Hujjat 05.03.2021 00 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Ilm, maʼrifat va raqamli iqtisodiyotni rivojlantirish yili”da amalga oshirishga oid davlat dasturi toʻgʻrisida” 2020-yil 2-martdagi PF-5953-son Farmoni)

Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Ilm, maʼrifat va raqamli iqtisodiyoni rivojlantirish yili”da amalga oshirishga oid davlat dasturi toʻgʻrisida” 2020-yil 2-martdagi PF-5953-son Farmoniga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — Oʻzbekiston Respublikasi iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 20-iyun,

396-son

Vazirlar Mahkamasining 2020-yil 20-iyundagi 396-son qaroriga

ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2011-yil 7-apreldagi 107-son qarori (Oʻzbekiston Respublikasi QT, 2011-y., 4-son, 27-modda) bilan tasdiqlangan Bolalikdan nogironlarga va oʻn sakkiz yoshga toʻlmagan OIV infeksiyasiga chalingan shaxslarga nafaqalar tayinlash va toʻlash tartibi toʻgʻrisidagi nizomda:

a) 5-bandning toʻrtinchi xatboshidagi “farzandlikka oluvchisi,” soʻzlaridan keyin “oilaga tarbiyaga olgan (patronat) tutingan ota-onasi (keyingi oʻrinlarda — tutingan ota-ona),” soʻzlari qoʻshilsin;

b) 6-bandning “v” kichik bandida:

birinchi xatboshi quyidagi tahrirda bayon qilinsin:

“v) nogiron bolaning, shuningdek, 16 yoshga toʻlmagan OIV infeksiyasiga chalingan shaxsning ota-onasi, farzandlikka oluvchisi, tutingan ota-onasi, vasiysi yoki homiysi tomonidan — nogiron bola, shuningdek, 16 yoshga toʻlmagan OIV infeksiyasiga chalingan shaxsning tugʻilganligi toʻgʻrisidagi guvohnoma nusxasi, sogʻliqni saqlash muassasalari tomonidan belgilangan tartibda beriladigan tibbiy xulosa, ariza bergan ota-ona, farzandlikka oluvchi, tutingan ota-ona, vasiy yoki homiyning pasporti nusxasi”;

ikkinchi xatboshidagi “Farzandlikka oluvchi,” soʻzlaridan keyin “tutingan ota-ona,” soʻzlari qoʻshilsin;

v) 13-bandning birinchi xatboshidagi “farzandlikka oluvchisi,” soʻzlaridan keyin “tutingan ota-onasi,” soʻzlari qoʻshilsin;

g) 15-bandning toʻrtinchi xatboshisidagi “davlat taʼminotidan chiqarilganda” soʻzlaridan keyin “, nogiron bolani tarbiyalash uchun oilaga qabul qilish toʻgʻrisidagi bitim bekor qilinganda” soʻzlari qoʻshilsin.

Keyingi tahrirga qarang.

2. Vazirlar Mahkamasining “Davlat pensiyalarini tayinlash va toʻlash tartibini yanada takomillashtirishga yoʻnaltirilgan normativ-huquqiy hujjatlarni tasdiqlash toʻgʻrisida” 2011-yil 8-sentabrdagi 252-son qarorida (Oʻzbekiston Respublikasi QT, 2011-y., 9-son, 75-modda):

a) 1-ilovada:

59-bandga quyidagi mazmundagi ikkinchi xatboshi qoʻshilsin:

“Ish staji “Yagona milliy mehnat tizimi” idoralararo dasturiy-apparat kompleksida (keyingi oʻrinlarda — “YAMMT” IDAK) mavjud maʼlumotlar asosida ham tasdiqlanadi”;

ikkinchi — oltinchi xatboshilar tegishli ravishda uchinchi — yettinchi xatboshilar deb hisoblansin;

85-band quyidagi tahrirda bayon qilinsin:

“85. Ish haqi hisoblangan ish haqi summasidan olinadi.

Ish haqini guvohlar koʻrsatmasi asosida aniqlashga yoʻl qoʻyilmaydi. Lavozim maoshlari shtat jadvalidan koʻchirmalar va jamoat tashkilotlarining aʼzolik biletlari haqiqiy ish haqini tasdiqlaydigan hujjat oʻrnini bosa olmaydi.

Arxiv maʼlumotlarini taqdim etmasdan ish haqi miqdorini aniqlash:

2005 — 2016-yillar davri uchun — jamgʻarib boriladigan pensiya tizimiga majburiy badallar toʻgʻrisidagi maʼlumotlardan;

2016 — 2018-yillar davri uchun — fuqarolarning Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga oʻtkazilgan sugʻurta badallarini yakka tartibda hisobga olishning markazlashtirilgan elektron reyestri maʼlumotlaridan;