Navoiy kon-metallurgiya kombinatini (Navoiy KMK) malakali mutaxassislar bilan toʻldirish, tibbiy sanatoriya-kurortda davolanish hamda oziq-ovqat bilan taʼminlashni yaxshilash maqsadida Vazirlar Mahkamasi qaror qiladi:

1. Oʻzbekiston Respublikasi Mehnat vazirligi “Qizilqumnodirmetalloltin” davlat konserni bilan birgalikda konsern korxonalarini yuqori malakali mutaxassislar va ishchilar bilan taʼminlash dasturini ishlab chiqsin hamda tasdiqlash uchun Vazirlar Mahkamasiga taqdim etsin.

2. Oʻzbekiston Respublikasi Oliy va oʻrta maxsus taʼlim vazirligi:

“Oʻzistiqbolstat” davlat qoʻmitasi, Moliya vazirligi, Navoiy viloyati hokimligi bilan birgalikda mintaqaning kon-metallurgiya, kimyo-texnologiya, energetika va mashinasozlik ixtisosliklari boʻyicha kadrlarga boʻlgan uzoq muddatli ehtiyojini hisobga olgan holda bir oy muddatda Toshkent davlat texnika universitetining Navoiy filiali negizida Navoiy politexnika institutini tashkil etish toʻgʻrisida takliflar tayyorlasin. Bunda tashkil etilayotgan institutning tuzilmasida ushbu oliy oʻquv yurti yoʻnalishi boʻyicha korxonalarning rahbar xodimlari va mutaxassislari malakasini oshirish fakultetini tashkil etish, shuningdek, boshqa shahardan kelgan oʻqituvchilarni uy-joy bilan taʼminlagan holda uni professor-oʻqituvchi kadrlar bilan toʻldirish nazarda tutilsin;

1994-yil fevral oyidan boshlab Zarafshon, Uchquduq, Navoiy shaharlarida muhandis-texnik ixtisosliklari boʻyicha oliy oʻquv yurtlariga kirish uchun pulli tayyorlov kurslari tashkil etsin;

Navoiy viloyat xalq taʼlimi boshqarmasi buyurtmanomalari boʻyicha mintaqa maktablari uchun 1994-1995 oʻquv yilidan boshlab Samarqand va Buxoro davlat universitetlarida tanlov asosida pedagog kadrlar tayyorlashni tashkil etsin.

3. Oʻzbekiston Respublikasi Xalq taʼlimi vazirligi, Navoiy viloyati hokimligi, “Qiziliqumnodirmetalloltin” konserni 1994-yilda Navoiy pedagogika instituti kompleksi qurilishini nihoyasiga yetkazsin.

4. Oʻzbekiston Respublikasi Sogʻliqni saqlash vazirligi:

Navoiy kon-metallurgiya kombinatining davolash muassasalarini yuqori malakali mutaxassislar bilan toʻldirsin, tanlov asosida Toshkent va Samarqand tibbiyot institutlaridan yosh mutaxassislar maqsadli yuborilishini tashkil etsin. Davolash muassasalarini zarur dori-darmonlar bilan taʼminlasin.

1994-1995-yillarda ishlab turgan sanatoriy yoki respublikaning davolash muassasi negizida Navoiy kon-metallurgiya kombinatining kasb kasalliklariga duchor boʻlgan xodimlarini davolash uchun sanatoriy tashkil etsin.

5. Oʻzbekiston Respublikasi Madaniyat ishlari vazirligi, Navoiy kon-metallurgiya kombinati, Navoiy viloyati hokimligi bir oy muddatda 1994-1995-yillarda madaniy-ommaviy tadbirlarni oʻtkazish dasturini ishlab chiqsinlar va tasdiqlasinlar.

6. Oʻzbekiston Respublikasi Markaziy banki “Qizilqumnodirmetalloltin” konserni korxonalarida ixtisoslashtirilgan klinikalarda, sanatoriy-kurortlarda davolanishga, dafn marosimlariga, mehnat taʼtilini oʻtkazish uchun respublika tashqarisiga ketuvchilar, shuningdek, MDH davlatlarida istiqomat qilayotganlarga kasb kasalliklari va nogironlik boʻyicha yetkazilgan zarar toʻlovlarini, alimentlarni toʻlash, korxonalarning yoʻllanmalari bilan taʼlim olayotgan talabalarga stipendiyalar toʻlash uchun soʻm-kuponlarni Rossiyaning 1993-yil namunasidagi rubllariga almashtirish punktlarini tashkil etsin hamda ularni Navoiy kon-metallurgiya kombinatining Oʻzbekiston Respublikasi Markaziy bankining Rossiya Federatsiyasi Markaziy bankidagi korrespondentlik schyotiga naqd pulsiz hisob-kitoblar boʻyicha oʻtkazilgan Rossiya Federatsiyasi rubllaridagi mablagʻlari hisobiga Rossiyaning 1993-yil namunasidagi rubllari bilan taʼminlasin.

7. Navoiy viloyati hokimligi Oʻzbekiston Respublikasi Davlat mulki qoʻmitasi bilan birgalikda “Qizilqumnodirmetalloltin” konserni korxonalarining, Navoiy viloyatining boshqa korxonalari hamda budjet tashkilotlari xodimlari boʻlgan fuqarolarga shaxsiy mulk qilib berilgan kvartiralarni sotib olish tartibi toʻgʻrisida Vaqtinchalik nizomni ishlab chiqsin va tasdiqlasin hamda uni 1994-yilning fevralidan boshlab amalga kiritsin.

8. Navoiy kon-metallurgiya kombinatiga Oʻzbekiston Respublikasining markaziy rayonlarida hamda MDH davlatlarida pensionerlar, kasb kasalliklariga duchor boʻlganlar, mehnat jarohati olgan shaxslar uchun korxonaning foydasi hisobiga uy-joy qurishga hamda keyinchalik boʻshab qolgan uylarni kombinatga bepul topshirgan holda ssudalar berishga ruxsat etilsin.

9. Navoiy, Samarqand, Buxoro viloyatlari hokimlari Uchquduq, Zarafshon, Navoiy, Sovetobod va Nurobod shaharlarida shaharlarning hokimliklari, “Qizilqumnodirmetalloltin” konserni korxonalari, transport tashkilotlari hamda hududiy bojxona boshqarmalari vakillaridan iborat respublika tashqarisiga shaxsiy mol-mulklarini joʻnatayotgan fuqarolarga konsultativ yordam va xizmat koʻrsatish boʻyicha jamoat komissiyalarini amaldagi qonunchilikka muvofiq tuzsinlar. Korxonalarning hududlarida shaxsiy mol-mulklarni koʻzdan kechirish va ularni joʻnatish boʻyicha bojxona postlari tashkil etsinlar.

10. Oʻzbekiston Respublikasi Moliya vazirligi “Oʻzbeksavdo” davlat-aksionerlik uyushmasi bilan birgalikda:

uzoq muddat saqlash uchun qoʻyiladigan kartoshka va sabzavot mahsulotlarining ikki oylik meʼyori zaxirasini taʼminlash uchun Navoiy kon-metallurgiya kombinati Ishchilar taʼminoti boshqarmasining oborot mablagʻlarini toʻldirish;

tovarlarni qayta baholash paytida oborot mablagʻlarni toʻldirishga yoʻnaltiriladigan farqni kombinat ishchilar taʼminoti boshqarmasi ixtiyorida qoldirish masalasini koʻrib chiqsin.

11. “Oʻzbeksavdo” davlat-aksionerlik uyushmasi, Navoiy, Samarqand, Buxoro viloyatlari hokimliklari Navoiy kon-metallurgiya kombinatining Ishchilar taʼminoti boshqarmasiga meʼyorlashtirilgan oziq-ovqat tovarlarini hamda eng zarur narsalarni markazlashtirilgan fondlardan unga ajratilgan hajmlar boʻyicha yetkazib berishni amalga oshirsinlar, shuningdek boshqa xalq isteʼmol tovarlari birinchi navbatda ajratilishini taʼminlasinlar.

12. “Oʻzdavneftmahsulot” aksionerlik birlashmasi “Qizilqumnodirmetalloltin” konserniga 1994-yil uchun ajratilgan kvotalar hajmini avtomobil benzini boʻyicha 31,3 ming tonnadan 36,7 ming tonnagacha, dizel yoqilgʻisi boʻyicha 56,3 ming tonnadan 86,4 ming tonnagacha koʻpaytirsin.

13. Mazkur qarorning bajarilishini nazorat qilish Bosh vazirning oʻrinbosari A.N. Voznenko zimmasiga yuklansin.