Hujjat 20.04.2022 00 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

qarori

Quyi boʻgʻinda suv resurslarini boshqarish samaradorligini oshirish boʻyicha qoʻshimcha chora-tadbirlar toʻgʻrisida

Oʻzbekiston Respublikasi Prezidentining “Quyi boʻgʻinda suv resurslarini boshqarishni takomillashtirish hamda suv isteʼmolchilari orasidagi munosabatlarni tartibga solish chora-tadbirlari toʻgʻrisida” 2022-yil 1-martdagi PQ-145-son qarori ijrosini taʼminlash hamda suv resurslarini samarali boshqarish, ularning hisobi va hisobotini toʻlaqonli yuritish, suv isteʼmolchilari oʻrtasidagi suv munosabatlarini takomillashtirish, ushbu jarayonlarga xususiy sektorni keng jalb qilish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Quyi boʻgʻinda suv resurslarini boshqarishni takomillashtirish hamda suv isteʼmolchilari orasidagi munosabatlarni tartibga solish chora-tadbirlari toʻgʻrisida” 2022-yil 1-martdagi PQ-145-son qarorida quyidagilar quyi boʻgʻinda suv resurslarini boshqarishning ustuvor yoʻnalishlari etib belgilanganligi maʼlumot uchun qabul qilinsin:

qishloq xoʻjaligi mahsuloti ishlab chiqaruvchilarni va aholi tomorqalarini suv resurslari bilan ishonchli taʼminlash;

irrigatsiya tizimlari va sugʻorish tarmoqlarini hamda ulardagi gidrotexnika inshootlarini doimiy texnik soz holatda ushlab turish;

yirik qishloq xoʻjaligi mahsuloti ishlab chiqaruvchilarni oʻz hududida suvni boshqarish va taqsimlash ishlariga jalb qilish;

iqtisodiyot tarmoqlarini suv bilan taʼminlashga oid davlat funksiyalarini xususiy sektorga oʻtkazish boʻyicha davlat-xususiy sheriklik tamoyillarini keng joriy etish;

suvning hisobi va hisobotini inson omiliga minimal ravishda bogʻliq boʻlgan avtomatlashtirilgan tizimlar orqali yuritish.

Keyingi tahrirga qarang.

2. Oʻzbekiston Respublikasi Suv xoʻjaligi vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari bir oy muddatda tuman (Quvasoy shahar) irrigatsiya boʻlimlari (irrigatsiya boʻlimlari mavjud boʻlmagan tumanlarda suv xoʻjaligining boshqa tegishli foydalanuvchi tashkilotlari) tarkibida suv isteʼmolchilariga suv yetkazib berish, xoʻjaliklararo sugʻorish tarmoqlaridan foydalanish, ularni taʼmirlash-tiklash va boshqa suv xoʻjaligi xizmatlarini koʻrsatish ishlarini tashkil qilish boʻyicha yuridik shaxs maqomiga ega boʻlmagan maxsus xizmat (keyingi oʻrinlarda — suv xoʻjaligining maxsus xizmati) tashkil etilishini taʼminlasin.

Keyingi tahrirga qarang.

3. Belgilab qoʻyilsinki:

a) suv xoʻjaligining maxsus xizmati:

suv isteʼmolchilariga suv yetkazib berish va koʻrsatilgan suv xoʻjaligi xizmatlaridan tushgan mablagʻlar hisobidan moliyalashtiriladi;

suv isteʼmolchilariga ajratilgan suv olish limiti doirasida suv yetkazib beradi, belgilangan tartibda uning hisobi va hisobotini yuritadi;

tuman (Quvasoy shahar) irrigatsiya boʻlimlariga (irrigatsiya boʻlimlari mavjud boʻlmagan tumanlarda suv xoʻjaligining boshqa tegishli foydalanuvchi tashkilotlariga) belgilangan tartibda berilgan ikki va undan ortiq suv isteʼmolchisiga xizmat koʻrsatuvchi xoʻjaliklararo (fermerlararo ichki) sugʻorish va kollektor-drenaj tarmoqlari, ulardagi bosh va ichki suv olish hamda boshqa inshootlardan (nasos agregatlari, sugʻorish va kuzatuv quduqlari) doimiy va maqsadli foydalanishni hamda taʼmirlash-tiklash ishlarini amalga oshiradi;

suv isteʼmolchilarining bosh suv olish joylarini suvni boshqarish va hisobga olish vositalari bilan jihozlashni hamda suvning hisobi va hisoboti yuritilishini raqamlashtirishni tashkil qiladi;

suv isteʼmolchilarining buyurtmanomasi boʻyicha boshqa suv xoʻjaligi xizmatlarini koʻrsatadi;

b) suv xoʻjaligining maxsus xizmati tomonidan shartnoma asosida koʻrsatilgan xizmatlardan tushgan mablagʻlar xoʻjaliklararo sugʻorish va kollektor-drenaj tarmoqlari, ulardagi bosh va ichki suv olish hamda boshqa inshootlardan doimiy va maqsadli foydalanish, taʼmirlash-tiklash ishlarini amalga oshirishga, bosh suv olish joylarini suvni boshqarish, hisobga olish vositalari bilan jihozlashga, suvning hisobi va hisoboti yuritilishini raqamlashtirishga, texnikalarni saqlash va ishlatish, xodimlarni, jumladan, mavsumiy jalb qilingan xodimlarni saqlashga hamda ularni moddiy ragʻbatlantirishga yoʻnaltiriladi.

Keyingi tahrirga qarang.

4. Quyidagilarni nazarda tutuvchi Oʻzbekiston Respublikasi Suv xoʻjaligi vazirligining maxsus xizmati tomonidan suv yetkazib berish va koʻrsatilgan boshqa suv xoʻjaligi xizmatlari uchun haq toʻlash hamda ushbu xizmatlarni koʻrsatishdan tushadigan mablagʻlardan foydalanish tartibi toʻgʻrisida nizom 1-ilovaga muvofiq tasdiqlansin:

suv xoʻjaligi tashkilotlari tomonidan suv isteʼmolchilariga suv yetkazib berish boʻyicha xizmatlarni shartnomaga asosan koʻrsatish tartibi;

suv isteʼmolchilariga suv yetkazib berish boʻyicha xizmatlar hamda boshqa xizmatlar uchun toʻlovlar toʻlash tartibi;

suv yetkazib berish va boshqa suv xoʻjaligi xizmatlarini koʻrsatishdan tushgan mablagʻlardan foydalanish tartibi.

Keyingi tahrirga qarang.

5. Quyidagilar:

Davlat suv xoʻjaligi obyektlarini davlat-xususiy sheriklik shartlari asosida boshqaruvga oladigan klasterlar roʻyxati 2-ilovaga muvofiq;

Davlat-xususiy sheriklik shartlari asosida xususiy sektor boshqaruviga beriladigan davlat suv xoʻjaligi obyektlarining tumanlar kesimidagi asosiy koʻrsatkichlari 3-ilovaga muvofiq tasdiqlansin.

6. Oʻzbekiston Respublikasi Suv xoʻjaligi vazirligiga 2-ilovaga muvofiq klasterlar, bitta suv isteʼmolchisiga xizmat koʻrsatayotgan, shuningdek, 3-ilovaga muvofiq suv xoʻjaligi obyektlari berilayotgan xususiy sektor bilan toʻgʻridan-toʻgʻri muzokaralar oʻtkazish asosida tender oʻtkazmasdan davlat sherigi qaroriga muvofiq bitim tuzishga ruxsat berilsin.

7. Davlat suv xoʻjaligi obyektlarini davlat-xususiy sheriklik shartlari asosida xususiy sherikka berish hamda xususiy sherikning investitsiya salohiyatini oʻrganish boʻyicha ishchi guruh tarkibi (keyingi oʻrinlarda — DXSh boʻyicha ishchi guruh) 4-ilovaga muvofiq tasdiqlansin.

DXSh boʻyicha ishchi guruh 2 va 3-ilovalarga muvofiq davlat suv xoʻjaligi obyektlaridan foydalanish uchun xususiy sektorni keng jalb qilishga masʼul ekanligi belgilansin hamda ushbu suv xoʻjaligi obyektlarini 2023-yil 1-aprelga qadar davlat-xususiy sheriklik shartlari asosida xususiy sektorga berishni tashkil qilsin.

8. Oʻzbekiston Respublikasi Suv xoʻjaligi vazirligi:

Oʻzbekiston texnik jihatdan tartibga solish agentligi, “Oʻzsuvloyiha” AJ hamda Irrigatsiya va suv muammolari ilmiy-tadqiqot instituti bilan birgalikda ikki oy muddatda fermer xoʻjaliklari va boshqa suv isteʼmolchilarining bosh suv olish joylarini suvni boshqarish va hisobga olish vositalari bilan jihozlash boʻyicha namunaviy ishchi chizmalarni ishlab chiqsin hamda joylarga yetkazsin;

Moliya vazirligi huzuridagi Davlat-xususiy sheriklikni rivojlantirish agentligi bilan birgalikda uch oy muddatda xususiy sherikka berilgan obyektlarda monitoring yurituvchi masʼul xodimlar uchun davlat-xususiy sheriklik shartlarining asosiy mezonlarini monitoring qilish tartibi yuzasidan treninglar (oʻquv mashgʻulotlari) tashkil etsin.

9. Oʻzbekiston Respublikasi Suv xoʻjaligi vazirligi, Qishloq xoʻjaligi vazirligi, Oʻzbekiston fermer, dehqon xoʻjaliklari va tomorqa yer egalari kengashi, Qoraqalpogʻiston Respublikasi Vazirlar Kengashi, viloyat va tumanlar hokimliklari:

a) uch oy muddatda quyi boʻgʻindagi barcha sugʻorish va kollektor-drenaj tarmoqlari hamda boshqa suv xoʻjaligi obyektlarini xatlovdan oʻtkazsin. Xatlov natijalariga asosan:

qishloq xoʻjaligi yer uchastkalari mavjud boʻlgan klasterlarga — ularga tegishli maydonlardagi barcha xoʻjaliklararo va ichki sugʻorish hamda kollektor-drenaj tarmoqlari, ulardagi bosh va ichki suv olish hamda boshqa suv xoʻjaligi obyektlarini ichki suv xoʻjaligi xizmatini tashkil qilish, ulardan maqsadli foydalanish, taʼmirlash-tiklash va rekonstruksiya qilish uchun;

suv isteʼmolchilariga — ularga bevosita xizmat koʻrsatuvchi ichki sugʻorish hamda kollektor-drenaj tarmoqlari, ulardagi bosh va ichki suv olish hamda boshqa suv xoʻjaligi obyektlarini ulardan maqsadli foydalanish, shuningdek, taʼmirlash-tiklash uchun dalolatnomalar asosida xoʻjaliklarga berilishini tashkil qilsin;

b) klasterlar, fermer xoʻjaliklari va boshqa suv isteʼmolchilarining bosh suv olish joylarini namunaviy ishchi chizmalar asosida suvni boshqarish va hisobga olish vositalarini ixtisoslashgan tashkilotlar tomonidan ishlab chiqish va qurish, ularni foydalanishga qabul qilish, suvni hisobi va hisobotini yuritish hamda moliyalashtirish tartibi yuzasidan har bir viloyatda jadval boʻyicha koʻrgazmali amaliy seminarlar oʻtkazsin;

v) mahalliy budjet mablagʻlari hisobidan klasterlar, fermer xoʻjaliklari va boshqa suv isteʼmolchilarining bosh suv olish joylarida suvni hisobga olish va hisobotini yuritishni raqamli texnologiyalar asosida amalga oshirish boʻyicha 2022-2023-yillarda namunaviy uchastkalarni tashkil qilsin.

10. Oʻzbekiston Respublikasi Moliya vazirligi Davlat soliq qoʻmitasi, Suv xoʻjaligi vazirligi va Qishloq xoʻjaligi vazirligi bilan birgalikda bir oy muddatda:

suv xoʻjaligi obyektlarini boshqaruviga oladigan subyektlarga nisbatan tatbiq etiladigan soliq imtiyozlari yuzasidan takliflarni;

suv isteʼmolchilari tomonidan shartnoma asosida suv xoʻjaligining maxsus xizmatiga toʻlanishi lozim boʻlgan mablagʻlarni suvdan foydalanganlik uchun soliq hisobidan qoplash va uni joriy qilish mexanizmlarini ishlab chiqsin hamda Vazirlar Mahkamasiga kiritsin.

11. Oʻzbekiston Respublikasi Suv xoʻjaligi vazirligi oʻn kun muddatda suv xoʻjaligining maxsus xizmatlari faoliyatini muvofiqlashtirish uchun Suv xoʻjaligi vazirligining markaziy apparatida vazirlik tizimidagi respublika budjetidan moliyalashtiriladigan tashkilotlar boshqaruv xodimlari sonini maqbullashtirish hisobiga 4 ta shtat birligidan iborat boʻlim, shuningdek, Qoraqalpogʻiston Respublikasi Suv xoʻjaligi vazirligi va irrigatsiya tizimlari havza boshqarmalarida maxsus xizmatlarga tushadigan mablagʻlar hisobiga moliyalashtiriladigan 2 ta shtat birligidan iborat boʻlim tashkil etsin.

Keyingi tahrirga qarang.

12. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2022-yil 19-aprel,

196-son

Vazirlar Mahkamasining 2022-yil 19-apreldagi 196-son qaroriga
1-ILOVA

Oʻzbekiston Respublikasi Suv xoʻjaligi vazirligining maxsus xizmati tomonidan suv yetkazib berish va koʻrsatilgan boshqa suv xoʻjaligi xizmatlari uchun haq toʻlash hamda ushbu xizmatlarni koʻrsatishdan tushadigan mablagʻlardan foydalanish tartibi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Suv xoʻjaligi vazirligining (keyingi oʻrinlarda — Vazirlik) maxsus xizmati tomonidan suv yetkazib berish va koʻrsatilgan boshqa suv xoʻjaligi xizmatlari uchun haq toʻlash hamda ushbu xizmatlarni koʻrsatishdan tushadigan mablagʻlardan foydalanish tartibini belgilaydi.

2. Ushbu Nizom talablari gidroenergetika sohasidagi tashkilotlarga hamda aholi isteʼmoli uchun ichimlik suv, issiq suv va issiqlik energiyasini yetkazib beruvchi kommunal soha tashkilotlariga, shuningdek, sanoat korxonalariga texnik suv yetkazib berish boʻyicha koʻrsatilgan xizmatlarga nisbatan tatbiq etilmaydi.

3. Ushbu Nizomda quyidagi asosiy tushunchalardan foydalaniladi:

suv isteʼmolchisi — oʻz ehtiyojlarini qondirish uchun suv obyektidan yoki suv xoʻjaligi obyektidan suv resurslarini belgilangan tartibda oluvchi jismoniy yoki yuridik shaxs;

suv xoʻjaligining foydalanuvchi tashkilotlari — suv xoʻjaligi obyektlaridan foydalanuvchi tumanlar (Quvasoy shahar) irrigatsiya boʻlimlari, irrigatsiya tizimi boshqarmalari, magistral kanallar (tizimlar) boshqarmalari, nasos stansiyalari va energetika boshqarmalari, meliorativ ekspeditsiyalar, suv omborlaridan va yirik gidrotexnika inshootlaridan foydalanish boshqarmalari, Qoraqalpogʻiston Respublikasi Suv xoʻjaligi vazirligi, Oʻzbekiston Respublikasi Suv xoʻjaligi vazirligi huzuridagi irrigatsiya tizimlari havza boshqarmalari);

suv xoʻjaligining maxsus xizmati — suv xoʻjaligining foydalanuvchi tashkilotlari tarkibida yuridik shaxs maqomiga ega boʻlmagan holda faoliyat yuritadigan hamda suv xoʻjaligi tashkilotlari va suv isteʼmolchilari oʻrtasida tuzilgan shartnoma asosida suv yetkazib berish va boshqa suv xoʻjaligi xizmatlari koʻrsatish uchun tashkil etilgan xizmat.

4. Suv xoʻjaligining foydalanuvchi tashkilotlari tomonidan suv isteʼmolchilariga suv yetkazib berish boʻyicha xizmatlar ular oʻrtasida tuziladigan shartnomaga muvofiq toʻlovlar asosida koʻrsatiladi.

2-bob. Suv yetkazib berish xarajatlarini aniqlash tartibi

5. Suv xoʻjaligining maxsus xizmati tomonidan suv isteʼmolchilariga suv yetkazib berish va boshqa suv xoʻjaligi xizmatlari (keyingi oʻrinlarda — suv xoʻjaligi xizmatlari) uchun toʻlov miqdori:

suvni suv isteʼmolchisiga yetkazib berish xarajatlari suv xoʻjaligining maxsus xizmatini saqlash (xodimlar mehnatiga haq toʻlash va ularni moddiy ragʻbatlantirish, transport vositalarini xarid qilish, ulardan foydalanish, kommunal toʻlovlar va boshqa xarajatlar);

xoʻjaliklararo sugʻorish tarmoqlari va boshqa suv xoʻjaligi obyektlarini (ikki va undan ortiq suv isteʼmolchisiga xizmat koʻrsatuvchi sugʻorish tarmoqlari, ulardagi gidrotexnika inshootlari, nasos agregatlari, sugʻorish quduqlari) ishonchli boshqarish, ularni taʼmirlash-tiklash ishlarini amalga oshirish;

suv isteʼmolchisining buyurtmanomasiga asosan uning bosh suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritishni raqamlashtirish, shuningdek, koʻrsatilgan boshqa suv xoʻjaligi xizmatlari uchun xarajatlardan iborat.

6. Suv xoʻjaligining maxsus xizmati kelgusi yil uchun suv isteʼmolchilariga koʻrsatiladigan suv xoʻjaligi xizmatlari va ularning xarajatlari boʻyicha har kalendar yilning 10-dekabriga qadar xarajatlar smetasini ishlab chiqadi.

Suv isteʼmolchisi tomonidan toʻlanadigan yillik toʻlovlar miqdori xarajatlar smetasiga asosan suv isteʼmolchisining sugʻoriladigan yer maydoni (ekiladigan ekin turi, ularni sugʻorish rejimi va boshqa koʻrsatkichlardan kelib chiqib) yoki yetkazib beriladigan har bir kub metr suv hajmi uchun oylar kesimida belgilanadi.

Suv isteʼmolchisiga suv yetkazib berish, shuningdek, xoʻjaliklararo sugʻorish va boshqa inshootlarni ishonchli boshqarish, ularni taʼmirlash-tiklash ishlarini amalga oshirish xarajatlari har kalendar yilning 20-dekabriga qadar suv isteʼmolchilarining umumiy yigʻilish qarori bilan tasdiqlanadi hamda 25-dekabrga qadar ularga yetkaziladi.

Suv isteʼmolchisining buyurtmanomasiga asosan koʻrsatiladigan boshqa suv xoʻjaligi xizmatlari uchun alohida shartnoma rasmiylashtiriladi.

7. Suv isteʼmolchilari tomonidan toʻlovlarni olingan suv hajmi boʻyicha belgilashda bir kub metr suv yetkazish tarifi quyidagi formula bilan hisoblanadi:

X_t = T_s/ W

T_s — suv xoʻjaligining maxsus xizmati tomonidan uning xizmat koʻrsatish hududidagi suv isteʼmolchilariga suv yetkazib berish hamda xoʻjaliklararo sugʻorish va boshqa suv xoʻjaligi obyektlarini ishonchli boshqarish, ularni taʼmirlash-tiklash ishlarini amalga oshirish boʻyicha yillik hisobiy xarajatlar miqdori (soʻmda);

W — suv xoʻjaligining maxsus xizmati tomonidan uning xizmat koʻrsatish hududidagi suv isteʼmolchilariga ajratiladigan koʻp yillik oʻrtacha hisobiy suv olish limiti (kub metrda).

3-bob. Suv yetkazib berish va koʻrsatilgan boshqa xizmatlar uchun haq toʻlash tartibi

8. Suv xoʻjaligining maxsus xizmati bilan suv isteʼmolchisi oʻrtasida belgilangan tartibda suvning kundalik hisob jurnali yuritiladi hamda har oy yakuni bilan keyingi oyning 5 sanasigacha yetkazib berilgan suvning hajmi hamda koʻrsatilgan suv xoʻjaligi xizmatlari toʻgʻrisida dalolatnoma rasmiylashtiriladi.

9. Suv isteʼmolchilari rasmiylashtirilgan dalolatnomaga asosan oʻtgan oy davomida olingan suv hajmidan, shuningdek, koʻrsatilgan boshqa xizmatlar hajmidan kelib chiqib hisoblangan toʻlovlarni keyingi oyning 10 sanasiga qadar suv xoʻjaligining maxsus xizmatining shaxsiy hisobvaragʻiga oʻtkazib beradi.

Buning uchun suv xoʻjaligi tashkilotlarida suv xoʻjaligining maxsus xizmati uchun Moliya vazirligi Gʻaznachiligida uning maxsus shaxsiy hisobvaraq ochiladi.

Suv isteʼmolchisining buyurtmanomasi boʻyicha tuzilgan shartnoma asosida koʻrsatilgan suv xoʻjaligi xizmatlari uchun toʻlovlar shartnoma shartlariga binoan amalga oshiriladi.

4-bob. Suv yetkazib berish boʻyicha koʻrsatilgan xizmatlardan tushadigan mablagʻlardan foydalanish tartibi

10. Suv yetkazib berish va koʻrsatilgan boshqa suv xoʻjaligi xizmatlardan maxsus shaxsiy hisobvaraqlarda jamlangan mablagʻlar suv xoʻjaligining maxsus xizmati tomonidan quyidagi maqsadlar uchun sarflanadi:

suv xoʻjaligining maxsus xizmatini saqlashga (xodimlarga, jumladan amaldagi meʼyorlar doirasida jalb etilgan mavsumiy ishchilar mehnatiga haq toʻlash, xodimlarni belgilangan tartibda ijtimoiy himoya qilish va moddiy ragʻbatlantirish, kommunal toʻlovlar va boshqa xarajatlar);

transport vositalarini (velosiped, mototsikl, moped va boshqalar) xarid qilish, ulardan foydalanishga;

xoʻjaliklararo sugʻorish va boshqa suv xoʻjaligi obyektlarini ishonchli boshqarish, ularni taʼmirlash-tiklash ishlarini amalga oshirishga;

suv xoʻjaligi tashkilotlarining moddiy-texnik bazasini mustahkamlash uchun meliorativ texnikalari xarid qilish va ulardan foydalanishga, shu jumladan lizing toʻlovlarini amalga oshirishga;

mexanik qurilmalarga ega suv xoʻjaligi inshootlarida elektr energiyasi xarajatlarini qoplashga;

suv isteʼmolchilarining buyurtmanomasiga asosan tuzilgan shartnomalar boʻyicha ularning bosh suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritishni raqamlashtirish, shuningdek, boshqa suv xoʻjaligi xizmatlariga.

5-bob. Yakunlovchi qoida

11. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradi.

Keyingi tahrirga qarang.

Vazirlar Mahkamasining 2022-yil 19-apreldagi 196-son qaroriga
2-ILOVA

Davlat suv xoʻjaligi obyektlarini davlat-xususiy sheriklik shartlari asosida boshqaruvga oladigan klasterlar

ROʻYXATI

T/r	Tumanlar nomi	Klasterlar nomi	Klaster hisobidagi yer maydoni, ga	klasterlar boshqaruviga oʻtkaziladigan suv xoʻjaligi obyektlari
				kanallar		kollektorlar		nasos stansiyalari soni, ta	sugʻorish quduqlari soni, ta
				soni, ta	uzunligi, km	soni, ta	uzunligi, km	nasos stansiyalari soni, ta	sugʻorish quduqlari soni, ta
Jami respublika boʻyicha			290 311	194	1 641	1 007	3 402	104	229
Andijon viloyati
1.	Jalaquduq	“Ishonch zamin klaster” MCNJ	902			1	2,0
2.	Marhamat	“Marhamat tekstil agro” MChJ	2 533	1	3,5
3.	Ulugʻnor	“Bunyodkor magistral” MChJ	2 168			1	2,8
Jami			5 603	1	3,5	2,0	4,8
Buxoro viloyati
4.	Peshku	“Buxoro Agro cluster” MChJ	8 657	10	139,3	77	234,4	3	24
Jami			8 657	10	139,3	77	234,4	3	24
Qashqadaryo viloyati
5.	Gʻuzor	“Kitob ip yigiruv” AJ	576	5	44,1				6
6.	Gʻuzor	“Canadian Soy Integrated Pro” MChJ	2 151	1	2,0
7.	Qarshi	“Qarshi Agroklaster” MChJ	423	1	6,2
8.	Qarshi	“Qarshi Xilal klaster” MChJ	93	1	16,4
9.	Kasbi	“Indorama agro” MChJ	12 014	2	16,6	15	50
10.	Mirishkor	“Mirishkor textiles group kluster” MChJ	3 125	2	23,9
11.	Nishon	“Indorama agro” MChJ	252	4	24,8	227	163
12.	Chiroqchi	“Chiroqchi gʻalla klaster” MChJ	305	1	18,6				1
13.	Shahrisabz	“Oqsaroy klaster” MChJ	1 262	8	64,4				13
14.	Yakkabogʻ	“Yakkabogʻ Boshoqlari Agro” MChJ	78	4	75,2			1
Jami			20 279	29	292,2	242	212,6	1
Namangan viloyati
15.	Mingbuloq	“Art Soft Nolding” MChJ	4098			16	18,2
16.	Pop	“Art Soft Nolding” MChJ	23579	25	144	17	104,5	25
17.	Toʻraqoʻrgʻon	“Namangan Toʻqimachi” MChJ	705			1	1,2
18.	Chust	“Namangan Toʻqimachi” MChJ	1271			5	11,5
Jami			29 653	25	144,0	39	135,4	25
Samarqand viloyati
19.	Bulungʻur	“Samarqand Garden Plast” MChJ	1 314			1	0,3
20.	Ishtixon	“Marokand Sifat Tekstil” MChJ	2 438			25	14,9		5
21.	Kattaqoʻrgʻon	“Amina gold invest” MChJ	6 367	2	3,2	1	5,0		1
22.		“Aminagold klaster” MChJ	4 338			4	15,0	2
23.		“Fayz bashirbek yuksalish” MChJ	100			2	5,0
24.	Oqdaryo	“Prestij don” MChJ	3 500						1
25.	Paxtachi	“Paxtachi klaster” MChJ				15	20,0
26.	Payariq	“Samarqand Sotton klaster” MChJ				21	38,0
27.	Pastdargʻom	“Samarqand kamalak tekstil” MChJ	2 463			40	70,0
28.	Toyloq	“Bogʻizagʻon” MChJ	3 260			5	2,0
Jami			23 780	2	3	114	170,2	2	7
Surxondaryo viloyati
29.	Angor	“Zamin Angor klaster” MChJ	9 213	6	58,8	16	107,7
30.	Bandixon	“Bandixon tekstil klaster” MChJ	354					1
31.	Jarqoʻrgʻon	“Termiz Jayxun klaster” MChJ	6 480	2	13,0	2	13,9
32.	Qiziriq	“Surxon Kotton tekstil” MChJ	22 402	2	53,4	13	125,0	4
33.	Qumqoʻrgʻon	“Termiz Jayxun klaster” MChJ	494	1	10,0
34.	Qumqoʻrgʻon	“Bek agro klaster” MChJ	372	1	18,0
35.	Muzrabot	“Muzrabot RES” MChJ	365	2	34,0			4
36.		“Muzrabot Indenim” MChJ	8 700			17	164,8
37.		“Surxon Boshoqli don” MChJ	11 200					3
38.	Oltinsoy	“Denov tekstil klaster” MChJ	84			7	65,9
39.	Termiz	“Termiz Klaster” Agrofirmasi	473			1	2,0
40.	Sherobod	“Surxondaryo Agroxizmat” MChJ	329			4	38,7
41.		“Barakali Dunyo-M eksport” MChJ	226			9	41,0
42.		“Surxon-Sherobod klaster” MChJ	55			4	26,8
43.	Shoʻrchi	“Shoʻrchi indenim klaster” MChJ	586			1	14,0	5
Jami			61 332	14	187,2	74	599,8	17
Sirdaryo viloyati
44.	Mirzaobod	“Bek Cluster” MChJ	11 148			73	397,6	1
45.	Oqoltin	“Apk Okoltin” UK	4 077			8	85,0
46.	Oqoltin	“Indorama Agro” MChJ	11 558			7	62,9
47.	Sardoba	“Indorama Agro” MChJ	12 600			11	92,7	1
48.	Sardoba	Sardoba universal claster MChJ	800			2	8,4
49.	Sirdaryo	“Guliston agro grup” MChJ	240			2	6,0	1
Jami			40 423			103	652,6	3
Toshkent viloyati
50.	Bekobod	“ARK Bekobod” MChJ	6 306	6	108,0	13	170,0	14
51.	Boʻka	“ARK Boʻka” MChJ	4 500	3	56,0	7	35,1	3
52.	Chinoz	“ARK Chinoz” MChJ	4 250	4	58,2	6	112,0	5
53.	Chinoz	“Chinoz Oltindon” MChJ	5 800	20	73,0	16	116,0
54.	Quyichirchiq	“TST Agro cluster” MChJ	40 071	23	160,8	39	234,0
55.	Oqqoʻrgʻon	“ABC Oqqorgon Agro Classter” MChJ	9 241	11	42,0	9	55,0
56.	Oʻrtachirchiq	“Real Agro Cotton” MChJ	1 514	5	43,3	3	25,0	1
Jami			71 681	72	541,3	93,0	747,1	23
Fargʻona viloyati
57.	Bagʻdod	“Ferghana Spinning” MChJ	57	1	1,5	1	2,0
58.	Dangara	“Musavartex” MChJ	377					1
59.	Oltiariq	“Xamza Ekspo Art Tekstil” XK	277	2	2,4			1	2
60.	Qoʻshtepa	“Global Textile Solutions” MChJ	1 219	2	5,9	71	105,0	2	3
61.	Rishton	“Zamin gold invest 2020” MChJ	28	1	0,2
62.	Rishton	“Rusoʻzbekteks” MChJ	177	1	0,4			3
63.	Toshloq	“Exro Kollor Print Teks” MChJ	53			2	2,8
64.	Oʻzbekiston	“Bulut textile” MChJ	350						10
65.	Uchkoʻprik	“Uchkoʻprik” MChJ	32	1	0,4
66.	Fargʻona	“Fergana Oseana” MChJ	6 695	4	11,9			8	154
67.	Furqat	“Istiqbolli Gʻalla Eksport” MChJ	6 630	4	27,5	138	306,0		29
Jami			15 895	16	50,2	212	415,8	15	198
Xorazm viloyati
68.	Bogʻot	“Kobotex” MChJ	4 000	2	22,6	12	84,0
69.	Gurlan	“Gurlan Global Teks” MChJ	560	1	35,2	7	12,1	1
70.	Qoʻshkoʻpir	“WBM Qoʻshkoʻpir kaster” MChJ	1 177	2	74,3	2	8,3	3
71.	Urganch	“Urganch Xalq Nurafshoni” MChJ	2 495	5	24,7	5	41,2
72.	Xazorasp	“Xazorasp teks” MChJ	912	3	25,5	9	25,1	5
73.	Xonqa	“Xorazm Tex” MChJ	1 116	1	8,0	2	5,0
74.	Xonqa	“Xonqa chorva nasl” MChJ	218	1	4,0
75.	Xiva	“Khiva Cluster” MChJ	1 020	2	10,1	5	17,7	3
76.	Yangiariq	“Yangiariq Tex” MChJ	1 102	5	43,2	6	27,5	3
77.	Yangibozor	“Yangibozor textile Agro Kluster” MChJ	167	1	12,0	2	3,2
78.	Tuproqqalʼa	“Tuproqqalʼa textile” MChJ	240	2	20,6	1	5,0
Jami			13 007	25	280,2	51	229,1	15

Izoh. Klasterlar roʻyxati va klasterlar boshqaruviga beriladigan suv xoʻjaligi obyektlariga oʻrganish va xatlov jarayonida aniqlik kiritilishi mumkin.

Vazirlar Mahkamasining 2022-yil 19-apreldagi 196-son qaroriga
3-ILOVA

Davlat-xususiy sheriklik shartlari asosida xususiy sektor boshqaruviga beriladigan davlat suv xoʻjaligi obyektlarining tumanlar kesimidagi

ASOSIY KOʻRSATKIChLARI

T/r	Tumanlar nomi	Sugʻoriladigan maydon, ga	Xususiy sektor boshqaruviga oʻtkaziladigan suv xoʻjaligi obyektlari
			kanallar		kollektorlar		nasos stansiyalari soni, ta	sugʻorish quduqlari soni, ta
			soni, dona	uzunligi, km	soni, dona	uzunligi, km	nasos stansiyalari soni, ta	sugʻorish quduqlari soni, ta
Jami respublika boʻyicha		1 008 309	753	6 204,1	845	4 328,2	315	331
Qoraqalpogʻiston Respublikasi
1.	Toʻrtkoʻl	27 920	16	288,7	3	42,1
2.	Beruniy	26 910	22	323,2	5	53,8
3.	Ellikqalʼa	27 450	15	248,0	1	32,4
4.	Amudaryo	32 030	24	296,6	2	31,2	49
5.	Nukus	23 020	8	116,4	7	146,7	5
6.	Moʻynoq	3 740	12	271,6	1	36,3
7.	Boʻzatov	4 540	4	153,6	3	75,7
Jami		145 610	101	1698,1	22	418,2	54
Andijon viloyati
8.	Andijon	20 000	27	249,1	14	56,9	28	8
9.	Asaka	16 996	31	103,9	34	71,1	15	3
10.	Buloqboshi	12 500	14	66,5	17	78,4	3
11.	Xoʻjaobod	11 700	20	121,6	21	68,2	1
Jami		61 196	92	541	86	275	47	11
Buxoro viloyati
12.	Buxoro	16 400	10	36,4	4	74,3
Jami		16 400	10	36,4	4	74,3
Jizzax viloyati
13.	Baxmal	15 870	5	41,2	3	19,5
14.	Gʻallaorol	14 400	6	84,5	14	138,9
15.	Zomin	18 600	10	32,9	14	34,1
16.	Forish	2 395	5	26,4	2	9,7
17.	Yangiobod	3 928					4
Jami		55 193	26	185,0	33	202,2	4
Qashqadaryo viloyati
18.	Dehqonobod	2 215	4	19,1
19.	Qamashi	23 100	6	34,5	15	65		3
20.	Kitob	15 323	22	129,2	13	44,6		6
21.	Chiroqchi	19 587	25	124,1	25	80		5
22.	Shahrisabz	19 979	7	54,1	16	91		3
23.	Yakkabogʻ	39 247	13	78,6	18	101,2
Jami		119 450	77	440	87	382		17
Navoiy viloyati
24.	Xatirchi	16 700	20	202,1	6	59,4	1
Jami		16 700	20	202,1	6	59,4	1
Namangan viloyati
25.	Kosonsoy	17 963	30	172,3	8	56,4	4
26.	Toʻrakoʻrgʻon	12 264	16	100,2	6	35,1	1
27.	Chortoq	13 432	25	170,4	2	23,4
28.	Yangiqoʻrgʻon	9 527	26	283,6	13	107,8	5	10
Jami		53 186	97	726,5	29	222,7	10	10
Samarqand viloyati
29.	Bulungʻur	29 859	4	50,1	34	110,2	2	36
30.	Jomboy	31 600	8	66,4	21	78,1		37
31.	Samarqand	17 769	9	42,6	19	80,9	7	2
32.	Tayloq	16 284	7	32,6	46	102,8		55
33.	Urgut	30 447	6	82,2	2	18,1	24	18
34.	Qoʻshrobod	5 745						15
Jami		131 704	34	273,9	122	390,1	33,0	163,0
Surxondaryo viloyati
35.	Angor	21 120	8	75,0	16	107,7	3
36.	Boysun	2 938	5	45,4
37.	Denov	30 281	12	144,0	13	86,4	3	15
38.	Oltinsoy	19 923	3	39,0	7	65,9	4
39.	Sariosiyo	13 700	6	70,0	1	5,0	4	22
40.	Termiz	11 927	8	70,1	11	77,3	3
Jami		99 889	42	443,5	48	342,3	17	37
Toshkent viloyati
41.	Boʻstonliq	12 849	22	140,0	14	34,6	14
42.	Zangiota	10 637	19	87,2	42	153,0	4
43.	Ohangaron	32 374	13	90,0	49	191,6	10
44.	Parkent	13 805	8	48,6	17	52,1	8
45.	Toshkent	10 221	15	83,7	43	171,5	4
46.	Qibray	13 408	40	309,5	36	150,2	3
47.	Yangiyoʻl	18 788	31	170,4	52	204,6	39	2
Jami		112 082	148	929,4	253	957,6	82	2
Fargʻona viloyati
48.	Quvasoy sh	13 744	13	55,0	6	23,5	1	60
49.	Fargʻona sh	3 216						17
50.	Oltiariq	25 900	8	46,7	8	34,1	1	6
51.	Rishton	24 000	15	65,4	12	65,3	1	4
52.	Soʻx	4 638	11	57,0
53.	Oʻzbekiston	25 400	8	36,4	5	33,5		3
54.	Fargʻona	29 700	6	45,0	3	25,1		1
Jami		126 598	61	305,5	34	181,5	3	91
Xorazm viloyati
55.	Bogʻot	22 000	10	140,0	20	175,2	17
56.	Urganch	28 600	16	110,8	43	316,6	29
57.	Xiva	19 700	19	172,3	58	331,1	18
Jami		70 300	45	423,1	121	822,9	64

Izoh. Tumanlar roʻyxati hamda xususiy sektor boshqaruviga beriladigan suv xoʻjaligi obyektlariga oʻrganish va xatlov jarayonida aniqlik kiritilishi mumkin.

Vazirlar Mahkamasining 2022-yil 19-apreldagi 196-son qaroriga
4-ILOVA

Davlat suv xoʻjaligi obyektlarini davlat-xususiy sheriklik shartlari asosida xususiy sherikka berish hamda xususiy sherikning investitsiya salohiyatini oʻrganish boʻyicha ishchi guruh

TARKIBI

1.	Gʻaniyev Sh.	—	Bosh vazir oʻrinbosari, Ishchi guruh rahbari
2.	Xamrayev Sh.	—	Suv xoʻjaligi vaziri, Ishchi guruh rahbari oʻrinbosari
3.	Mirzayev A.	—	Suv xoʻjaligi vazirining oʻrinbosari
4.	Isakov O.	—	Moliya vazirining oʻrinbosari
5.	Mirzayev T.	—	Moliya vazirligi departament boshligʻi
6.	Karimov A.	—	Adliya vazirining oʻrinbosari
7.	Usmonov B.	—	Davlat aktivlarini boshqarish agentligi direktorining oʻrinbosari
8.	Bozorov Z.	—	Moliya vazirligi huzuridagi Davlat-xususiy sheriklikni rivojlantirish agentligi direktori v.v.b
9.	Duvlanov A.	—	Moliya vazirligi huzuridagi Davlat-xususiy sheriklikni rivojlantirish agentligi boʻlim boshligʻi
10.	lavozimi boʻyicha	—	Qoraqalpogʻiston Respublikasi Moliya vaziri va viloyat hokimliklari moliya boshqarmalari boshliqlari
11.	lavozimi boʻyicha	—	Qoraqalpogʻiston Respublikasi suv xoʻjaligi vaziri va irrigatsiya tizimlari havza boshqarmalari boshliqlari
12.	Djurayev I.	—	Suv xoʻjaligi vazirligi boshqarma boshligʻi — Ishchi guruh kotibi

Izoh. Ishchi guruh aʼzolari boshqa ishga oʻtganda uning tarkibiga ushbu lavozimga yangidan tayinlangan yoki tegishli funksiyalarni bajarish zimmasiga yuklangan shaxs kiritiladi.

(Qonunchilik maʼlumotlari milliy bazasi, 20.04.2022-y., 09/22/196/0323-son; 19.02.2024-y., 09/24/79/0136-son)