Hujjat 24.05.2005 00 sanasi holatiga
Amaldagi versiyaga o‘tish

Oʻzbekiston Respublikasining qonuni

Davlat soliq xizmati toʻgʻrisida

1-modda. Ushbu Qonunning maqsadi

Ushbu Qonun davlat soliq xizmati organlari faoliyatining huquqiy asoslarini belgilab beradi.

Davlat soliq xizmati organlari soliqlar, yigʻimlar va boshqa toʻlovlarning (bundan buyon matnda — soliqlar deyiladi) toʻliq va oʻz vaqtida budjetga tushishini taʼminlash maqsadlarida tuziladi.

Keyingi tahrirga qarang.

2-modda. Soliq nazorati

Soliq nazorati soliqqa tortiladigan subyektlar va obyektlarni hisobga olishning, shuningdek soliq toʻgʻrisidagi qonun hujjatlariga rioya etilishini nazorat qilishning yagona tizimidan iborat.

Soliq nazorati davlat soliq xizmati organlari tomonidan soliqqa tortilishi lozim boʻlgan subyektlar va obyektlarni hisobga olish, soliqlarga doir tekshiruvlar oʻtkazish, soliq toʻlovchilar, boshqa shaxslarni soʻrab-surishtirish vositasida hamda qonun hujjatlarida nazarda tutilgan boshqa shakllarda amalga oshiriladi.

Keyingi tahrirga qarang.

3-modda. Davlat soliq xizmati organlari

Davlat soliq xizmati organlari quyidagilardir: Oʻzbekiston Respublikasi Davlat soliq qoʻmitasi, Qoraqalpogʻiston Respublikasi hamda Toshkent shahar davlat soliq bosh boshqarmalari, viloyatlar davlat soliq boshqarmalari, shuningdek tumanlar, shaharlar va shaharlardagi tumanlarning davlat soliq inspeksiyalari.

Oldingi tahrirga qarang.

Oʻzbekiston Respublikasi Davlat soliq qoʻmitasi tarkibida hududiy boʻlinmalarga ega boʻlgan: xoʻjalik yurituvchi subyektlarning moliya-xoʻjalik faoliyatini nazorat hamda hujjat asosidagi tekshiruv va taftishni amalga oshiruvchi maxsus nazorat-taftish boʻlinmasi, shuningdek davlat soliq xizmati organlarida rejim va xodimlar bilan ishlash maxsus boʻlinmasi tuziladi.

(3-moddaning ikkinchi qismi Oʻzbekiston Respublikasining 2001-yil 30-avgustdagi 271-II-son Qonuni tahririda — Oliy Majlis Axborotnomasi, 2001-y., 9-10-son, 182-modda)

Davlat soliq xizmati organlari oʻz faoliyatlarida Oʻzbekiston Respublikasi Konstitutsiyasiga, ushbu Qonunga, boshqa qonun hujjatlariga, shuningdek Oʻzbekiston Respublikasining xalqaro shartnomalariga amal qiladilar.

Davlat soliq xizmati organlari oʻz faoliyatlarini davlat hokimiyati va boshqaruvi mahalliy organlaridan mustaqil tarzda qonun hujjatlariga muvofiq amalga oshiradilar.

Davlat soliq xizmati organlarining oʻz vakolatlari doirasida qabul qiladigan qarorlari barcha yuridik va jismoniy shaxslar uchun majburiydir.

Davlat soliq xizmati organlari yuridik shaxslar hisoblanadi, respublika budjeti mablagʻlari hisobidan taʼminlanadi, Oʻzbekiston Respublikasi Davlat gerbining tasviri tushirilgan va oʻz nomi bitilgan muhrga ega boʻladi.

Oʻzbekiston Respublikasi Davlat soliq qoʻmitasining tuzilishi va faoliyatini tashkil etish Oʻzbekiston Respublikasi Vazirlar Mahkamasi tomonidan tasdiqlanadigan Oʻzbekiston Respublikasi Davlat soliq qoʻmitasi toʻgʻrisidagi nizom bilan belgilanadi.

Keyingi tahrirga qarang.

4-modda. Davlat soliq xizmati organlarining asosiy vazifalari

Keyingi tahrirga qarang.

Davlat soliq xizmati organlarining asosiy vazifalari quyidagilardan iborat:

Oldingi tahrirga qarang.

soliqlar toʻgʻrisidagi qonun hujjatlariga rioya etilishi, soliqlar shuningdek Oʻzbekiston Respublikasi Moliya vazirligi huzuridagi Budjetdan tashqari Pensiya va Respublika yoʻl jamgʻarmalariga majburiy toʻlovlar toʻgʻri hisoblab chiqarilishi, toʻliq va oʻz vaqtida toʻlanishini nazorat qilish;

Keyingi tahrirga qarang.

(4-moddaning ikkinchi xatboshisi Oʻzbekiston Respublikasining 2005-yil 23-maydagi OʻRQ—2-sonli Qonuni tahririda — OʻR QHT, 2005-y., 21-son, 148-modda)

soliq toʻgʻrisidagi qonun hujjatlariga rioya etilishi uchun zarur shart-sharoitlarni taʼminlash, soliq toʻlovchilarga soliqlar boʻyicha majburiyatlarni bajarishlarida yordam koʻrsatish;

soliq siyosatining roʻyobga chiqarilishida bevosita qatnashish;

soliqqa tortiladigan obyektlar va subyektlarning toʻliq hamda oʻz vaqtida hisobga olinishini taʼminlash;

soliqlar boʻyicha huquqbuzarliklar sodir etilishining oldini olish, ularni aniqlash va bartaraf etish.

Keyingi tahrirga qarang.

5-modda. Davlat soliq xizmati organlarining huquqlari

Davlat soliq xizmati organlari oʻz vakolatlari doirasida quyidagi huquqlarga ega:

Oldingi tahrirga qarang.

1) soliq toʻlovchilarning (shu jumladan, soliq toʻlovchi bilan bogʻliq boʻlgan subyektlarning) moliyaviy hujjatlari, shartnomalari (kontraktlari), rejalari, smetalari, daromadlar haqidagi deklaratsiyalari soliqlarni va Oʻzbekiston Respublikasi Moliya vazirligi huzuridagi Budjetdan tashqari Pensiya va Respublika yoʻl jamgʻarmalariga majburiy toʻlovlarni hisoblab chiqarish hamda toʻlash bilan bogʻliq boshqa hujjatlarini, shuningdek eksport-import operatsiyalari bilan bogʻliq hujjatlarini tekshirish, tekshiruv vaqtida yuzaga keladigan masalalar boʻyicha zarur tushuntirishlar, maʼlumotnomalar va axborotlar olish;

Keyingi tahrirga qarang.

(5-moddaning birinchi qismi 1-bandi Oʻzbekiston Respublikasining 2005-yil 23-maydagi OʻRQ-2-sonli Qonuni tahririda — OʻR QHT, 2005-y., 21-son, 148-modda)

2) yuridik va jismoniy shaxslardan soliq toʻlovchilarning faoliyatiga taalluqli axborotlar, maʼlumotnomalar, hujjatlar va ularning nusxalarini olish;

Keyingi tahrirga qarang.

3) belgilangan tartibda:

soliq toʻgʻrisidagi qonun hujjatlarining buzilishiga yoʻl qoʻyayotgan yuridik va jismoniy shaxslardan daromadni (foydani) va soliqqa tortiladigan boshqa obyektlar yashirilganligidan dalolat beruvchi hujjatlarni, shuningdek huquqbuzarlik predmetlarini olib qoʻyish;

tadbirkorlik faoliyati bilan shugʻullanish tartibini buzayotgan jismoniy shaxslardan litsenziyalarini, patentlari yoki roʻyxatdan oʻtganlik toʻgʻrisidagi guvohnomalarini olib qoʻyib, soʻngra qonun buzilganligiga doir materiallarni mazkur faoliyat bilan shugʻullanishga ruxsat bergan organlarga topshirish;

Keyingi tahrirga qarang.

4) kassalarni va tovar-moddiy boyliklar hamda hujjatlar saqlanadigan joylarni muhrlab qoʻyish, tovarlar, buyumlar, xom ashyo, materiallar va yarim tayyor mahsulotlarning namunalarini, shuningdek hujjatlarni olib qoʻyish va ularni tekshirishga, tadqiq qilishga va ekspertizaga yuborish;

Oldingi tahrirga qarang.

5) savdo, tovarlarni berish va xizmatlar koʻrsatish qoidalariga, shuningdek naqd pul tushumining bankka vaqtida topshirilishiga rioya etilishini tekshirish;

(5-moddaning birinchi qismi beshinchi bandi Oʻzbekiston Respublikasining 2002-yil 13-dekabrdagi 447-II-son Qonuni tahririda — Oliy Majlis Axborotnomasi, 2003-y., 1-son, 8-modda)

6) yuridik va jismoniy shaxslarning qayerda joylashganligidan qatʼi nazar, daromad (foyda) olish uchun foydalaniladigan yoxud soliqqa tortish obyektlarini saqlab turish bilan bogʻliq boʻlgan ishlab chiqarish binolari, omborxonalar, savdo va boshqa binolarni hamda joylarni (shu jumladan alohida rejimdagi korxonalarni) tekshirish, bajarilgan ishlarni, koʻrsatilgan xizmatlarni tekshiruv tariqasida oʻlchash va tovar-moddiy boyliklarni roʻyxat qilish. Soliq xizmati organlarining soliqlar boʻyicha tekshirish oʻtkazayotgan mansabdor shaxslari mazkur binolar yoki joylarga kiritilmagan taqdirda davlat soliq xizmati organlari oʻzlarida mavjud boʻlgan axborotlar (shu jumladan, soliq toʻlovchining xarajatlari haqidagi axborotlar) asosida yoki boshqa shunga oʻxshagan soliq toʻlovchilarga solinadigan soliqlarni nazarda tutgan holda soliqlar summasini mustaqil ravishda belgilashga haqlidirlar;

7) yuridik va jismoniy shaxslardan qonun hujjatlarining buzilganligi aniqlangan hollarni bartaraf etishni talab qilish;

Oldingi tahrirga qarang.

8) yuridik hamda jismoniy shaxslar hujjatlar asosida (hisob-kitobli) tekshiruv oʻtkazilishini yoki davlat soliq xizmati organlarining mansabdor shaxslari daromad (foyda) olish uchun foydalaniladigan yoki soliqqa tortish obyektini saqlab turish bilan bogʻliq binolar va joylarga kirishini rad etsa, soliqlar va Oʻzbekiston Respublikasi Moliya vazirligi huzuridagi Budjetdan tashqari Pensiya va Respublika yoʻl jamgʻarmalariga majburiy toʻlovlarni hisoblab chiqarish va toʻlash bilan bogʻliq moliyaviy hisobotlar, hisob-kitoblar, deklaratsiyalar va boshqa hujjatlarni soliq xizmati organlariga va ularning mansabdor shaxslariga taqdim etmasa (yoki taqdim etishni rad qilsa), bunday yuridik shaxslarning, shuningdek qonun hujjatlariga muvofiq jismoniy shaxslarning banklardagi va boshqa moliya-kredit muassasalaridagi hisob-kitob va boshqa hisobvaraqlari boʻyicha operatsiyalarini toʻxtatib qoʻyish;

Keyingi tahrirga qarang.

(5-moddaning birinchi qismi 8-bandi Oʻzbekiston Respublikasining 2005-yil 23-maydagi OʻRQ-2-sonli Qonuni tahririda — OʻR QHT, 2005-y., 21-son, 148-modda)

9) qonun hujjatlarida belgilangan tartibda:

soliqlarga oid qonunbuzarliklar haqidagi ishlarni koʻrib chiqish va yuridik hamda jismoniy shaxslarga nisbatan moliyaviy jazo choralari qoʻllash;

Keyingi tahrirga qarang.

maʼmuriy huquqbuzarliklar toʻgʻrisidagi ishlarni koʻrib chiqish va maʼmuriy jazo choralarini qoʻllash;

Qoʻshimcha maʼlumot uchun qarang: Oʻzbekiston Respublikasi Maʼmuriy javobgarlik toʻgʻrisidagi kodeksining 264-moddasi.

10) soliqlar borasida qonunbuzarlik faktlari boʻyicha tovar-moddiy boyliklarni qonun hujjatlarida belgilangan hollarda va tartibda musodara qilish;

Keyingi tahrirga qarang.

11) soliqlar boʻyicha boqimandalarni, shuningdek jarima summalarini qonun hujjatlariga muvofiq soʻzsiz undirib olish;

12) yuridik va jismoniy shaxslarning gʻayriqonuniy ravishda olgan mablagʻlarini davlat daromadiga undirish haqida ularga nisbatan sudda daʼvo qoʻzgʻatish;

13) tadbirkorlik faoliyatini amalga oshirayotgan yuridik va jismoniy shaxslarning moliya-xoʻjalik faoliyatini tekshirish va taftish qilishni belgilangan tartibda muvofiqlashtirish, nazorat qiluvchi organlar xoʻjalik yurituvchi subyektlarning moliya-xoʻjalik faoliyatini tekshirish va taftish qilish yuzasidan amalga oshirayotgan ishlarni toʻxtatish haqida takliflar kiritish;

Oldingi tahrirga qarang.

(5-moddaning birinchi qismi 14-bandi Oʻzbekiston Respublikasining 2001-yil 30-avgustdagi 271-II-son Qonuniga asosan chiqarilgan — Oliy Majlis Axborotnomasi, 2001-y., 9-10-son, 182-modda)

Oldingi tahrirga qarang.

(5-moddaning birinchi qismi 15-bandi Oʻzbekiston Respublikasining 2001-yil 30-avgustdagi 271-II-son Qonuniga asosan chiqarilgan — Oliy Majlis Axborotnomasi, 2001-y., 9-10-son, 182-modda)

Keyingi tahrirga qarang.

Davlat soliq xizmati organlari ushbu Qonunda va boshqa qonun hujjatlarida nazarda tutilgan oʻzga huquqlarga ham egadirlar.

Keyingi tahrirga qarang.

Oldingi tahrirga qarang.

Davlat soliq xizmati organlarining ushbu modda birinchi qismining 1—7-bandlarida nazarda tutilgan huquqlari davlat soliq xizmati organlarining barcha mansabdor shaxslariga, 8—13-bandlarida nazarda tutilgan huquqlar esa, davlat soliq xizmati organlarining faqat boshliqlariga va ularning oʻrinbosarlariga beriladi.

(5-moddaning uchinchi qismi Oʻzbekiston Respublikasining 2001-yil 30-avgustdagi 271-II-son Qonuni tahririda — Oliy Majlis Axborotnomasi, 2001-y., 9-10-son, 182-modda)

Keyingi tahrirga qarang.

Davlat soliq xizmati organlari davlat statistika, axborot, arxiv, maʼlumot va boshqa tashkilotlarining soliq toʻlovchilar haqidagi maʼlumotlarni berish yuzasidan koʻrsatadigan xizmatlari (bajaradigan ishlari) uchun haq toʻlashdan ozod qilinadi.

6-modda. Davlat soliq xizmati organlarining majburiyatlari

Davlat soliq xizmati organlari:

Oldingi tahrirga qarang.

1) soliq haqidagi qonun hujjatlariga rioya etilishi, soliqlarning shuningdek Oʻzbekiston Respublikasi Moliya vazirligi huzuridagi Budjetdan tashqari Pensiya va Respublika yoʻl jamgʻarmalariga majburiy toʻlovlarning toʻgʻri hisoblab chiqilishi, toʻliq va oʻz vaqtida toʻlanishi ustidan davlat nazoratini amalga oshirishlari, ushbu Qonun va boshqa qonun hujjatlarining talablariga rioya etishlari;

Keyingi tahrirga qarang.

(6-moddaning birinchi qismi 1-bandi Oʻzbekiston Respublikasining 2005-yil 23-maydagi OʻRQ-2-sonli Qonuni tahririda — OʻR QHT, 2005-y., 21-son, 148-modda)

2) yuridik va jismoniy shaxslarning huquqlari hamda qonun bilan qoʻriqlanadigan manfaatlarini himoya qilishlari;

3) soliqqa tortiladigan subyektlar va obyektlar, hisoblab chiqarilgan va toʻlangan soliqlarning toʻliq va oʻz vaqtida hisobga olinishini, shuningdek jismoniy shaxslarning tadbirkorlik faoliyati bilan shugʻullanish tartibiga rioya etishlari ustidan nazoratni taʼminlashlari;

4) soliq haqidagi qonun hujjatlarini qoʻllash boʻyicha yoʻriqnoma materiallar, uslubiy koʻrsatmalar va qoʻllanmalar ishlab chiqish va nashr etishlari;

5) soliqlar boʻyicha tekshiruvlar oʻtkazilayotgan vaqtda soliq toʻlovchilarga ularning huquqlari va vazifalarini tushuntirishlari;

6) soliq toʻlovchilarga oʻtkazilgan tekshiruvlar natijalarini maʼlum qilishlari;

7) soliq toʻlovchilarga soliq haqidagi qonunlar va normativ hujjatlarni oʻz vaqtida yetkazishlari;

8) soliq haqidagi qonun hujjatlarini buzish faktlarini toʻplash, tahlil etish va baholashlari hamda soliqlar boʻyicha huquqbuzarliklarga yoʻl ochib berayotgan sabablar va sharoitlarni bartaraf etish toʻgʻrisida tegishli organlarga takliflar kiritishlari;

9) huquqni muhofaza qiluvchi organlar bilan birgalikda soliqlar boʻyicha huquqbuzarliklarga qarshi kurashning uzoq muddatli va joriy dasturlarini ishlab chiqish va amalga oshirishlari;

10) soliqlarga oid qonun hujjatlari buzilganligi toʻgʻrisidagi arizalar, xabarlar va boshqa axborotlarni tekshirishlari;

11) yuridik va jismoniy shaxslarga ular soliq toʻlovchi sifatida roʻyxatga olinganliklari toʻgʻrisidagi hujjatlarni, roʻyxatdan oʻtkazish (identifikatsiyalash) tartib raqamlarini qonun hujjatlarida belgilangan tartibda berishlari;

Oldingi tahrirga qarang.

12) davlatga yoki fuqarolarning oʻzini oʻzi boshqarish organlariga meros huquqi boʻyicha oʻtgan xazinalarning va mol-mulkning hisobini yuritishlari, ularni baholashlari va ularning oʻtkazilishini nazorat etishlari;

(6-moddaning birinchi qismi 12-bandi Oʻzbekiston Respublikasining 2003-yil 25-apreldagi 482-II-son Qonuni tahririda — Oliy Majlis Axborotnomasi, 2003-y., 5-son, 67-modda)

Oldingi tahrirga qarang.

12¹) davlat daromadiga oʻtkazilgan mol-mulkning realizatsiya qilinishidan olingan pul mablagʻlarining davlat daromadiga toʻliq va oʻz vaqtida tushishi ustidan nazorat olib borishlari, shuningdek davlat organlariga begʻaraz oʻtkazilgan mol-mulk hisobini olib borishlari;

(6-moddaning birinchi qismi Oʻzbekiston Respublikasining 2003-yil 25-apreldagi 482-II-son Qonuniga asosan 12¹ band bilan toʻldirilgan — Oliy Majlis Axborotnomasi, 2003-y., 5-son, 67-modda)

13) masalani hal etish davlat soliq xizmati organlarining vakolat doirasidan chiqqan hollarda qonun hujjatlarini buzish faktlariga oid materiallarni prokuratura, ichki ishlar, milliy xavfsizlik xizmati organlariga va sudga oshirishlari;

14) yuridik va jismoniy shaxslar valyuta hamda eksport-import operatsiyalarini amalga oshirishning belgilangan tartibiga rioya etishlarini oʻz vakolatlari doirasida nazorat qilishlari;

15) qonun hujjatlariga muvofiq soliq toʻlovchilarga taalluqli maʼlumotlarning maxfiyligiga rioya etishlari;

16) oʻzlariga boʻysunadigan boʻlinmalar faoliyatini nazorat qilishlari shart.

Davlat soliq xizmati organlari qonun hujjatlarida nazarda tutilgan boshqa majburiyatlarni ham bajaradilar.

Keyingi tahrirga qarang.

7-modda. Davlat soliq xizmati organlarining boshqa organlar va tashkilotlar bilan oʻzaro hamkorligi

Davlat soliq xizmati organlari oʻz zimmalariga yuklatilgan vazifalarni davlatning boshqa boshqaruv organlari, davlat hokimiyati mahalliy organlari, fuqarolarning oʻzini oʻzi boshqarish organlari, huquqni muhofaza qiluvchi, statistika va moliya organlari, banklar va boshqa tashkilotlar bilan oʻzaro hamkorlikda bajaradilar. Mazkur organlar va tashkilotlar soliq haqidagi qonun hujjatlariga rioya etilishi ustidan davlat nazoratini amalga oshirish va soliqlar boʻyicha huquqbuzarliklarga qarshi kurashda davlat soliq xizmati organlariga koʻmaklashishlari shart.

Keyingi tahrirga qarang.

Davlat soliq xizmati organlari, huquqni muhofaza qiluvchi organlar, moliya organlari, banklar va boshqa moliya-kredit tashkilotlari oʻzaro kelishib belgilangan tartibda soliqlar boʻyicha huquqbuzarliklarga oid mavjud materiallar va huquqbuzarliklarning oldini olish yuzasidan koʻrilgan chora-tadbirlar, oʻtkazilayotgan tekshiruvlar toʻgʻrisida bir-birlarini xabardor qiladilar, shuningdek zimmalariga yuklatilgan vazifalarni bajarish maqsadida boshqa axborotlarni almashib turadilar.

Keyingi tahrirga qarang.

Oʻzbekiston Respublikasi Davlat soliq qoʻmitasi oʻz vakolatlari doirasida soliqqa tortish subyektlari va obyektlari, soliq bazasini belgilash, soliq imtiyozlarini qoʻllash, soliq haqidagi qonun hujjatlarining ayrim qoidalarini tushuntirish bilan bogʻliq masalalar yuzasidan qabul qiladigan umumiy majburiy tusdagi normativ hujjatlar Oʻzbekiston Respublikasi Moliya vazirligi bilan kelishilgan holda Oʻzbekiston Respublikasi Adliya vazirligida roʻyxatdan oʻtkazilishi lozim.

Keyingi tahrirga qarang.

Soliq toʻlovchilarning hisobga olinishini va soliq haqidagi qonun hujjatlariga rioya etilishi ustidan nazoratni taʼminlash maqsadida banklar va boshqa moliya-kredit tashkilotlari:

Keyingi tahrirga qarang.

1) xoʻjalik yurituvchi subyektlar davlat soliq xizmati organlarida roʻyxatga olinganliklarini tasdiqlovchi hujjat taqdim etgan taqdirdagina ular uchun hisob-kitob va boshqa hisobvaraqlari ochishlari mumkin va bu hisobvaraqlar ochilganligi haqida ular ochilgan kunning ertasidan kechiktirmay mazkur organga xabar beradilar;

2) xoʻjalik yurituvchi subyektlar budjet oldidagi oʻz majburiyatlarini bajarganliklari toʻgʻrisida davlat soliq xizmati organlarining xulosasi taqdim etilgan taqdirdagina xoʻjalik yurituvchi subyektlarning hisob-kitob va boshqa hisobvaraqlarini yopishlari mumkin;

Keyingi tahrirga qarang.

Oldingi tahrirga qarang.

3) davlat soliq xizmati organlarining soliq toʻlovchi mijozlardan belgilangan muddatda toʻlanmagan soliqlar va jarimalarni soʻzsiz undirish toʻgʻrisidagi farmoyishlarini (inkasso topshiriqlarini) mehnatga doir huquqiy munosabatlardan kelib chiqadigan, alimentlar undirish haqidagi, mualliflik shartnomalari boʻyicha haq toʻlashga doir, shuningdek hayot va sogʻliqqa yetkazilgan zararning oʻrnini qoplash haqidagi talablarni qondirish uchun hisobvaraqdan pul mablagʻlari oʻtkazilishi yoki berilishini nazarda tutadigan ijro hujjatlari boʻyicha mutanosib ravishda bajaradilar;

(7-moddaning toʻrtinchi qismi uchinchi bandi Oʻzbekiston Respublikasining 1998-yil 1-maydagi 621-I-son Qonuni tahririda — Oliy Majlis Axborotnomasi, 1998-y., 5-6-son, 102-modda)

4) soliq toʻlovchi mijozning mablagʻlari boʻlsa, uning hisob-kitob yoki boshqa hisobvaragʻidan mablagʻlarni hisobdan chiqarish operatsiyasi amalga oshirilgan kuni soliqlar va jarima summalarini budjet daromadiga oʻtkazadilar;

Oldingi tahrirga qarang.

(7-moddaning toʻrtinchi qismi beshinchi bandi Oʻzbekiston Respublikasining 2002-yil 13-dekabrdagi 447–II-son Qonuniga asosan chiqarilgan — Oliy Majlis Axborotnomasi, 2003-y., 1-son, 8-modda)

6) davlat soliq xizmati organlarining yozma talabi boʻyicha soliq toʻlovchi mijozlarning hisob-kitob yoki boshqa hisobvaraqlaridan pul mablagʻlari berish, oʻtkazish yoki ularni hisobdan chiqarishga doir barcha operatsiyalarni toʻxtatib qoʻyadilar;

Keyingi tahrirga qarang.

7) davlat soliq xizmati organlarining mansabdor shaxslariga:

yuridik shaxslarning hisob-kitob yoki boshqa hisobvaraqlari;

jismoniy shaxslarning depozit va boshqa hisobvaraqlari boʻyicha amalga oshirilgan operatsiyalarni tekshirish uchun qonun hujjatlarida belgilangan tartibda yoʻl qoʻyadilar;

Keyingi tahrirga qarang.

8) davlat soliq xizmati organlarining soʻrovnomasiga koʻra ularga soʻralayotgan davr mobaynida soliq toʻlovchi mijozlarning hisob-kitob yoki boshqa hisobvaraqlaridan amalga oshirilgan operatsiyalar va ana shu hisobvaraqlarda pul mablagʻlarining bor-yoʻqligi toʻgʻrisidagi maʼlumotlarni taqdim etadilar;

LexUZ sharhi

Qarang: Oʻzbekiston Respublikasi “Bank siri toʻgʻrisida”gi Qonunining 11-moddasi.

9) davlat soliq xizmati organlarining soʻrovnomasiga koʻra eksport-import kontraktlarining ijrosiga doir maʼlumotlarni va qonun hujjatlarida belgilangan boshqa axborotni taqdim etadilar.

Keyingi tahrirga qarang.

Oldingi tahrirga qarang.

10) olti oy mobaynida (savdo va savdo-vositachilik korxonalari esa — uch oy mobaynida) bank hisobvaraqlari boʻyicha pul operatsiyalari oʻtkazish bilan bogʻliq moliya-xoʻjalik faoliyatini amalga oshirmaganligi munosabati bilan korxonalarning hisobvaraqlari yopilgan sanadan eʼtiboran ularning faoliyatni davom ettirishi maqsadga muvofiqligi toʻgʻrisidagi masalalarni belgilangan tartibda ishlab chiqish uchun axborotni ularni hisobga olgan joydagi davlat soliq xizmati organiga uch ish kuni mobaynida taqdim etadilar.

(7-moddaning toʻrtinchi qismi Oʻzbekiston Respublikasining 1999-yil 20-avgustdagi 832-I-son Qonuniga asosan oʻninchi band bilan toʻldirilgan — Oliy Majlis Axborotnomasi, 1999-y., 9-son, 229-modda)

Keyingi tahrirga qarang.

Banklar va boshqa moliya-kredit tashkilotlarining soliq toʻlovchi mijozlarning soliqlar, shuningdek jarima summalarini oʻtkazish haqidagi topshiriqlarini bajarishni kechiktirishi taqiqlanadi.

Bank va boshqa moliya-kredit tashkilotining aybi bilan soliq toʻlovchi mijozning yoki davlat soliq xizmati organining soliqlarni oʻtkazish haqidagi topshirigʻi bajarilmagan (bajarish kechiktirilgan) taqdirda bank va boshqa moliya-kredit tashkilotidan har bir kechiktirilgan kun uchun oʻtkazilmagan soliqlar summasining 0,5 foizi miqdorida belgilangan tartibda penya undiriladi.

Keyingi tahrirga qarang.

8-modda. Davlat soliq xizmati organlarining mansabdor shaxslari

Davlat soliq xizmati organlarining mansabdor shaxslari xizmat vazifalarini bajarish chogʻida davlat hokimiyati vakili hisoblanadilar. Davlat soliq xizmati organlari mansabdor shaxslarining soliq haqidagi qonun hujjatlariga rioya qilish xususidagi talablari barcha yuridik va jismoniy shaxslar tomonidan ijro etilishi shart.

Hech kim davlat soliq xizmati organlari mansabdor shaxslarining qonuniy faoliyatiga aralashishga haqli emas. Davlat soliq xizmati organlari mansabdor shaxslarining oʻz xizmat vazifalarini bajarishlariga toʻsqinlik qilinish, ularning oʻz xizmat vazifalarini bajarishlari munosabati bilan ularning shaʼni va qadr-qimmatini haqoratlash, ularga qarshilik koʻrsatish, tahdid qilish, zoʻravonlik qilish yoki ularning hayoti, sogʻligʻi va mol-mulkiga tajovuz qilish qonun hujjatlarida nazarda tutilgan javobgarlikka sabab boʻladi.

Keyingi tahrirga qarang.

9-modda. Uchastka soliq inspektori

Soliqqa tortish subyektlari va obyektlarining toʻliq hamda oʻz vaqtida hisobga olinishini taʼminlash maqsadida davlat soliq xizmati organlarida uchastka soliq inspektorlari lavozimi tashkil etiladi. Uchastkalarning chegaralari, shuningdek uchastka soliq inspektorlarining soni Oʻzbekiston Respublikasi Vazirlar Mahkamasi belgilaydigan normativlar boʻyicha belgilanadi.

Keyingi tahrirga qarang.

Oldingi tahrirga qarang.

Uchastka soliq inspektorlari oʻzlariga biriktirilgan uchastkada mol-mulk soligʻi va yer soligʻi toʻlovchi jismoniy shaxslarni, shuningdek tadbirkorlik faoliyati bilan shugʻullanayotgan jismoniy shaxslarni hisobga olish yuzasidan tegishli ishlarni bajaradilar hamda ular tegishli soliqlarni oʻz vaqtida toʻlashlarini nazorat qiladilar.

(9-moddaning ikkinchi qismi Oʻzbekiston Respublikasining 2004-yil 27-avgustdagi 671-II-sonli Qonuni tahririda — OʻR QHT, 2004-y., 37-son, 408-modda)

Oldingi tahrirga qarang.

10-modda. Davlat soliq xizmati organlarining mansabdor shaxslarini tayinlash

Oʻzbekiston Respublikasi Davlat soliq qoʻmitasining raisi Oʻzbekiston Respublikasi Bosh vazirining taqdimiga binoan Oʻzbekiston Respublikasi Prezidenti tomonidan tasdiqlanadi va lavozimidan Oʻzbekiston Respublikasi Prezidenti tomonidan ozod qilinadi.

Keyingi tahrirga qarang.

Oʻzbekiston Respublikasi Davlat soliq qoʻmitasi raisining oʻrinbosarlari, Qoraqalpogʻiston Respublikasi, viloyatlar va Toshkent shahar davlat soliq boshqarmalari boshliqlari Oʻzbekiston Respublikasi Prezidenti tomonidan tayinlanadi va lavozimidan ozod qilinadi.

Oʻzbekiston Respublikasi Davlat soliq qoʻmitasining mansabdor shaxslari, Qoraqalpogʻiston Respublikasi, viloyatlar va Toshkent shahar davlat soliq boshqarmalari boshliqlarining oʻrinbosarlari, Qoraqalpogʻiston Respublikasi, viloyatlar va Toshkent shahar davlat soliq boshqarmalari boʻlimlarining boshliqlari, davlat soliq inspeksiyalarining boshliqlari Oʻzbekiston Respublikasi Davlat soliq qoʻmitasi raisining buyrugʻi bilan tayinlanadi.

Keyingi tahrirga qarang.

Davlat soliq xizmati organlarining ushbu moddaning birinchi — uchinchi qismlarida sanab oʻtilmagan mansabdor shaxslari davlat soliq xizmati tegishli organining rahbari tomonidan tayinlanadi.

(10-modda Oʻzbekiston Respublikasining 2004-yil 3-dekabrdagi 714-II-sonli Qonuni tahririda — OʻR QHT, 2004-y., 51-son, 514-modda)

11-modda. Davlat soliq xizmati organlari mansabdor shaxslarining maxsus unvonlari

Davlat soliq xizmati organlarining mansabdor shaxslariga egallab turgan lavozimi va ish stajiga muvofiq quyidagi maxsus unvonlar beriladi:

soliq xizmatining bosh davlat maslahatchisi;

soliq xizmatining I darajali davlat maslahatchisi;

soliq xizmatining II darajali davlat maslahatchisi;

soliq xizmatining III darajali davlat maslahatchisi;

soliq xizmatining I darajali maslahatchisi;

soliq xizmatining II darajali maslahatchisi;

soliq xizmatining III darajali maslahatchisi;

soliq xizmatining I darajali inspektori;

soliq xizmatining II darajali inspektori;

soliq xizmatining III darajali inspektori;

soliq xizmatining inspektori.

Maxsus unvonlarni berish va ulardan mahrum qilish tartibi Oʻzbekiston Respublikasi Vazirlar Mahkamasi tomonidan belgilanadi.

LexUZ sharhi

Qarang: Vazirlar Mahkamasining 2019-yil 17-apreldagi 320-son qarori bilan tasdiqlangan “Oʻzbekiston Respublikasi davlat soliq xizmati organlarida xizmatni oʻtash toʻgʻrisida nizom”ning V bobi.

12-modda. Davlat soliq xizmati organlari mansabdor shaxslarining xatti-harakatlari va qarorlari ustidan shikoyat qilish

Davlat soliq xizmati organlari mansabdor shaxslarining xatti-harakatlari va qarorlari ustidan shikoyat qilish qonun hujjatlarida belgilangan tartibda amalga oshiriladi.

Keyingi tahrirga qarang.

Oldingi tahrirga qarang.

13-modda. Davlat soliq xizmati organlari mansabdor shaxslarining javobgarligi

Davlat soliq xizmatining mansabdor shaxslari quyidagilar uchun Oʻzbekiston Respublikasining qonun hujjatlarida nazarda tutilgan tartibda javobgar boʻladilar:

Keyingi tahrirga qarang.

oʻz vazifalarini bajarmaganligi yoxud zarur darajada bajarmaganligi, ijro intizomini buzganligi uchun;

ushbu Qonun va Oʻzbekiston Respublikasining boshqa qonun hujjatlari talablariga rioya qilmaganligi uchun;

Keyingi tahrirga qarang.

gʻayriqonuniy harakatlari (harakatsizligi) natijasida fuqarolarga, korxonalar, muassasalar va tashkilotlarga moddiy va maʼnaviy zarar yetkazganligi uchun;

oʻzining gʻayriqonuniy harakatlari (harakatsizligi) natijasida xoʻjalik yurituvchi subyektlarda ishlab chiqarish hajmlarini pasaytirib yuborganligi va soliq solish bazasini kamaytirib yuborganligi uchun;

Oʻzbekiston Respublikasining qonun hujjatlariga muvofiq boʻlmagan qarorlar qabul qilganligi uchun;

Keyingi tahrirga qarang.

boshqa huquqbuzarliklari uchun.

Soliq organlari mansabdor shaxslarining soliq tekshiruvini amalga oshirish chogʻidagi gʻayriqonuniy harakatlari bilan yetkazilgan zararlar qonunda belgilangan tartibda qoplanishi kerak.

LexUZ sharhi

Batafsil maʼlumot uchun qarang: Oʻzbekiston Respublikasi Fuqarolik kodeksining 14, 15 va 990-moddalari.

Davlat soliq organlari xodimlarining oʻz xizmat vakolatlari doirasidan chetga chiqqanligi, shuningdek zimmasiga yuklangan xizmat vazifalarini bajarmaganligi Oʻzbekiston Respublikasining qonun hujjatlarida belgilab qoʻyilgan tartibda intizomiy, maʼmuriy yoki jinoiy javobgarlikka sabab boʻladi.

(13-modda Oʻzbekiston Respublikasining 2000-yil 31-avgustdagi 125-II-son Qonuni tahririda — Oliy Majlis Axborotnomasi, 2000-y., 7-8-son, 217-modda)

Keyingi tahrirga qarang.

14-modda. Davlat soliq xizmati organlari mansabdor shaxslarini ijtimoiy himoyalash, ularning mulkiy va shaxsiy nomulkiy huquqlarini muhofaza qilish

Davlat soliq xizmati organlari mansabdor shaxslarining ijtimoiy himoyasi davlat tomonidan kafolatlanadi.

Davlat soliq xizmati organlarining mansabdor shaxslari respublika budjeti mablagʻlari hisobidan majburiy davlat sugʻurtalanishi lozim.

LexUZ sharhi

Qarang: Oʻzbekiston Respublikasi Vazirlar Mahkamasining 1994-yil 10-dekabrdagi 631-sonli “Oʻzbekiston Respublikasi soliq organlari xodimlarining majburiy davlat sugʻurtasi boʻyicha sugʻurta summalari va sugʻurta tariflari miqdori toʻgʻrisida”gi qarori.

Davlat soliq xizmati organlari mansabdor shaxslari oʻz xizmat faoliyatlarini bajarishlari bilan bogʻliq holda halok boʻlsa, ularga tan jarohati yetkazilsa, tegishli ravishda, halok boʻlgan shaxsning oilasiga yoki davlat soliq xizmati organlarining mansabdor shaxsiga qonun hujjatlarida belgilangan tartibda va miqdorda bir yoʻla beriladigan nafaqa toʻlanadi.

Keyingi tahrirga qarang.

Davlat soliq xizmati organlarining mansabdor shaxsi oʻz xizmat faoliyatini amalga oshirishi munosabati bilan uning mol-mulkiga yetkazilgan zarar respublika budjeti mablagʻlaridan qoplanadi va bu summa keyinchalik aybdor shaxslardan undirib olinadi.

15-modda. Davlat soliq xizmati organlari mansabdor shaxslarining moddiy taʼminoti

Keyingi tahrirga qarang.

Davlat soliq xizmati organlari mansabdor shaxslarining ish haqi — mansab maoshi, maxsus unvon, koʻp yil xizmat qilganligi uchun toʻlanadigan ustama haqlar hamda Oʻzbekiston Respublikasi Vazirlar Mahkamasi belgilaydigan tartibda toʻlanadigan boshqa qoʻshimcha haqlardan iborat boʻladi.

Maxsus unvon berilgan shaxslar belgilangan normalar boʻyicha bepul maxsus formali kiyim-bosh bilan taʼminlanadilar.

Keyingi tahrirga qarang.

Davlat soliq xizmati organlarida maxsus fond tashkil etilishi mumkin, uni hosil qilish tartibi qonun hujjatlarida belgilab qoʻyiladi.

Keyingi tahrirga qarang.

Keyingi tahrirga qarang.

Keyingi tahrirga qarang.

16-modda. Xalqaro hamkorlik

Oʻzbekiston Respublikasi Davlat soliq qoʻmitasi Oʻzbekiston Respublikasining qonun hujjatlariga va xalqaro shartnomalariga muvofiq tajriba almashish, soliq haqidagi qonun hujjatlariga rioya etilishini nazorat qilish usullarini oʻrganish va joriy etish, kadrlarni oʻqitish maqsadida hamda boshqa masalalar boʻyicha xorijiy davlatlarning soliq va boshqa organlari bilan aloqalar oʻrnatishi mumkin.

Keyingi tahrirga qarang.

Oʻzbekiston Respublikasining Prezidenti I. KARIMOV

1997-yil 29-avgust,

(Oʻzbekiston Respublikasi Oliy Majlisining Axborotnomasi, 1997-y., 9-son, 232-modda; 1998-y., 5-6-son, 102-modda; 1999-y., 9-son, 229-modda; 2000-y., 7-8-son, 217-modda; 2001-y., 5-son, 89-modda; 9-10-son, 182-modda; 2003-y., 1-son, 8-modda; 5-son, 67-modda; Oʻzbekiston Respublikasi qonun hujjatlari toʻplami, 2004-y., 37-son, 408-modda; 51-son, 514-modda; 2005-y., 21-son, 148-modda; 37-38-son, 280-modda; 51-son, 376-modda; 2006-y., 41-son, 405-modda; 2007-y., 52-son, 533-modda; 2008-y., 52-son, 513-modda; 2009-y., 52-son, 557-modda; 2010-y., 37-son, 314-modda; 2012-y., 15-son, 163-modda; 2014-y., 36-son, 452-modda; 2015-y., 52-son, 645-modda; 2017-y., 1-son, 1-modda, 24-son, 487-modda; Qonun hujjatlari maʼlumotlari milliy bazasi, 30.12.2017-y., 03/18/455/0492-son; 05.01.2018-y., 03/18/456/0512-son, 10.01.2018-y., 03/18/459/0536-son, 09.01.2019-y., 03/19/512/2435-son, 16.01.2019-y., 03/19/516/2484-son; 2019-y., 2-son, 47-modda, 21.03.2019-y., 03/19/531/2799-son, 24.05.2019-y., 03/19/542/3177-son; Qonunchilik maʼlumotlari milliy bazasi, 21.04.2021-y., 03/21/683/0375-son; 12.03.2022-y., 03/22/758/0207-son)