Naqd pulning muomalada boʻlishini yanada mustahkamlash, shuningdek respublika mintaqalarida pulning muomalada boʻlishi ahvoli uchun rahbarlar va mansabdor shaxslarning masʼuliyatini oshirish maqsadida Vazirlar Mahkamasi qaror qiladi:

1. Qoraqalpogʻiston Respublikasi, Jizzax, Qashqadaryo, Navoiy, Surxondaryo va Sirdaryo viloyatlarida naqd pul emissiyasi darajasi boʻyicha vujudga kelgan ahvol normal emas deb hisoblansin.

Bu, eng avvalo, koʻrsatib oʻtilgan mintaqalar, isteʼmol tovarlari ishlab chiqarish, savdo va servis xizmatini tashkil etish bilan shugʻullanuvchi respublika idoralari va organlari rahbarlarining aholining zarur tovarlar va xizmatlarga boʻlgan ehtiyojini taʼminlashga nihoyatda masʼuliyatsizlik bilan munosabatda boʻlishi oqibati ekanligi qayd etilsin.

Qoraqalpogʻiston Respublikasi Vazirlar Kengashi Raisi, viloyatlar hokimlari Vazirlar Mahkamasining Isteʼmol tovarlari ishlab chiqarish va savdo kompleksi, Oʻzbekiston Respublikasi Markaziy banki va boshqa manfaatdor tuzilmalar bilan birgalikda bir oy muddatda ishlarning ahvolini toʻgʻrilash yuzasidan aniq asoslangan takliflar tayyorlasinlar va Vazirlar Mahkamasiga kiritsinlar.

Oʻzbekiston Respublikasi Hukumati ushbu takliflarni belgilangan tartibda koʻrib chiqsin va tasdiqlasin, bunda aholining isteʼmol tovarlari va xizmatlarga boʻlgan ehtiyojini qondirish muammosini tubdan hal etish nazarda tutilsin.

2. Qoraqalpogʻiston Respublikasi, viloyatlar, Toshkent shahri, shaharlar va tumanlar boʻyicha 2001-yilgi va I chorakdagi naqd pul mablagʻlari emissiyasi darajasi va kassa rejasi parametrlariga 1 va 2- ilovalarga* muvofiq rozilik berilsin.

Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlari naqd pul mablagʻlari emissiyasi darajasi va kassa rejalarining belgilangan parametrlari bajarilishi ustidan qattiq va taʼsirchan nazoratni taʼminlasinlar.

3. Belgilab qoʻyilsinki, Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlari isteʼmol bozorini zarur tovarlar bilan toʻldirish, naqd pul tushumi tushishini taʼminlash hamda aholiga ish haqi, pensiyalar, nafaqalar va boshqa toʻlovlarning oʻz vaqtida berilishi uchun shaxsan javob beradilar.

4. “Oʻzbeksavdo”, “Oʻzbekbirlashuv” aksiyadorlik kompaniyalari, “Oʻzavtotrans” korporatsiyasi, “Oʻzbekiston havo yoʻllari” milliy aviakompaniyasi, “Oʻzbekiston temir yoʻllari” davlat-aksiyadorlik kompaniyasi, “Toshshaharyoʻlovchitrans” uyushmasi, “Oʻzkommunxizmat” agentligi, Oʻzbekiston pochta va telekommunikatsiyalar agentligi, savdo shoxobchalariga ega boʻlgan va aholiga pulli xizmatlar koʻrsatuvchi boshqa vazirliklar va idoralar, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari mahalliy bozorlarni zarur turdagi xalq isteʼmol tovarlari bilan taʼminlash va pulli xizmatlar sohasini kengaytirish boʻyicha aniq chora-tadbirlar koʻrsinlar.

5. Oʻzbekiston Respublikasi Davlat soliq qoʻmitasi va Prokuraturasi xoʻjalik yurituvchi subyektlar tomonidan tovarlar sotishdan, ishlar va xizmatlarni amalga oshirishdan naqd pul tushumlarining banklar kassalariga oʻz vaqtida va toʻliq topshirilishini taʼminlash ustidan qattiq nazorat oʻrnatsinlar.

7. Pul-kredit siyosati boʻyicha Respublika komissiyasi ushbu qarorning bajarilishini har oyda koʻrib chiqsin va Vazirlar Mahkamasiga mansabdor shaxslarni naqd pul mablagʻlari emissiyasi darajasining belgilangan parametrlari va kassa rejasi bajarilganligi uchun ragʻbatlantirish va ularning ushbu koʻrsatkichlarning bajarilishi uchun javobgarligini oshirish boʻyicha takliflar kiritsin.

8. Oʻzbekiston Respublikasi Vazirlar Mahkamasining “Oʻzbekiston Respublikasi milliy valyutasining ichki erkin almashuvini taʼminlashga oid chora-tadbirlar toʻgʻrisida” 1994-yil 21-iyuldagi 379-son qarorining 11-bandi oʻz kuchini yoʻqotgan deb hisoblansin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov va Oʻzbekiston Respublikasi Markaziy banki raisi F.M. Mullajonov zimmasiga yuklansin.