|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
BUXORO VILOYATIDA “OLOT” BOJXONA KOMPLEKSI QURILIShI TOʻGʻRISIDA
LexUZ sharhiMazkur qaror Oʻzbekistan Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Avtotransport vositalarining kirishi va chiqishini tartibga solish, Buxoro viloyatida Turkmaniston bilan chegarada bojxona nazoratini taʼminlash maqsadida Vazirlar Mahkamasi qaror qiladi:
1. Davlat soliq qoʻmitasining Bosh bojxona boshqarmasi 1995-1996-yillarda Buxoro viloyatida Turkmaniston bilan chegarada “Olot” bojxona kompleksi qurilishini amalga oshirsin.
2. Buxoro viloyati hokimligi “Olot” bojxona kompleksi qurilishi, ijtimoiy-maishiy maqsaddagi obyektlar uchun 4 gektar yer maydoni ajratsin hamda bir hafta muddatda Bosh bojxona boshqarmasiga arxitektura — rejalashtirish topshirigʻini, uchastkaning va muhandislik tarmoqlari trassalarining topografiya suratini bersin.
3. “Oʻzshaharsozlik” ilmiy-tadqiqot loyihalash instituti Davlat soliq qoʻmitasining Bosh bojxona boshqarmasi buyurtmasi boʻyicha “Olot” bojxona kompleksi qurilishining zarur loyiha-smeta hujjatlarini ishlab chiqsin.
4. Buxoro viloyati hokimligi, Oʻzbekiston Respublikasi Energetika va elektrlashtirish vazirligi oʻzlari uchun 1995-yilga ajratilgan kapital mablagʻlarning umumiy hajmi va oʻz mablagʻlari hisobidan zarur muhandislik kommunikatsiyalarining “Olot” bojxona kompleksiga tortib keltirilishini taʼminlasinlar.
5. “Oʻzdavneftmahsulot” birlashmasi qurilish uchastkasi bosh rejasiga muvofiq va oʻz mablagʻlari hisobidan avtomobillarga yonilgʻi quyish shoxobchasi qursin.
6. “Oʻzavtoyoʻl” davlat konserni oʻz mablagʻlari hisobidan zarur borish yoʻllari, shu jumladan, yonilgʻi quyish shoxobchalariga borish yoʻllari, koʻzdan kechirish maydonlari, avtomashinalar qoʻyiladigan joylar qurilishini taʼminlasin.
7. Davlat soliq qoʻmitasining Bosh bojxona boshqarmasi Buxoro viloyatidagi “Olot” bojxonasi obyektlar” qurilishini oʻz mablagʻlari hisobiga 1995-1996-yillarda amalga oshirsin.
“Oʻzsuvqurilish” davlat konserni, “Oʻzkolxozqurilish” birlashmasi Davlat soliq qoʻmitasining Bosh bojxona boshqarmasi buyurtmasi boʻyicha koʻrsatib oʻtilgan bojxona kompleksi binolari va inshootlari qurilishini amalga oshirsinlar.
8. Oʻzbekiston Respublikasi Moliya vazirligi Bosh bojxona boshqarmasining “Olot” posti uchun qoʻshimcha 30 nafar xodimlar xarajatlari uchun mablagʻ ajratsin.
9. Bosh bojxona boshqarmasiga “Olot” bojxona kompleksi obyektlarini loyihalash va qurish ishlarini bir vaqtda amalga oshirishga, mablagʻ bilan taʼminlovchi banklarga esa loyiha-smeta hujjatlari ishlab chiqilib, tasdiqlangunga qadar amalda bajarilgan ishlar hajmi boʻyicha haq toʻlashga ruxsat berilsin.
10. Mazkur qarorning bajarilishini nazorat qilish Bosh vazir oʻrinbosari R.R. Yunusov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1995-yil 25-may,
184-son
