Vazirlar Mahkamasi qayd etadiki, aholining farovonligini oshirish yoʻliga muvofiq respublikada uy-joy-kommunal xoʻjaligining moddiy bazasini rivojlantirish, aholini uning xizmatlari bilan oʻz vaqtida va sifatli taʼminlash uchun qulay sharoitlar yaratish boʻyicha muayyan ishlar qilingan.

Shu bilan birga, ushbu sohadagi iqtisodiy islohotlar sust surʼatlar bilan bormoqda, bozor iqtisodiyoti sharoitlarida uning faoliyat koʻrsatishi uchun zarur sharoitlar yaratilmagan, muqobil kommunal korxonalar tashkil etilmagan, koʻrsatilayotgan xizmatlarga narx belgilash tizimini takomillashtirishga muhtoj, xizmatlar sifati esa aholining haqli eʼtirozlariga sabab boʻlmoqda.

Kommunal xizmat koʻrsatish xodimlari mehnatiga haq toʻlash va ragʻbatlantirish bilan bogʻliq masalalar mutlaqo hal etilmagan.

Samarali ijtimoiy siyosat izchil amalga oshirilishini taʼminlash, bozor iqtisodiyoti sharoitlarida uy-joy-kommunal tarmogʻi faoliyatini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Kommunal xizmat koʻrsatish vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining uy-joy-kommunal tarmogʻida bozor munosabatlarini shakllantirishga doir ishlari qoniqarsiz deb hisoblansin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining hamda “Davarxitektqurilish” qoʻmitasi joylardagi organlarining turar-joylar va ijtimoiy-madaniy ahamiyatga ega boʻlgan obyektlarni ichimlik suvni, gazni hisobga olish priborlari oʻrnatilgan holda foydalanishga qabul qilish borasidagi ishi qoniqarsiz ekanligi qayd etilsin hamda belgilangan tartib buzilganligi uchun rahbarlar shaxsan javobgar ekanliklari toʻgʻrisida ogohlantirilsin.

2. Bozor iqtisodiyoti sharoitlarida kommunal xizmat koʻrsatishni takomillashtirish boʻyicha respublika komissiyasi ilovaga* muvofiq tarkibda tuzilsin.

Quyidagilar komissiyaning asosiy vazifalari etib belgilansin:

respublika aholisiga kommunal xizmatlar sifatli va oʻz vaqtida koʻrsatilishini taʼminlash, mulkchilikning turli shakllaridagi kommunal korxonalar faoliyat koʻrsatishi tuzilmasini takomillashtirish, bozor iqtisodiyoti sharoitlarida ular xodimlarining mehnatini tashkil etish va ragʻbatlantirish boʻyicha takliflar tayyorlash;

kommunal tarmoqni davlat tasarrufidan chiqarish va xususiylashtirish, aholiga kommunal xizmatlar koʻrsatish yuzasidan shartnoma munosabatlarini rivojlantirish, mablagʻ bilan taʼminlash va bu sohada narx belgilashni takomillashtirish boʻyicha ishlarni tashkil etish;

fuqarolarning ayrim toifalariga imtiyozli kommunal xizmat koʻrsatish tizimini tartibga solish;

kommunal tarmoqda oʻtkazilayotgan islohotlarning maqsadlari va vazifalari, uy-joy fondidan foydalanish huquqlarini roʻyobga chiqarish va uni saqlashda yashovchilarning faol qatnashishi toʻgʻrisida aholi oʻrtasida keng tushuntirish ishlari olib borish.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Kommunal xizmat koʻrsatish vazirligi bilan birgalikda 1997-yil davomida uy-joy fondiga xizmat koʻrsatish va uni tuzatish tizimini takomillashtirish chora-tadbirlarini amalga oshirsinlar, bunda uy-joylardan foydalanish tashkilotlari tarkibida uy-joy fondini saqlash va tuzatish hamda aholiga tegishli xizmatlar koʻrsatish boʻyicha tuzatish-foydalanish boʻlinmalari tashkil etilgan holda ushbu tashkilotlarni xoʻjalik hisobiga oʻtkazishni nazarda tutsinlar.

4. Oʻzbekiston Respublikasi Kommunal xizmat koʻrsatish vazirligi Mehnat vazirligi va Moliya vazirligi bilan birgalikda uy-joy-kommunal xoʻjaligiga xizmat koʻrsatish boʻyicha normativlarni, joriy yilning oxirigacha tarmoqni ushbu normativlar boʻyicha mehnatga haq toʻlashga bosqichma-bosqich oʻtkazishni nazarda tutgan holda, ishlab chiqsin va tasdiqlasin. Bunda kommunal xizmat koʻrsatish ayrim xizmatlari xodimlarini mehnatga haq toʻlashning vaqtbay shaklidan ishbay shakliga oʻtkazishni nazarda tutsin.

Toshkent shahar hokimligi Oʻzbekiston Respublikasi Kommunal xizmat koʻrsatish vazirligi bilan birgalikda bir nechta uylarga xizmat koʻrsatishning oilaviy, brigada pudratini eksperiment tariqasida joriy etsin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari uy-joy-kommunal xizmatlariga tariflarni tasdiqlashda xarajatlar tarkibi boʻyicha mavjud normativ-uslubiy hujjatlarga qatʼiy amal qilsinlar, bunda xarajatlarni izchil qisqartirishni nazarda tutsin.

Oʻzbekiston Respublikasi Moliya vazirligi huzuridagi Monopoliyadan chiqarish va raqobatni rivojlantirish qoʻmitasi tarmoqning xususiyatini hisobga olgan holda kommunal xizmatlarga tariflar belgilashning asoslanganligini muntazam nazorat qilsin. Tariflarni shakllantirish va qoʻllash tartibi buzilishi hollari aniqlangan taqdirda aybdorlarga nisbatan monopoliyaga qarshi qonunchilikda nazarda tutilgan jazo choralarini qoʻllasin.

6. Toshkent shahar hokimligi, Oʻzbekiston Respublikasi Kommunal xizmat koʻrsatish vazirligi:

1997-yilda Toshkent shahrida ikkita uyni avtonom ravishda issiqlik bilan taʼminlash yuzasidan eksperiment oʻtkazsinlar. Eksperiment natijalarini tahlil qilish asosida uylar (xonadonlar)ni issiqlik bilan taʼminlashning amaldagi tizimini yanada takomillashtirish yuzasidan Vazirlar Mahkamasiga takliflar kiritsinlar;

Toshkent shahrining faoliyat koʻrsatayotgan korxonalari negizida chet el firmalarini jalb etgan holda suv, gaz, issiqlik energiyasini hisobga olish priborlarini tayyorlash, plastmassa trubalar ishlab chiqarish boʻyicha korxonalar tashkil etsinlar.

7. Bozor iqtisodiyoti sharoitlarida kommunal xizmat koʻrsatishni takomillashtirish respublika komissiyasi Aholiga kommunal xizmat koʻrsatish tizimida iqtisodiy islohotlarni chuqurlashtirish konsepsiyasini ikki oy muddatda ishlab chiqsin va tasdiqlash uchun Vazirlar Mahkamasiga kiritsin. Unda quyidagilar nazarda tutilsin:

kommunal xizmat koʻrsatishning amaldagi tizimini bosqichma-bosqich qayta tashkil etish, boshqaruv tuzilmasini soddalashtirish kommunal korxonalarning oʻz funksiyalariga kiruvchi vazifalarni hal etishda iqtisodiy mustaqilligini va javobgarligini oshirish;

aholi bilan tarmoq korxonalari va tashkilotlari oʻzaro munosabatlarining iqtisodiy shakllariga oʻtishni taʼminlovchi kommunal-xizmat koʻrsatishning normativ-huquqiy bazasini takomillashtirish;

fuqarolar qulay yashashlari uchun zarur shart-sharoitlar yaratish, koʻrsatilayotgan xizmatlar sifatini tegishli darajada saqlab turgan holda chiqimlar va tariflarni kamaytirish;

mulkchilikning turli shakllaridagi pudratchi tuzatish-foydalanish xizmatlarini tanlov yoʻli bilan tanlab olish, aholiga kommunal xizmati koʻrsatish boʻyicha muqobil korxonalarni rivojlantirish asosida kommunal xizmatlar koʻrsatishda raqobat muhitini shakllantirish.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov zimmasiga yuklansin.