Oʻzbekiston Respublikasi va Rossiya Federatsiyasi oʻrtasidagi siyosiy, savdo-iqtisodiy, investitsiyaviy, moliyaviy-texnik, madaniy-gumanitar sohalaridagi oʻzaro manfaatli, amaliy sheriklikni kengaytirish hamda strategik hamkorlik va ittifoqchilik munosabatlarini sifat jihatidan yangi darajaga koʻtarish va uni aniq mazmun bilan yanada boyitishni taʼminlash maqsadida:

1. Investitsiyalar va tashqi savdo vazirligi markaziy apparati tuzilmasiga Rossiya Federatsiyasi bilan tashqi iqtisodiy hamkorlikni rivojlantirish uchun masʼul boʻlgan investitsiyalar va tashqi savdo vazirining oʻrinbosari — Investitsiya loyihalarini ishlab chiqish markazi direktori lavozimi kiritilsin.

Investitsiyalar va tashqi savdo vazirligi markaziy apparati tuzilmasida vazirlikning belgilangan shtatlari doirasida 5 shtat birligidan iborat Rossiya Federatsiyasi bilan hamkorlikni rivojlantirish boshqarmasi tashkil qilinsin.

2. Oʻzbekiston Respublikasi bilan Rossiya Federatsiyasi oʻrtasida savdo-iqtisodiy, investitsiyaviy va moliyaviy-texnik hamkorlik loyihalarini sifatli tayyorlash va amalga oshirish boʻyicha tizimli ishlarni taʼminlash maqsadida Moskva shahrida xodimlarning cheklangan soni 7 kishidan iborat Investitsiyalar va tashqi savdo vazirligining vakolatxonasi (keyingi oʻrinlarda — Vakolatxona) tashkil etilsin.

3. Quyidagilar investitsiyalar va tashqi savdo vazirining oʻrinbosari — Investitsiya loyihalarini ishlab chiqish markazi direktorining asosiy vazifalari etib belgilansin:

Rossiya Federatsiyasi bilan savdo-iqtisodiy, investitsiyaviy, moliyaviy-texnik hamkorlik loyihalari va dasturlarini ishlab chiqish hamda amalda roʻyobga chiqarish;

Rossiya Federatsiyasi bilan yuqori texnologiyalar, innovatsiyalar, sanoat, energetika, infratuzilmani rivojlantirish, transport, logistika, qishloq xoʻjaligi, turizm va boshqa yoʻnalishlarda amaliy hamkorlikni kengaytirish boʻyicha aniq takliflar tayyorlash;

Rossiya Federatsiyasi bilan amalga oshirilgan oliy darajadagi tashriflar yakunlari boʻyicha erishilgan savdo-iqtisodiy, investitsiyaviy va moliyaviy-texnik hamkorlik sohasidagi kelishuvlarning soʻzsiz va sifatli ijro etilishi ustidan doimiy hamda tizimli monitoring va nazoratni tashkil qilish;

Rossiya Federatsiyasi bilan savdo-iqtisodiy, investitsiyaviy, moliyaviy-texnik hamkorlik sohalaridagi amaliy chora-tadbirlar rejalari (“yoʻl xaritalari”)ni soʻzsiz amalga oshirish boʻyicha masʼul ijrochilar — vazirliklar, idoralar, mahalliy ijro hokimiyati organlarining faoliyatini muvofiqlashtirish;

Investitsiyalar va tashqi savdo vazirligi hamda Rossiya Federatsiyasi Sanoat va savdo vazirligi oʻrtasida tashkil etilgan “Loyiha ofisi” faoliyati doirasida yangi sanoat loyihalarini ishlab chiqish va Rossiya tomoni bilan hamkorlikda amalga oshirishni taʼminlash;

Investitsiya loyihalarini ishlab chiqish markazi direktoriga yuklangan vazifa va funksiyalarni amalga oshirish.

4. Investitsiyalar va tashqi savdo vazirligi Tashqi ishlar vazirligi va Moliya vazirligi bilan birgalikda ikki oy muddatda:

Vakolatxonani tashkil etish chora-tadbirlari toʻgʻrisida Vazirlar Mahkamasiga tegishli qaror loyihasini kiritsin. Bunda, Vakolatxona tuzilmasi, xarajatlar smetasi, moliyalashtirish manbalari, xodimlar mehnatiga haq toʻlash darajasi (faoliyatining aniq natijalari uchun mukofotlashni hisobga olgan holda) hamda moddiy-texnik taʼminoti bilan bogʻliq masalalar aks etsin;

Vakolatxonani malakali mutaxassislar bilan toʻldirish hamda uning faoliyat boshlashi bilan bogʻliq barcha tashkiliy masalalarni hal etsin.

5. Investitsiyalar va tashqi savdo vazirligining Jahon savdo tashkiloti (keyingi oʻrinlarda — JST) bilan hamkorlik qilish boshqarmasi negizida vazirlikning belgilangan shtatlari doirasida Xalqaro va mintaqaviy tashkilotlar bilan hamkorlik qilish hamda tashqi iqtisodiy integratsiya jarayonlarini muvofiqlashtirish boshqarmasi tashkil qilinsin.

Quyidagilar Xalqaro va mintaqaviy tashkilotlar bilan hamkorlik qilish hamda tashqi iqtisodiy integratsiya jarayonlarini muvofiqlashtirish boshqarmasining asosiy vazifalari etib belgilansin:

koʻp tomonlama savdo aloqalari sohasidagi davlat siyosatini shakllantirish boʻyicha takliflar ishlab chiqish hamda Oʻzbekiston Respublikasini xalqaro va mintaqaviy savdo tashkilotlari bilan hamkorlik qilish va integratsiyalashuv jarayonlarida davlat organlari faoliyatini muvofiqlashtirish;

Oʻzbekiston Respublikasining huquqiy hujjatlari, xalqaro shartnomalari va ularning loyihalari xalqaro va mintaqaviy savdo tashkilotlari bilan integratsiyalashuv va oʻzaro hamkorlik doirasidagi talab va meʼyorlarga muvofiqligini koʻrib chiqish;

Oʻzbekiston Respublikasining Yevroosiyo iqtisodiy ittifoqi (keyingi oʻrinlarda — YEOII) va JST bilan oʻzaro hamkorligi doirasida milliy manfaatlarni ilgari surish maqsadida integratsiya jarayonlarini chuqurlashtirish choralarini olib borish;

Oʻzbekiston Respublikasining YEOII va JSTga aʼzo boʻlishi bilan bogʻliq masalalarni chuqur tahlil qilish hamda muvofiqlashtirish;

xalqaro tashkilotlarga aʼzo boʻlishning iqtisodiy afzalliklarini oʻrganish;

tashqi iqtisodiy siyosatni mamlakat ichki iqtisodiy siyosatiga muvofiqlashtirish boʻyicha takliflar ishlab chiqish;

integratsion salohiyat va raqobatbardosh ustunliklardan foydalangan holda iqtisodiy samaraga erishishni taʼminlash boʻyicha aniq choralar koʻrish;

integratsiya jarayonlari doirasida iqtisodiy siyosatni oldindan prognozlashtirishni taʼminlash.

6. Investitsiyalar va tashqi savdo vazirligi uch oy muddatda Vazirlar Mahkamasiga:

Oʻzbekiston Respublikasi Prezidentining 2017-yil 12-apreldagi “Oʻzbekiston Respublikasi va Rossiya Federatsiyasi oʻrtasidagi ikki tomonlama strategik hamkorlik va ittifoqchilik munosabatlarini yanada kengaytirish chora-tadbirlari toʻgʻrisida”gi PQ-2885-son va 2018-yil 3-noyabrdagi “Oʻzbekiston Respublikasi va Rossiya Federatsiyasi oʻrtasidagi ikki tomonlama strategik hamkorlik va ittifoqchilik munosabatlarini yanada kengaytirish chora-tadbirlari toʻgʻrisida”gi PQ-3997-son qarorlari ijrosini puxta tahlil qilgan holda ushbu qarorlar bilan tasdiqlangan “yoʻl xaritalari”ni birlashtirish toʻgʻrisida;

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

7. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Bosh vazirining oʻrinbosari S.U. Umurzakov zimmasiga yuklansin.