“Oʻzbekiston Respublikasida maʼmuriy-hududiy tuzilish, toponimik obyektlarga nom berish va ularning nomlarini oʻzgartirish masalalarini hal etish tartibi toʻgʻrisida”gi Oʻzbekiston Respublikasi Qonunining 12-moddasiga muvofiq hamda BMTning nufus masalalari boʻyicha standartlariga koʻra shahar va qishloq aholi punktlari toʻgʻri hisobga olinishini taʼminlash maqsadida:

1. Qoraqalpogʻiston Respublikasi Vazirlar Kengashi, viloyatlar va tumanlar hokimliklari:

ikki oy muddatda Oʻzbekiston Respublikasining amaldagi qonun hujjatlariga muvofiq shaharchalar toifasiga kiruvchi aholi punktlarini roʻyxatdan oʻtkazsin;

roʻyxatdan oʻtkazish natijalarini hisobga olgan holda tumanlar hokimlarining iltimosnomalari asosida bir oy muddatda Qoraqalpogʻiston Respublikasi Joʻqorgʻi Kengesi, xalq deputatlari viloyat Kengashlariga aholi soni kamida 2000 kishi boʻlgan, oʻz belgilariga koʻra “Oʻzbekiston Respublikasida maʼmuriy-hududiy tuzilish, toponimik obyektlarga nom berish va ularning nomlarini oʻzgartirish masalalarini hal etish tartibi toʻgʻrisida”gi Oʻzbekiston Respublikasi Qonunining 12-moddasiga mos keladigan qishloq aholi punktlarini shaharchalar toifasiga kiritish toʻgʻrisida iltimosnomalar taqdim etsin;

har yil birinchi chorakda Oʻzbekiston Respublikasi Milliy statistika qoʻmitasining hududiy boʻlinmalari bilan birgalikda qishloq aholi punktlarini roʻyxatdan oʻtkazsin va zarur hollarda amaldagi qonun hujjatlariga muvofiq ularning maqomini oʻzgartirish toʻgʻrisida belgilangan tartibda Qoraqalpogʻiston Respublikasi Joʻqorgʻi Kengesi va xalq deputatlari viloyat Kengashlariga tegishli iltimosnomalar kiritsin.

2. Qoraqalpogʻiston Respublikasi Joʻqorgʻi Kengesi, xalq deputatlari viloyat Kengashlariga Qoraqalpogʻiston Respublikasi Vazirlar Kengashi va viloyatlar hokimliklarining iltimosnomalarini koʻrib chiqish hamda yuqorida koʻrsatilgan aholi punktlarining maqomini oʻzgartirish toʻgʻrisida belgilangan tartibda tegishli qarorlar qabul qilish tavsiya etilsin.

3. Oʻzbekiston Respublikasi Vazirlar Mahkamasi Qoraqalpogʻiston Respublikasi Joʻqorgʻi Kengesi va xalq deputatlari viloyat Kengashlarining qarorlaridan kelib chiqqan holda va asoslab beruvchi hujjatlarni puxta oʻrganish natijalariga koʻra muayyan qishloq aholi punktlarini shahar posyolkalari toifasiga kiritish bilan bogʻliq iqtisodiy-huquqiy masalalar boʻyicha qarorlar qabul qilsin.

4. Oʻzbekiston Respublikasi Milliy statistika qoʻmitasi Oʻzbekiston Respublikasi Vazirlar Mahkamasining qarorlari asosida qishloq va shahar aholi punktlarining statistika koʻrsatkichlariga belgilangan tartibda tegishli oʻzgartishlar kiritsin.

5. Belgilansinki, qishloq aholi punktlarini shahar posyolkalari toifasiga kiritish chogʻida vrachlar, provizorlar, oʻrta tibbiyot va farmatsevtika xodimlari uchun:

aholi punktlarining maqomi oʻzgartirilgan kundan boshlab 5 yil mobaynida qishloq joylarda amalda boʻlgan mehnatga haq toʻlash shartlari saqlab qolinadi;

ular pensiyaga chiqqanida ushbu toifadagi shaxslarga uy-joy-kommunal xizmatlar haqini toʻlash boʻyicha har oylik kompensatsiya pul toʻlovlarini tayinlash chogʻida mazkur davr ish stajiga qoʻshiladi.

6. Ushbu qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.