|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
YAPONIYA HUKUMATINING MADANIYAT SOHASIDAGI BEGʻARAZ YORDAMIDAN SAMARALI FOYDALANISH TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Oʻzbekiston Respublikasining Xiva, Buxoro, Shahrisabz, Samarqand va boshqa shaharlarida joylashgan madaniy va tarixiy merosni saqlashga 141,0 mln Yaponiya yeni miqdoridagi asbob-uskunalarni yetkazib berish uchun Yaponiya Hukumatining begʻaraz yordamidan samarali foydalanishni taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Bosh vazirining oʻrinbosari H.S. Karomatov Oʻzbekiston Respublikasi Hukumati nomidan Almashuv notalarini imzolashga vakil qilinsin.
2. Quyidagilarga:
Oʻzbekiston Respublikasi Madaniyat ishlari vazirligiga begʻaraz yordamni olish uchun zarur tadbirlarni Yaponiya tomoni bilan kelishilgan muddatlarda rasmiylashtirish;
Oʻzbekiston Respublikasi Tashqi iqtisodiy faoliyat milliy bankiga koʻrsatib oʻtilgan begʻaraz yordamga hisob-kitob xizmati koʻrsatish yuklansin.
3. Begʻaraz yordam doirasida Oʻzbekiston Respublikasiga kelayotgan asbob-uskunalar bojxona toʻlovlaridan ozod qilinsin, bojxona rasmiylashtiruvi uchun undiriladigan yigʻimlar bundan mustasno.
4. Oʻzbekiston Respublikasi Tashqi ishlar vazirligi belgilangan tartibda Madaniyat ishlari vazirligining talabnomalari boʻyicha loyihani amalga oshirish uchun jalb etilayotgan xorijiy mutaxassislarga koʻp martalik vizalar konsullik yigʻimlari undirilmasdan berilishini taʼminlasin.
5. Oʻzbekiston Respublikasi Ichki ishlar vazirligi Madaniyat ishlari vazirligining talabnomalariga koʻra loyihani amalga oshirishda qatnashayotgan xorijiy mutaxassislarning viza muddatlarini uzaytirish, ularni turar joylarida vaqtinchalik roʻyxatdan oʻtkazish va roʻyxatdan oʻtkazish muddati uzaytirilishi davlat boji undirmasdan amalga oshirilishini taʼminlasin.
6. Vakolatli bank Madaniyat ishlari vazirligining buyurtmanomalariga koʻra begʻaraz yordamga hisob-kitob xizmati koʻrsatganlik uchun Yaponiya tomonining vositachilik haqini toʻlashga soʻmlardagi mablagʻlar konvertatsiya qilinishini taʼminlasin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S Karomatov zimmasiga yuklansin.
Oʻzbekiston Respublikasining Bosh vaziri Oʻ. SULTONOV
Toshkent sh.,
2003-yil 24-yanvar,
42-son
