|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
OʻZBEKISTON RESPUBLIKASIDA ASOSIY VOSITALARNI QAYTA HISOBLASh IShLARINI TAShKIL ETISh TOʻGʻRISIDA
LexUZ sharhiMazkur qaror Oʻzbekistan Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Investitsiya resurslarini qadrsizlanishdan himoya qilish, asosiy vositalarning haqiqiy qiymatini belgilash va investitsiya faoliyatini faollashtirish uchun shart-sharoitlar yaratish maqsadida Vazirlar Mahkamasi qaror qiladi:
1. Belgilab qoʻyilsinki, mulkchilik shakllaridan qatʼi nazar respublikaning barcha korxonalari, tashkilotlari va muassasalari asosiy vositalar qiymatini uning 1995-yil 1-yanvardagi holatiga koʻra qayta hisoblab chiqishga majburdirlar.
Qayta hisoblash 1995-yilning 1-fevraligacha tugallansin.
Asosiy vositalarni qayta hisoblashning toʻliqligi, oʻz vaqtida va sifatli oʻtkazilishi uchun shaxsiy javobgarlik korxonalar, tashkilotlar va muassasalarning rahbarlari zimmasiga yuklansin.
2. Oʻzbekiston Respublikasi Moliya vazirligi “Oʻzistiqbolstat” davlat qoʻmitasi va Davlat mulki qoʻmitasi bilan birgalikda:
bir hafta muddatda Asosiy vositalarni qayta hisoblashni oʻtkazish tartibini ishlab chiqsin va tasdiqlasin;
korxonalar va tashkilotlarga asosiy vositalarni qayta hisoblashni oʻtkazishda va uning natijalarini buxgalteriya va statistika hisobotida aks ettirishda uslubiy rahbarlikni hamda amaliy yordam berishni taʼminlasin.
3. Vazirliklar, idoralar, konsernlar, uyushmalar, birlashmalar, korxonalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:
Asosiy vositalarni qayta hisoblashni oʻtkazish tartibini olganlaridan soʻng bir hafta muddatda uni oʻzlariga qarashli tashkilotlarga yetkazsinlar;
asosiy vositalarni qayta hisoblash yakunlari toʻgʻrisidagi hisobotni 1995-yilning 1-fevraligacha “Oʻzistikbolstat” davlat qoʻmitasi belgilagan shakllarda va manzillarga taqdim etsinlar.
4. “Oʻzistiqbolstat” davlat qoʻmitasi asosiy vositalar qiymatini qayta hisoblashning birlashmalar, korxonalar, tashkilotlar va muassasalar va boshqa xoʻjalik yurituvchi subyektlardan olingan natijalarini umumlashtirsin hamda 1995-yilning 20-martidan kechiktirmay Vazirlar Mahkamasiga taqdim etsin.
5. Oʻzbekiston Respublikasi Davlat mulki qoʻmitasi korxonalar va tashkilotlarni xususiylashtirishda ularning dastlabki narxi miqdorini belgilashni, shuningdek, ularning xodimlariga beriladigan imtiyozlar miqdorini belgilashni mazkur qarorga muvofiq oʻtkazilayotgan qayta hisoblashni nazarda tutgan holda amalga oshirsin.
6. Ushbu qaror qabul qilingunga qadar mulk ijarasi shartnomasini tuzgan korxonalar va tashkilotlar bir oy muddatda shartnomaning qolgan muddati uchun ijara toʻlovlari miqdorlarini ijaraga berilgan asosiy fondlarning qayta hisoblab chiqilgan qiymatidan kelib chiqqan holda qayta koʻrib chiqsinlar.
Mazkur qaror qabul qilingunga qadar davlat mulkini sotib olish huquqi bilan ijara shartnomasini tuzgan korxonalar va tashkilotlar mulkning 1995-yil 1-yanvargacha sotib olinmagan qismini uning qiymatini qayta hisoblashni hisobga olgan holda sotib oladilar.
7. Belgilab qoʻyilsinki, 1995-yilda mol-mulkka solinadigan soliq va amortizatsiya asosiy vositalarning mazkur qarorga muvofiq amalga oshiriladigan qayta hisoblangan qiymatidan kelib chiqqan holda hisoblab chiqiladi.
8. Oʻzbekiston Respublikasi Moliya vazirligi “Oʻzistiqbolstat” davlat qoʻmitasiga asosiy vositalar qiymatini qayta hisoblashni tashkil etish va oʻtkazish uchun 900 ming soʻm ajratsin.
9. “Oʻzulgurjibirjasavdo” uyushmasi “Oʻzistiqbolstat” davlat qoʻmitasiga uning buyurtmanomasi boʻyicha 0,3 tonna yozuv qogʻozi va 1,5 tonna gazeta qogʻozini shakllar va Asosiy vositalarni qayta hisoblash tartibini koʻpaytirish uchun sotsin.
10. Oʻzbekiston Respublikasi Davlat matbuot qoʻmitasi “Oʻzistiqbolstat” davlat qoʻmitasi Asosiy vositalarni qayta hisoblash tartibi va statistika hisoboti shakllarini taqdim etgandan soʻng 15 kun muddatda ularni chop etsin va buyurtmanomaga muvofiq joʻnatsin.
11. Mazkur qarorning bajarilishini nazorat qilish Oʻzbekiston Respublikasi Bosh vazirining tegishli oʻrinbosarlari zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1994-yil 28-noyabrdagi
572-son
