiya dasturini shakllantirishda tashqi muhandislik kommunikatsilarini olib kelishni taʼminlash uchun Toshkent shahar hokimligiga zarur mablagʻlar ajratishni nazarda tutsin.
6. Toshkent shahar hokimligi, “DEU-Toshkent” Biznes-markazi texnik-iqtisodiy asoslanishini manfaatdor vazirliklar va idoralar bilan kelishgan holda Oʻzbekiston Respublikasi Vazirlar Mahkamasiga ikki hafta muddatda tasdiqlash uchun kiritsin.
7. “Oʻzbekiston temir yoʻllari” davlat aksiyadorlik kompaniyasi “DEU-Toshkent” qoʻshma korxonasi uchun asbob-uskunalar konteynyerlari oʻz vaqtida va uzluksiz qabul qilinishini, saqlab turilishini va joʻnatilishini taʼminlasin.
8. Oʻzbekiston Respublikasi Vazirlar Mahkamasining “Toshkent shahrida Biznes-markaz qurish va undan foydalanish boʻyicha “DEU-Toshkent” Oʻzbekiston-Koreya qoʻshma korxonasini tashkil etish toʻgʻrisida” 1997-yil 27-iyundagi 329-son qarorining 2, 3, 5-bandlari va Oʻzbekiston Respublikasi Vazirlar Mahkamasining 1994-yil 6-iyuldagi 254-f-son farmoyishi oʻz kuchini yoʻqotgan deb hisoblansin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. Joʻrabekov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1998-yil 26-fevral,
81-son
