Hujjat 27.11.2021 00 sanasi holatiga
Amaldagi versiyaga o‘tish
Oʻzbekiston Respublikasi Prezidentining
Qarori
Tibbiy-ijtimoiy ekspertiza xizmati faoliyati hamda bolalarga nogironlikni belgilash tizimini yanada takomillashtirish chora-tadbirlari toʻgʻrisida
Fuqarolarni ortiqcha ovoragarchilik va byurokratik toʻsiqlarsiz tibbiy-ijtimoiy ekspertizadan oʻtkazish, nogironligi boʻlgan shaxslarning toʻlaqonli hayot tarzini yuritish hamda oʻz huquqlari va salohiyatini roʻyobga chiqarish imkoniyatlarini kengaytirish, ularni reabilitatsiya qilishga toʻgʻri yoʻnaltirish hamda tegishli chora-tadbirlar bilan qamrab olish koʻlamini yanada kengaytirish, shuningdek, Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturi ijrosini taʼminlash maqsadida:
1. Oʻzbekiston Respublikasi Prezidentining 2021-yil 25-martdagi “Keksalar va nogironligi boʻlgan shaxslarni ijtimoiy qoʻllab-quvvatlash, “Saxovat” va “Muruvvat” internat uylari tizimini yanada rivojlantirish toʻgʻrisida”gi PF-6195-son Farmoniga muvofiq Respublika tibbiy-ijtimoiy ekspertiza inspeksiyasi va uning hududiy boʻlinmalari Tibbiy-ijtimoiy xizmatlarni rivojlantirish agentligi tizimiga oʻtkazilganligi hamda unga fuqarolarni tibbiy-ijtimoiy ekspertizadan oʻtkazish va nogironlikni belgilash tizimini yanada takomillashtirish vazifasi yuklanganligi maʼlumot uchun qabul qilinsin.
2. Fuqarolarni tibbiy-ijtimoiy ekspertizadan oʻtkazish va nogironlikni belgilash tizimini takomillashtirishning asosiy yoʻnalishlari etib quyidagilar belgilansin:
fuqarolarga nogironlikni belgilashda korrupsiyaning sabab va shart-sharoitlarini bartaraf etish, manfaatlar toʻqnashuviga yoʻl qoʻymaslik;
nogironlikni belgilashda fuqarolarning ortiqcha ovoragarchiliklarini bartaraf etish, sohada mavjud byurokratik toʻsiq va gʻovlarni bekor qilish;
maʼlumotlar elektron bazasini shakllantirish orqali fuqarolarga zamon talablariga javob beradigan samarali xizmat koʻrsatish tizimini shakllantirish.
3. Shunday tartib oʻrnatilsinki, unga muvofiq:
a) 2021-yil 1-dekabrdan boshlab:
shaxs sogʻligʻining holatiga koʻra Respublika tibbiy-ijtimoiy ekspertiza inspeksiyasining tibbiy-ijtimoiy ekspert komissiyasiga (keyingi oʻrinlarda — tibbiy-ijtimoiy ekspert komissiyasi) borish imkoniga ega boʻlmagan holatda nogironlikni belgilash biriktirilgan hududlarga chiqib koʻchma majlislarda, shaxsning uyida yoki davolanishda boʻlgan statsionarda hamda sirtdan koʻrikdan oʻtkazish orqali tashkil etiladi;
Keyingi tahrirga qarang.
nogironlik belgilari aniq koʻrinib turgan, anatomik nuqsonlari boʻlgan shaxslarni klinik-funksional maʼlumotlarni olishga doir qoʻshimcha tekshiruvdan oʻtkazmasdan turib, tasdiqlangan kasalliklar roʻyxati asosida fuqaroning ishtirokisiz ular nogironligi boʻlgan shaxs deb topilganda nogironlik muddatsiz davrga belgilanadi.
tibbiy-ijtimoiy ekspert komissiyalari tomonidan nogironlik toʻgʻrisidagi maʼlumotnomalarda nogironligi boʻlgan shaxslarning ishlashi mumkin boʻlgan kasblar boʻyicha tavsiyalar beriladi.
Keyingi tahrirga qarang.
b) 2022-yil 1-avgustdan boshlab, dastlab Toshkent shahrida nogironligi boʻlgan shaxslarni tibbiy-ijtimoiy ekspert komissiyalarida hisobga olish va koʻrikdan oʻtkazishning yangi “Tibbiy-ijtimoiy ekspertiza” elektron axborot tizimi (keyingi oʻrinlarda — axborot tizimi) joriy etiladi.
Bunda, fuqarolarga nogironlikni belgilash uchun asos hisoblanadigan (tibbiy yoʻllanma, kasallik tarixi va ambulator kartadan koʻchirmalar va boshqa) maʼlumotlar axborot tizimiga elektron tarzda kiritilishi taʼminlanadi;
v) 2023-yil 1-yanvardan boshlab axborot tizimi respublikaning boshqa barcha hududlarida toʻliq joriy etiladi.
Bunda:
nogironlikni belgilashda davolash-profilaktika muassasalarining yoʻllanmalari, kasallik tarixidan koʻchirmalar, ambulator karta, vaqtincha mehnatga layoqatsizlik varaqasi hamda mehnat vazifalarini bajarish bilan bogʻliq holdagi baxtsiz hodisa yoki sogʻliqning boshqacha tarzda shikastlanganligi toʻgʻrisidagi hujjatlar toʻliq axborot tizimi orqali qabul qilinadi;
vaqtincha mehnatga layoqatsizlik varaqasi hamda mehnat vazifalarini bajarish bilan bogʻliq holdagi baxtsiz hodisa yoki sogʻliqning boshqacha tarzda shikastlanganligi toʻgʻrisidagi maʼlumotlar “Yagona mehnat milliy tizimi” idoralararo dasturiy-apparati hamda axborot tizimi orasida maʼlumot almashinuvi asosida olinadi;
axborot tizimidagi fuqaroga tegishli maʼlumotlardan kelib chiqib, organizmning funksiyasi buzilishi va hayot faoliyati chegaralanishini hisobga olgan holda nogironlikni fuqarolarning ishtirokisiz belgilash tartibi joriy etiladi;
nogironligi boʻlgan shaxsga taalluqli boʻlgan maʼlumotlar, davolovchi hamda tibbiy xulosa bergan shifokorlar toʻgʻrisidagi maʼlumotlar axborot tizimida qayd etib boriladi;
nogironlik belgilangan shaxslarga pensiya va ijtimoiy nafaqalarni tayinlash uchun elektron maʼlumotlar “Pensiya” hamda “Ijtimoiy himoya yagona reyestri” axborot tizimlariga avtomatik tarzda yuboriladi.
4. Respublika tibbiy-ijtimoiy ekspertiza inspeksiyasining pediatriya tibbiy-ijtimoiy ekspert komissiyalari (keyingi oʻrinlarda — pediatriya tibbiy-ijtimoiy ekspert komissiyalari) tashkil etilsin va shu munosabat bilan Sogʻliqni saqlash vazirligi tizimining shifokorlari zimmasiga 18 yoshgacha boʻlgan bolalarga nogironlikni belgilash boʻyicha yuklatilgan qoʻshimcha funksiyalar bekor qilinsin.
Keyingi tahrirga qarang.
5. Belgilab qoʻyilsinki:
18 yoshgacha boʻlgan bolalarni nogironligi boʻlgan bola deb topish pediatriya tibbiy-ijtimoiy ekspert komissiyalari tomonidan amalga oshiriladi;
18 yoshdan katta fuqarolarni nogironligi boʻlgan shaxs deb topish tibbiy-ijtimoiy ekspert komissiyalari tomonidan amalga oshiriladi;
pediatriya tibbiy-ijtimoiy ekspert komissiyalari Davlat budjeti mablagʻlari hisobidan moliyalashtiriladigan doimiy faoliyat koʻrsatuvchi tuzilma hisoblanadi.
Keyingi tahrirga qarang.
6. Quyidagilar:
Qoraqalpogʻiston Respublikasi, Andijon, Qashqadaryo, Samarqand va Fargʻona viloyatlarida ikkitadan pediatriya tibbiy-ijtimoiy ekspert komissiyalari;
Buxoro, Jizzax, Navoiy, Namangan, Sirdaryo, Surxondaryo, Toshkent, Xorazm viloyatlari va Toshkent shahrida bittadan pediatriya tibbiy-ijtimoiy ekspert komissiyalari;
Qashqadaryo, Sirdaryo, Xorazm va Namangan viloyatlarida qoʻshimcha ravishda bittadan tumanlararo tibbiy-ijtimoiy ekspert komissiyalari;
Respublika tibbiy-ijtimoiy ekspertiza inspeksiyasida 3 nafar shtat birligidan iborat informatsion texnologiyalarni joriy etish boʻlimi tashkil etilsin.
Bunda, Respublika tibbiy-ijtimoiy ekspertiza inspeksiyasi va tibbiy-ijtimoiy ekspert komissiyalarining shtat birliklari Oʻzbekiston Respublikasi Prezidentining 2021-yil 5-maydagi “Sogʻliqni saqlash tizimida olib borilayotgan islohotlarni izchil davom ettirish va tibbiyot xodimlarining salohiyatini oshirish uchun zarur shart-sharoitlar yaratish toʻgʻrisida”gi PF-6221-son Farmoniga muvofiq ajratilgan shtat birliklari hisobidan shakllantiriladi.
Keyingi tahrirga qarang.
7. Pediatriya tibbiy-ijtimoiy ekspert komissiyalarining asosiy vazifalari etib quyidagilar belgilansin:
18 yoshgacha boʻlgan bolalarni tibbiy-ijtimoiy ekspertizadan oʻtkazish hamda nogironligi boʻlgan shaxslar jamiyatlari bilan birgalikda nogironlikni belgilash sohasida davlat dasturlarini ishlab chiqishda qatnashish;
18 yoshgacha boʻlgan bolalarni nogironlikka olib keluvchi omillarni oʻrganish hamda sogʻligʻi yomonlashuvining oldini olish chora-tadbirlarini ishlab chiqish;
nogironligi boʻlgan bolalarni reabilitatsiya qilishning yakka tartibdagi dasturini ishlab chiqish va amalga oshirish sohasini nazorat qilish va muvofiqlashtirish;
sohaning joriy va istiqboldagi ehtiyojlarini hisobga olgan holda kadrlarni oʻqitish, tayyorlash, qayta tayyorlash va malakasini oshirishning ilgʻor usullarini tizimli asosda joriy etishda qatnashish.
Keyingi tahrirga qarang.
8. Nogironligi boʻlgan shaxslarni tibbiy-ijtimoiy ekspert komissiyalarida hisobga olish va koʻrikdan oʻtkazishning elektron axborot tizimini yaratish va kadrlar salohiyatini oshirish boʻyicha “Yoʻl xaritasi” ilovaga muvofiq tasdiqlansin.
9. Sogʻliqni saqlash vazirligi (B. Musayev) Tibbiy-ijtimoiy xizmatlarni rivojlantirish agentligi (A. Inakov) bilan birgalikda:
bir oy muddatda Sogʻliqni saqlash vazirligining 18 yoshgacha boʻlgan bolalarga nogironlikni belgilash masalalari uchun masʼul tibbiyot muassasalaridagi nogironlikka oid tibbiy xulosani berish bilan bogʻliq boʻlgan barcha hujjatlar belgilangan tartibda xatlovdan oʻtkazilishini va tegishli pediatriya tibbiy-ijtimoiy ekspert komissiyalariga topshirilishini taʼminlasin;
ikki oy muddatda davlat tibbiyot muassasasi tomonidan fuqarolarni tibbiy-ijtimoiy ekspertizaga yuborish tartibini nazarda tutuvchi vrachlik — maslahat komissiyasi toʻgʻrisida nizomni ishlab chiqsin va tasdiqlasin;
2022/2023 oʻquv yilidan boshlab tibbiy-ijtimoiy ekspertiza, reabilitologiya, tibbiy, ijtimoiy va kasbiy reabilitatsiya mutaxassislarini tayyorlashdagi magistratura, klinik ordinatura, qayta tayyorlash va malaka oshirish oʻquv dasturlarini xalqaro taʼlim standartlari asosida takomillashtirish choralarini koʻrsin;
har besh yilda kamida bir marta tibbiy-ijtimoiy ekspertiza xizmati tizimining tibbiyot xodimlari Sogʻliqni saqlash vazirligi tizimidagi taʼlim muassasalari va respublika ixtisoslashtirilgan ilmiy-amaliy tibbiyot markazlarida mutaxassisligi va tibbiy-ijtimoiy ekspertiza boʻyicha malaka oshirishi hamda birlamchi ixtisoslashtirish kurslaridan bepul oʻtishini taʼminlasin.
10. Mazkur qaror qabul qilingunga qadar berilgan nogironlik toʻgʻrisidagi eski namunadagi maʼlumotnomalar hamda rasmiylashtirilgan eski namunadagi nogironligi boʻlgan shaxslarni reabilitatsiya qilishning yakka tartibdagi dasturlari navbatdagi qayta koʻrik oʻtkazilgunga qadar yoki reabilitatsiya tadbirlarini amalga oshirish (agar nogironlik muddatsiz belgilangan boʻlsa) tugagungacha haqiqiy hisoblanishi belgilab qoʻyilsin.
11. Tibbiy-ijtimoiy xizmatlarni rivojlantirish agentligi (A. Inakov) Sogʻliqni saqlash vazirligi (B. Musayev), Bandlik va mehnat munosabatlari vazirligi (N. Xusanov), Moliya vazirligi (T. Ishmetov) hamda boshqa manfaatdor vazirlik va idoralar bilan birgalikda 2022-yil 1-iyunga qadar BMTning Taraqqiyot dasturi, Jahon banki, Jahon sogʻliqni saqlash tashkiloti va YUNISEFning texnik koʻmagini jalb qilgan holda nogironlikni belgilashning ijtimoiy modeliga bosqichma-bosqich oʻtish boʻyicha Oʻzbekiston Respublikasi Prezidenti qarori loyihasini ishlab chiqsin.
Bunda, xalqaro tajribani oʻrgangan holda Sogʻligʻi va hayot faoliyatining (funksiyalarining) cheklanishi xalqaro klassifikatsiyasi asosida fuqarolarga nogironlikni belgilashning ijtimoiy modeliga oʻtish Konsepsiyasini ishlab chiqish nazarda tutiladi.
12. Moliya vazirligi (T. Ishmetov) Tibbiy-ijtimoiy xizmatlarni rivojlantirish agentligining asoslantirilgan takliflariga muvofiq ushbu qarorda koʻzda tutilgan tadbirlarni amalga oshirishga va tibbiy-ijtimoiy ekspertiza xizmatining moddiy-texnika bazasini mustahkamlash, shu jumladan yangi tashkil etilayotgan pediatriya va tumanlararo tibbiy-ijtimoiy ekspert komissiyalarini transport vositalari bilan taʼminlash, shuningdek, axborot tizimini yaratish, kadrlar tayyorlash uchun zarur boʻlgan mablagʻlarni 2021-yilda Davlat budjeti parametrlarida sogʻliqni saqlash sohasi uchun nazarda tutilgan mablagʻlarning cheklangan miqdorlari doirasida ajratilishini hamda 2022-yildan boshlab Davlat budjeti parametrlarida nazarda tutilishini taʼminlasin.
Keyingi tahrirga qarang.
13. Tibbiy-ijtimoiy xizmatlarni rivojlantirish agentligi (A. Inakov):
a) Axborot texnologiyalari va kommunikatsiyalarini rivojlantirish vazirligi (Sh. Shermatov) bilan birgalikda:
uch oy muddatda Davlat budjeti parametrlari doirasida tibbiy-ijtimoiy ekspertiza xizmati faoliyatini takomillashtirishga ajratilgan mablagʻlar hisobiga 18 yoshgacha boʻlgan bolalarning nogironligi va undan katta yoshdagi nogironligi boʻlgan shaxslarning elektron maʼlumotlarini oʻzida jamlaydigan elektron maʼlumotlar bazasini takomillashtirsin;
2022-yil 1-avgustga qadar ilgʻor chet el tajribasini oʻrgangan holda, fuqarolarni tibbiy-ijtimoiy ekspert komissiyalarida hisobga olish va koʻrikdan oʻtkazishning yangi elektron axborot tizimini ishlab chiqsin;
nogironlik belgilangan shaxslarning nogironlik muddati tugayotganligi hamda qayta koʻrikka kelishi toʻgʻrisida qisqa xabarni begʻaraz tarzda ularning mobil aloqa vositalariga bir oy oldin yuborish mexanizmini tashkil etsin.
Bunda, vazirlik va idoralarga nogironligi boʻlgan shaxslar toʻgʻrisidagi maʼlumotlar “Elektron hukumat” tizimi idoralararo integratsiyalashuv platformasi orqali elektron tarzda yuboriladi;
b) Sogʻliqni saqlash vazirligi (A. Inoyatov) bilan birgalikda bir oy muddatda hududiy tibbiy-ijtimoiy ekspert komissiyalarining binolari va xonalari hamda jihozlar uchun minimal talablarni ishlab chiqsin hamda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga yetkazilishini taʼminlasin.
14. Sogʻliqni saqlash vazirligi (B. Musayev) 2022-yil 1-avgustdan Toshkent shahar hamda 2023-yildan boshlab respublikaning barcha hududlaridagi davolash-profilaktika muassasalari tomonidan yoʻllanmalarni, kasallik tarixidan koʻchirmalarni, ambulator kartalarni, vaqtincha mehnatga layoqatsizlik varaqasi hamda kasb kasalligini belgilash uchun asos boʻladigan maxsus vakolat berilgan sogʻliqni saqlash muassasasi xulosasidan koʻchirmalarni axborot tizimiga elektron tarzda kiritib borishni taʼminlasin.
Belgilansinki, nogironlikni belgilash bilan bogʻliq boʻlgan barcha hujjatlar davolash-profilaktika muassasalarining IT operator-hamshiralari tomonidan shaxsiy identifikatsion login va parollar asosida axborot tizimiga kiritib boriladi.
15. Vazirlar Mahkamasi bir oy muddatda tibbiy-ijtimoiy ekspertiza xizmati faoliyatini tartibga soluvchi Hukumat qarorini tasdiqlasin.
16. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ikki oy muddatda barcha hududiy tibbiy-ijtimoiy ekspert komissiyalarini belgilangan talablarga javob beradigan, ijtimoiy muhofazaga muhtoj fuqarolar tashrifi uchun qulay boʻlgan binolar va xonalarda begʻaraz asosda joylashtirish choralarini koʻrsin.
17. Tibbiy-ijtimoiy xizmatlarni rivojlantirish agentligi manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
18. Tibbiy-ijtimoiy xizmatlarni rivojlantirish agentligi Oʻzbekiston Milliy teleradiokompaniyasi hamda Axborot va ommaviy kommunikatsiyalar agentligi bilan birgalikda ushbu qaror maqsadi va vazifalarini ommaviy axborot vositalari va boshqa axborot resurslari orqali keng yoritish ishlarini tashkil qilsin.
19. Mazkur qaror ijrosini samarali tashkil qilishga masʼul va shaxsiy javobgar etib Tibbiy-ijtimoiy xizmatlarni rivojlantirish agentligi direktori A.K. Inakov belgilansin.
Qaror ijrosini muhokama qilib borish, masʼul ijrochi tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Amalga oshirilayotgan chora-tadbirlar natijadorligi yuzasidan Oʻzbekiston Respublikasi Prezidentiga 2022-yil 1-iyulga qadar axborot berilsin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2021-yil 27-noyabr,
PQ-22-son
Oʻzbekiston Respublikasi Prezidentining 2021-yil 27-noyabrdagi PQ-22-son qaroriga
ILOVA
Nogironligi boʻlgan shaxslarni tibbiy-ijtimoiy ekspert komissiyalarida hisobga olish va koʻrikdan oʻtkazishning elektron axborot tizimini yaratish va kadrlar salohiyatini oshirish boʻyicha
“Yoʻl xaritasi”

T/r

Chora-tadbirlar nomlanishi

Amalga oshirish mexanizmi

Ijro muddati

Masʼul ijrochilar

I. Nogironligi boʻlgan shaxslarni tibbiy-ijtimoiy ekspert komissiyalarida hisobga olish va koʻrikdan oʻtkazishning avtomatlashtirilgan elektron axborot tizimini yaratish

1.

Nogironligi boʻlgan shaxslarni tibbiy-ijtimoiy ekspert komissiyalarida hisobga olish va koʻrikdan oʻtkazishning elektron axborot tizimini (keyingi oʻrinlarda — axborot tizimi) ishlab chiqish uchun zarur boʻlgan mablagʻlar miqdorini aniqlash va ularni ajratish.

1. Axborot tizimini ishlab chiqish boʻyicha loyihaoldi maʼlumotlar tahlilini amalga oshirish, texnik talabnoma ishlab chiqish.

2. Tegishli kompaniyalarni jalb qilgan holda loyihani amalga oshirish uchun lozim boʻlgan mablagʻ miqdorini aniqlash hamda dastlabki smeta hujjatlarini ishlab chiqish.

3. Ishlab chiqilgan smeta hujjatlariga asosan zarur mablagʻlarni ajratish.

2021-yil dekabr

Tibbiy-ijtimoiy xizmatlarni rivojlantirish agentligi (Inakov), Moliya vazirligi (Ishmetov)

2.

Axborot tizimi boʻyicha loyiha-texnik hujjatlarni ishlab chiqish.

1. Axborot tizimini ishlab chiqish va ishga tushirish boʻyicha loyiha-texnik hujjatlarni ishlab chiquvchi va ekspertizadan oʻtkazuvchi tashkilotni aniqlash boʻyicha tanlov oʻtkazish.

2. Gʻolib deb topilgan tashkilot bilan birgalikda axborot tizimini yaratish boʻyicha loyiha-texnik hujjatlarni ishlab chiqish va ekspertizadan oʻtkazish. Hujjatlarda axborot tizimini manfaatdor vazirlik va idoralarning axborot tizimlari va maʼlumotlar bazasi bilan integratsiya qilishni nazarda tutish.

2022-yil fevral

Tibbiy-ijtimoiy xizmatlarni rivojlantirish agentligi (Inakov), Axborot texnologiyalari va kommunikatsiyalarini rivojlantirish vazirligi (Shermatov)

3.

Axborot tizimini ishlab chiqish va funksional jihatdan ishga tushirish.

1. Ishlab chiqilgan texnik-topshiriq hujjatlari asosida axborot tizimini ishlab chiqish va ishga tushirish uchun zarur mablagʻni ajratish.

2022-yil mart

Tibbiy-ijtimoiy xizmatlarni rivojlantirish agentligi (Inakov), Axborot texnologiyalari va kommunikatsiyalarini rivojlantirish vazirligi (Shermatov), vazirlik va idoralar

2. Axborot tizimini ishlab chiqish va ishga tushirish boʻyicha tashkilotni aniqlash yuzasidan tanlov oʻtkazish.

2022-yil aprel

3. Gʻolib deb topilgan tashkilot bilan birgalikda axborot tizimini ishlab chiqish va aprobatsiyadan oʻtkazish.

2022-yil avgust

4.

Axborot tizimini hududlarda yoʻlga qoʻyish va joriy etish uchun joylardagi muassasalarni kompyuter jamlanmasi bilan taʼminlash.

140 ta kompyuter jamlanmasini oʻrnatilgan tartibda xarid qilish va Respublika tibbiy-ijtimoiy ekspertiza inspeksiyasi tasarrufidagi tashkilotlarga yetkazish.

2022-yil may

Tibbiy-ijtimoiy xizmatlarni rivojlantirish agentligi (Inakov), Moliya vazirligi (Ishmetov)

5.

Axborot tizimidan foydalanish tartibini ishlab chiqish, joylardagi xodimlarni platformadan foydalanishga oʻrgatish (oʻqitish) va ish jarayoniga tayyorlash.

1. Axborot tizimining tegishli qismida axborotni taqdim etish va kiritishni belgilovchi foydalanish tartibini ishlab chiqish va tasdiqlash.

2022-yil iyun

Tibbiy-ijtimoiy xizmatlarni rivojlantirish agentligi (Inakov), vazirlik va idoralar

2. Axborot tizimidan foydalanuvchi barcha xodimlarni grafik asosida foydalanishga oʻrgatish (oʻqitish) va ish jarayoniga tayyorlash.

2022-yil iyun-iyul

6.

Axborot tizimi doimiy ishlab turishi va kelgusida takomillashtirib borilishini taʼminlash.

1. Tegishli IT kompaniyalarni jalb qilgan holda axborot tizimini keyinchalik texnik qoʻllab-quvvatlash va takomillashtirish hamda saqlash (server hajmlari) xarajatlari boʻyicha tijorat takliflarini oʻrganish va taqdim qilish.

2. Axborot tizimini keyinchalik texnik qoʻllab-quvvatlash va takomillashtirish hamda saqlash (server hajmlari) xarajatlari boʻyicha 2023-yildan boshlab Davlat budjeti parametrlari doirasida zarur mablagʻlarni ajratish.

2022-yil avgust

Tibbiy-ijtimoiy xizmatlarni rivojlantirish agentligi (Inakov), Moliya vazirligi (Ishmetov)

7.

Axborot tizimini manfaatdor vazirlik va idoralarning axborot tizimlari va maʼlumotlar bazasi bilan integratsiya qilish.

Axborot tizimini “Ijtimoiy xizmat” elektron platformasi va nogironligi boʻlgan shaxslarga tibbiy, ijtimoiy xizmatlar va yordam koʻrsatish jarayonlarida ishtirok etayotgan manfaatdor vazirlik va idoralarning axborot tizimlari va maʼlumotlar bazasi bilan integratsiya qilish.

2022-yil sentabr

Tibbiy-ijtimoiy xizmatlarni rivojlantirish agentligi (Inakov), Axborot texnologiyalari va kommunikatsiyalarini rivojlantirish vazirligi (Shermatov)

8.

Sogʻliqni saqlash vazirligining davolash-profilaktika muassasalari xodimlarini axborot tizimida ishlash hamda fuqarolarga nogironlikni belgilashda tegishli hujjatlarni elektron tarzda dasturiy taʼminotga kiritish boʻyicha oʻqitish grafiklarini tuzgan holda amaliy seminarlar tashkil etish.

Davolash-profilaktika muassasalari tomonidan yoʻllanmalarni, kasallik tarixidan koʻchirmalarni, ambulator kartalarni, vaqtincha mehnatga layoqatsizlik varaqasi hamda kasb kasalligini belgilash uchun asos boʻladigan maxsus vakolat berilgan sogʻliqni saqlash muassasasi xulosasidan koʻchirmalarni axborot tizimiga elektron tarzda kiritish borasida amaliy-oʻquv seminarlar tashkil qilish.

2022-yil iyul-avgust

Sogʻliqni saqlash vazirligi (Inoyatov), Tibbiy-ijtimoiy xizmatlarni rivojlantirish agentligi (Inakov)

9.

Davolash-profilaktika muassasalari xodimlarining axborot tizimida ishlashlari uchun zaruriy texnik imkoniyatlarni yaratish.

Davolash-profilaktika muassasalari xodimlarining axborot tizimida ishlashi va maʼlumotlarni kiritishi uchun individual parol va loginlar bilan taʼminlash.

Axborot tizimidagi maʼlumotlarni kiritgan va (yoki) ularga oʻzgartirish kiritgan xodimlar toʻgʻrisidagi maʼlumotlarni qayd etish funksiyalarini joriy etish.

2022-yil avgust — dekabr

Tibbiy-ijtimoiy xizmatlarni rivojlantirish agentligi (Inakov), Sogʻliqni saqlash vazirligi (Azizov)

10.

Axborot tizimini toʻliq ishga tushirish.

1. Axborot tizimini dastlab Toshkent shahrida ishga tushirish.

2022-yil avgust

Tibbiy-ijtimoiy xizmatlarni rivojlantirish agentligi (Inakov), Sogʻliqni saqlash vazirligi (Azizov), Axborot texnologiyalari va kommunikatsiyalarini rivojlantirish vazirligi (Shermatov)

2. Aprobatsiya natijalariga koʻra axborot tizimini respublikaning boshqa barcha hududlarida toʻliq joriy etish.

2022-yil dekabr

II. Pediatriya tibbiy-ijtimoiy va tibbiy-ijtimoiy ekspert komissiyalari mutaxassislarining bilim darajasi va koʻnikmalarini rivojlantirish

11.

Pediatriya tibbiy-ijtimoiy va tibbiy-ijtimoiy ekspert komissiyalarining barcha mutaxassislarini jalb qilgan holda ularning zamonaviy bilim olishlari va amaliy koʻnikmalarga ega boʻlishlari borasida malaka oshirish tadbirlarini tashkil etish.

Sogʻliqni saqlash vazirligi huzuridagi Tibbiyot xodimlarining kasbiy malakasini rivojlantirish markazining “Ijtimoiy tibbiyot” kafedrasi bilan hamkorlikda Rossiya Federatsiyasining Sankt-Peterburg Mehnat ekspertizasi va nogironlarning mehnatini tashkil etish Ilmiy tekshirish instituti, Belarus Respublikasining Mehnat ekspertizasi va nogironlarning mehnatini tashkil etish Ilmiy tekshirish laboratoriyasi hamda Koreya Respublikasining milliy ijtimoiy servis institutlarida qisqa muddatli malaka oshirish kurslarini tashkil etish, shuningdek, mazkur tashkilotlar bilan onlayn rejimda amaliy seminarlar oʻtkazish.

2022-yildan boshlab har yili

Tibbiy-ijtimoiy xizmatlarni rivojlantirish agentligi (Inakov), Sogʻliqni saqlash vazirligi (Inoyatov)

12.

Tibbiy-ijtimoiy ekspertiza va tibbiy-ijtimoiy reabilitatsiya asoslari va amaliyoti boʻyicha tibbiy-ijtimoiy ekspert komissiyalari vrachlarining nazariy va amaliy bilimlarini oshirish choralarini koʻrish.

Sogʻliqni saqlash vazirligi huzuridagi Tibbiyot xodimlarining kasbiy malakasini rivojlantirish markazining “Ijtimoiy tibbiyot” kafedrasi hamda Respublika tibbiy-ijtimoiy ekspertiza inspeksiyasi xodimlari bilan birga hududlarda reabilitatsiya markazlari vrachlari, tibbiy-ijtimoiy ekspert komissiyalarining raislari va aʼzolari (“Saxovat” va “Muruvvat” uylari vrachlari) uchun sayyor oʻquv kurslarini tashkil etish.

2022-yildan boshlab grafik asosida

Tibbiy-ijtimoiy xizmatlarni rivojlantirish agentligi (Inakov), Sogʻliqni saqlash vazirligi (Inoyatov)

13.

Pediatriya tibbiy-ijtimoiy va tibbiy-ijtimoiy ekspert komissiyalarining vrach-ekspertlari uchun masofaviy oʻquv seminarlar oʻtish hamda yakuni bilan oʻz malaka darajasini mustaqil ravishda aniqlab borishi uchun masofaviy test sinovlari platformasini yaratish.

Vaqtinchalik mehnatga layoqatsizlik ekspertizasi, tibbiy, ijtimoiy, kasbiy reabilitatsiya va ijtimoiy himoya masalalari hamda amaliyoti boʻyicha masofaviy oʻquv seminarlarini oʻtkazish hamda vrach-ekspertlarining oʻz bilimlarini mustaqil aniqlab borishi uchun masofaviy test sinovlari platformasini yaratish.

Test sinovlari platformasining savollar bazasini doimiy ravishda tibbiy-ijtimoiy ekspertiza amaliyoti hamda qonunchilikdagi oʻzgarishlar bilan yangilab borish.

Doimiy ravishda

Tibbiy-ijtimoiy xizmatlarni rivojlantirish agentligi (Inakov)

14.

Zamonaviy ergoterapiya asoslari boʻyicha pediatriya tibbiy-ijtimoiy va tibbiy-ijtimoiy ekspert komissiyalarining vrach-ekspertlarini oʻqitish va ularning malakasini oshirish.

Reabilitatsiya dasturlarini tuzishda ergoterapiya asoslarini qoʻllash boʻyicha Sogʻliqni saqlash vazirligi huzuridagi Tibbiyot xodimlarining kasbiy malakasini rivojlantirish markazida oʻquv trening seminarlarini tashkil etish va bosqichma -bosqich barcha vrach-ekspertlar malakasini oshirish tadbirlarini oʻtkazish.

Har yili

Tibbiy-ijtimoiy xizmatlarni rivojlantirish agentligi (Inakov), Sogʻliqni saqlash vazirligi (Inoyatov)

15.

Nogironlikni belgilashning tibbiy modelidan ijtimoiy modeliga bosqichma-bosqich oʻtish boʻyicha milliy strategiyani ishlab chiqish.

Mutasaddi vazirlik va idoralarning masʼul xodimlaridan iborat tematik ishchi guruhlarni tuzish va strategiya maqsadlaridan kelib chiqib tahliliy oʻrganishlar oʻtkazish.

2022-yil mart

Tibbiy-ijtimoiy xizmatlarni rivojlantirish agentligi (Inakov), BMTning Taraqqiyot dasturi, YUNISEF, Jahon banki (kelishuv asosida), vazirlik va idoralar

BMTning Taraqqiyot dasturi, YUNISEF, Jahon banki va boshqa xalqaro moliya institutlarning texnik koʻmagi asosida xalqaro tajribani oʻrgangan holda fuqarolarga nogironlikni belgilash milliy strategiyasini tayyorlash.

2022-yil may

16.

Sogʻligʻi va hayot faoliyatining (funksiyalarining) cheklanishi xalqaro klassifikatsiyasini amaliyotga qoʻllash boʻyicha xalqaro oʻquv-amaliy seminar tashkil qilish.

Xalqaro va nufuzli ekspertlarni jalb qilgan holda Toshkent shahrida Sogʻligʻi va hayot faoliyatining (funksiyalarining) cheklanishi xalqaro klassifikatsiyasini amaliyotga qoʻllash boʻyicha xalqaro oʻquv-amaliy seminarini oʻtkazish.

2022-yil aprel

Tibbiy-ijtimoiy xizmatlarni rivojlantirish agentligi (Inakov), BMTning Taraqqiyot dasturi, YUNISEF, Jahon banki (kelishuv asosida), vazirlik va idoralar

Keyingi tahrirga qarang.
(Qonunchilik maʼlumotlari milliy bazasi, 27.11.2021-y., 07/21/22/1105-son; 29.12.2023-y., 06/23/216/1008-son; 28.02.2024-y., 07/24/88/0159-son; 17.07.2024-y., 07/24/257/0511-son; 12.05.2025-y., 06/25/84/0432-son)