1992-yilgi Olimpiya oʻyinlarida MDH yagona sport jamoasi tarkibida oʻz respublikasi bayrogʻi ostida qatnashuvi Oʻzbekiston Respublikasi sportchilarini muvaffaqiyatli tayyorlashni taʼminlash maqsadida va bundan buyon Oʻzbekiston Respublikasi terma jamoalarining xalqaro musobaqalarda, Osiyo va Olimpiya oʻyinlarida mustaqil jamoa sifatida qatnashishlarini eʼtiborga olib, Vazirlar Mahkamasi qaror qiladi:

1. Oʻzbekiston Respublikasi Davlat jismoniy tarbiya va sport qoʻmitasi:

davlatlararo bitimlarga muvofiq MDH terma jamoalarining respublika hududida oʻquv-mashq yigʻinlarini tashkil qilish va yuksak darajada oʻtkazishni taʼminlasin;

MDH yagona sport jamoasi tarkibida Oʻzbekiston Respublikasi sportchilarini sifatli tayyorlash va ularning Olimpiya oʻyinlarida muvaffaqiyatli ishtirok etishlari uchun zarur chora-tadbirlarni amalga oshirsin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari oʻz tasarrufidagi sport qoʻmitalariga yoshlarning respublika, viloyatlar va shahar sport oʻyinlarini, Oʻzbekiston Respublikasi shaharlari spartakiadalarini tashkil etish va oʻtkazishda aniq amaliy yordam koʻrsatsinlar, ularni tashkil qilish va oʻtkazish uchun mablagʻ ajratsinlar.

3. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi Oʻzbekiston Respublikasi Davlat jismoniy tarbiya va sport qoʻmitasi bilan kelishuvga muvofiq respublika terma jamoasi aʼzosi boʻlgan talaba va oʻqituvchilarni Olimpiya oʻyinlariga, xalqaro va respublikalararo musobaqalarga samarali tayyorlash uchun barcha zarur sharoitlarni taʼminlasinlar.

4. Oʻzbekiston Respublikasi Sogʻliqni saqlash vazirligi Oʻzbekiston Respublikasi Davlat jismoniy tarbiya va sport qoʻmitasi uchun respublika terma jamoalarini 1992-yil xalqaro musobaqalariga tayyorlash va ularni oʻtkazish davrida zarur dori-darmonlar ajratsin.

5. Oʻzbekiston Yengil sanoat mollari ishlab chiqarish davlat uyushmasi “Oʻzbeksavdo” uyushmasi zaxirasi hisobidan Oʻzbekiston Respublikasi Davlat jismoniy tarbiya va sport qoʻmitasi buyurtmasi boʻyicha respublika terma jamoalari uchun anʼanaviy sport kiyimlarini tayyorlasin va Oʻzbekiston Respublikasi Davlat jismoniy tarbiya va sport qoʻmitasining “Oʻzbekiston” sport mollari sotish markaziga yetkazib bersin.

6. “Oʻzbekiston havo yoʻllari” milliy aviakompaniyasi Oʻzbekiston Respublikasi Davlat jismoniy tarbiya va sport qoʻmitasi buyurtmasiga muvofiq xalqaro musobaqalar qatnashchilarini belgilangan joyga olib borishni taʼminlasin.

7. “Oʻzbekiston” uyushmasi, viloyatlar va Toshkent shahar hokimliklari Oʻzbekiston Respublikasi hududida oʻtkaziladigan MDH va respublika hamda xalqaro musobaqalarning oʻquv-mashq yigʻinlarida qatnashuvchi terma jamoalarini sifatli oziq-ovqat bilan taʼminlasin.

8. Oʻzbekiston Respublikasi Moliya vazirligi MDH va respublika terma jamoalari aʼzolari boʻlgan instruktor-sportchilarning lavozim ish haqlarini toʻlash uchun Oʻzbekiston Respublikasi Davlat jismoniy tarbiya va sport qoʻmitasiga 1992-yilda 930 ming soʻm miqdorida qoʻshimcha mablagʻ ajratsin.

9. Oʻzbekistonning taraqqiyot istiqbolini belgilash qoʻmitasi xalqaro toifadagi sport ustalarini markazlashgan tartibda tayyorlash va Oʻzbekiston Respublikasining eng kuchli sportchilarining Olimpiya va Osiyo oʻyinlarida, jahon chempionatlari, birinchiliklari, Kuboklarida va boshqa xalqaro musobaqalarda muvaffaqiyatli ishtirok etishlarini taʼminlash uchun Oʻzbekiston Respublikasi Davlat jismoniy tarbiya va sport qoʻmitasining talabnomasi boʻyicha chet el valyutasini ajratish imkoniyatlarini qidirib topsin va 1992-yildan boshlab kerakli mablagʻni ajratsin.

10. Mazkur qarorning bajarilishini nazorat qilish ijtimoiy masalalar, fan va taʼlim boʻlimi zimmasiga yuklatilsin.