Hujjat kuchini yo‘qotgan " " 01.09.2020

Hujjat 25.05.1993 00 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

qarori

OʻZBEKISTON RESPUBLIKASI HUDUDIDA VALYUTANI TARTIBGA SOLISh TOʻGʻRISIDA

LexUZ sharhi

Mazkur qaror Oʻzbekiston Respublikasi Vazirlar Mahkamasining 2020-yil 10-avgustdagi 472-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Valyutani tartibga solish toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida” 2019-yil 22-oktabrdagi OʻRQ-573-son va “Banklar va bank faoliyati toʻgʻrisida” Oʻzbekiston Respublikasi Qonuniga oʻzgartish va qoʻshimchalar kiritish haqida” 2019-yil 5-noyabrdagi OʻRQ-580-son qonunlari)”gi qaroriga asosan 2020-yil 1-sentabrdan oʻz kuchini yoʻqotadi.

“Valyutani tartibga solish toʻgʻrisida” va “Korxonalar, birlashmalar va tashkilotlardan olinadigan soliqlar toʻgʻrisida”gi Oʻzbekiston Respublikasi Qonuniga oʻzgartirishlar va qoʻshimchalar kiritish toʻgʻrisida” 1993-yil 7-maydagi Oʻzbekiston Respublikasi qonunlariga muvofiq va xalqaro toʻlovlarni markazlashgan tartibda amalga oshirish uchun chet el valyutasida olinadigan barqaror moliyaviy manbalarni taʼminlash, Respublika valyuta fondini shakllantirish, aholi uchun birinchi navbatda zarur boʻlgan buyumlarni chet eldan xarid qilishni taʼminlash maqsadida Vazirlar Mahkamasi qaror qiladi:

1. Quyidagilar belgilab qoʻyilsin:

Oʻzbekiston Respublikasi hududida tadbirkorlik yoki boshqa faoliyat bilan shugʻullanuvchi hamda chet el valyutasida tushum oluvchi mulkchilikning barcha shakllaridagi korxonalar, birlashmalar va tashkilotlar chet el valyutasida olingan tushumdan soliq toʻlaydilar;

barter eksport-import operatsiyalarini amalga oshirishda valyuta tushumi summasi bitim qiymatidan kelib chiqqan holda hisoblab chiqiladi va chet el valyutasida olingan tushumga soliq solishning obyekti boʻlib hisoblanadi;

chet el valyutasida olingan tushumdan 25 foizli stavka boʻyicha soliq — Respublika valyuta fondiga va 10 foizli stavka boʻyicha — Qoraqalpogʻiston Respublikasi, viloyatlar hamda Toshkent shahrining tegishli valyuta fondlariga toʻlanadi. Bunda valyutaning 5 foizi Respublika valyuta fondiga ajratmalarning 25 foizi hisobidan Oʻzbekiston Respublikasi Moliya vazirligi va Markaziy bank tomonidan belgilanadigan tartibga muvofiq Markaziy bankka ajratilishi—sotilishi kerak.

Keyingi tahrirga qarang.

2. Quyidagilar tasdiqlansin:

chet el valyutasida olingan tushumdan soliqni hisoblab chiqish va toʻlash tartibi toʻgʻrisidagi nizom 1-ilovaga muvofiq;

Keyingi tahrirga qarang.

Respublika valyuta fondi toʻgʻrisidagi nizom 2-ilovaga muvofiq;

3. Oʻzbekiston Respublikasi Moliya vazirligi Oʻzbekiston Respublikasi Vazirlar Mahkamasi huzuridagi Davlat soliq Bosh boshqarmasi bilan birgalikda:

chet el valyutasida olingan tushumdan soliqni hisoblab chiqish va toʻlash tartibi toʻgʻrisidagi yoʻriqnomani oʻn kun muddatda ishlab chiqsin hamda uni tegishli vazirliklar, idoralar, konsernlar, uyushmalar va boshqa soliq toʻlovchilarga yetkazsin;

chet el valyutasida undiriladigan bojlar, yigʻimlar va soliqqa tegishli boʻlmagan boshqa majburiy toʻlovlar roʻyxati toʻgʻrisidagi takliflarni ikki hafta muddatda Vazirlar Mahkamasiga kiritsin.

4. Oʻzbekiston Respublikasi Moliya vazirligi va Markaziy banki oʻn kun muddatda Respublika valyuta fondi mablagʻlaridan Oʻzbekiston Respublikasi Markaziy bankiga valyuta sotish tartibi boʻyicha Vazirlar Mahkamasiga taklif kiritsinlar.

5. Oʻzbekiston Respublikasi Moliya vazirligi va “Oʻzistiqbolstat” davlat qoʻmitasi Markaziy bank Davlat soliq Bosh boshqarmasi, Davlat bojxona qoʻmitasi hamda Tashqi iqtisodiy aloqalar vazirligi bilan birgalikda ikki hafta muddatda valyuta, eksport-import operatsiyalari boʻyicha statistika hisoboti shaklini ishlab chiqsinlar va uni joriy etish yuzasidan takliflar kiritsinlar.

6. Oʻzbekiston Respublikasi Moliya vazirligi vakolatli banklar bilan birgalikda har oyda kirimlarning manbalarini va xarajatlar moddalarini koʻrsatgan holda amalga oshirilgan valyuta operatsiyalari boʻyicha hisobotlarni Vazirlar Mahkamasiga taqdim etishni taʼminlasin.

7. Vazirliklar, idoralar, banklar va boshqa tashkilotlar bir oy muddatda normativ va yoʻriqnoma hujjatlarni mazkur qarorga va ilova qilinayotgan Nizomga muvofiqlashtirsinlar.

8. Vazirlar Mahkamasining 1991-yil 6-sentabrdagi 200-7-son qarori oʻz kuchini yoʻqotgan deb hisoblansin.

9. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari oʻrtoq Oʻ.T. Sultonov zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 25-may,

251-son

Vazirlar Mahkamasining
1993-yil 25-maydagi 251-son qaroriga
1-ILOVA

Chet el valyutasida olingan tushumga solinadigan soliqni hisoblab chiqish va toʻlash tartibi toʻgʻrisida

NIZOM

Ushbu Nizom chet el valyutasida olingan tushumdan soliq toʻlovchilarning roʻyxatini, soliqni hisoblab chiqish va toʻlash muddatlari tartibini belgilaydi.

Soliq toʻlovchilar chet el valyutasida olingan tushumdan soliq toʻlashda ushbu Nizomga va Oʻzbekiston Respublikasining soliq solish boʻyicha boshqa qonun va normativ hujjatlariga amal qiladilar.

1. Quyidagilar soliq toʻlovchilar hisoblanadilar:

yuridik shaxs boʻlgan mulkchilikning barcha shakllaridagi korxonalar, birlashmalar va tashkilotlar, shu jumladan, jamoa, davlat, dehqon xoʻjaliklari va boshqa qishloq xoʻjaligi korxonalari, shuningdek, korxonalar, birlashmalar va tashkilotlarning yuridik shaxs boʻlmagan, ammo bank muassasalarida mustaqil balansga va hisob schyotiga ega boʻlgan filiallari, vakolatxonalari va boshqa alohida boʻlinmalari;

xoʻjalik hisobida boʻlmagan, lekin xoʻjalik (tijorat) faoliyatidan chet el valyutasida daromad olayotgan tashkilotlar;

Oʻzbekiston Respublikasi hududida chet el investitsiyasi bilan tashkil etilgan korxonalar, xoʻjalik hisobi prinsiplarida xoʻjalik (tijorat) faoliyatini amalga oshiruvchi xalqaro birlashmalar va tashkilotlar, ularning shoʻba korxonalari, filiallari va boshqa boʻlinmalari, shuningdek, bosh korxonalari boshqa davlatlarning hududlarida joylashgan Oʻzbekiston Respublikasi hududidagi shoʻba korxonalar, filiallar va boshqa boʻlinmalar;

xoʻjalik (tijorat) faoliyatini amalga oshiruvchi, Hukumat tasarrufida boʻlmagan xalqaro tashkilotlar (birlashmalar);

banklar va sugʻurta organlari.

2. Mahsulotlar (ishlar, xizmatlar)ni, boshqa moddiy boyliklarni sotishdan va sotishdan tashqari operatsiyalarni amalga oshirishdan chet el valyutasida olingan tushum soliq solish obyekti hisoblanadi.

Mazkur Nizomda mahsulotlar (ishlar, xizmatlar)ni sotishdan chet el valyutasida olingan tushum deganda joʻnatilgan mahsulot hamda bajarilgan ishlar va koʻrsatilgan xizmatlar uchun schyotlar boʻyicha toʻlangan summa, shuningdek, sotilgan mahsulot (ishlar, xizmatlar) uchun toʻlangan, korxonaning bankdagi schyotiga, korxonaning kassasiga haqiqatda tushgan chet el valyutasidagi pul mablagʻlari, shuningdek, boshqa tadbirkorlik faoliyatidan chet el valyutasida olingan summa tushuniladi.

3. Chet el valyutasida olingan tushumga solinadigan soliq toʻlovchilarning schyotlariga valyuta tushumi kelib tushgan vaqtdan boshlab – 10 kun mobaynida Respublika valyuta fondiga 25 foizli stavka boʻyicha hamda Qoraqalpogʻiston Respublikasi, viloyatlar va Toshkent shahar valyuta fondlariga 10 foizli stavka boʻyicha toʻlanadi.

Respublika valyuta fondiga oʻtkaziladigan 25 foiz ajratmalarning 5 foizi, Oʻzbekiston Respublikasi Moliya vazirligi va Markaziy banki tomonidan belgilanadigan tartibga muvofiq Markaziy bankka ajratilishi—sotilishi shart.

4. Korxonalardan soliq olish maqsadida korxonalarning chet el valyutasidagi yalpi tushumi quyidagilar hisobiga kamaytirilgan holda qabul qilinadi:

yuklarni transportda tashish, sugʻurta qilish va tarqatish qiymati;

bitimlar va shartnomalarga muvofiq Oʻzbekiston Respublikasining boshqa rezidentlariga tegishli boʻlgan hamda ulardan soliq bevosita valyutaning ushbu qismini oluvchi tomonidan toʻlanadigan chet el valyutasidagi tushumning bir qismi;

kreditlar uchun foizlar boʻyicha chet el valyutasidagi toʻlovlar summasi, muddati oʻtib ketgan va muddati uzaytirilgan ssudalardan tashqari;

xayriya, ekologiya va sogʻlomlashtirish jamgʻarmalariga berilgan chet el valyutasidagi tushum summasi, lekin chet el valyutasida olingan soliq solinadigan tushumning 1 foizidan koʻp boʻlmagan miqdorda.

5. Xayriya maqsadlarida xayr-ehson sifatida tushuvchi chet el valyutasidagi mablagʻlardan maqsadli foydalanilgan taqdirda;

korxonalar, birlashmalar va tashkilotlarning aksiyalari, brokerlik oʻrinlari, qiymatli qogʻozlarini sotib olganlik uchun toʻlovning ustav sarmoyasiga tushgan ulushidan;

valyuta bozorida sotib olingan chet el valyutasidan chet el valyutasida olingan tushumga solinadigan soliq undirilmaydi.

6. Soliq summasi, berilgan imtiyozlarni hisobga olib, chet el valyutasida olingan tushum miqdoridan kelib chiqilgan holda soliq toʻlovchi tomonidan mustaqil ravishda hisoblab chiqiladi.

Bunda korxona daromadlaridan olinadigan soliq chet el valyutasida olingan tushumni oʻz ichiga olmaydigan yalpi daromaddan kelib chiqqan holda hisoblab chiqiladi.

7. Respublika valyuta fondining mablagʻlari Oʻzbekiston Respublikasi Tashqi iqtisodiy faoliyat milliy bankining maxsus schyotida jamlanadi hamda ulardan Oʻzbekiston Respublikasi Vazirlar Mahkamasi tomonidan belgilanadigan maqsadlarda foydalaniladi.

8. Qoraqalpogʻiston Respublikasi, viloyatlar va Toshkent shahar valyuta fondlarining mablagʻlari Oʻzbekiston Respublikasi Tashqi iqtisodiy faoliyat milliy banki, uning filiallari va boshqa vakolatli banklarning tegishli schyotlarida jamlanadi hamda ulardan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan belgilanadigan maqsadlarda foydalaniladi.

9. Qimmatbaho toshlarni, qimmatbaho metallarni, ulardan yasalgan buyumlarni, uran va boshqa strategik xomashyoni hamda oʻxshashi yoʻq texnologiyalarni eksport qilishdan chet el valyutasida olingan tushumdan soliq toʻlash tartibi Oʻzbekiston Respublikasi Vazirlar Mahkamasi tomonidan belgilanadi.

10. Chet el valyutasida olingan tushumdan soliq olish boʻyicha hisobotlar tegishli soliq idoralariga hisobot oyidan keyingi oyning 20-kuniga qadar taqdim etiladi.

11. Oʻzbekiston Respublikasining vakolatli banklari, Davlat bojxona qoʻmitasi har oyda tegishli moliya va soliq idoralariga Vazirlar Mahkamasi tomonidan tasdiqlanadigan shaklga binoan amalga oshirilgan valyuta, eksport-import operatsiyalari toʻgʻrisidagi hisobotni taqdim etishga majburdirlar.

12. Eksport qilgan korxonaning aybi bilan bankka toʻlov hujjatlari taqdim etilmagan yoki tovar yuklab joʻnatilgandan keyin 180 kun oʻtgach uning hisob schyotiga valyuta tushumi tushmagan taqdirda bank bu haqda davlat soliq idoralariga maʼlum qiladi.

13. Oʻzbekiston Respublikasi Davlat bojxona qoʻmitasi va uning hududiy boʻlinmalari, mahalliy soliq idoralarining soʻrovlariga binoan ularga bojxona deklaratsiyalari reyestrlarini joʻnatiladigan mahsulotlar miqdorini, valyuta tushumi summasini hamda eksport yuklarni joʻnatishga asos boʻlgan boshqa maʼlumotlarni koʻrsatgan holda taqdim etadilar.

14. Chet el valyutasida olingan tushumdan soliq toʻlangandan keyin valyuta tushumining qolgan qismi korxonalarning valyuta fondlarini shakllantirishga yoʻnaltiriladi, korxonalar ushbu fond mablagʻlaridan oʻz ixtiyorlari boʻyicha, oʻzlarining ustavlarida koʻzda tutilgan vazifalarga muvofiq foydalanadilar.

15. Respublika valyuta fondiga soliq toʻlovlarining toʻgʻriligi va oʻz vaqtida toʻlanganligi uchun javobgarlik soliq toʻlovchilar va ularning mansabdor shaxslariga yuklatiladi.

16. Mahsulotlar (ishlar, xizmatlarni sotishdan, sotishdan tashqari operatsiyalar natijalaridan, shuningdek, boshqa tadbirkorlik faoliyatidan chet el valyutasida olingan tushumlar, agar Oʻzbekiston Respublikasi Markaziy banki tomonidan boshqacha tartib belgilanmagan boʻlsa, Oʻzbekiston Respublikasi hududidagi xorijiy sheriklar bilan hisob-kitoblarni amalga oshiruvchi vakolatli banklardagi schyotlarga oʻtkazilishi shart.

Chet el valyutasida olingan valyuta tushumini schyotga oʻtkazishning koʻrsatib oʻtilgan tartibini buzganliklari uchun korxonalarga Oʻzbekiston Respublikasining amaldagi qonun hujjatlariga muvofiq moliya sanksiyalari qoʻllaniladi.

17. Chet el valyutasidagi tushumdan soliqning toʻliqligi, toʻgʻriligi va oʻz vaqtida toʻlanishini nazorat qilish soliq idoralari tomonidan Oʻzbekiston Respublikasi qonun hujjatlariga muvofiq amalga oshiriladi.

18. Ushbu Nizom korxonalar, tashkilotlar va muassasalar tomonidan buzilgan taqdirda respublika Markaziy banki, Tashqi iqtisodiy aloqalar vazirligi, moliya va soliq idoralari tomonidan, ularning huquq doirasida, belgilangan tartibda quyidagi sanksiyalar qoʻllaniladi:

moliya sanksiyalarini qoʻllash va Oʻzbekiston Respublikasi qonun hujjatlarida belgilangan miqdorlarda maʼmuriy jarimalar solish;

tashqi iqtisodiy faoliyat qatnashchisi maqomidan mahrum qilish,

chet el valyutasida operatsiyalar oʻtkazish, tovarlar (ishlar, xizmatlar)ni eksport qilish tashqi iqtisodiy savdo-vositachilik operatsiyalari uchun olingan litsenziyalardan mahrum qilish;

qoidalarning buzilishiga pul qoʻygan yoki valyutani tartibga solish meʼyorlariga rioya qilish uchun zarur chora-tadbirlar koʻrmagan mansabdor shaxslarni amaldagi qonun hujjatlariga muvofiq javobgarlikka tortish.

19. Ushbu Nizomni qoʻllanish boʻyicha yoʻriqnoma Oʻzbekiston Respublikasi Moliya vazirligi tomonidan Vazirlar Mahkamasi huzuridagi Davlat soliq Bosh boshqarmasi bilan birgalikda chiqariladi.

Keyingi tahrirga qarang.

Vazirlar Mahkamasining
1993-yil 25-maydagi 251-son qaroriga
2-ILOVA

Respublika valyuta fondi toʻgʻrisida

NIZOM

Mazkur Nizom Respublika valyuta fondining vazifasini, shakllanishini va ishlatilishini belgilaydi.

I. Umumiy qoidalar

Respublika valyuta fondi (RVF) — respublika valyuta budjeti respublika valyuta tushumlarining bir qismini chet el kreditlarini toʻlash yuzasidan majburiyatlarni bajarish, aholi ehtiyojlari uchun eng zarur boʻlgan buyumlarni chet mamlakatlardan xarid qilishni taʼminlash, xalqaro toʻlovlarni markazlashtirilgan tartibda amalga oshirish, respublikaning valyuta rejasida belgilangan davlat ijtimoiy va iqtisodiy dasturlarini amalga oshirish manbai sifatida jamlash maqsadida Oʻzbekiston Respublikasi Vazirlar Mahkamasi tomonidan tashkil etiladi.

RVF mablagʻlari ilova* qilinayotgan Respublika valyuta fondi daromadlari va xarajatlari Klassifikatsiyasiga muvofiq Oʻzbekiston Respublikasi Tashqi iqtisodiy faoliyat milliy bankidagi maxsus schyotlarda jamlanadi.

* Ilova rus tilidagi matnida berilgan.

II. Respublika valyuta fondini shakllantirish manbalari

1. Chet el valyutasidagi quyidagi tushumlar RVFni shakllantirish manbalari hisoblanadi:

yuridik shaxslarning chet el valyutasidagi tushumidan olinadigan soliq;

chet el investorining xorijga oʻtkaziladigan daromadidan olinadigan soliq;

jismoniy shaxslardan chet el valyutasida olinadigan daromad soligʻi;

bojxona bojlari;

bojxona tartibi qoidalarini amalga oshirganlik uchun toʻlovlar;

musodara qilingan mol-mulkni va musodara qilingan chet el valyutasini sotishdan tushumlar;

korxonalar, birlashmalar va tashkilotlarni roʻyxatga olganlik uchun davlat boji;

Oʻzbekiston Respublikasi Hukumati tomonidan olingan chet el kreditlari;

Oʻzbekiston Respublikasi Hukumati tomonidan chet mamlakatlar hukumatlariga berilgan kreditlar boʻyicha tushumlar;

qiymatli qogʻozlardan tushumlar;

Oʻzbekiston Respublikasi Markaziy bankidan chet el valyutasida sotib olingan mablagʻlar;

boshqa tushumlar.

2. RVF schyotlari boʻyicha bank operatsiyalarini amalga oshirganlik uchun vositachilik haqi undirilmaydi. Mablagʻlar chet elga oʻtkazilgan taqdirda bank haqi imtiyozli tarif boʻyicha undiriladi.

III. Oʻzbekiston Respublikasi ijro etuvchi organlarining Respublika valyuta fondi mablagʻlarini shakllantirish va ulardan foydalanish boʻyicha vakolatlari

RVF mablagʻlarini shakllantirish va ulardan foydalanish RVFning chet el valyutasidagi tushumlari va xarajatlari Prognozi hamda Oʻzbekiston Respublikasi Vazirlar Mahkamasining alohida qarorlari asosida amalga oshiriladi.

RVF ning chet el valyutasidagi tushumlari va xarajatlari Prognozi har yili koʻrib chiqish va tasdiqlash uchun Oʻzbekiston Respublikasi Vazirlar Mahkamasiga Moliya vazirligi tomonidan taqdim etiladi.

Respublika Moliya vazirligining huquq doirasiga quyidagilar kiradi:

RVFning chet el valyutasidagi tushumlari va xarajatlarining tasdiqlangan Prognoziga muvofiq va Oʻzbekiston Respublikasi Vazirlar Mahkamasining alohida qarorlariga binoan RVF mablagʻlarini shakllantirish va ulardan foydalanish;

Respublika Vazirlar Mahkamasiga valyuta mablagʻlarini koʻpaytirish yoʻllari va manbalari toʻgʻrisida, RVF mablagʻlaridan foydalanish yoʻnalishlari haqida takliflar kiritish;

RVF dan ajratilgan valyuta mablagʻlaridan maqsadli va samarali foydalanishni nazorat qilish;

xizmat safarlari va boshqa joriy xarajatlar uchun valyuta mablagʻlari ajratish.

Tashqi iqtisodiy faoliyat milliy bankining va boshqa vakolatli banklarning, shuningdek, respublika Vazirlar Mahkamasi huzuridagi Davlat soliq Bosh boshqarmasining huquq doirasiga korxonalardan, birlashmalardan va tashkilotlardan RVFga, Qoraqalpogʻiston Respublikasi viloyatlar va Toshkent shahrining valyuta fondlariga chet el valyutasidagi soliqlar hamda boshqa toʻlovlarning oʻz vaqtida va toʻliq kelib tushishini taʼminlash kiradi.

IV. Respublika valyuta fondi mablagʻlaridan foydalanishning asosiy yoʻnalishlari

RVF mablagʻlaridan foydalanishning asosiy yoʻnalishlari quyidagilar hisoblanadi:

Oʻzbekiston Respublikasining chet el valyutasidagi tushumlar va xarajatlar Prognozida nazarda tutilgan maqsad va chora-tadbirlar;

chet el kreditlariga xizmat koʻrsatish;

Oʻzbekiston Respublikasining investitsiya Dasturiga kirgan ijtimoiy ahamiyatga ega boʻlgan dasturlar va obyektlarni imtiyozli shartlarda kredit bilan taʼminlash;

respublika Hukumati nomidan jahon bozorlarida qiymatli qogʻozlar operatsiyalarini amalga oshirish;

Oʻzbekiston Respublikasi Vazirlar Mahkamasi tomonidan belgilanadigan boshqa maqsadlar.

V. Respublika valyuta fondidan mablagʻlar ajratish shakllari

Respublika valyuta fondidan chet el valyutasidagi mablagʻlar quyidagi shakllarda ajratiladi:

a) budjetdagi davlat korxonalari va tashkilotlariga:

begʻaraz berish;

foizsiz kredit berish;

imtiyozli kredit berish;

b) mulkchilik shaklidan qatʼi nazar, xoʻjalik hisobidagi korxonalar va tashkilotlarga:

Oʻzbekiston Respublikasi Markaziy banki tomonidan sotiladigan kunda belgilanadigan kurs boʻyicha soʻmga sotish;

imtiyozli kredit berish;

v) Markaziy bankka:

Oʻzbekiston Respublikasi Moliya vazirligi va Markaziy banki tomonidan belgilangan tartibga muvofiq soʻmga sotish.

Markaziy bankka, korxonalarga, tashkilotlarga va muassasalarga chet el valyutasini sotishdan tushgan soʻmdagi ekvivalent Vazirlar Mahkamasining Oʻzbekiston Respublikasi Tashqi iqtisodiy faoliyat milliy bankidagi maxsus soʻm schyotiga oʻtkaziladi.

Mazkur schyotdan olinadigan mablagʻlardan Vazirlar Mahkamasining qarori boʻyicha:

chet el valyutalari sotib olish;

eksport tovarlar sotib olish uchun soʻmni qoplashni taʼminlash;

Oʻzbekiston Respublikasi Vazirlar Mahkamasi tomonidan belgilanadigan boshqa maqsadlar uchun foydalaniladi.

VI. Respublika valyuta fondi mablagʻlaridan foydalanish boʻyicha hisobot

RVFning chet el valyutasidagi tushumlar va xarajatlar Prognozining bajarilishi toʻgʻrisidagi hisobot yilning har choragida Oʻzbekiston Respublikasi Moliya vazirligi tomonidan Vazirlar Mahkamasiga koʻrib chiqish uchun taqdim etiladi.