Respublika agrosanoat kompleksi uchun injener kadrlar tayyorlashni takomillashtirish, respublika xoʻjaliklarida ilgʻor mamlakatlar qishloq xoʻjaligi ishlab chiqarishining zamonaviy darajasiga javob beruvchi melioratsiya tadbirlarini, yangi texnologiyalar va texnika vositalarini tatbiq etishni, kadrlar tayyorlash va ilmiy tadqiqotlar sohasiga bozor munosabatlarini joriy etishni, shuningdek, fan va ishlab chiqarish integratsiyasini chuqurlashtirishni taʼminlash maqsadida Vazirlar Mahkamasi qaror qiladi:

1. Toshkent qishloq xoʻjaligini irrigatsiyalash va mexanizatsiyalash injenerlari instituti yagona yaxlit oʻquv-ilmiy-ishlab chiqarish kompleksi (UNPK TIIIMSX) sifatida bosh institut, uning Qarshi filiali va Oʻrta Chirchiq nohiyasining Toʻytepa shahridagi oʻquv-tajriba xoʻjaligi tarkibida saqlab qolinsin.

2. Toshkent qishloq xoʻjaligini irrigatsiyalash va mexanizatsiyalash injenerlari instituti oʻquv-ilmiy-ishlab chiqarish kompleksining oʻquv-tajriba xoʻjaligiga ishlab chiqarilgan paxta tolasining faqat 85 foizi hajmi uchun davlat buyurtmasi belgilansin.

3. Oʻzbekiston Respublikasi Moliya vazirligi, Melioratsiya va suv xoʻjaligi vazirligi Toshkent qishloq xoʻjaligini irrigatsiyalash va mexanizatsiyalash injenerlari instituti oʻquv-ilmiy-ishlab chiqarish kompleksi xarajatlarining hisobini har yili belgilayotganda ijtimoiy-iqtisodiy ehtiyojlarga va kompleksning moddiy-texnika bazasini mustahkamlashga sarf-xarajatlarning bir qismini oʻquv-tajriba xoʻjaligining ishlab chiqarish faoliyatidan olinadigan foyda hisobidan qoplashni nazarda tutsinlar.