Hujjat 22.04.2025 00 sanasi holatiga
Amaldagi versiyaga o‘tish

Oʻzbekiston Respublikasi Prezidentining

Davlat organlari va tashkilotlarining korrupsiyaga qarshi ichki nazorat boʻlinmalari mustaqilligini taʼminlash hamda faoliyati samaradorligini oshirish chora-tadbirlari toʻgʻrisida

2025-yil 5-mart kuni Korrupsiyaga qarshi kurashish boʻyicha milliy kengashning kengaytirilgan yigʻilishida davlat organlari va tashkilotlarining korrupsiyaga qarshi ichki nazorat boʻlinmalari ishini yangicha tizim asosida tashkil etish yuzasidan belgilangan asosiy vazifalarni samarali amalga oshirish, shuningdek, davlat organlari va tashkilotlarida “halollik vaksinasi” tamoyili asosida korrupsiyaga murosasiz munosabatni shakllantirish maqsadida qaror qilaman:

I. Ustuvor vazifalar

1. Davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan xoʻjalik jamiyatlaridagi (keyingi oʻrinlarda — davlat organlari va tashkilotlari) korrupsiyaga qarshi ichki nazorat boʻlinmalarining ustuvor vazifalari etib quyidagilar belgilansin:

(a) korrupsiya holatlarini barvaqt aniqlash va ularning oldini olish, ularga imkon beruvchi sabab va shart-sharoitlarni bartaraf etish;

(b) davlat xizmatlarini koʻrsatishda korrupsiyaviy omillarni bartaraf etish, maishiy korrupsiyaning oldini olish, shu jumladan, raqamlashtirish, byurokratiyani qisqartirish boʻyicha takliflar ishlab chiqish;

(v) idoraviy normativ-huquqiy hujjatlarni korrupsiyaga qarshi ekspertizadan oʻtkazish va yakunlari boʻyicha aniqlangan korrupsiyaviy normalarni bekor qilish boʻyicha taklif kiritish;

(g) davlat xaridlarini amalga oshirishda manfaatlar toʻqnashuviga yoʻl qoʻymaslik choralarini koʻrish, davlat xaridlari boʻyicha preventiv oʻrganishlarni amalga oshirish;

(d) korrupsiyaga qarshi kurashish boʻyicha amalga oshirilgan ishlar yuzasidan muntazam ravishda Korrupsiyaga qarshi kurashish agentligiga (keyingi oʻrinlarda — Agentlik) elektron hisobot taqdim etib borish;

(e) tegishli soha va tarmoqda korrupsiyaviy xavf-xatarlar roʻyxatini shakllantirish, ularni bartaraf etishga qaratilgan chora-tadbirlar ishlab chiqib, tasdiqlanishini taʼminlash;

(j) davlat organlari va tashkilotlarida korrupsiyaga qarshi ichki nazoratni amalga oshirish va korrupsiyaviy xavf-xatarlarni aniqlash imkonini beruvchi situatsion markazlar faoliyatini yoʻlga qoʻyish boʻyicha takliflar kiritish;

(z) mehnat jamoasida korrupsiyaga nisbatan murosasiz munosabatni shakllantirish, manfaatlar toʻqnashuviga yoʻl qoʻymaslik va odob-axloq qoidalariga rioya qilish boʻyicha targʻibot va tashviqot ishlarini olib borish;

(i) korrupsiyaga qarshi kurashish boʻyicha ijobiy tajribalarni ommalashtirish va joriy etish yuzasidan takliflar kiritish.

II. Korrupsiyaga qarshi ichki nazorat tizimini takomillashtirish boʻyicha chora-tadbirlar

2. Belgilansinki:

(a) korrupsiyaga qarshi ichki nazorat boʻlinmalari oʻz faoliyatida bevosita tashkilotning birinchi rahbariga, ustav fondida (ustav kapitalida) davlat ulushi 50 foiz va undan ortiq boʻlgan xoʻjalik jamiyatlarida esa kuzatuv kengashiga (kuzatuv kengashi mavjud boʻlmagan hollarda korxona rahbariga) boʻysunadi va uning oldida hisobdor boʻladi;

(b) davlat organlari va tashkilotlari hududiy boʻlinmalari va tarkibiy tashkilotlarining korrupsiyaga qarshi ichki nazorat boʻlinmalari rahbarlari va xodimlari respublika darajasidagi davlat organlari va tashkilotlarining birinchi rahbarlari tomonidan tayinlanadi hamda faoliyati ular tomonidan muvofiqlashtiriladi;

(v) korrupsiyaga qarshi ichki nazorat boʻlinmalari xodimlarini moddiy ragʻbatlantirish toʻgʻrisidagi Agentlikning taqdimnomalari ular faoliyat olib borayotgan tashkilotlar tomonidan koʻrib chiqilishi majburiy hisoblanadi.

3. Davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan xoʻjalik jamiyatlarida korrupsiyaga qarshi ichki nazorat boʻlinmalarini tashkil etishning minimal mezonlari 1-ilovaga muvofiq tasdiqlansin.

Agentlik Hisob palatasi, Davlat aktivlarini boshqarish agentligi hamda boshqa masʼul vazirlik va idoralar bilan birgalikda har yili davlat organlari va tashkilotlarida mazkur minimal mezonlarga asosan korrupsiyaga qarshi ichki nazorat boʻlinmalari tashkil etilishini monitoring qilib, natijalari boʻyicha Korrupsiyaga qarshi kurashish boʻyicha milliy kengashga axborot kiritib borsin.

III. Korrupsiyaga qarshi ichki nazorat tizimi samaradorligini oshirish boʻyicha huquqiy eksperiment

4. 2027-yil 1-yanvargacha huquqiy eksperiment tariqasida quyidagilarni nazarda tutuvchi tizim joriy etilsin:

(a) Sogʻliqni saqlash vazirligi, Qurilish va uy-joy kommunal xoʻjaligi vazirligi, Suv xoʻjaligi vazirligi, “Oʻzbekneftgaz” AJ hamda “Oʻzsuvtaʼminot” AJning (keyingi oʻrinlarda — eksperiment oʻtkaziladigan tashkilotlar) korrupsiyaga qarshi ichki nazorat boʻlinmalari rahbari lavozimiga Agentlik xodimlari tayinlanadi;

(b) eksperiment oʻtkaziladigan tashkilotlarning korrupsiyaga qarshi ichki nazorat boʻlinmalari rahbarlari bevosita Agentlikka boʻysunadi;

(v) eksperiment oʻtkaziladigan tashkilotlarning korrupsiyaga qarshi ichki nazorat boʻlinmalari faoliyatini tashkil etish, muvofiqlashtirish va monitoring qilish Agentlik hamda eksperiment oʻtkaziladigan tashkilotlar tomonidan birgalikda amalga oshiriladi.

5. Huquqiy eksperiment doirasida belgilangan vazifalar ijrosini samarali taʼminlash maqsadida:

(a) eksperiment oʻtkaziladigan tashkilotlarning korrupsiyaga qarshi ichki nazorat boʻlinmalari rahbarlari shtat birliklari huquqiy eksperiment davrida Agentlikka oʻtkaziladi;

(b) mazkur shtat birliklari uchun Agentlikning boʻlim boshligʻiga belgilangan mehnatga haq toʻlash, moddiy ragʻbatlantirish va ijtimoiy himoya qilish shartlari qoʻllanadi. Bunda ushbu lavozim uchun mehnatga haq toʻlash xarajatlari, shuningdek, Agentlikda va eksperiment oʻtkaziladigan tashkilotlarda ushbu lavozim uchun toʻlanadigan ish haqi oʻrtasidagi tafovut:

(i) Sogʻliqni saqlash vazirligi, Qurilish va uy-joy kommunal xoʻjaligi vazirligi va Suv xoʻjaligi vazirliklarida faoliyat yurituvchi Agentlik xodimlari uchun — Davlat budjeti mablagʻlari hisobidan;

(ii) “Oʻzbekneftgaz” AJ va “Oʻzsuvtaʼminot” AJda faoliyat yurituvchi Agentlik xodimlari uchun — Agentlikning budjetdan tashqari shaxsiy gʻazna hisobvaragʻiga aksiyadorlik jamiyatlari tomonidan oʻtkazib beriladigan mablagʻlar hisobidan qoplanadi.

6. Agentlik (A. Burxanov) eksperiment oʻtkaziladigan tashkilotlar bilan birgalikda:

(a) bir oy muddatda eksperiment oʻtkaziladigan tashkilotlarning korrupsiyaga qarshi ichki nazorat boʻlinmasi xodimlari faoliyatining huquqiy eksperiment davomidagi eng muhim samaradorlik koʻrsatkichlarini (KPI) belgilasin;

(b) huquqiy eksperimentning amalga oshirilishi haqida har yarim yilda Korrupsiyaga qarshi kurashish boʻyicha milliy kengashga axborot kiritib borsin;

(v) ikki oy muddatda huquqiy eksperimentni amalga oshirish jarayonini tartibga solish boʻyicha qoʻshma qaror qabul qilsin;

(g) huquqiy eksperimentning natijalarini tahlil qilish asosida 2027-yil 1-yanvarga qadar ushbu tizimni boshqa davlat organlari va tashkilotlariga ham tatbiq etish yuzasidan asoslantirilgan takliflarni kiritsin.

IV. Korrupsiyaga qarshi ichki nazorat boʻlinmalari xodimlari malakasini oshirish va ular faoliyatining samaradorligini baholash

7. Agentlik davlat organlari va tashkilotlarining korrupsiyaga qarshi ichki nazorat boʻlinmalari faoliyatini muvofiqlashtirish va uslubiy taʼminlash, ularning xodimlarini stajirovka va attestatsiyadan oʻtkazish hamda malakasini oshirish boʻyicha maxsus vakolatli organ etib belgilansin.

8. Davlat organlari va tashkilotlari korrupsiyaga qarshi ichki nazorat boʻlinmalarining ilk marta lavozimga tayinlangan masʼul xodimlari quyidagi tartibda ikki haftalik stajirovkadan oʻtishi belgilansin:

(a) davlat organlari va tashkilotlarining markaziy apparatidagi korrupsiyaga qarshi ichki nazorat boʻlinmalarining rahbarlari va xodimlari — Agentlikda;

(b) hududiy boʻlinma va tarkibiy tashkilotlarning korrupsiyaga qarshi kurashishga masʼul xodimlari — davlat organlari va tashkilotlarining markaziy apparatidagi korrupsiyaga qarshi ichki nazorat boʻlinmalarida.

(a) davlat organlari va tashkilotlari bilan birgalikda ularning korrupsiyaga qarshi ichki nazorat boʻlinmalari rahbarlari va xodimlari uchun har yili korrupsiyaga qarshi kurashish va komplayens nazorat boʻyicha qisqa muddatli malaka oshirish kurslarini hamda ularning qonunchilikda belgilangan tartibda har uch yilda attestatsiyadan oʻtkazilishini tashkil etib borsin;

LexUZ sharhi

Qarang: Oʻzbekiston Respublikasi Prezidentining “Davlat organlari va tashkilotlarining korrupsiyaga qarshi ichki nazorat boʻlinmalari mustaqilligini taʼminlash hamda faoliyati samaradorligini oshirish chora-tadbirlari toʻgʻrisida”gi 2025-yil 21-apreldagi PQ-147-son qarorining 9-bandi, “Aholi va davlat xizmatchilarining korrupsiyaga qarshi kurashish sohasidagi bilimlarini uzluksiz oshirish tizimini joriy qilish chora-tadbirlari toʻgʻrisida”gi 2024-yil 21-iyundagi PQ-228-son qarori, “Korrupsiyaga qarshi kurashish virtual akademiyasi” elektron platformasida oʻqitishni tashkil etish tartibi toʻgʻrisidagi nizom (roʻyxat raqami 3565, 2024-yil 30-oktabr).

(b) uch oy muddatda quyidagilarni nazarda tutuvchi Hukumat qarori loyihasini ishlab chiqsin va belgilangan tartibda Vazirlar Mahkamasiga kiritsin:

LexUZ sharhi

Qarang: Oʻzbekiston Respublikasi Prezidentining 2023-yil 20-yanvardagi PQ-10-son qarori bilan tasdiqlangan Ichki ishlar organlari xodimlarining kasbiy madaniyat va xizmat intizomi kodeksi, 2021-yil 2-apreldagi PQ-5050-son qarori bilan tasdiqlangan Ichki ishlar organlarida maʼnaviy-maʼrifiy ishlarni tashkil etish Konsepsiyasi.

(i) Davlat organlari va tashkilotlarining korrupsiyaga qarshi ichki nazorat boʻlinmalari toʻgʻrisidagi namunaviy nizomni tasdiqlash;

(ii) korrupsiyaga qarshi ichki nazorat boʻlinmalari rahbarlari va xodimlarini lavozimga tayinlash va ozod etishni Agentlik bilan kelishish tartibini belgilash;

(iii) korrupsiyaga qarshi ichki nazorat boʻlinmalari xodimlari faoliyatining eng muhim samaradorlik koʻrsatkichlarini (KPI) tasdiqlash va baholash tartibini belgilash;

(iv) korrupsiyaga qarshi ichki nazorat boʻlinmalari xodimlarining malakasini oshirish, ularni stajirovka va attestatsiyadan oʻtkazish tartibini belgilash;

(v) uch oy muddatda korrupsiyaga qarshi ichki nazorat boʻlinmalari xodimlarining kasbiy standartlari ishlab chiqilishi va belgilangan tartibda tasdiqlanishini taʼminlasin;

(g) 2025-yil 1-iyulga qadar “E-anticor.uz” elektron platformasida korrupsiyaga qarshi ichki nazorat boʻlinmalari rahbarlari va xodimlarining elektron reyestrini yuritish, korrupsiyaga qarshi kurashish boʻyicha qilingan ishlar haqidagi hisobotni elektron shaklda taqdim etish, anonim soʻrovnomalar oʻtkazib, natijalarini jamoatchilikka eʼlon qilish imkonini beruvchi elektron modulni ishga tushirsin;

(d) korrupsiyaga qarshi ichki nazorat boʻlinmalari xodimlari faoliyatini eng muhim samaradorlik koʻrsatkichlari (KPI) asosida baholash natijalari boʻyicha har yarim yilda Korrupsiyaga qarshi kurashish boʻyicha milliy kengashga axborot kiritib borsin.

V. Moliyaviy resurslar

10. “E-anticor.uz” elektron platformasini funksional kengaytirishga qaratilgan modulni yaratish bilan bogʻliq xarajatlar Agentlikning budjetdan tashqari mablagʻlari, xalqaro va milliy donorlar tomonidan ajratilgan mablagʻlar va qonunchilikda taqiqlanmagan boshqa manbalar hisobidan moliyalashtirilishi belgilansin.

LexUZ sharhi

Qarang: “Elektron hukumat toʻgʻrisida”gi Qonunning 30-moddasi, Oʻzbekiston Respublikasi Prezidentining 2019-yil 21-maydagi PQ-4328-son qarori bilan tasdiqlangan “Elektron hukumat” tizimi va raqamli iqtisodiyotni rivojlantirish doirasida idoralararo va idoraviy axborot tizimlari, maʼlumotlar bazalari, dasturiy mahsulotlar yaratish va joriy etish boʻyicha loyihalar hamda axborot-kommunikatsiya texnologiyalari sohasidagi boshqa loyihalarni ishlab chiqish va amalga oshirish tartibi toʻgʻrisidagi nizom.

VI. Qaror ijrosini tashkil etish, taʼminlash va nazorat

11. Agentlik Oʻzbekiston Milliy axborot agentligi, Oʻzbekiston Milliy teleradiokompaniyasi, Axborot va ommaviy kommunikatsiyalar agentligi bilan birgalikda ushbu qarorning maqsad, vazifalari, undan kutilayotgan natijalarni ommaviy axborot vositalarida va Internet tarmogʻida keng yoritish ishlarini tashkil qilsin.

12. Oʻzbekiston Respublikasi Prezidentining ayrim qarorlariga 2-ilovaga muvofiq oʻzgartirish va qoʻshimchalar kiritilsin.

13. Agentlik (A. Burxanov) ikki oy muddatda manfaatdor vazirlik va idoralar bilan birgalikda qonunchilik hujjatlariga mazkur qarordan kelib chiqadigan oʻzgartirish hamda qoʻshimchalar toʻgʻrisida Vazirlar Mahkamasiga takliflar kiritsin.

14. Mazkur qarorda belgilangan vazifalarning oʻz vaqtida va toʻliq bajarilishini taʼminlash, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov hamda Oʻzbekiston Respublikasi Prezidentining maslahatchisi D.B. Kadirov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

2025-yil 21-aprel,

Oʻzbekiston Respublikasi Prezidentining 2025-yil 21-apreldagi PQ-147-son qaroriga
1-ILOVA

Davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan xoʻjalik jamiyatlarida korrupsiyaga qarshi ichki nazorat boʻlinmalarini tashkil etishning

MINIMAL MEZONLARI *

T/r	Mavjud shtat birliklari va tizim tashkilotlari soni		Korrupsiyaga qarshi ichki nazorat boʻlinmasi minimal shtat birligi soni*
	Markaziy apparatda shtat birligi soni	Tizimda hududiy (Qoraqalpogʻiston Respublikasi, viloyatlar, Toshkent shahar, tuman (shahar) boʻlinmalar va tarkibiy tashkilotlar (qoʻmita, agentlik, inspeksiya, markaz, muassasalar va respublika darajasidagi boshqa tashkilotlar) mavjudligi
1.	150 gacha	Mavjud emas	1 ta xodim
		Mavjud	Markaziy apparatda 2 ta xodimdan iborat boʻlim va har bir hududiy boʻlinma va tarkibiy tashkilotlarda* 1 tadan xodim
2.	150 — 400 gacha	Mavjud emas	Markaziy apparatda 2 ta xodimdan iborat boʻlim
		Mavjud	Markaziy apparatda 3 ta xodimdan iborat boʻlim va har bir hududiy boʻlinma va tarkibiy tashkilotlarda* 1 tadan xodim
3.	400 va undan ortiq	Mavjud emas	Markaziy apparatda 3 ta xodimdan iborat boʻlim
		Mavjud	Markaziy apparatda 4 ta xodimdan iborat boʻlim va har bir hududiy boʻlinma va tarkibiy tashkilotlarda* 1 tadan xodim****

* Davlat organlari va tashkilotlari xodimlarining belgilangan umumiy soni va ajratilgan mablagʻlar doirasida oʻzlarining korrupsiyaga qarshi ichki nazorat boʻlinmalari uchun ushbu minimal mezonlarda nazarda tutilganidan koʻproq shtat birliklarini belgilashi mumkin. Bunda belgilangan masʼul xodimlar shtat birliklari soni 7 va undan ortiq boʻlgan hollarda boshqarma, 2 va undan ortiq boʻlgan hollarda boʻlim tashkil etiladi.

** Agar davlat organlari va tashkilotlarining hududiy (Qoraqalpogʻiston Respublikasi, viloyatlar, Toshkent shahri, tuman (shahar) boʻlinmasida umumiy shtatlar soni 100 ta va undan kam boʻlsa, ushbu hududiy boʻlinmaning korrupsiyaga qarshi kurashish faoliyati davlat organi va tashkilotining markaziy apparatidagi korrupsiyaga qarshi ichki nazorat boʻlinmasi tomonidan amalga oshiriladi.

*** Agar davlat organlari va tashkilotlarining tizimidagi tarkibiy tashkilotning shtatlar soni 100 ta va undan kam boʻlsa hamda tarkibiy tashkilotning oʻzida hududiy yoki tarkibiy tashkilotlar mavjud boʻlmasa, ushbu tarkibiy tashkilotning korrupsiyaga qarshi kurashish faoliyati davlat organi va tashkilotining markaziy apparatidagi korrupsiyaga qarshi ichki nazorat boʻlinmasi tomonidan amalga oshiriladi.

**** Agar tizimdagi tarkibiy tashkilotning umumiy shtatlari soni (hududiy boʻlinma va tarkibiy tashkilotlarining shtat birligi bilan birgalikda) 400 va undan ortiq boʻlsa, yuqoridagi jadvalga asosan minimal mezonlar tatbiq etiladi.

Oʻzbekiston Respublikasi Prezidentining 2025-yil 21-apreldagi PQ-147-son qaroriga
2-ILOVA

Oʻzbekiston Respublikasi Prezidentining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2018-yil 21-noyabrdagi PQ-4024-son qarori bilan tasdiqlangan Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasi toʻgʻrisidagi nizomning 10-bandi 4-kichik bandi quyidagi mazmundagi oltinchi xatboshi bilan toʻldirilsin:

“davlat organlari va tashkilotlarida ochiqlikni taʼminlash boʻyicha amalga oshirilayotgan ishlarning samaradorligi va natijadorligini aniqlash maqsadida davlat organlari va tashkilotlarining rasmiy veb-saytlarida axborotlarni joylashtirish va elektron davlat xizmatlari koʻrsatish holatini baholaydi”.

2. Oʻzbekiston Respublikasi Prezidentining 2019-yil 10-yanvardagi “Oʻzbekiston Respublikasi Iqtisodiyot va sanoat vazirligi faoliyatini tashkil etish toʻgʻrisida”gi PQ-4105-son qarori 11-bandida:

uchinchi xatboshi chiqarib tashlansin;

toʻrtinchi xatboshi uchinchi xatboshi deb hisoblansin.

3. Oʻzbekiston Respublikasi Prezidentining 2020-yil 26-martdagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi hamda uning tizim tashkilotlari faoliyatini tashkil etish toʻgʻrisida”gi PQ-4653-son qarorida:

a) 2-bandning toʻrtinchi xatboshisidan “Maʼmuriy binolardan foydalanish boshqarmasi” soʻzlari chiqarib tashlansin;

8-bandning oʻn birinchi xatboshisi chiqarib tashlansin;

31-bandning ikkinchi xatboshisidan “hamda Maʼmuriy binolardan foydalanish boshqarmasi boshligʻi” soʻzlari chiqarib tashlansin;

38-bandning ikkinchi xatboshisidan “Maʼmuriy binolardan foydalanish boshqarmasi” soʻzlari chiqarib tashlansin;

v) 10-ilovaning 9-bandi oʻz kuchini yoʻqotgan deb hisoblansin.

4. Oʻzbekiston Respublikasi Prezidentining 2021-yil 6-iyuldagi “Korrupsiyaga qarshi kurashish faoliyatini samarali tashkil etishga doir qoʻshimcha chora-tadbirlar toʻgʻrisida”gi PQ-5177-son qarorida:

a) 1-band quyidagi tahrirda bayon etilsin:

“1. Davlat hokimiyati va boshqaruvi organlari, davlat muassasalari, davlat ulushi 50 foiz va undan ortiq boʻlgan tashkilotlarda (keyingi oʻrinlarda — davlat organlari va tashkilotlari) ishga qabul qilishni ochiq tanlov asosida amalga oshirish hamda tanlov doirasida oʻtkaziladigan sinov tadbirlarini Internet tarmogʻi orqali real vaqt rejimida kuzatishni nazarda tutuvchi tartib joriy etilsin”;

b) 3-band quyidagi tahrirda bayon etilsin:

“3. Barcha davlat organlari va tashkilotlari, shu jumladan, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarida hamda ustav fondida (ustav kapitalida) davlat ulushi 50 foiz va undan ortiq boʻlgan xoʻjalik jamiyatlarida mavjud shtat birliklari doirasida korrupsiyaga qarshi ichki nazorat boʻlinmalari faoliyati yoʻlga qoʻyiladi”.

5. Oʻzbekiston Respublikasi Prezidentining 2022-yil 25-iyuldagi “Investitsiyaviy va infratuzilmaviy loyihalarning loyihaoldi, davlat xaridiga doir tender boʻyicha xarid qilish hujjatlari va texnik topshiriqlar hamda shartnomalarni ekspertizadan oʻtkazish tartibini yanada takomillashtirish chora-tadbirlari toʻgʻrisida”gi PQ-332-son qarori 2-bandi quyidagi mazmundagi yettinchi xatboshi bilan toʻldirilsin:

“Markazga kompleks ekspertizadan oʻtkazish uchun kiritilgan chet elda ishlab chiqarilgan axborot qurilma, uskunalar, barcha turdagi axborot tizimlari, mobil ilovalar va boshqa dasturiy taʼminotlarni xarid qilish boʻyicha loyihalar “Raqamli Oʻzbekiston — 2030” strategiyasini amalga oshirish boʻyicha muvofiqlashtirish komissiyasining ijobiy qarori taqdim etilganidan keyin koʻrib chiqiladi”.

6. Oʻzbekiston Respublikasi Prezidentining 2022-yil 19-avgustdagi “Faol tadbirkor” koʻkrak nishonini taʼsis etish toʻgʻrisida”gi PQ-356-son qarorining 5-bandi quyidagi tahrirda bayon etilsin:

“5. “Faol tadbirkor” koʻkrak nishonini berish, uni tayyorlash hamda “Yilning ilgʻor tadbirkorlari” kitobini chop etish bilan bogʻliq sarf-xarajatlar Savdo-sanoat palatasining oʻz mablagʻlari hisobidan amalga oshiriladi”.

(Qonunchilik maʼlumotlari milliy bazasi, 22.04.2025-y., 07/25/147/0367-son)