Yoqilgʻi-energetika resurslarini realizatsiya qilishning bozor mexanizmlarini yanada joriy etishni taʼminlash, ulardan oqilona foydalanish, energiya tejamkorligini ragʻbatlantirish, moliyaviy intizomni mustahkamlash va yoqilgʻi-energetika kompleksi korxonalarini balansli rivojlantirish maqsadida, shuningdek, yoqilgʻi-energetika resurslarining jahon narxlari oʻsishini va tovarlar (xizmatlar) bozorlarida monopoliyani bosqichma-bosqich pasaytirilayotganligini inobatga olgan holda Vazirlar Mahkamasi qaror qiladi:

1. 2018-2019-yillarda narx va tariflarning bosqichma-bosqich oʻzgarish grafiklari:

tabiiy va suyultirilgan gaz uchun 1-ilovaga muvofiq*;

elektr energiyasi uchun 2-ilovaga* muvofiq tasdiqlansin.

2. 2018-yilning 16-noyabridan boshlab:

a) isteʼmol soligʻini hisobga olgan holda avtobenzin va dizel yoqilgʻisi chakana narxlari:

Ai-80 avtobenzinga — 4 000 soʻm/litr;

Ai-91 avtobenzinga — 4 500 soʻm/litr;

dizel yoqilgʻisiga — 4 800 soʻm/litr;

EKO dizel yoqilgʻisiga — 4 900 soʻm/litr etib;

b) qonunchilikda belgilangan ayrim toifadagi shaxslarga avtobenzin xarid qilish xarajatlarining bir qismini qoplash uchun har oylik pul kompensatsiyasi 66 700 (oltmish olti ming yetti yuz) soʻm etib;

v) “Oʻztransgaz” AJning va “Oʻzneftmahsulot” AJ hududiy neft bazalari korxonalarining tabiiy gaz va suyultirilgan gaz, neft mahsulotlarining realizatsiyasidan yagona maxsus va jamgʻarib boriladigan maqsadli hisob raqamlariga tushadigan mablagʻlar (Oʻzbekiston Respublikasi Bosh prokuraturasi huzuridagi Majburiy ijro byurosiga ajratmalar chegirilgan holda) “Oʻzbekneftgaz” AJning maxsus maqsadli hisob raqamlariga oʻtkazish tartibi belgilansin.

3. 2019-yilning 1-yanvaridan boshlab eksperiment tariqasida Toshkent shahrining Yunusobod tumanida quyidagilar joriy etilsin:

a) aholi isteʼmoli uchun elektr energiyasi bazaviy normasi oyiga bir abonentga 300 kVt.soat;

b) aholi isteʼmoli uchun tabiiy gazning bazaviy normasi:

isitish mavsumi davrida yakka tartibda isitiladigan uylar va kvartiralarda yashaydigan bir abonentga oyiga 1000 kub.m;

boshqa holatlarda bir abonentga oyiga 250 kub.m;

v) aholi bilan elektr energiyasi va tabiiy gaz uchun hisob-kitoblarni amalga oshirganda:

bazaviy norma doirasida — belgilangan tarif boʻyicha;

bazaviy normadan ortgan qismi uchun — belgilangan tarifga 1,2 baravar oshirish koeffitsiyentini qoʻllash.

“Oʻzbekneftgaz” AJ, “Oʻzbekenergo” AJ, Oʻzbekiston Respublikasi Moliya vazirligi va Iqtisodiyot vazirligi 2019-yilning 1-iyuliga qadar elektr energiyasi va tabiiy gaz isteʼmoli bazaviy normalarini amalda qoʻllanishini oʻrganish natijalariga koʻra kelgusida isteʼmol bazaviy normalarini qoʻllash boʻyicha Vazirlar Mahkamasiga aniq takliflar kiritsin.

4. “Oʻzbekneftgaz” AJ, Oʻzbekiston Respublikasi Moliya vazirligi va Iqtisodiyot vazirligi:

“Oʻzneftgazqazibchiqarish” AJ va “Oʻzneftmahsulot” AJ bilan birgalikda ishlab chiqarish samaradorligiga erishish maqsadida 2018-yilning 16-noyabridan boshlab neft va gaz sohasida qazib chiqaruvchi va qayta ishlovchi korxonalar mahsulotlarining tarmoq ichidagi narxlari tabiiy gaz uchun — oʻrtacha 2,2 barobarga, neft uchun — oʻrtacha 2 barobarga, gaz kondensati uchun — 1,6 barobarga va suyultirilgan gaz uchun — 2,3 barobarga oshirilishini taʼminlansin;

“Oʻzbekneftgaz” AJ barcha isteʼmolchilarni dizel yoqilgʻisi bilan belgilangan narxlarda uzluksiz taʼminlash boʻyicha 2019-yil 1-yanvargacha taklif kiritsin;

“Oʻzdavneftgazinspeksiya” DI hamda tegishli vazirliklar va idoralar bilan birgalikda bir oy muddatda aholiga maishiy ehtiyoj uchun Vazirlar Mahkamasining 2002-yil 28-martdagi 99-son qarori bilan tasdiqlangan Gaz hisoblagichlari boʻlmagan taqdirda kommunal-maishiy ehtiyojlar uchun aholiga beriladigan tabiiy gazning oylik normalarini qayta koʻrib chiqish boʻyicha Vazirlar Mahkamasiga takliflar kiritsin.

5. Belgilansinki, “Oʻzbekenergo” AJning hududiy elektr tarmoqlari korxonalarining elektr energiyasini yetkazib berish va sotish xizmatlari uchun belgilanadigan ustamalar tasdiqlanadigan tariflar doirasida hududiy elektr tarmoqlari korxonalari tomonidan mustaqil ravishda taʼsischilari bilan belgilangan tartibda kelishilgan holda oʻrnatiladi.

6. Oʻzbekiston Respublikasi Moliya vazirligi “Oʻzneftmahsulot” AJ, “Oʻzbekenergo” AJ va “Oʻztransgaz” AJ bilan birgalikda joriy etilayotgan yangi narx va tarif preyskurantlarini tasdiqlasin hamda barcha manfaatdor vazirliklar, idora va tashkilotlarga yetkazsin.

7. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Moliya vazirligi bilan birgalikda 2018-yil 16-noyabrdan boshlab issiqlik energiyasi tariflarini aholi uchun koʻpi bilan 10 foizgacha oshirish va boshqa isteʼmolchilar uchun tannarxdan kelib chiqqan holda oʻrnatsin.

8. “Oʻzneftmahsulot” AJ va uning hududiy korxonalari, shuningdek, avtomobillarga yoqilgʻi quyish shoxobchalarida benzin sotuvchi va avtomobillarga gaz toʻldirish kompressor stansiyalarida tabiiy gaz sotuvchi xoʻjalik yurituvchi subyektlar, “Oʻztransgaz” AJ va uning hududiy filiallari “Oʻzdavneftgazinspeksiya” DI va Oʻzbekiston Respublikasi davlat soliq qoʻmitasi bilan birgalikda 2018-yil 16-noyabrdagi holati boʻyicha avtomobillarga yoqilgʻi quyish shoxobchalarida benzinning hamda gaz toʻldirish shoxobcha va punktlarida suyultirilgan gazning qoldigʻini qayta hisoblasinlar.

Belgilansinki, qoʻshimcha baholash summasi toʻliqligicha Oʻzbekiston Respublikasi Davlat budjeti daromadiga kiritiladi.

9. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirishlar kiritilsin.

10. Oʻzbekiston Respublikasi Hukumatining 4-ilovaga muvofiq baʼzi qarorlari oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Moliya vaziri J.A. Qoʻchqorov va Oʻzbekiston Respublikasi Bosh vazirining oʻrinbosari A.S. Sultanov zimmasiga yuklansin.

1. Vazirlar Mahkamasining “2002 — 2004-yillarda uy-joy fondini gazni hisobga olish priborlari bilan jihozlashga doir qoʻshimcha chora-tadbirlar toʻgʻrisida” 2002-yil 28-martdagi 99-son qaroriga 5-ilovada:

a) “Gaz priborlarining turi va gazni sarflash maqsadi” ustuni 4-pozitsiyasining birinchi xatboshi quyidagi tahrirda bayon etilsin:

“besh oylik isitish mavsumi mobaynida har oyda gaz bilan isitish priborining turidan qatʼi nazar uylar, kvartiralarni yakka tartibda isitishda, shuningdek, markaziy isitishdan uzilgan koʻp qavatli uylardagi kvartiralar gazdan foydalanganda”;

b) izoh 1-bandining ikkinchi xatboshidagi “bir yarim baravar miqdorda” soʻzlari “1,2 baravar miqdorda” soʻzlari bilan almashtirilsin.

2. Vazirlar Mahkamasining “Yoqilgʻi-energetika resurslari bilan oʻz vaqtida taʼminlash boʻyicha qoʻshimcha chora-tadbirlar toʻgʻrisida” 2017-yil 14-noyabrdagi 913-son qarori 1-bandning “a” kichik bandi va 2-bandining ikkinchi xatboshi chiqarib tashlansin.

3. Vazirlar Mahkamasining “Qishloq xoʻjaligida bozor mexanizmlarini keng joriy etish chora-tadbirlari toʻgʻrisida” 2018-yil 28-fevraldagi 149-son qarori 4-bandining ikkinchi va uchinchi xatboshilari chiqarib tashlansin.

1. Vazirlar Mahkamasining “Tabiiy gaz va elektr energiyasi yetkazib berish va realizatsiya qilish tizimini yanada takomillashtirish chora-tadbirlari toʻgʻrisida” 2017-yil 28-dekabrdagi 1025-son qarori.

2. Vazirlar Mahkamasining “Aholiga kundalik hayotda isteʼmol qilish uchun sotiladigan suyultirilgan gazning respublika boʻyicha yagona chakana narxini bosqichma-bosqich joriy etish toʻgʻrisida” 2017-yil 29-dekabrdagi 1033-son qarorining 1-bandi hamda qarorga 1 va 2-ilovalar.