O‘zbekiston Respublikasi Prezidentining “2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi to‘g‘risida” 2019-yil 17-yanvardagi PF-5635-son Farmonini ijro etish yuzasidan, shuningdek, “Yuksalish” umummilliy harakati — nodavlat notijorat tashkiloti faoliyatini yanada qo‘llab-quvvatlash maqsadida Vazirlar Mahkamasi qaror qiladi:

1. Quyidagilar:

a) O‘zbekiston Respublikasi Prezidentining “2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi to‘g‘risida” 2019-yil 17-yanvardagi PF-5635-son Farmonining 25-bandiga muvofiq:

“Yuksalish” umummilliy harakati — nodavlat notijorat tashkiloti (keyingi o‘rinlarda “Yuksalish” harakati deb ataladi) hamda uning Qoraqalpog‘iston Respublikasi, viloyatlar va Toshkent shahrida hududiy bo‘linmalari tashkil etilganligi;

rejalashtirilgan islohotlarni, shu jumladan, O‘zbekiston Respublikasi Prezidentining 2019-yil 17-yanvardagi PF-5635-son Farmoni bilan tasdiqlangan 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturida nazarda tutilgan islohotlarni amalga oshirishga ko‘maklashish maqsadida fuqarolar, xorijda yashayotgan vatandoshlar va nodavlat notijorat tashkilotlarni ixtiyoriylik asosida birlashtirishdan, shu jumladan:

xalq va biznes hamjamiyati bilan ochiq muloqotni yo‘lga qo‘yish;

jamoatchilik nazoratining samarali tizimini shakllantirish;

davlat hokimiyati va boshqaruvi organlari, nodavlat notijorat tashkilotlar va fuqarolik jamiyatining boshqa institutlari, shuningdek, fuqarolar, ayniqsa, yoshlarning sa’y-harakatlari va kuchlarini safarbar etish;

rejalashtirilgan, shu jumladan, Davlat dasturida nazarda tutilgan islohotlarning amalga oshirilishi jarayonini O‘zbekiston Respublikasi Oliy Majlisi palatalari va xalq deputatlari mahalliy Kengashlarida muhokama qilishda faol ishtirok etish;

O‘zbekiston Respublikasi Oliy Majlisi palatalari, O‘zbekiston Respublikasi Prezidenti Administratsiyasi va O‘zbekiston Respublikasi Vazirlar Mahkamasiga tahliliy axborot va takliflarni muntazam kiritish “Yuksalish” harakatining asosiy vazifasi etib belgilanganligi;

b) O‘zbekiston Respublikasi Prezidentining “2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi to‘g‘risida” 2019-yil 17-yanvardagi PF-5635-son Farmonining 26-bandiga muvofiq Adliya vazirligiga “Yuksalish” umummilliy harakati va “Taraqqiyot strategiyasi” markazi bilan birgalikda:

Davlat dasturi amalga oshirilishining borishini tizimli monitoring qilish, uni sifatli va o‘z vaqtida bajarish uchun qo‘shimcha choralar ko‘rish bo‘yicha tavsiyalar ishlab chiqish;

Davlat dasturi amalga oshirilishining borishi to‘g‘risidagi axborotni har oyda umumlashtirish hamda yakunlarini aniq ko‘rsatkichlar va erishilgan ijobiy o‘zgarishlarni aks ettirgan holda o‘z veb-saytlarida joylashtirish;

monitoring natijalari to‘g‘risidagi axborotni har chorakda O‘zbekiston Respublikasi Prezidenti Administratsiyasi va O‘zbekiston Respublikasi Vazirlar Mahkamasiga kiritish;

Davlat dasturi amalga oshirilishi yakunlariga bag‘ishlangan axborot-tahliliy sharhlarni tayyorlash, ularni xorijiy tillarda e’lon qilish va keng tarqatishni ta’minlash topshirilganligi;

v) O‘zbekiston Respublikasi Oliy Majlisi huzuridagi Fuqarolik jamiyati institutlarini qo‘llab-quvvatlash jamoat fondi mablag‘larini boshqarish bo‘yicha parlament komissiyasi hamda “Yuksalish” harakatining muassislari — tashkilotlar tomonidan har yili “Yuksalish” harakatining asoslangan buyurtmanomalari asosida “Yuksalish” harakati markaziy apparati va uning hududiy bo‘linmalari xodimlari mehnatiga haq to‘lash, shuningdek, “Yuksalish” harakatining asosiy vazifalarini bajarish doirasidagi tadbirlarni tashkil etish va o‘tkazishni moliyalashtirish uchun zarur mablag‘lar ajratilishi ma’lumot uchun qabul qilinsin.

2. Belgilansinki:

davlat boshqaruvi organlari, mahalliy ijro etuvchi hokimiyat organlari o‘z faoliyatini nodavlat notijorat tashkilotlarning mustaqilligi va ular faoliyatiga aralashmaslik prinsiplariga qat’iy rioya qilgan holda “Yuksalish” harakati bilan o‘zaro yaqin hamkorlikda amalga oshiradilar;

davlat boshqaruvi organlari, mahalliy ijro etuvchi hokimiyat organlari rahbarlari “Yuksalish” harakatining ishini tashkil etilishi va amalga oshirilishida, shu jumladan, so‘ralayotgan ma’lumotlarni o‘z vaqtida taqdim etish, “Yuksalish” harakati tadbirlari yakunlari bo‘yicha kiritilgan materiallar va tavsiyalarni ko‘rib chiqish yo‘li bilan zarur shart-sharoitlar yaratadilar va har tomonlama ko‘maklashadilar;

“Yuksalish” harakati raisi maqomi, tibbiy va transport ta’minoti shart-sharoitlariga ko‘ra vazirga tenglashtiriladi.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda “Yuksalish” harakatining hududiy bo‘linmalariga ularning binolarini zarur texnika, avtotransport vositasi, ofis anjomlari, mebel va aloqa vositalari, shu jumladan, keng polosali butunjahon Internet axborot tarmog‘i bilan jihozlanishini quyidagi manbalar hisobiga ta’minlasinlar:

Qoraqalpog‘iston Respublikasi budjeti, viloyatlar va Toshkent shahar mahalliy budjetlarining qo‘shimcha manbalari;

qonunchilik bilan taqiqlanmagan boshqa manbalar.

4. O‘zbekiston milliy teleradiokompaniyasi va “Yuksalish” harakatining markaziy va mahalliy telekanallarda davlat hokimiyati va boshqaruvi organlarining mansabdor shaxslari, jamoatchilik va fuqarolik jamiyati institutlari vakillari ishtirokida:

2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini amalga oshirish chora-tadbirlariga;

ochiq muloqotni yo‘lga qo‘yish, davlat organlarining aholi va fuqarolik jamiyati institutlari bilan o‘zaro hamkorligi, o‘sib kelayotgan avlodni qonunlarga, umuminsoniy va milliy qadriyatlarga hurmat ruhida tarbiyalashning dolzarb masalalarini muhokama qilishga;

“Yuksalish” harakati tomonidan olib borilgan monitoringlar natijalarini ko‘rib chiqishga va davlat organlari faoliyatini tahlil qilishga, aniqlangan huquqbuzarliklarni, tizimli kamchiliklar va muammolarni bartaraf etish chora-tadbirlari to‘g‘risida aholini xabardor qilishga bag‘ishlangan birgalikdagi teleko‘rsatuvlar namoyishini tashkil etish to‘g‘risidagi taklifiga rozilik berilsin.

5. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi “Yuksalish” harakatini zarur aloqa vositalari, shu jumladan, hukumat aloqasi bilan belgilangan tartibda ta’minlasin.

6. “Yuksalish” harakati:

Davlat statistika qo‘mitasi, moliya, iqtisodiyot va sanoat, bandlik va mehnat munosabatlari, ichki ishlar vazirliklari, Davlat soliq qo‘mitasi, Davlat bojxona qo‘mitasi, O‘zbekiston Respublikasi Bosh prokuraturasi, Oliy sudi, boshqa vazirliklar va idoralarning statistika axboroti;

O‘zbekiston Respublikasi Moliya vazirligi huzuridagi Budjet-soliq tadqiqotlari instituti va O‘zbekiston Respublikasi Iqtisodiyot va sanoat vazirligi huzuridagi Prognozlashtirish va makroiqtisodiy tadqiqotlar institutining tahliliy materiallari majburiy yuboriladigan reyestrga kiritilsin.

7. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, O‘zbekiston Respublikasi Davlat aktivlarini boshqarish agentligi va Moliya vazirligining Toshkent shahar, Yunusobod tumani, Sh. Rashidov ko‘chasi, 16-uy manzilida joylashgan “Poytaxt” biznes markazi 5-qavatining bir qismini (842 kv.m) “Yuksalish” harakatining markaziy apparatini joylashtirish uchun, shuningdek, Qoraqalpog‘iston Respublikasi, viloyatlar va Toshkent shahrida tegishli binolarni hududiy bo‘linmalarni joylashtirish uchun tekin foydalanish huquqi asosida “Yuksalish” harakatiga berish to‘g‘risidagi taklifiga rozilik berilsin.

8. Mazkur qarorning bajarilishini nazorat qilish O‘zbekiston Respublikasi Vazirlar Mahkamasining Yoshlar siyosati, madaniyat, ma’naviyat, ommaviy axborot vositalari, ijodiy va jamoat tashkilotlari masalalari kotibiyatiga yuklansin.