Yetim bolalarni uygʻun rivojlantirish va tarbiyalash uchun qulay sharoitlar yaratish maqsadida Vazirlar Mahkamasi qarori qiladi:

1. “Sogʻlom avlod uchun” hukumatga qarashli boʻlmagan xalqaro xayriya jamgʻarmasi, Oʻzbekiston xotin-qizlar qoʻmitasi va Toshkent shahar hokimligining “SOS — Kinderdorf Interneshnl” xalqaro jamiyati (Avstriya) bilan birgalikda “Oʻzbekiston bolalar mahallalari” (“SOS — Detskiye derevni Uzbekistana”) uyushmasini tashkil etish va Toshkent shahrida Bolalar mahallasini (“SOS—Detskaya derevnya”) qurish toʻgʻrisidagi takliflari qabul qilinsin.

2. “SOS — Oʻzbekiston bolalar mahallalari” uyushmasi toʻgʻrisidagi Nizomga rozilik berilsin (ilova qilinadi). Maʼlumot uchun qabul qilinsinki, quyidagilar “SOS — Oʻzbekiston bolalar mahallalari” uyushmasining asosiy vazifalari hisoblanadi;

jamoatchilik va davlat tuzilmalarining yetim bolalarni jismoniy, intellektual va maʼnaviy rivojlantirish uchun qulay shart-sharoitlar yaratishga, ularni ijtimoiy va huquqiy qoʻllab-quvvatlashni taʼminlashga qaratilgan saʼy-harakatlarini muvofiqlashtirish;

yetim bolalarni Oʻzbekistonda qabul qilingan anʼanaviy pedagogika tamoyillarini hisobga olgan holda tarbiyalash. Tarbiyachi onalarni va xodimlarni tanlash, ular uchun pedagogik va boshqa zarur tayyorgarlikni tashkil etish;

“SOS — Kinderdorf Interneshnl” jamiyati aʼzolari boʻlgan tashkilotlar bilan “SOS — Oʻzbekiston bolalar mahallalari” va ular bilan bogʻliq SOS — loyihalari bolalar bogʻchalari, maktablar, oʻqitish, sport va dam olish markazlari qurish va ularni toʻliq jihozlashni tashkil etishda vositachi sifatida hamkorlik qilish;

davlat, jamoat va xususiy tuzilmalarni Uyushma faoliyatiga faol jalb qilish.

3. Oʻzbekiston Respublikasi Bosh vazirining oʻrinbosari D. Gʻulomova jahondagi SOS — bolalar mahallalariga koʻmaklashish xalqaro jamiyati (“SOS — Kinderdorf Interneshnl”, Avstriya) bilan Bitimni ishlab chiqsin va Hukumat nomidan imzolasin, unda quyidagilar nazarda tutilsin:

a) “SOS — Kinderdorf Interneshnl” xalqaro jamiyati:

“Sogʻlom avlod uchun” xalqaro jamgʻarmasi, Xotin-qizlar qoʻmitasi va boshqa organlar, shu jumladan, jamoat tashkilotlari bilan birgalikda faoliyati Oʻzbekiston Respublikasining amaldagi qonun hujjatlariga muvofiq amalga oshiriladigan “SOS — Oʻzbekiston bolalar mahallalari” uyushmasini taʼsis etadi;

Toshkent shahrida birinchi bolalar mahallasi tashkil etish maqsadida Oʻzbekiston Hukumati bilan yaqindan hamkorlik qiladi;

Oʻzbekiston Respublikasi qonunlarini hurmat qilish va bajarish, Oʻzbekistonning tarbiya va anʼanaviy pedagogika tamoyillariga amal qilish majburiyatini oladi;

Oʻzbekistonda bolalar mahallalari va bolalar bogʻchalari, maktablar, oʻqitish va dam olish markazlari, klinikalar kabi boshqa SOS — loyihalarni toʻliq tashkil etish, koʻrish va jihozlash uchun butun masʼuliyatni oʻz zimmasiga oladi;

“SOS — Bolalar mahallalari”dagi yetim bolalarning toʻliq xarajatlarini, shuningdek, xodimlarga ish haqi toʻlashni, shu jumladan, ijtimoiy, tibbiy sugʻurtalashni va pensiya taʼminotini ularning butun hayot faoliyati davomida mablagʻ bilan taʼminlaydi;

b) Oʻzbekiston Respublikasi Hukumati:

“SOS — Kinderdorf Interneshnl” xalqaro jamiyatiga va “SOS — Oʻzbekiston bolalar mahallalari” uyushmasiga Oʻzbekiston Respublikasi hududida faoliyat koʻrsatayotgan barcha boshqa jamoat va xayriya tashkilotlariga beriladigan imtiyozlarni berish;

“SOS — Toshkent shahridagi Bolalar mahallasi” qurilishi va u bilan bogʻliq qurilish obyektlari uchun kamida 5 gektar yer maydoni, uni soliqlardan ozod qilgan holda, ajratish;

qurilish uchun zarur shart-sharoitlar yaratish va “SOS — Toshkent shahridagi Bolalar mahallasi”ni uning chegarasigacha kommunikatsiyalar tarmogʻi va boshqa zarur xizmatlar bilan taʼminlash majburiyatini oladi;

v) Oʻzbekiston Respublikasi Hukumati respublika hududida amal qilayotgan meʼyorlar, qoidalar va qonunlarga zid yoki zarar keltiradi deb hisoblaydigan hamma narsani taqiqlab qoʻyish huquqini oʻzida saqlab qoladi.

4. Bosh vazir oʻrinbosari D.M. Gʻulomovaga “SOS — Oʻzbekiston bolalar mahallalari” uyushmasini tashkil etish va Uyushma hamda uning ishchi organlari toʻgʻrisidagi Nizomni tasdiqlash yuzasidan masalalar majmuini bir oy muddatda ishlab chiqish va taʼsis yigʻilishini oʻtkazish topshirilsin.

5. Oʻzbekiston Respublikasi Tashqi ishlar vazirligi “SOS — Oʻzbekiston bolalar mahallalari” uyushmasini oʻz faoliyatini xalqaro muruvvat dasturlari va ijtimoiy sohada begʻaraz texnikaviy koʻmaklashish doirasida amalga oshiruvchi tashkilot sifatida akkreditatsiya qilsin.

6. Oʻzbekiston Respublikasi Adliya vazirligi “SOS — Oʻzbekiston bolalar mahallalari” uyushmasini belgilangan tartibda roʻyxatdan oʻtkazsin.

7. Toshkent shahar hokimligi bir oy muddatda:

“SOS — Kinderdorf Interneshnl” xalqaro jamiyati bilan kelishgan holda Toshkent shahrida kamida 5 gektar yer maydoni ajratsin;

“SOS — Bolalar mahallasi” chegarasigacha boʻlgan muhandislik kommunikatsiyalari qurilishini oʻz mablagʻlari hisobidan taʼminlasin.

8. Oʻzbekiston Respublikasi Xalq taʼlimi vazirligi “SOS — Kinderdorf Interneshnl” va “SOS — Oʻzbekiston bolalar mahallalari” uyushmasi bilan birgalikda yetim bolalar bilan ishlashning oʻziga xos xususiyatlarini hisobga olgan holda tarbiyachi “onalarni” pedagogik jihatdan tayyorlashni amalga oshirsin.

9. Oʻzbekiston Respublikasi Sogʻliqni saqlash vazirligi “SOS — Kinderdorf Interneshnl” va “SOS — Oʻzbekiston bolalar mahallalari” uyushmasi bilan birgalikda “SOS — Bolalar mahallasi”ga qabul qilinadigan yetim bolalarni tibbiy koʻrikdan oʻtkazishni taʼminlasin.

10. “Oʻzbekiston temir yoʻllari” davlat-aksiyadorlik kompaniyasi va “Oʻzbekiston havo yoʻllari” milliy aviakompaniyasi “SOS — Oʻzbekiston bolalar mahallalari” uyushmasining muruvvat loyihalari bilan bogʻliq barcha yuklarning imtiyozli tariflar boʻyicha toʻsiqlarsiz qabul qilinishini va joʻnatilishini taʼminlasinlar.

11. Oʻzbekiston Respublikasi Tashqi ishlar vazirligi va Ichki ishlar vazirligi manfaatdor vazirliklar va idoralar bilan birgalikda “SOS — Bolalar mahallasi” qurilishida va uning xodimlariga amaliy yordam koʻrsatishda qatnashish uchun “SOS — Kinderdorf Interneshnl” tomonidan jalb qilinadigan xorijiy mutaxassislarga vizalar, shu jumladan koʻp martalik vizalar, yashashi va ishlashi uchun ruxsatnomalar bersinlar.

12. Uyushma apparati Toshkent shahar, Oxunboboyev koʻchasidagi 15-uyga joylashtirilsin.

13. Mazkur qarorning bajarilishini nazorat qilish Bosh vazirning oʻrinbosari D.M. Gʻulomova zimmasiga yuklansin.

1. “SOS — Oʻzbekiston bolalar mahallalari” uyushmasi (bundan keyin matnda Uyushma deb ataladi) yetim bolalarni jismoniy, intellektual va maʼnaviy rivojlantirish uchun qulay sharoitlar yaratish uchun bolalar mahallalari tashkil etish boʻyicha “SOS — Kinderdorf Interneshnl” xalqaro jamiyati tomonidan taʼsis etiladi.

2. Uyushmaning nomi:

oʻzbek tilida — “SOS — Oʻzbekiston bolalar mahallalari” uyushmasi;

ingliz tilida — “SOS — Shildrens villages Assatiation of Uzbekistan”;

rus tilida — assotsiatsiya “SOS — Detskiye derevni Uzbekistana”.

3. Oʻzbek va ingliz tillari Uyushmaning rasmiy tillari hisoblanadi.

Oʻzbek, ingliz va rus tillari ish yuritish tillari hisoblanadi.

4. Uyushmaning joylashgan manzili:

Oʻzbekiston Respublikasi, Toshkent shahri, Oxunboboyev koʻchasi, 15-uy.

5. Quyidagilar Uyushma faoliyatining asosiy maqsadi va yoʻnalishlari hisoblanadi:

jamoat va davlat tuzilmalarining yetim bolalarni jismoniy, intellektual va maʼnaviy rivojlantirish uchun qulay sharoitlar yaratishga, ularni ijtimoiy muhofaza qilish va huquqiy qoʻllab-quvvatlashni taʼminlashga yoʻnaltirilgan saʼy-harakatlarini muvofiqlashtirish;

yetim va tashlab ketilgan bolalarni tarbiyalashni hamda ularga yordam berishni taʼminlashga, ular uchun oilalardagi kabi hayot sharoitlari yaratishga yoʻnaltirilgan loyiha va dasturlarni amalga oshirishga moliyaviy yordam berish;

barcha bolalarga, ayniqsa yetim bolalarga, shuningdek yetim bolalarni tarbiyalayotgan onalarga yordam berish;

Oʻzbekiston Respublikasida SOS — bolalar mahallalari hamda bolalar bogʻchalari, maktablar, oʻquv, sport va dam olish markazlari, klinikalar va shu kabi ular bilan uzviy bogʻliq insonparvarlik SOS — loyihalarni qurishni hamda asbob-anjomlar bilan toʻliq jihozlashni tashkil etish;

“SOS — Kinderdorf Interneshnl” bilan hamkorlik qilish;

SOS — bolalar mahallalari hamda SOS — loyihalar uchun tarbiyachi onalar va xodimlar tanlash va ular uchun pedagogik hamda boshqa zarur tayyorgarlikni tashkil etish;

davlat, jamoat va xususiy tuzilmalarni Uyushma faoliyatiga faol jalb etish;

yetim bolalar uchun insonparvarlik dasturlarini hamda German Gmaynerning pedagogik gʻoyalarini ommalashtirish va qoʻllab-quvvatlash uchun maqolalar, axborot materiallarini nashr qilish, koʻrgazmalar, seminarlar uyushtirish, ommaviy axborot vositalari bilan ishlarni tashkil etish.

6. “SOS — Oʻzbekiston bolalar mahallalari” uyushmasi “SOS — Kinderdorf Interneshnl” xalqaro uyushmasi tarkibiga kiradi.

7. Uyushma bank muassasalarida oʻzining hisob-kitob va valyuta schyotlarini ochish huquqiga ega boʻlgan yuridik shaxs hisoblanadi, oʻz majburiyatlari boʻyicha oʻzining mol-mulki bilan javob beradi, sudda va hakamlik sudida daʼvogar yoki javobgar sifatida qatnashadi. Uyushma “ SOS — Kinderdorf Interneshnl” ramzidan foydalangan holda oʻz muhriga, firma blanklariga va boshqa rekvizitlarga ega boʻladi.

8. Uyushma oʻz faoliyatida “Oʻzbekiston Respublikasidagi jamoat birlashmalari toʻgʻrisida” Oʻzbekiston Respublikasi Qonuniga, Oʻzbekiston Respublikasining boshqa qonunchilik hujjatlariga va ushbu Nizomga amal qiladi.

9. Uyushma quyidagi huquqlarga ega:

yetim bolalarni tarbiyalash, ijtimoiy muhofaza qilish va huquqiy qoʻllab-quvvatlashni taʼminlash muammolariga oid respublika va xalqaro insonparvarlik dasturlari hamda loyihalarini ishlab chiqishda va amalga oshirishda qatnashish;

Oʻzbekiston Respublikasida SOS — bolalar mahallalari va boshqa SOS — obyektlarini tashkil etish hamda ularning hayot faoliyatini taʼminlash;

Oʻzbekiston Respublikasining ijro etuvchi va qonun chiqaruvchi organlariga “ SOS — Kinderdorf Interneshnl” maqsadi va vazifalaridan kelib chiqadigan takliflar kiritish.

10. Uyushma quyidagilarga majburdir:

“SOS — Kinderdorf Interneshnl” yoʻl-yoʻriqlari va koʻrsatmalarini bajarish;

oʻz faoliyatini Oʻzbekiston Respublikasi qonunchiligiga va ushbu Nizomga muvofiq yuritish,

11. Uyushma Oʻzbekistondagi SOS — Bolalar mahallalari va SOS — loyihalar egasi hisoblanadi hamda ularni tashkil etish, jihozlash va ularning faoliyati uchun toʻliq moliyaviy va boshqacha turlarda javob beradi.

12. Uyushma yuridik shaxs hisoblanadi hamda Oʻzbekiston Respublikasi qonun hujjatlariga va xalqaro huquq normalariga binoan oʻz faoliyati maqsadlari va mol-mulkining moʻljallanganligiga muvofiq ularga egalik qiladi, ulardan foydalanadi va ularni tasarruf etadi. Uyushmaning mulkiy huquqlari Oʻzbekiston Respublikasi qonun hujjatlariga muvofiq himoya qilinadi.

13. Uyushma mablagʻlari quyidagilar hisobiga shakllanadi:

“SOS — Kinderdorf Interneshnl” uyushmasidan, “SOS — Kinderdorf Interneshnl” xalqaro jamiyati va bu tashkilotga kiruvchi jamiyatlar va ittifoqlardan tushumlar;

korxonalar, muassasalar va tashkilotlardan, shuningdek xorijiy sarmoya ishtirokidagi korxonalardan, xususiy shaxslardan begʻaraz xayriya badallari, xayr-ehsonlar va tushumlardan;

merosdan, yetim bolalarni davlat tomonidan qoʻllab-quvvatlash mablagʻlaridan, istalgan turdagi jamoatchilik tushumlaridan, mahalliy va xalqaro xayr-ehsonlardan;

muruvvat tadbirlarini va muruvvat yoʻnalishidagi boshqa tadbirlarni oʻtkazishdan olingan daromadlar;

qonun hujjatlariga va mazkur Nizomga zid boʻlmagan boshqa daromadlardan.

14. Boshqaruv qaroriga koʻra Uyushmaning oʻz mablagʻlaridan ham Oʻzbekistondagi, ham uning tashqarisidagi qarovchisiz qolgan bolalarga yordam berish uchun foydalanilishi mumkin. Boshqaruv har yili bu mablagʻlarning bir qismini “SOS — Kinderdorf Interneshnl” doirasidagi xorijiy muruvvat loyihalariga ajratish huquqiga ega, bunda mablagʻlar xayr-ehson yigʻishda eʼlon qilingan maqsadlar uchungina ajratilishi mumkin.

15. Uyushmaning tuzilmasi:

Uyushma aʼzolarining umumiy yigʻilishidan;

Uyushma boshqaruvidan;

taftish komissiyasidan;

Uyushma direksiyasidan iborat boʻladi.

16. Umumiy yigʻilish Uyushmaning yuqori rahbar organi hisoblanadi. Umumiy yigʻilishda barcha haqiqiy va faxriy aʼzolar, shuningdek “SOS — Kinderdorf Interneshnl” xalqaro jamiyatining ikki ovozga ega boʻlgan ikki vakili qatnashishlari mumkin. Umumiy yigʻilish har yili kamida bir marta chaqiriladi. Yigʻilish oʻtkaziladigan sana kun tartibi, oʻtkaziladigan joyi va sanasi koʻrsatilgan holda bir oy oldin eʼlon qilinadi.

Umumiy yigʻilish “SOS — Kinderdorf Interneshnl” Ustaviga muvofiq chaqirilgan boʻlsa qaror qabul qilishga haqlidir va u protokol bilan rasmiylashtirilishi kerak.

17. “SOS — Oʻzbekiston bolalar mahallalari” uyushmasining navbatdan tashqari umumiy yigʻilishi zaruriyat boʻlganda Uyushma prezidenti tomonidan chaqirilishi mumkin. Prezident navbatdan tashqari yigʻilishni bu haqida boshqaruv yoki Uyushma aʼzolarining yarmi yoki “SOS — Kinderdorf Interneshnl” talab qilsa oʻtkazishi kerak.

18. Yigʻilish unda Uyushma aʼzolarining 60 foizi qatnashgan taqdirda vakolatli hisoblanadi. Qaror oddiy koʻpchilik ovoz bilan qabul qilinadi.

19. Quyidagilar umumiy yigʻilishning mutlaq vakolatiga kiradi:

prezidentni va boshqaruvning boshqa aʼzolarini saylash va ozod qilish;

“SOS — Oʻzbekiston bolalar mahallalari” doʻstlarini qabul qilish va chiqarish;

taftish komissiyasini saylash va ozod qilish;

har yillik moliyaviy hisobotni tasdiqlash;

“SOS — Kinderdorf Interneshnl” xalqaro jamiyati bilan kelishgan holda Uyushma faoliyatini tugatish.

Boshqaruv yoki Uyushma direksiyasi tashabbusiga koʻra Uyushma faoliyatiga tegishli boshqa masalalar ham koʻrib chiqish uchun kiritilishi mumkin.

20. Boshqaruv prezidentdan, vitse-prezidentdan, xazinachi va Uyushmaning toʻrt aʼzosidan iborat boʻladi. Boshqaruv tarkibiga shuningdek “SOS — Kinderdorf Interneshnl” xalqaro jamiyati vakillari kiradi.

21. Boshqaruv uch yil muddatga saylanadi va jamoatchilik asosida Uyushmaning muruvvat faoliyatiga joriy rahbarlik qiladi, uning maqsadi va vazifalariga javob beruvchi tashkiliy-moliyaviy tadbirlarni oʻtkazadi.

22. Prezident yoki vitse-prezident boshqaruv yigʻilishini zaruriyatga koʻra, lekin yiliga kamida 4-marta, chaqiradi.

23. Boshqaruv qarori prezident yoki vitse-prezident, shuningdek uning aʼzolarining yarmi qatnashgan taqdirda kuchga ega boʻladi va oddiy koʻpchilik ovoz bilan qabul qilinadi.

24. Boshqaruv ish yuritish tartibini belgilaydi, Uyushmaning maqsadi va vazifalariga muvofiq mablagʻlarni xarajat qiladi, yillik hisobotni tuzadi.

25. Aʼzolardan biri chiqib ketgan taqdirda boshqaruv Uyushmaning haqiqiy aʼzolaridan birini chaqiriq muddati tugagunga qadar boshqaruv tarkibiga kiritishga haqlidir.

26. Boshqaruv “SOS — Kinderdorf Interneshnl” xalqaro jamiyatining “SOS — Oʻzbekiston bolalar mahallalari” uyushmasiga tegishli koʻrsatmalarini bajarishga majburdir.

27. Uyushma aʼzolarining yigʻilishi uch yil muddatga taftish komissiyasini saylaydi.

28. Taftish komissiyasi “SOS — Kinderdorf Interneshnl” xalqaro jamiyati mezonlari va Oʻzbekiston Respublikasi qonun hujjatlariga muvofiq har yili Uyushmaning barcha moliyaviy faoliyatini tekshirishi kerak.

29. Uyushmaning moliyaviy yili joriy yilning 31-yanvarida tugaydi.

30. Uyushmaning maqsadi va vazifalarni bajarish hamda joriy faoliyatiga rahbarlik qilish uchun boshqaruv direksiyani taʼsis etadi. Direktor Uyushma prezidenti tomonidan “SOS — Kin-derdorf Interneshnl” jamiyati bilan kelishilgan holda tayinlanadi.

31. Direktor boshqaruv aʼzosi hisoblanadi va Uyushma boshqaruvi majlisida egallab turgan lavozimiga koʻra maslahat ovozi bilan qatnashishga majbur.

32. Uyushmaning haqiqiy aʼzolari, faxriy aʼzolari va “SOS — Oʻzbekiston bolalar mahallalari” uyushmasi doʻstlari (homiy aʼzolar) Uyushmaning aʼzolari hisoblanadi.

33. Mazkur Nizomning muqaddimasiga muvofiq SOS — bolalar mahallalari gʻoyasini qoʻllab-quvvatlayotgan va Uyushma boshqaruvi tomonidan shunday deb tan olingan yuridik va jismoniy shaxslar Uyushmaning haqiqiy aʼzolari boʻlishlari mumkin. Uyushma haqiqiy aʼzolarining soni 25 kishidan oshmasligi kerak.

Uyushmaning yangi haqiqiy aʼzolari Uyushma boshqaruvining umumiy yigʻilishdagi taklifi boʻyicha, agar bu taklifni Uyushma haqiqiy aʼzolarining koʻpchiligi yoqlab ovoz bersa, qabul qilinadi.

34. “SOS — Kinderdorf Interneshnl” maqsadlarini amalga oshirishda xizmat koʻrsatgan va yutuqlarga ega boʻlgan shaxslar Uyushmaning faxriy aʼzolari hisoblanadi. Bu shaxslar Uyushmaning faxriy aʼzolari sifatida Uyushma boshqaruvining umumiy yigʻilishdagi taklifi boʻyicha, agar bu taklifni koʻpchilik yoqlab ovoz bersa, saylanadi.

35. Uyushmaning haqiqiy va faxriy aʼzolari Uyushmaning rahbar organlariga saylash va saylanish, oʻz dasturlari va takliflarini koʻrib chiqish uchun kiritish, Uyushma tomonidan oʻtkaziladigan tadbirlarda qatnashish huquqiga egadirlar.

36. Doimiy (erkin miqdordagi) badallari bilan Uyushma ishlarini qoʻllab-quvvatlaydigan jismoniy va yuridik shaxslar “SOS — Oʻzbekiston bolalar mahallalari”ning doʻstlari hisoblanadilar. Ularni qabul qilish toʻgʻrisidagi masala boshqaruv tomonidan, oddiy koʻpchilik ovoz berish yoʻli bilan hal etiladi.

37. Uyushma aʼzolari:

Uyushmaning asosiy vazifalarini bajarishga faol koʻmaklashishga majburdirlar;

“SOS — Oʻzbekiston bolalar mahallalari” uyushmasi dasturlarini amalga oshirishda aniq yordam koʻrsatishga doir tadbirlarda qatnashish huquqiga egadirlar;

Uyushma boshqaruviga yozma ravishda bildirishnoma taqdim etgan holda Uyushmadan chiqish huquqiga egadirlar. Uyushmadan chiqish sanasi bildirishnoma taqdim etilgandan keyin 3 oy oʻtgach boshlanadi.

38. Uyushmaning haqiqiy aʼzolari Uyushma boshqaruvi tomonidan belgilangan tartibda va miqdorlarda yilning har choragida Uyushmaning ustav jamgʻarmasiga moliyaviy badal toʻlash majburiyatini oʻz zimmasiga oladilar.

39. Uyushmaga aʼzolik:

jismoniy shaxsning vafoti munosabati bilan;

yuridik shaxs tugatilgan taqdirda tugagan hisoblanadi.

40. Aʼzolarni Uyushmadan chiqarish toʻgʻrisidagi qaror boshqaruv tomonidan, aʼzolar uchdan ikki qismining koʻpchilik ovozi bilan qabul qilinadi. Uyushma aʼzolari unga aʼzolikdan chiqarilganligi toʻgʻrisida yozma ravishda xabardor qilinishi kerak. Aʼzolikdan chiqarilganlik toʻgʻrisida Uyushma aʼzosining aʼzolikdan chiqarilganligi eʼtirof etilgandan keyin 2 oy mobaynida norozilik bildirilishi mumkin.

41. Aʼzolikdan chiqish chogʻida, ushbu aʼzolar tomonidan toʻlangan badallar qaytarib berilmaydi. Uyushma aʼzoligidan chiqish yoki chiqarilish tegishli yuridik shaxslar va Uyushmaning ular oʻrtasida tuzilgan shartnomalardan kelib chiqqan oʻzaro majburiyatlariga daxl qilmaydi.

Uyushma faoliyatini toʻxtatish qonunchilikda belgilangan tartibda amalga oshiriladi.