|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
RESPUBLIKADA OZIQ-OVQAT SPIRTI IShLAB ChIQARIShNI KENGAYTIRISh TOʻGʻRISIDA
LexUZ sharhiMazkur qaror Oʻzbekistan Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Respublika xalq xoʻjaligi ehtiyojlari uchun etil spirti ishlab chiqarishni koʻpaytirish va uni chet eldan xarid qilishni toʻxtatish maqsadida Vazirlar Mahkamasi qaror qiladi:
1. 1995-1996-yillarda Andijon va Yangiyoʻl biokimyo zavodlarida va “Qoʻqon” ishlab chiqarish birlashmasida banklarning kredit resurslari hisobidan har biri yiliga 0,915 mln dal spirt ishlab chiqaradigan liniyalar qurilishi amalga oshirilsin.
2. “Oʻzsanoatxoʻjalikqurilish” korporatsiyasi bosh pudratchi, Andijon biokimyo zavodi boʻyicha — Oʻzbekiston kimyoviy loyihalar ilmiy-tadqiqot instituti (Chirchiq shahri), “Qoʻqon” ishlab chiqarish birlashmasi boʻyicha — Oʻzbekiston kimyoviy loyihalar ilmiy-tadqiqot instituti va “2-giprooziqovqatsanoat” aksiyadorlik jamiyati (Moskva shahri) bosh loyihachilar etib belgilansin.
3. “Oʻzkimyosanoat” uyushmasi, Andijon biokimyo zavodi, “Qoʻqon” ishlab chiqarish birlashmasi, Yangiyoʻl biokimyo zavodi:
Andijon va Qoʻqonda spirt ishlab chiqaruvchi korxonalar loyihalashtirilishini 1995-yil oxirigacha tugallasinlar;
texnologik asbob-uskunalarga buyurtmalar berilishini va ularni yetkazib berishga kontraktlar tuzilishini 1995-yil oxirigacha taʼminlasinlar.
4. “Oʻzsanoatxoʻjalikqurilish” korporatsiyasi, “Oʻzmontajmaxsusqurilish” va “Oʻzkimyosanoat” uyushmalari 1996-yil oxirigacha Andijon va Qoʻqonda va 1996-yilning uchinchi choragida Yangiyoʻlda yiliga 0,915 mln dal etil spirti ishlab chiqaradigan quvvatlarni qurish va ishga tushirishni taʼminlasinlar.
5. Loyiha-smeta hujjatlari belgilangan tartibda tasdiqlangunga qadar obyektlarni loyihalash va qurish bir vaqtning oʻzida amalga oshirilishiga hamda ishlarga ish chizmalari va alohida smetalar boʻyicha haq toʻlashga ruxsat berilsin.
6. Pul-kredit siyosati boʻyicha respublika komissiyasi, Markaziy bank:
1995-1996-yillarda koʻrsatib oʻtilgan qurilishlarga ilovaga* muvofiq kredit resurslari ajratilishini nazarda tutsinlar;
* Ilova berilmaydi.
ajratilgan soʻm mablagʻlarining 345 mln soʻmga teng qismini asbob-uskunalar sotib olish uchun kontraktlarga muvofiq konvertirlasinlar hamda “Oʻzsanoatqurilishbank” bilan birgalikda qurilishlarga uzluksiz kredit berilishini taʼminlasinlar;
spirt ishlab chiqaruvchi quvvatlar qurilishida kreditlardan foydalanganlik uchun foiz stavkalari undirishni obyektlar foydalanishga topshirilgandan keyin amalga oshirsinlar.
7. Andijon, Fargʻona va Toshkent viloyatlari hokimliklari spirt ishlab chiqaruvchi korxonalar qurilishini muntazam ravishda nazorat qilsinlar.
8. Mazkur qarorning bajarilishini nazorat qilish Bosh vazirning birinchi oʻrinbosari I.H. Joʻrabekov va Bosh vazirning oʻrinbosari R.R. Yunusov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1995-yil 28-sentabr,
380-son
