Hujjat 07.04.2021 00 sanasi holatiga
Amaldagi versiyaga o‘tish
Oʻzbekiston Respublikasi Prezidentining
Qarori
Turizm va sport vazirligi faoliyatini tashkil etish toʻgʻrisida
Oʻzbekiston Respublikasi Prezidentining 2021-yil 6-apreldagi “Turizm, sport va madaniy meros sohalarida davlat boshqaruvi tizimini yanada takomillashtirish chora-tadbirlari toʻgʻrisida”gi PF–6199-son Farmoniga muvofiq:
1. Quyidagilar:
Turizm va sport vazirligining tashkiliy tuzilmasi 1-ilovaga muvofiq;
Turizm va sport vazirligi markaziy apparatining boshqaruv xodimlari cheklangan soni 156 nafar boʻlgan tuzilmasi 2-ilovaga muvofiq tasdiqlansin.
2. Madaniyat vazirligining moddiy madaniy meros sohasidagi YUNESKO bilan ishlash hamda muzeylar va kutubxonalarni rivojlantirish bilan bogʻliq vazifa va funksiyalari tegishliligicha Turizm va sport vazirligi hamda Madaniy meros agentligiga oʻtkazilsin.
3. Turizm va sport vazirligining hududiy boʻlinmalari boshqaruv xodimlarining cheklangan soni 980 nafar etib belgilansin.
4. Bosh vazir oʻrinbosari — turizm va sport vaziriga:
davlat organlari va boshqa tashkilotlar, yetakchi loyiha institutlari, ilmiy va taʼlim muassasalari, xalqaro tashkilotlar, xorijiy kompaniyalarning yuqori malakali mutaxassislarini, shuningdek, ekspertlarni maslahatchi sifatida jalb qilish;
zarur hollarda, xodimlarning shtatdagi belgilangan umumiy soni doirasida Turizm va sport vazirligi markaziy apparati, shuningdek, tizim tashkilotlari tuzilmasiga oʻzgartirishlar kiritish;
Turizm va sport vazirligining Qoraqalpogʻiston Respublikasi, viloyatlar va Toshkent shahar bosh boshqarmalari, tumanlar (shaharlar) boʻlimlari tuzilmalari va nizomlarini tasdiqlash, shuningdek, ular boshqaruv xodimlarining cheklangan sonini belgilash huquqi berilsin.
Keyingi tahrirga qarang.
5. Belgilab qoʻyilsinki:
Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlarining turizm va sportni rivojlantirish masalalari boʻyicha oʻrinbosarlari hamda maslahatchilari lavozimlari tegishligicha Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlarining turizm, sport, madaniyat, madaniy meros va ommaviy kommunikatsiyalar masalalari boʻyicha oʻrinbosarlari etib qayta nomlanadi;
Qoraqalpogʻiston Respublikasi Vazirlar Kengashi raisi, viloyatlar hamda Toshkent shahar hokimlarining turizm, sport, madaniyat, madaniy meros va ommaviy kommunikatsiyalar masalalari boʻyicha oʻrinbosarlari bir vaqtning oʻzida tegishlicha turizm va sport bosh boshqarmalarining rahbarlari hisoblanadi;
Keyingi tahrirga qarang.
Madaniy meros agentligi direktori, turizm va sport vazirining maslahatchilari (xorijiy maslahatchilardan tashqari) hamda apparat boshqaruvchisi maqomi, mehnatga haq toʻlash, tibbiy va transport xizmati koʻrsatish shart-sharoitlariga koʻra turizm va sport vazirining oʻrinbosarlariga tenglashtiriladi;
Keyingi tahrirga qarang.
Turizm va sport vazirligiga ishga qabul qilish Bosh vazir oʻrinbosari — turizm va sport vaziri tomonidan tegishli davlat organlari tomonidan ilgari amalga oshirilgan kelishuvlarni inobatga olgan holda, mustaqil amalga oshiriladi;
Turizm va sport vazirligi toʻgʻrisidagi nizom tasdiqlangunga qadar, Turizm va sport vazirligi xodimlari mehnatiga haq toʻlashning budjetdan tashqari mablagʻlar hisobidan toʻlanadigan toʻlovlar Oʻzbekiston Respublikasi Prezidentining 2016-yil 2-dekabrdagi PQ-2666-son qarori bilan tasdiqlangan Turizmni rivojlantirish davlat qoʻmitasi toʻgʻrisidagi nizomga asosan amalga oshiriladi;
Turizmni rivojlantirish davlat qoʻmitasi huzuridagi budjetdan tashqari Turizm sohasini qoʻllab-quvvatlash jamgʻarmasi Turizm va sport vazirligi huzuridagi budjetdan tashqari Turizm va sportni qoʻllab-quvvatlash jamgʻarmasi (keyingi oʻrinlarda — Jamgʻarma) etib qayta nomlanadi. Bunda, Jismoniy tarbiya va sport vazirligining budjetdan tashqari “Sport” maxsus hisob raqami mablagʻlari Jamgʻarmaga toʻliq oʻtkaziladi;
Turizm va sport vazirligi hamda uning hududiy boʻlinmalari faoliyatini moliyalashtirishning asosiy manbasi etib Davlat budjeti mablagʻlari, vazirlikning budjetdan tashqari mablagʻlari, qonunchilik hujjatlari bilan taqiqlanmagan boshqa manbalar esa uning faoliyatini moliyalashtirishning qoʻshimcha manbalari hisoblanadi;
Jamgʻarma mablagʻlari hamda qonunchilik hujjatlari bilan taqiqlanmagan boshqa manbalar hisobidan Turizm va sport vazirligi va uning hududiy boʻlinmalari, shuningdek, tizim tashkilotlari xodimlarini qoʻshimcha ragʻbatlantirishga yoʻnaltiriladi.
Keyingi tahrirga qarang.
Mazkur bandning uchinchi xatboshisida koʻrsatilgan lavozimlarga nomzodlar Bosh vazir oʻrinbosari — turizm va sport vaziri taqdimnomasiga asosan belgilangan tartibda tayinlanishi va lavozimidan ozod etilishi belgilab qoʻyilsin.
Keyingi tahrirga qarang.
6. Moliya vazirligi ushbu qaror ijrosini taʼminlash yuzasidan Turizm va sport vazirligi xarajatlari uchun asoslangan hisob-kitoblar boʻyicha 2021-yilgi Davlat budjeti parametrlari doirasida mablagʻ ajratsin va 2022-yildan boshlab zarur budjet mablagʻlarini koʻzda tutsin.
Turizm va sport vazirligi Moliya vazirligi bilan birgalikda ikki oy muddatda Davlat budjetining 2021-yil uchun tasdiqlangan budjet parametrlariga ushbu qaror talablaridan kelib chiqib tegishli oʻzgartirishlar kiritish boʻyicha qonun loyihasini Vazirlar Mahkamasiga kiritsin.
7. Quyidagilar Jamgʻarma mablagʻlarini shakllantirishning qoʻshimcha manbalari etib belgilansin:
muassisi Turizm va sport vazirligi hisoblangan korxonalar va tashkilotlar (keyingi oʻrinlarda — davlat tashkilotlari) ixtiyorida soliqlar va yigʻimlar toʻlanganidan keyin qoladigan sof foydaning bir qismi;
xususiylashtirish toʻgʻrisidagi qarorlarga muvofiq davlat mulki obyektlarini realizatsiya qilishdan tushadigan tegishli mablagʻlar;
Keyingi tahrirga qarang.
davlat tashkilotlarining mol-mulkini (koʻchmas mulk bundan mustasno) sotishdan tushgan mablagʻlarning 50 foizi;
davlat tashkilotlarining mol-mulkini ijaraga berishdan tushgan budjetga yoʻnaltirilayotgan mablagʻlarning 50 foizi;
davlat tashkilotlari faoliyatini tekshirish natijalari boʻyicha Turizm va sport vazirligining ichki audit xizmatlari tomonidan aniqlangan hamda Davlat budjeti mablagʻlarining, talon-toroj, rastratalar, kamomadlar summalarining 50 foizi;
davlat tashkilotlari faoliyatini tekshirish natijalari boʻyicha Turizm va sport vazirligining ichki audit xizmatlari tomonidan aniqlangan hamda davlat maqsadli jamgʻarmalari va budjetdan tashqari jamgʻarmalar daromadiga undirilgan noqonuniy sarflangan budjet mablagʻlari, talon-toroj, rastratalar, kamomadlar summalari;
davlat tashkilotlarining budjetdan tashqari jamgʻarmalariga tushadigan mablagʻlarning 10 foizi;
Jamgʻarmaning vaqtincha boʻsh turgan mablagʻlarini joylashtirishdan olinadigan daromadlar;
turizm, sport va madaniy meros sohalaridagi davlat-xususiy sheriklik loyihalarini amalga oshirishdan tushadigan mablagʻlar;
Keyingi tahrirga qarang.
yuridik va jismoniy shaxslarning, shu jumladan Oʻzbekiston Respublikasi norezidentlarining homiylik xayriyalari;
xalqaro moliya tashkilotlari va xorijiy davlatlarning grantlari va texnik koʻmaklashish mablagʻlari;
qonunchilik hujjatlarida taqiqlanmagan boshqa tushumlar.
8. Turizm va sport vazirligi, Qurilish vazirligi, Oliy va oʻrta maxsus taʼlim vazirligi, Iqtisodiy taraqqiyot va kambagʻallikni qisqartirish vazirligining 2021/2022 oʻquv yilidan boshlab moddiy madaniy meros obyektlarini konservatsiyalash, restavratsiya qilish, tuzatish, taʼmirlash, ilmiy va ilmiy-texnik tadqiq etish, loyihalash boʻyicha yuqori malakali kadrlarni tayyorlash va ushbu sohaga yetakchi mutaxassislarni jalb qilish maqsadida:
Toshkent arxitektura-qurilish instituti va Samarqand davlat arxitektura-qurilish institutida madaniy meros obyektlarini asrash fakultetlarini tashkil qilish;
Buxoro arxitektura va qurilish kollejida Madaniy meros obyektlarini asrash yoʻnalishini tashkil qilish toʻgʻrisidagi takliflari maʼqullansin.
9. Jismoniy tarbiya va sport boʻyicha mutaxassislarni ilmiy-metodik taʼminlash, qayta tayyorlash va malakasini oshirish markazi Jismoniy tarbiya va sport boʻyicha mutaxassislarni qayta tayyorlash va malakasini oshirish instituti etib qayta nomlansin.
10. Turizm va sport vazirligi uch oy muddatda:
“Sport media markazi” davlat unitar korxonasini “Milliy PR markazi” davlat unitar korxonasiga;
“Sertifikatlashtirish va kompyuterlashtirish markazi” davlat unitar korxonasini “Turizm xizmatlarini sertifikatlash markazi” davlat unitar korxonasiga;
Suv sport turlarini rivojlantirish Respublika markazi hamda Suv sport turlari boʻyicha Respublika olimpiya zaxiralari ixtisoslashtirilgan bolalar-oʻsmirlar sport maktabini Suv sport turlari boʻyicha Respublika oliy sport mahorati maktabiga qoʻshish choralarini koʻrsin.
11. Turizm va sport vazirligi taʼsischiligida “Ommaviy tadbirlarni tashkil etish va oʻtkazish direksiyasi” davlat unitar korxonasi tashkil etilsin.
Bunda, “Ommaviy tadbirlarni tashkil etish va oʻtkazish direksiyasi” davlat unitar korxonasi shtat birliklari Suv sport turlarini rivojlantirish Respublika markazi hamda Suv sport turlari boʻyicha Respublika olimpiya zaxiralari ixtisoslashtirilgan bolalar-oʻsmirlar sport maktabi boshqaruv xodimlarining 14 ta shtat birligini qisqartirish hisobiga shakllantiriladi.
12. Kapital bozorni rivojlantirish agentligi Turizm va sport vazirligi, Moliya vazirligi, Adliya vazirligi va Davlat soliq qoʻmitasi bilan birgalikda sport sohasida bukmekerlik faoliyatini tashkil etish orqali sportni qoʻshimcha moliyalashtirish tizimini kengaytirish boʻyicha Hukumat qarori loyihasini ikki oy muddatda Vazirlar Mahkamasiga kiritsin.
Keyingi tahrirga qarang.
13. Turizm va sport vazirligi:
a) bir oy muddatda:
vazirlikning markaziy apparati va uning hududiy boʻlinmalarini zarur nazariy bilimlar va amaliy koʻnikmalarga, yuklatilgan vazifalarni professional darajada amalga oshirish qobiliyatiga ega boʻlgan yuqori malakali kadrlar bilan toʻldirishni;
vazirlik tarkibiy va quyi boʻlinmalari toʻgʻrisidagi nizomlar (ustavlar), shuningdek, xodimlarning lavozim yoʻriqnomalari tasdiqlanishini taʼminlasin;
b) uch oy muddatda tegishli vazirlik va idoralar bilan birgalikda Vazirlar Mahkamasiga:
vazirlik boʻlinmalari va boshqa vakolatli organlarining mazkur sohadagi vakolatlarini aniq belgilagan holda, shuningdek, davlat boshqaruvi va mahalliy ijro hokimiyati organlari bilan hamkorligining mexanizmlarini nazarda tutuvchi Turizm va sport vazirligi toʻgʻrisidagi nizomni;
qonunchilik hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisidagi normativ-huquqiy hujjatlar loyihalarini belgilangan tartibda kiritsin.
14. Turizm va sport vazirligi, Axborot texnologiyalari va kommunikatsiyalarini rivojlantirish vazirligi hamda Madaniy meros agentligi 2021-yil davomida moddiy madaniy meros obyektlari, muzey, sport majmualari va boshqa namoyish obyektlarida elektron toʻlov, turniket (lazer-datchikli) va video qayd qilish moslamalarini oʻrnatishni, kirish biletlarini oldindan sotib olishni nazarda tutuvchi yagona markazlashgan elektron tizimni joriy etsin. Bunda, elektron tizimni yaratish, ishga tushirish va texnik qoʻllab-quvvatlash Jamgʻarma va qonunchilik hujjatlari bilan taqiqlanmagan boshqa manbalar hisobidan amalga oshiriladi.
Keyingi tahrirga qarang.
Turizm va sport vazirligi:
ikki oy muddatda yagona markazlashgan elektron tizimga 2021-yilda integratsiya qilinishi lozim boʻlgan obyektlar roʻyxatini shakllantirsin va ularda joriy etilishini taʼminlasin;
Keyingi tahrirga qarang.
2021-yil 1-sentabrga qadar Jamgʻarma mablagʻlari hisobidan moddiy madaniy meros obyektlari, muzey, sport majmualari va boshqa namoyish obyektlarida elektron toʻlov, turniket (lazer-datchikli) va video qayd qilish moslamalarini oʻrnatish hamda kirish biletlarini oldindan sotib olish tizimini namuna sifatida Samarqand shahrida joriy etsin.
Keyingi tahrirga qarang.
15. Restavratsiya va taʼmirshunoslik sohasining oʻziga xos jihatlarini inobatga olib, hududlarda uzoq yillar davomida shakllangan meʼmorchilik maktablarini saqlab qolish va rivojlantirish maqsadida davlat muassasasi shaklida “Madaniy meros obyektlari restavratsiyasi direksiyasi” va bosqichma-bosqich ravishda uning mintaqaviy restavratsiya markazlari tashkil etilsin.
Belgilab qoʻyilsinki, Davlat budjetidan madaniy meros obyektlarini asrashga doir ishlar uchun ajratiladigan mablagʻlar ustuvor ravishda toʻgʻridan-toʻgʻri shartnoma asosida “Madaniy meros obyektlari restavratsiyasi direksiyasi”ga yoʻnaltiriladi.
Keyingi tahrirga qarang.
“Madaniy meros obyektlari restavratsiyasi direksiyasi” va mintaqaviy restavratsiya markazlari faoliyatini moliyalashtirish manbalari etib shartnoma asosida koʻrsatiladigan xizmatlar koʻrsatishdan tushgan mablagʻlar, xalqaro moliya institutlari va tashkilotlari grantlari hamda qonunchilik hujjatlari bilan taqiqlanmagan boshqa manbalar belgilansin.
16. Belgilansinki:
yagona markazlashgan elektron tizimni tashkil etish uchun Turizm va sport vazirligi taʼsischiligida davlat tashkiloti tashkil etiladi;
Jismoniy tarbiya va sport vazirligi, Turizmni rivojlantirish davlat qoʻmitasi va Madaniy meros departamentining mol-mulki, shu jumladan avtotransport vositalarini Turizm va sport vazirligiga oʻtkazishda qayta rasmiylashtirish uchun toʻlovlar undirilmaydi.
Keyingi tahrirga qarang.
17. Turizm va sport vazirligi Toshkent shahri, Amir Temur shoh koʻchasi, 107 b-uy manzili boʻyicha, Madaniy meros agentligi esa Toshkent shahri, Abdulla Qodiriy koʻchasi, 2-uy manzili boʻyicha joylashtirilsin.
18. Mazkur qarorning ijrosini nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidentining maslahatchisi A.A. Abduvaxitov zimmasiga yuklansin.
Amalga oshirilayotgan chora-tadbirlar natijadorligi yuzasidan 2021-yil 1-iyul va 2022-yil 1-yanvarga qadar Oʻzbekiston Respublikasi Prezidentiga axborot berilsin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2021-yil 6-aprel,
PQ-5054-son
Oʻzbekiston Respublikasi Prezidentining 2021-yil 6-apreldagi PQ-5054-son qaroriga
1-ILOVA
Turizm va sport vazirligining tashkiliy tuzilmasi

Turizm va sport vazirligi

Qoraqalpogʻiston Respublikasi, viloyatlar va Toshkent shahar turizm va sport bosh boshqarmalari

“Ipak yoʻli” turizm xalqaro universiteti

Turizm, sport va madaniy meros sohalaridagi texnikum va kollejlar

Oʻzbekiston davlat jismoniy tarbiya va sport universiteti hamda uning Nukus va Fargʻona filiallari

Olimpiya zaxiralari kollejlari

Tumanlar (shaharlar) turizm va sport boʻlimlari

Sport turlari boʻyicha ixtisoslashtirilgan davlat maktab-internatlari

Madaniy meros agentligi

“Rossiya davlat jismoniy tarbiya, sport, yoshlar va turizm universiteti” federal davlat budjeti oliy taʼlim muassasasining Samarqand filiali

Sport maktablari

“Milliy PR-markazi” DUK

Jismoniy tarbiya va sport boʻyicha mutaxassislarni qayta tayyorlash va malakasini oshirish instituti hamda uning Nukus, Samarqand va Fargʻona filiallari

Olimpiya shon-shuhrati muzeyi

“Sport va turizm xizmatlarini sertifikatlash markazi” DUK

Turizm, sport va madaniy meros sohalaridagi nodavlat notijorat tashkilotlari

“Turistlarga xizmat koʻrsatish markazi” DUK

Turizmni rivojlantirish instituti

“Ipak yoʻli ofisi” UK

Madaniy meros ilmiy-tadqiqot instituti

“Binolardan foydalanish direksiyasi” DUK

“Sport obyektlari infratuzilmasini rivojlantirish boʻyicha injiniring kompaniyasi” DUK

 

“Ommaviy tadbirlarni tashkil etish va oʻtkazish direksiyasi” DUK

“Beldirsoy-Chimyon-Nanay” xalqaro umummavsumiy kurortni qurish va ekspluatatsiya qilish boʻyicha loyiha ofisi” DUK

“Madaniy meros obyektlari restavratsiyasi direksiyasi” davlat muassasasi

Keyingi tahrirga qarang.
Oʻzbekiston Respublikasi Prezidentining 2021-yil 6-apreldagi PQ-5054-son qaroriga
2-ILOVA
Turizm va sport vazirligi markaziy apparatining
TUZILMASI
Boshqaruv xodimlarining umumiy cheklangan soni — 156 nafar.
Texnik va xizmat koʻrsatuvchi xodimlar soni oʻrnatilgan meʼyorlarga muvofiq belgilanadi.
Keyingi tahrirga qarang.

(Qonun hujjatlari maʼlumotlari milliy bazasi, 07.04.2021-y., 07/21/5054/0299-son; Qonunchilik maʼlumotlari milliy bazasi, 12.01.2022-y., 0722/79/0015-son; 15.01.2022-y., 06/22/52/0029-son; 07.04.2022-y., 06/22/98/0279-son; 07.07.2023-y., 06/23/108/0460-son; 01.03.2025-y., 06/25/35/0204-son; 22.04.2025-y., 06/25/70/0375-son)